Khuurakikha 34

Shekemu afwakhila Dina

1Shifukhu shitweela, Dina umukhaana isi Leya aasaalila Yakobo, waatsya khuukyeniyilakho batweela khu bakhasi be mu Kanaani. 2Ne Shekemu, umusooleli wa Hamori umu Hivi, uwaba umuwuli we shisiintsa isho, n'amubonakho waamwikoomba, wamuwaamba waamuyila, waakona ni naye, waamwoonakisa. 3Kumwoyo kwa Shekemu kwewotooma naabi Dina umukhaana wa Yakobo, aryo waakana naabi umukhaana yuno, waamukanikhatsakayo buulayi. 4Kila Shekemu atsya waakanikha isi paapawe Hamori, nga amuloma ari, “Ingana ukhweele umukhaana yuno khuuba umukhasi wase.”

5Lwanyuma Yakobo waashiwulila bari umukhaana weewe baamwoonakisile, ne lwekhuuba abe basooleli beewe baatsiile khukhwaayisa bibaayo, waakhalawo waasila busa khukhwoolesa boosi ni baakobolaka ingo. 6Biba biryo, Hamori, paapa wa Shekemu waatsya khuukanikha ni Yakobo bibiiwaamba khu lomo yino. 7Khu mbuka nyene iyo, basooleli baakobolaka khukhwaama mu maayilo. Nabo ni baashiwulilakho, isisi ingali naabi yabawaamba, beetsula lirima liikali, lwekhuuba Shekemu aaba nga waakholile shishiindu she mbikho shishifwaana shiri. Lwekhuuba aaba waakholile shishiindu she bubwooni khu babaandu ba Isiraeli, lwe khuukona n'umukhaana wa Yakobo, shishiindu abe shishikhaakhila khuukholikha ta.

8Ne Hamori waabakanikhayo, nga abaloma ari, “Umusooleli wase Shekemu waakana naabi umukhaana weenywe oyu, naabekoontseleele, ni mumulekhe amuyile. 9Ni mufukiilise abewo khuuyilana akari eefwe, inywe mukhuwe ifwe bakhaana beenywe, ni nanywe muyile bakhaana beefwe. 10Muryo kane mumenyatsake ano ni nafwe, mumenye oosi isi mukana. Kane mubaatsake muno, mukholelemo bye khuukulaana, mufune bye buyiindifu biikali.”

11Biba biryo, Shekemu naye aaba weetsile ni paapawe, kila akanikha isi paapa wa Dina ni babandaaye, nga aloma ari, “Naabekoontseleele, ni mumaambile shiisa, muukholele shishiindu shino, ni nase kane imbawe shoosi sheesi kane mukane. 12Ni mumboolele buukali bwe bibiindu bye khuukhwa, ni biiwaanwa byeesi mukana, nase kane imbisasule byoosi. Shonyene sheesi imbaloomba ndi, ni muumbe ise umukhaana yuno khuuba umukhasi wase.”

13Ne lwekhuuba ndi Shekemu aaba nga woonakisile umukooko waabwe Dina, basooleli ba Yakobo beelamwo isi Shekemu ni paapawe Hamori ni khukhwimunyakasa khuukali. 14Baabalomela bari, “Ifwe sikhunyala khwaakhola shishiindu shishifwaana shiri, khwaakaba umukooko weefwe isi umuundu ukhenjila imbalu ta. Isho shiba shishiindu she bubwooni naabi isi khuli. 15Khunyala khwaashifukiilisa nga mwaakholile shishiindu shitweela ndi, mufwaane nga ifwe ni khuli, buli musaani musiinywe enjile imbalu. 16Nio lwanyuma kane khufukiilisane, khuubawa inywe bakhaana beefwe, ni nafwe khuuyila bakhaana beenywe. Khuryo kane khumenyatsake akari musiinywe, khube babaandu batweela ni nanywe. 17Ne siinga mulekha khufukiilisana ni sheesi khwaama khubaboolela she khuutsya khwinjila imbalu ta, khutsya khusuta umukhaana weefwe, khwiileyo.”

18Byeesi baakanikha bino byekhoyesa naabi Hamori n'umusooleli weewe Shekemu. 19Kila Shekemu enyukhilamwo khaangu naabi khuutsya khukhola byeesi baaloma, lwekhuuba abe buulamu bweewe bwaasiima naabi umukhaana wa Yakobo. Shekemu niye aaba ufuurayo khuuweebwa lukoosi muungo mwaabwe.

20Baryo Hamori n'umusooleli weewe Shekemu baatsya mu lubuusano lwe shiriimba aambi ni shiilibwa, baakanikha isi babaandu be mu shiriimba. 21Baabalomela bari, “Babaandu bano bali basaale naabi. Nashiryo muli ni khuubalekha bamenye mu shibala sheefwe, bakholelemo bye khuukulaana. Liiswa lino lili liikali naabi linyala lyaakhumala ifwe ni nabo. Kane khuyilatsake bakhaana baabwe, ni nafwe khubafukiilile khuuyila bakhaana beefwe. 22Ne shonyene ndi, babaandu bano kane bafukiilile khuumenya ni nafwe, nio khunyalise khukhwikyela babaandu batweela, siinga buli musaani musiifwe enjila imbalu nga nibo nibali babenjile. 23Simwambaasa muri bibyaayo byaabwe, ni bye buyiindifu byaabwe bibiindi, kane bibe bibyeefwe ta? Ifwe lekha khubafukiilise busa khuri bamenye ni nafwe.” 24Baryo babaandu be mu shiriimba isho boosi baafukiilisana ni byeesi Hamori ni Shekemu baabalomela, buli musaani yeesi wenjila imbalu.

25Ne lwanyuma lwe bifukhu bitaru khuuwakho, nga basaani bano boosi bali mu butsiina bwe kamakoontsyo buukali, babili khu basooleli ba Yakobo, Simeyoni ni Levi, babandaaye ba Dina, baabukula tsiindima tsaabwe, baasoota baatsya mu shiriimba, nga mbaawo umuundu yeesi umanyile ta, baakhoonyaka basaani boosi. 26Baatsya baakhoonya Hamori naye atweela n'umusooleli weewe Shekemu. Lwanyuma baarusa Dina khukhwaama muntsu ya Shekemu, baatsya. 27Baryo nga Simeyoni ni Levi baamalile khuukhoonyaka basaani be mu shiriimba, basooleli ba Yakobo baatsya mu shiriimba, baanuula bibiindu byamwo byoosi, nga beliyaasa lwekhuuba baakhola khu mukooko waabwe bye bubwooni. 28Baawaambaka bibyaayo byaabwe, mumuuli kamasheese, tsimbusi ni tsikhaafu, ni tsisikilya, na buli shiindu shishiindi shoosi shishaba mu shiriimba, ni n'ebyo byoosi bibyaba mu maayilo. 29Baasutaka bye buyiindifu byoosi, bawaambaka ni bakhasi boosi atweela ni babaana beene, ni bibiindu byoosi bibyaba muntsu tsaabwe.

30Lwanyuma kila Yakobo alomela Simeyoni ni Levi ari, “Ari inywe mwandeerere ise buwangafu! Lwekhuuba ari babaandu ba Kanaani bano, ni ba Perizi, na buli muundu yeesi uuli mu shibala shino, batsya khumbiyila ise. Mwamanya muri ifwe khuli bakyeekhe bari, nashiryo siinga babaandu bano boosi bebuusa atweela bantsibwakala, ise ni be muungo mwase boosi khutsya khuhela khuwewo.”

31Nabo baamwiilamwo bari, “Abe anyala aryeena waakhola umukooko weefwe khuuba nga malaaya!”

Currently Selected:

Khuurakikha 34: LCE

Highlight

Copy