Khuurakikha 35

Yakobo elayo i Beseli

1 # Rak 28.11-17 Wele waalomela Yakobo ari, “Yinyukha khaangu utsye i Beseli, umenyatsake ibweene iyo. Uli ni khukhwoombekha shisheeso ibweene iyo she khukhuuntsisaayilakho, ise. Ise indi Wele woowo, uwakhubonekhela nga uli khuutitukha khukhwaama isi waandaayo Esawu.”

2Aryo kila Yakobo alomela babaandu be muungo mweewe boosi, ni babaandi babaaba ni naye ari, “Ni mwinyusewo bi wele bye kamanaambo byeesi muli nabyo, mwiipyeeluuse mwabeene, lwanyuma mukwaare bikwaaro bibiindi biimiliwu. 3Khuryo khwinyukhe khutsye ano i Beseli, isi ise intsya khukhwoombekhela shisheeso isi Wele, uwaantsilamwo khuuloomba khwase waanjeeta, mu mbuka isi nabeela mu mutaambo. Niye abeelatsakile ni nase buli aandu oosi isi imbeele nga intsya.” 4Baryo baasuta bi wele bye kamanaambo ibyo baabiwa Yakobo, baarusakakho ni bubuuma bwe khu maru kaabwe nabwo baabumuwaambisa. Kila Yakobo atsya waabusiikha aasi e kuusaala kumuruumba, kukwaba aambi ni Shekemu.

5Yakobo ni babaandu beewe ni baaba nga batsya, shiriiso she kamaani khukhwaama isi Wele shawaamba babaandu be mu biriimba ibyo byoosi bibyaba byaabebotokheleele, yaalekha khuubawo n'umuundu na mutweela uwabaloondakho ari abebwaakale ta. 6Lwanyuma Yakobo atweela ni babaandu boosi beesi aaba nabo, boola i Luzi (nga niyo i Beseli), shishaba shili mu shibala sha Kanaani. 7Ibweene iyo, woombakhayo shisheeso, waatwiikha shiifwo isho lisiina ari Eli Beseli#35.7 Eli Beseli: Shino shimanyisa shiri Wele we Beseli, lwekhuuba Wele aamubonekhela abweene awo, nga n'aba ali khuutitukha khukhwaama isi waandaaye Esawu.

8Khu mbuka iyo, Debora, uwaba umukaangi wa Rebeka waafwa, lwanyuma baamusiikha mwisina mwe kuusaala kumuruumba, kukwaba lwamwaalo wa Beseli. Khukhwaamila abweene awo balaanga shiifwo isho bari Aloni Bakusi#35.8 Aloni Bakusi: Shimanyisa Kusaala kwe kumutaambo.

9Indi luundi Wele waabonekhela Yakobo, nga n'akobola khukhwaama i Padani Aramu, waamuwa tsikhabi. 10#Rak 32.28Wele waamulomela ari, “Lisiina lyoowo abe lili Yakobo, ne khukhwaama shaleelo singene baakhulaange luundi bari Yakobo ta, ne ari lili Isiraeli.” Ni abweene awo, Wele waamutwiikha lisiina ari Isiraeli. 11#Rak 17.4-8Lwanyuma kila Wele amulomela ari, “Ise ndi Wele Umunyali wa byoosi. Ingana usaale babaana baakali, lisaaye lyoowo libalaahe. Linaambo likhulu, ni bikuuka bye kamanaambo bikhaame mwiiwe. Bayiinga bakhaabe batweela khu be mu lisaaye lyoowo. 12Ikhaakhuwe iwe liiswa lyeesi nakabila Iburayimu, ni Isaaka. Ilala ikhaalikhuwe iwe, atweela ni lisaaye lyoowo lilikhaakhwiililewo.” 13Lwanyuma lweebyo, Wele waamururayo weelayo mu ngaaki.

14 # Rak 28.18,19 Abweene awo isi Wele aakanikhila ni naye, Yakobo waarawo Libaale lye khuuba nga she khuushebulililakho. Lwanyuma waalikhosesa nga alitsukhakho shiwaanwa she viini, naluundi waalitsukhakho kamafura ke kuusaala ku olivu. 15Yakobo waatwiikha shiifwo mweesi Wele aamukanikhilayo isho lisiina ari Beseli.

Khuufwa khwa Rakeli

16Khukhwaama i Beseli iyo, belooselayo ni lukyeendo. Ne ni baaba nga bali aambi khukhwoola i Efurasi, imbuka iya Rakeli iye khuusaala umwaana yoola, ne shonyene ndi waafuna buwangafu bwe khuusaala bukali naabi. 17Aryo nga biisa bye khuusaala bimuli buubi naabi, umukaangi weewe uwamuyeeta khuusaala, waamulomela ari, “Ukharya ta, uli ni khuusaala umwaana ukuundi umusiinde.” 18Ne shonyene ndi biba biryo, Rakeli aaba nga ali khuufwa, ne nga ashikubakuba aryo waatwiikha umwaana lisiina ari Benoni#35.18 Benoni: Limanyisa liri Umusiinde wase uwe kumutaambo. Ne lwanyuma paapawe waamutwiikha ari Benyamini#35.18 Banyamini: Limanyisa liri Umusiinde wase uwe kumukhono kumulayi.

19Musaambo iyo Rakeli waaafwa, lwanyuma baamusiikha aambi ni kumukhoosi kukwaba kutsya i Efurasi (nga nisho Betelehemu). 20Abweene awo, Yakobo waasimikhawo libaale khu ŋani yeewe khuuba nga shikhebuliso she ŋani ya Rakeli, shishiiliwo khukhwoolesa ni shaleelo shino. 21Isiraeli waakyeenda khukhwaama ibweene iyo, waatsya woombekha lisari lyeewe khu lubeka lwe shanjelekha lwe kumunaala kwa Ederi.

Basooleli ba Yakobo

(2 Kim 2.1-2)

22 # Rak 49.4 Nga Isiraeli ashimenya mu shibala isho, Rewubeni waatsya waakona ni Bila, mutweela khu bakhaana babaakaanisi ba paapa weewe, lwanyuma Isiraeli waashiwulilakho shaamutsiina.

Yakobo aaba ni basooleli likhumi na babili. 23Basooleli ba Leya baaba nibo, Rewubeni (nga niye umusooleli wa Yakobo umukhulu), Simeyoni, Levi, Yuda, Isakaari, ni Zebuluni. 24Basooleli ba Rakeli baaba nibo, Yozefu ni Benyamini. 25Basooleli ba Bila, uwaba umukhaana umwakaanisi wa Rakeli baaba nibo, Dani ni Nafutali. 26Basooleli ba Zilupa, uwaba umukhaana umwakaanisi wa Leya baaba nibo, Gadi ni Asheri. Bano nibo basooleli beesi Yakobo aasaala nga ali i Padani Aramu.

Khuufwa khwa Isaaka

27 # Rak 13.18 Yakobo weetsa ingo isi paapawe Isaaka i Mamure, aambi ni Kiriyasi Aruba (nga nisho Heburon). Abweene awo niwo isi Iburayimu ni Isaaka baamenyatsaka. 28Isaaka aawaangala woolesa kimiiko shitoondo shitweela ni kamakhumi shinaane (180). 29Lwanyuma waafwa mu miiko kyeewe kye busakhulu. Basooleli beewe Esawu ni Yakobo baamusiikha.

Currently Selected:

Khuurakikha 35: LCE

Highlight

Copy