Khuurakikha 31

Yakobo atitukha khukhwaama wa Labani

1Nga ibyo byaabeele biryo, Yakobo waawulila bari basooleli ba Labani balikho beluŋuunya, nga baloma bari, “Bona Yakobo waayilile buli shiindu sha paapa weefwe shoosi. Buyiindifu bweewe bwoosi wabwaamisile khu buyiindifu bwa paapa weefwe.” 2Naluundi Yakobo aashibona ari Labani s'ashiili uwe buusaale ni naye, nga n'aba ashikhola makiboole ta.

3Lwanyuma kila Umukasya alomela Yakobo ari, “Yiilayo mu liswa lye baakuuka boowo, mu balebe boowo. Ise samweene kane imbatsake ni nawe.”

4Isho shaakila Yakobo waarumanisa isi Rakeli ni Leya khukhwiitsa bamwakaanane iyo mu maayilo isi aaba ni bibyaayo byeewe. 5Waabalomela ari, “Ise naatsiile khuushimenielesa nga paapa weenywe s'ashimbirisa buulayi, nga n'ambirisatsaka maakiboole ta. Ne shonyene ndi Wele isi paapa wase esaayatsaka, ali atweela ni nase. 6Inywe mwaashiimanya buulayi isaambo isi imbeele nga inaambilamwo paapa weenywe ni kamaani kaase koosi nga siniwusa ta. 7Ne ari bona waandyaakhanile ise, waashuusanisa kumukheemba kwase aambi kimiluundi likhumi kimibuufu. Ne shiilayi Wele s'amufukiilisa khukhukholakho buubi bwoosi ta. 8Buli isi Labani aalomela ari ‘bibyaayo bye kamakoondookoondo byoosi bili bibyoowo,’ bibyaayo byoosi byaarakikha khuusaala tse kamakoondo. Naluundi isi aashuusilakho shishambaaso waaloma ari, ‘bibibyaayo byoosi bibiilikho tsinyilili byoosi bili bibyoowo,’ bibyaayo byoosi byaarakikha khuusaala tsitsiilikho tsinyilili. 9Nashiryo musaambo yino, Umukasya waabukuule bibyaayo khukhwaama khu paapa weenywe, waabimbeele ise. 10Naluundi nga abe imbuka iye khukhwiilukha khwe bibyaayo yoolile, abe indoora busa kamarooro, naabona nga tsindurume tsitsiilikho kamakoondokoondo namwe tsinyilili, nitso tsitsilukhisa. 11Lwanyuma mu marooro mweene umwo, malayika wa Wele weetsa wanaanga lisiina ari, ‘Yakobo.’ Nase nelamwo indi, ‘Ise niyooyu.’ 12Lwanyuma malayika uyo waanomela ari, ‘Yinyusa tsimoni tsoowo ubone. Tsindurume tsitsiili khukhwiilukhisa tsoosi tsilikho kamakoondo, namwe tsilikho tsinyilili. Indi khuukhola shino, lwekhuuba naaboone isaambo isi Labani ali khuukhubirisamwo iwe. 13#Rak 28.18-22Ise indi Wele, uwakhubonekhela i Beseli, isi waareerawo libaale, waalitsukhakho kamafura ke kuusaala ku olivu, khuuba nga shishebuliso, lwanyuma waakhola shishitsubo. Ari yiŋoonaŋoona winyukhe, wiileyo mu shibala sheesi wasaalikhilamwo.’”

14Lwanyuma Rakeli ni Leya beelamwo Yakobo bari, “Ifwe khushiiliyo ndi ni busikha bwoosi, namwe ni kumukabo kwoosi mu ntsu ya paapa weefwe? 15Ifwe ari akhubirisa busa nga bakhasi banaambo. Lwekhuuba ifwe waakhukulisa khaale, ni tsinusu tseesi aafuna, waatsiraambisa khaale tsaawawo. 16Nashiryo buyiindifu buno bweesi Wele abukuule khu paapa weefwe, ari buli bubweefwe atweela ni babaana beefwe. Nilwe shisheene isho, iwe tsya mu moni khuukhola shoosi sheesi Wele akhulomela khuukhola.”

17Aryo Yakobo wenyukha, weŋoonaŋoona, waayeeta baakyelama ni babaana beewe khukhwiikhala khu ŋamila. 18Lwanyuma waasama bibyaayo byeewe byoosi, byaatsya iburaangisi weewe, nga waareerekho ni bye buyiindifu bibiindi byoosi byeesi aabusanisa nga ali mu Padani Aramu. Musaambo iyo, waarakikha lukyeendo lwe khuutsya i Kanaani, mu shibala mweesi paapa weewe Isaaka aamenyatsaka. 19Biba biryo, abe Labani waatsiile khuubeka bubwooya khu masheese keewe. Isho shaanyalisisa Rakeli khukhwiiba bu wele bwe mu ntsu ya paapa weewe, waatsya ni nabwo. 20Yakobo aakhalila Labani umu Arameya kamakyesi ke angaaki naabi, waalekha khumanya ari balikho batsya ta. 21Aryo Yakobo waayila buli shiindu shoosi sheesi aaba nasho. Waatitukha, waatsya waambukha luluutsi Efurati, waaniinaniina kwe mu shibala she tsingoongo sha Giliyadi.

Labani aloonda khu Yakobo

22Lwanyuma lwe biifukhu bitaru khuubirawo, Labani waawulila kamakhuuwa bari Yakobo waamutitukhilekho. 23Naye nga n'awulila aryo, waabusanisa batweela khu baalebe beewe, baaloonda khu Yakobo. Shaabayilila biifukhu musaafu bibuufu, nio baamwoolelela aambi mu shibala she tsingoongo sha Giliyadi. 24Ne khuunyoowa mu shilo isho nio bushe bamunyoole, Wele waabonekhela Labani mu marooro, nga amulomela ari, “Waakha khukhwiitsiliilisa, ukhakhakakho waakhaabila Yakobo ilomo yoosi imbi namwe indayi ta.”

25Aryo Labani woola aambi ni isi Yakobo aaba, nga woombekhele lisari lyeewe mu shibala isho she mu ngoongo sha Giliyadi, Labani naye ni baalebe beewe tsana, woombekha lisari lyeewe aambikho ni lya Yakobo. 26Kila Labani alomela Yakobo ari, “Lwashiina ukholile shishiindu shishifwaana shiri? Khuunyoowa waamoombesile ise, naluundi waayila bakhaana baase, nga uyila ni baabowe beesi baawaambile mu busoolo. 27Shiina shisheene shishakilile iwe waatitukha busa mu shimoonyo uryo waantsiba na khuntsiba? Lwashiina ukhaambooleelekho nio nase inyala khukhuusiibula buulayi ni kumwikhoyo, ni khukhweemba kimyeenya, atweela ni khuusakayisa bibisakaya ni kamatuungu? 28Ate naluundi waalekha khuufukiilisa ise khuusiibulakho babetsukhulu baase ni bakhaana baase ta. Isho sheesi wakholile sishabeele she kamakyesi ta. 29Ise ari indi ni buunyala khuukhukholakho buubi, ne shonyene ndi mu shilo shishabirire, Wele wa paapa woowo andewuure mu marooro, nga anomela ari, ‘Waakha khukhwiitsiliilisa, ukhakhakakho waakhaabila Yakobo ilomo yoosi imbi namwe indayi ta.’ 30Ari ni shishiindi, ise naamanyile ndi utitukhile lwekhuuba wiwulila uri ukana naabi khukhwiilayo iweenywe, ne lwashiina weebile ba wele be mu ntsu yase?”

31Yakobo naye weelamwo Labani ari, “Ise natitukhile lwekhuuba nabeele naariire naabi, nga nambaasa ndi, unyala waandusakho bakhaana boowo ni kamaani. 32Ne siinga unyoolakho umuundu yeesi uuli ni ba wele boowo, umweene uyo aakha khukhwiiribwa. Ni shishiindi, siinga unyoolakho shishiindu shishiili shishoowo mu biindu bino byoosi, ikhwitsubila mu moni tse baalebe bano boosi indi, uli ni khuushikobosayo.” Ne Yakobo khu mbuka iyo, aaba nga waakhumanya ari Rakeli weebile ba wele ba Labani ta.

33Lwanyuma Labani waatsya wenjila mu lisari lya Yakobo, nga afukura, lwanyuma waatsya mu lisari lya Leya nalyo, waamawo waatsya wenjila mu lisari lye babaakaanisi babili, ne waalekha khuunyoolamwo ba wele beewe ta. Nga aliimalile aryo, waatsya wenjila mu lisari lya Rakeri nalyo. 34Rakeli aaba nga waasuta ba wele be mu ntsu abo, nga waabara mu wootswa namwe isutilo iye khu ŋamila, khweesi aaba nga wekhaliile. Labani waafukura nga aweentsa mu lisari lyoosi, ne waalekha khunyoolamwo ba wele abo ta. 35Kila Rakeli alomela paapa weewe ari, “Musakhulu ukhaakhalalila ise ta, ise naakhunyalisa khukhwinyukha ta, lwekhuuba natsiile i masaaba.” Aryo Labani waahentselesela ilala, ne waalekha khunyoola ba wele abo ta.

36Kila Yakobo naye ni lirima liikali elamwo Labani ari, “Ari kumusaango kwase nikwo kuli eena? Shibi shiina sheesi nakholile, shishikilile iwe waanoondakho nga undimisa? 37Abe yaakhaba nga waafukuure nga uweentselesa mu biindu byase byoosi, biindu shiina bye mu ntsu yoowo byeesi unyoolilemo? Ingana ubiruse byoosi, ubire ano iburaangisi we baalebe boowo, ni baalebe baase, boosi babibone, nio lwanyuma bakhalewo khuumanya naanu uuli uwa ŋali. 38Ise naabeele ni nawe khuumala kimiiko kamakhumi kabili kimibuufu, kamakheese koowo atweela ni tsimbusi tsoowo byaakhutuumisatsakakho namwe byaakhasikha khuusaala buumeeme ta. Namwe khu lubeka lwase, naakhulyatsakakho limiiku lyoowo, abe yakhaba na litweela ta. 39Abe buli lweesi isolo iye mwirome yiitsila yeerakho likheese lyoowo litweela, ise sinasutakho kumulaambo kwayo naareera khuukhwookesa iwe ta, ne khuurusakho ndi ise nabukulatsaka busa khu tsase inamu, nakhwiisilawo. Iwe wakhalatsakawo khukhuusasulisa ise shishaayo shoosi, sheesi baaba nga beebile, oba kumuusi namwe mu shilo. 40Musaambo iyo, kimiluundi mikali naaba nga indaambisibwa naabi ni kumuumu kukwantsoshatsaka kumuusi, ni buunyifu bwe mu shilo buukali, nga sinyala ni khuukona liilo ta. 41Bibeelatsakile biryo, khuumala kimiiko kino kamakhumi kabili kimibuufu. Khuumala kimiiko likhumi na kine, ise nakhwakaanisa iwe nio ufukiilise ise khuuyila bakhaana boowo boombi, ni kimiiko kikiindi kisesaba, lwe khuukana khuufunakho bibyaayo bino. Abe byakhaba nga byaba biryo, iwe washuusanisa kumukheemba kwase kimiluundi likhumi kimibuufu! 42Ilala Wele wa paapa wase, Wele wa Iburayimu, naluundi niye Wele isi paapa wase Isaaka esaayatsaka, alekha khuba ni nase, khali waasiibule khuurura iwoowo busa, nga siindikho na shiindu shoosi ta. Ne Wele waabona kumutaambo kwase, ni saambo isi naraambamwo ni kamaani. Isho nisho shishakilile waakhubonekhela iwe mu shilo shishabirire, waandusakho kumusaango!”

Yakobo akhola Indakaano ni Labani

43Lwanyuma lwe bilomo ibyo, Labani weelamwo Yakobo ari, “Bakhasi bano, bali bakhaana baase, ni babaana baabwe bano nabo, bali babaase, bibyaayo bino na buli shiindu shoosi sheesi uli nasho, byoosi bili bibyase. Ari mbaawo sheesi ise inyala naakhola khu bakhaana baase bano, namwe khu baana beesi baakhusaalila iwe bano ta. 44Khuurusakho ari, yiitsa khukhole indakaano, iwe ni nase. Inyene iyo ibe nga umujulilwa akari eefwe fweembi.”

45Aryo Yakobo, waabukula libaale waaliimisawo khuuba nga shishebuliso. 46Lwanyuma waalomela baalebe beewe khuubuusanisayo kamabaale, bakare atweela. Baryo baalebe bano babuusa kamabaale, kila Yakobo ni Labani beekhala aasi, baaliila atweela biilyo aambi ni kamabaale keene. 47Labani waatwiikha kamabaale kano ari Yegari Sahaduta#31.47 Yegari Sahaduta: Mu Lulimi Lu Aramayiki shimanyisa shiri kamabaale ke khuukhushebusatsaka, ne Yakobo niye waakalaanga ari Galeedi.

48Kila Labani alomela Yakobo ari, “Kamabaale kano kali ni khuuba nga ke khuukhushebusatsaka iwe ni nase.” Isho nisho shishikila balaanga shiifwo isho bari Galeedi. 49Indi luundi shiifwo baashiilaanga bari Mizipa, lwekhuuba Labani aaloma ari, “Umukasya umweene akhulolelele iwe ni nase, abe yakhaba nga kane khube khwaawukhanile.” 50Labani waalooselakho ari, “Iwe siinga utsya ne waabirisaka bakhaana baase buubi, namwe waatsya waayilaka bakhasi babaandi khuubatubaasakho, abe yakhaba nga ise naakhushimanyakho ta, shebulilatsaka uri Wele ali umujulilwa akari aase ni nawe.”

51Indi luundi Labani waalomela Yakobo ari, “Waaboone kamabaale kano keesi ise indeerewo akari eefwe, naluundi niko shishebuliso. 52Kamabaale kano kali shishebuliso naluundi kali she khuukhushebusatsaka ifwe kari, ise singene ikhalise ano intsye khu luwaande lwoowo khuukhukhola iwe buubi ta, namwe iwe khuukhalisa wiitse iwase khukhukholakho buubi ta. 53Khali Wele wa kuuka Iburayimu, naluundi Wele wa kuuka Nahori, akhalilewo akari eefwe fweembi.”

Aryo Yakobo naye weetsuba mu lisiina lya Wele mweene isi paapa weewe Isaaka esaayatsaka. 54Ni abweene awo, Yakobo wawaanayo isaayilo khu lukiingi lweene, lwanyuma waalaanga baalebe beewe khuuliila atweela. Baryo nga baamalile khuulya, baakonela ibweene iyo khu lukiingi.

55Antsye ni bwasha kumutikhinyi, Labani wenyukha waasibula babetsukhulu beewe, atweela bakhaana beewe, waabaloombela tsikhabi, lwanyuma waakobolayo ingo weewe.

Currently Selected:

Khuurakikha 31: LCE

Highlight

Copy