Khuurakikha 30

1Ne Rakeli n'abona nga siwakhusaalilakho Yakobo babaana ta, libuba lyaamuwaambila yaayawe Leya. Kila alomela Yakobo ari, “N'umbe babaana nase isaale, nga akhuba isho ta, inafwa bufwi.”

2Kila Yakobo lirima limuwaambila Rakeli, waamwiilamwo ari, “Iwe waambaasa uri ise ndi Wele, uwakhwiimisa iwe khuusaala babaana?”

3Lwanyuma kila Rakeli alomela Yakobo ari, “Bona umwakaanisi wase Bila uyushiina, tsya ukone ni naye, nio manya waasaalilayo umwaana. Musaambo iyo, nase kane imbe nga naafunile babaana khuubirira mu niye.” 4Aryo Rakeli waawa Bila isi Yakobo khuuba umukyelama weewe; Yakobo waatsya waakona ni naye. 5Lwanyuma Bila waaba shisoombo, waasaalila Yakobo umwaana umusiinde. 6Kila Rakeli amutwiikha lisiina ari Dani, lwekhuuba aaloma ari, “Wele waambotseele kumusaango kwase! Naluundi waawuliile khuuloomba khwase, waambeele umwaana umusiinde.” 7Indi luundi Bila waaba shisoombo, waasaalila Yakobo umwaana ukuundi umusiinde. 8Lwanyuma ndi kila Rakeli amutwiikha lisiina ari Nafutali, lwekhuuba aaloma ari, “Naarekanile khuurekana khuukali naabi ni yaaya wase, ne ari imbonekha nga uuli khuufuura!”

9Naye Leya n'abona ari waakamile khuusaala babaana, waawa Yakobo umwakaanisi weewe Zilupa, khuuba umukyelama weewe. 10Lwanyuma Zilupa waasaalila Yakobo umwaana umusiinde 11Leya waamutwiikha lisiina ari Gadi, lwekhuuba aaloma ari, “Naabeele ni khabi ingali naabi.” 12Indi luundi Zilupa waasaalila Yakobo umwaana ukuundi umusiinde. 13Naye Leya waamutwiikha lisiina ari Asheri, lwekhuuba aaloma ari, “Indi umusangaafu naabi! Ari bakhasi babaandi kane balome bari indi umusangaafu.”

14Shifukhu shitweela khu mbuka iye likyesa lye ŋaano, Rewubeni waatsya waanyoola shisaala shishiindi Mandurekisi#30.14 Mandurekisi: Shisaala shino shambaasilisibwa khuuba nga shireera lusaalo lwe babaana, namwe abe shireera khukana mu mukuunda, waashikhuula waareerera maayi weewe Leya kimili. Kila Rakeli aloma Leya ari, “Naakhwikoontseleele, n'umbekho shisaala isho sheesi umwaana woowo aama khuureera.”

15Kila Leya naye amwiilamwo ari, “Iwe wambaasa uri shili shiindu shikyeekhe naabi iwe khuuba nga waayimbukula umuseetsa wase? Ni na ari ukana khuuyila shisaala sh'omwaana wase nasho?”

Rakeli naye waamwilamwo ari, “Siinga ufukiilila khukhuumba shisaala sh'omwaana woowo isho, kane ikhufukiilile ukone ni Yakobo shiilo she shaleelo shino.”

16Angoloobe awo, Yakobo n'aba nga akobola khukhwaama mu mikuunda, Leya waatsya waamwakaanila, waamulomela ari, “Shiilo shino waakha khuukona ni nase. Lwekhuuba ise naakhusasuliile iwe, nga inaambisa shisaala sheesi umwaana wase areerire.” Aryo Yakobo waatsya waakona ni naye shiilo isho.

17Wele waawulila khuuloomba khwa Leya. Leya waaba shisoombo, waasaalila Yakobo umwaana umusiinde uwe kharaano. 18Leya waamutwiikha lisiina ari Isakaari, lwekhuuba aaloma ari, “Wele waasasuule ise, lwekhuuba nawa umuseetsa wase isi umwakaanisi wase khuuba umukyelama weewe.” 19Indi luundi Leya waaba shisoombo, waasaalila Yakobo umwaana umusiinde uwe khasesaba. 20Leya waamutwiikha lisiina ari Zebuluni, lwekhuuba aaloma ari, “Wele waambeele shiwaanwa shiilayi naabi. Aluno kane umuseetsa wase aambe lukoosi, lwekhuuba naamusaaliile babaana besiinde basesaba.” 21Lwanyuma ndi Leya waasaalayo umwaana umukhaana, isi aatwiikha lisiina ari Dina.

22Wele waashebulila Rakeli, waamuwaambila shiisa mu mutaambo kweewe, weelamwo khuuloomba khweewe, waamunyaalisisa khuusaala babaana. 23Aryo waaba shisoombo, waasaala umwaana umusiinde. Kila aloma ari, “Wele waandusilekho she kamaŋaanyu.” 24Kila amutwiikha lisiina ari Yozefu, lwekhuuba aaloma ari, “Khali Umukasya ambeeleyo umwaana umusiinde ukuundi.”

Bibyaayo bya Yakobo biiloosela buukali

25Lwanyumakho nga Rakeli waamalile khuusaala Yozefu, Yakobo waatsya waalomela Labani ari, “Ari ingana undekhuule ingoboleyo ingo weefwe, mu shibala shase. 26Ingana uumbe bakhasi baase, atweela ni babaana baase, beesi nafuniile ano, nga ikhuraambila iwe. Nashiryo ikhuloomba undekhuule intsye, lwekhuuba waamanyile buulayi bubweene bubwakaanisi bwase nga ni bubeele isi iwe.”

27Labani naye waamwiilamwo ari, “Iwe siinga uba ufukiilila, ukhatsya, waandekha ise ta. Lwekhuuba naashifumbuule ndi, Umukasya waambeele tsikhabi tsino tsoosi khulwoowo. 28N'ubalilile byoosi byeesi umaantsa ise, ni nase kane ikhuliyile.”

29Yakobo naye waamwiilamwo ari, “Iwe waamanya buulayi bubweene, isaambo isi ise imbeele nga ikhwakaanisamwo iwe mu bwiyikinwa mu miiko kino kyoosi. Naluundi waamanya isaambo isi bibyaayo byoowo biyimbilemo nga nimbeele imbilolelela. 30Iwe waba nga uli ni tsikhaafu imbale tsiri, ari tsasaalana tsaakhila ta. Umukasya waakhuwa iwe tsikhabi, mu buli shiindu shoosi sheesi imbeele nga ikhola. Ne ari nase kane ifune liina imbuka iye khuulolelela be muungo mwase?”

31Labani naye waamureeba ari, “Ari ukana ikhuwe shiina?”

Yakobo waamwiilamwo ari, “Siingana waabakho ni sheesi usasula ise ta. Ne ngana ukholeleyo shishiindu shitweela, ni nase kane intsye niloosele khuukhuraambila samweene. 32Ifukiilile intsye mu byaayo byoosi shaleelo shino, imbe nga imbukulakamwo kamasheese ni tsimbusi bibiilikho kamakoondokoondo, ni kamasheese kamaana kakaali kamamali busa. Bibyeene ibyo byeesi inarusamwo, nibyo bibikane bibe kumukheemba kwase. 33Shino kane shikhuyeete iwe lwanyumakho, khuumanya oba nga ise imbeele umwiyikinwa isi uli namwe ta, isi iwe kane wiitsile khuulola khu mukheemba kwase ukwo. Iwe siinga nga unyoolamwo tsimbusi namwe kamasheese bibikhalikho kamakoondokoondo ta, namwe kamasheese kamaana kakaakhali kamamali ta, umanya busa uri ako naakebile.”

34Labani weelamwo ari, “Mbaawo buubi ta. Khayo shibe nga iwe niwaama khuloma.” 35Ne khu shifukhu sheene isho, Labani waatsya, waarusakamwo tsindurume tsitsabakho kamakoondokoondo, ni tsimbusi tsikhasi tsoosi tsitsabakho buwaangawaanga, ni kamasheese kamaana koosi kakaabamwo buumali, waabiwa baasooleli beewe khuutsya khwaayisa. 36Waabalomela batsye baayisile aleeyi, mu shifwo abe shishiyila lukyeendo lwe bifukhu nga bitaru, akari aabwe ni shiifwo mweesi Yakobo aaba. Ne Yakobo niye waarama ni bibyaayo bya Labani bibiramile.

37Lwanyuma Yakobo waatsya waafunayo biisaala bye bikuuka bitaru, waabyobuulakakho kamakhobolyo mu nyilili, byaabonekha nga bibiilikho buwaangabuwaanga. 38Kila emisaka biisaala ibyo iburaangisi we bitowo bye kameetsi mweesi bibyaayo binyweela. Bisaala ibyo aabiimisaka abweene awo, lwekhuuba abe bibyaayo biilukhisana nga biitsya khuunywa kameetsi. 39Biryo bibyaayo bino nga abe byelukhisaniile iburaangisi we bisaala bibyoobule bino, nga bilikho tsinyilili tse buwaangawaanga, tsinyana tseesi byasaalatsaka natso tsabakho tsinyilili tse buwaangabuwaanga, namwe kamakoondokoondo. 40Yakobo waawulakamwo kamasheese nga akarusa mu mbusi, kila atsikhola tsaaba nga tsilolelela lubeka lwe kamakoondokoondo, ni kamasheese kamamali khuulolela lubeka lwe bibyaayo bya Labani. Musaambo yino Yakobo waaba nga awukhanisa bibyaayo byeewe khuurura mu bya Labani.

41Abe buli lweesi bibyaayo bye kamaani biba nga bilikho biilukhisana, Yakobo emisatsaka biisaala bibyobule tsana iburaangisi we bitowo bye kameetsi, isho shaakila byaahesela abweene awo. 42Ne abe buli lweesi bibyaayo biitoro biitsila khukhwiilukhisana, abe s'arawo biisaala ibyo ta, shaakila bibyaayo biitoro byaba bya Labani, ne bye kamaani byaba bya Yakobo. 43Musaambo iyo, Yakobo wetsusa bibyaayo, waaba umuyiindifu luukali. Aryo waaba nga ali ni bibyaayo biikali, ni baakulwa, tsiŋamila atweela ni tsisikilya.

Currently Selected:

Khuurakikha 30: LCE

Highlight

Copy