Khuurakikha 29

Yakobo oola muungo mwa Labani

1Lwanyuma lwa bino, Yakobo weelooselayo ni lukyeendo lweewe, waatsya woola mu shibala she babaandu be bwaamanyaanga. 2Nga ashiilikho aleeyikho, waabona kamataala kataru ke kamasheese nga kali mu maayilo, kaakonele aambi ni isebele iye kameetsi. Ne shonyene ndi, baaba nga baakifuunikhilekho khu ngaaki ni libaale. 3Yabatsaka isaambo yaabwe ndi, abe banyoowa baaliinda kamasheese kaanyoowa khuubuusana, nio baarusawo liibaale khu sebele. Nga abe baamalile khuunyweesa kamasheese koosi, beesayo liibaale, baalifuunikha khu ngaaki khwe sebele.

4Yakobo waatsya aambi ni babaayi be kamasheese waabareeba ari, “Inywe mwaama waheena?”

Nabo baamwiilamwo bari, “Ifwe khwaama i Harani.”

5Kila ndi abareeba ari, “Mwaamanya umusaani isi baalaanga bari Labani, umwitsukhulu wa Nahori?”

Nabo baamwiilamwo bari, “Khwaamumanya.”

6Yakobo waabareeba ari, “Ali aryeena?”

Nabo baamwiilamwo bari, “Ali umulayi, ni bibiindu bimutsiila buulayi. Bona n'umukhaana weewe Rakeli uyo, ali khukhwiitsa ni kamasheese.”

7Kila ndi Yakobo waabalomela ari, “Bona antsye tsinyaanga, ashiili khukhwiilabula ta, lwashiina mukhanyweesa kamasheese kameetsi, lwanyuma mwaakeesayo khukhwaaya? Eyi siili inyaanga iye khuubuusanisa busa kamasheese ta.”

8Nabo baamwiilamwo bari, “Si khunyala khwaapilingisa libaale khwaalirusayo, khwaarakikha khuunyweesa kamasheese ta, khuurusakho nga kamasheese koosi kaamalile khuubusana atweela.”

9Ni baaba nga bashiikanikha baryo, Rakeli woola ni kamasheese ka paapawe, lwekhuuba niye uwabatsaka umwaayi wako. 10Aryo Yakobo n'abona khu Rakeli, shaananyina sheewe, umukhaana wa khootsa weewe Labani, ni kamasheese ka Labani, wenyukha waatsya khu sebele, waapiringisa libaale, waalirusayo, waanyweesa kamasheese. 11Lwanyuma lwayo, Yakobo waatsya waakwa Rakeli mu shifuba, waarakikha khuulilaka kamasika. 12Aryo Yakobo waarakikha khuusontsoola Rakeli nga niye naali umulebe wa paapa weewe Labani, umwaana wa Rebeka. Isho shaakila Rakeli waatimaka ingo waatsya waaboolela paapa weewe Labani.

13Labani n'amala khuuwuliilisa kamakhuuwa kakawaamba khu Yakobo, waatimaka khaangu khuutsya khuumwakaanana, waamukwa mu shifuba, waamusheesa. Lwanyuma Labani waamureera ingo weewe, Yakobo weeloosela khuumunoonosela byoosi bibyamureera. 14Kila Labani waamulomela ari, “Ilala iwe uli uwase umweene, kumubili kwase ni kamafuki kameene.” Yakobo waamenya ibweene iyo khuumala kumweesi kumubuufu.

Yakobo akhwa Leya ni Rakeli

15Lwanyuma Labani waalomela Yakobo ari, “Iwe s'unyala waanaambila ise busa uryo, lwekhuuba bari khuli baalebe ta. Ari ingana iwe umboolele, ukana ikhusasule kumukheemba kukwoola kuryeena?”

16Labani aaba nga ali ni bakhaana beewe babili: Lisiina ly'omukhulu abe bari Leya, n'umuro weewe abe bari Rakeli. 17Leya#29.17 Leya: Alala kamakhulu kaasho sikamanyikha buulayi ta, ne burone bubuundi buloma buri, abe tsimoni tseewe tsibonekha buulayi, aaba ni tsimoni nga tsilola mbola busa, ne nga Rakeli aaba nga abonekha buulayi luundi nga umumiliwu naabi. 18Aryo Yakobo waakana naabi Rakeli, kila aloma ari, “Kane ise ikhuraambile khuumala kimiiko musaafu, siinga nga ufukiilila ise khuuyila umukhaana woowo umukyeekhe Rakeli khuuba umukyelama wase.”

19Labani weelamwo ari, “Shiilayi iwe waamuyila, khuufuurisa naakhwaalikha w'omusaani ukuundi busa. Nashiryo, n'umenye ano ni nase.”

20Aryo Yakobo waaraambila kimiiko musaafu, nga akana khuuyila Rakeli. Lwekhuuba khuukana khweesi aaba ni nakhwo isi Rakeli, khwaba khuukali naabi, kimiiko musaafu kino kyamufwaanila busa nga biifukhu bikyeekhe biri. 21Lwanyuma lwa byoosi, Yakobo waalomela Labani ari, “Imbuka yase iye buuraambi naakimalile. Ari n'umbe umukhasi wase imuyile.”

22Aryo Labani waabusanisa babesanwa beewe boosi, lwanyuma waakabula kamayiiya ke bukhwaale. 23Mu shilo isho, nga antsye amaliyile, Labani waayila Leya isi Yakobo, mu shifwo sha Rakeli, Yakobo waatsya waakona ni naye. 24(Labani waawa Leya umwakaanisi weewe Zilupa, khuuba umukyeesa weewe.)

25Ne antsye ni bwasha kumutikhinyi, Yakobo wenyoola nga umukhasi aaba Leya. Kila areeba Labani ari, “Lwashiina iwe waakhaliile ise kamakyesi kakafwaana kari? Ise naakhuraambiile khuumala kimiiko musaafu kino kyoosi khulwa Rakeli. Lwashiina ilala umoombesile musaambo yino?”

26Kila Labani naye amwiilamwo ari, “Mu shibala she weefwe ino, sikhunyoowa khukhwaalikhisa umukhaana umukyeekhe, nga umukhulu ashiili ango ta. 27Nashiryo, nyoowa umaliilise bifukhu musaafu, nga uli ni nayuno, ne lwanyuma kane ikhuwe Rakeli naye, siinga nga ufukiilila khukhuunaambila kimiiko kikiindi musaafu.”

28Aryo Yakobo waafukiilila, waamaliilisa biifukhu musaafu ibyo ni naye, lwanyuma Labani ndi waamuwa Rakeli khuuba nga umukyelama weewe naye. 29(Labani waawa Rakeli umwakaanisi weewe Bila, khuuba umukyeesa weewe.) 30Aryo Yakobo waatsya waakona ni Rakeli naye, waamukana naabi khufuurisakho Leya. Lwanyuma weeloosela khuumenyawo nga araambila Labani khuumala kimiiko kikiindi musaafu.

Babaana ba Yakobo

31Ne Umukasya n'abona ari Yakobo s'akana naabi Leya ta, waamwikulila lisaaye khuusaala babaana, ne Rakeli niye waaraama nga umukuumba busa. 32Aryo Leya waaba shisoombo, wasaala umwaana umusiinde. Kila amutwiikha lisiina ari Rewubeni, nga aloma ari, “Lwekhuuba Umukasya waaboone kumutaambo kwase, ni aluno umuseetsa wase kane angane.” 33Lwanyuma ndi waaba shisoombo luundi, waasaala umwaana umusiinde ukuundi. Oyuno waamutwiikha lisiina ari Simeyoni, nga aloma ari, “Lwekhuuba Umukasya waawuliile ari ise si bangana ta, waambeele umwaana umusiinde ukuundi.” 34Indi luundi Leya waaba shisoombo, wasaala umwaana ukuundi umusiinde. Oyuno waamutwiikha lisiina ari Levi, nga aloma ari, “Khulw'omwaana yuno, ari umuseetsa wase kane antsihaambilekho ilala, lwekhuuba ise naamusaaliile babaana besiinde bataru.” 35Lwanyuma ndi waaba shisoombo, wasaala umwaana ukuundi umusiinde. Oyuno waamutwiikha lisiina ari Yuda, nga aloma ari, “Khu muluundi kuno, kane imbuyilise Umukasya!” Lwanyuma lwooyo, waakama khuusaala babaana.

Currently Selected:

Khuurakikha 29: LCE

Highlight

Copy