Khuurakikha 27

Isaaka

1Imbuka isi Isaaka aabeela nga wahaangaale mu miiko, luundi nga tsimoni tseewe sitsibona ta, waalaanga umusooleli weewe umukhulu Esawu weetsa isi ali. Kila amulaanga ari, “Mwaana wase.”

Esawu naye weelamwo ari, “Indi ano paapa.”

2Isaaka waamuloma ari, “Bona ise ari nahaangaale, naluundi simanya shifukhu shiina khweesi indifwiilakho ta. 3Ingana iwe usute buyiingo bwoowo atweela ni bufumo, utsye mwirome uyiime isaanyi, ukireere. 4Lwanyuma, ukiŋoonaŋoone buulayi musaambo isi ingana, undeerere ano indye. Nga naamalile, kane ikhuloombele tsikhabi tsoowo nga ishiili khufwa ta.”

5Ne Rebeka aaba nga waarekeeresile byeesi Isaaka aaba nga ali khuuboolela umusooleli weewe Esawu. Aryo Esawu n'arura waatsya mwirome, khuutsya khuyiima isaanyi, 6Rebeka waalomela umusooleli weewe Yakobo ari, “Ise imbeele nga naarekeeresile, naawulila paapawo nga alomela waandaayo Esawu ari, 7‘Tsya khaangu uŋoonaŋooneleyo inyama musaambo isi ingana, undeerere indye, nio lwanyuma ikhuloombele tsikhabi mu moni ts'Omukasya nga ishiili khufwa ta.’ 8Ni nashiryo ari mwaana wase, ingana undeekerese buulayi, utsye ukhole sheesi ikhulakila khuukhola. 9Tsya khaangu mwitaala, undeerereyo tsimbusi tsindayi, tsisooleli tsibili. Ingana khuuteekhela paapawo inyama musaambo isi afuura khuukana. 10Lwanyuma usute umuyilile akilye, akhuloombele iwe tsikhabi nga ashiili khufwa ta, mu shifwo sha waandaayo Esawu.”

11Yakobo naye weelamwo maayi weewe Rebeka ari, “Maayi, shebulila uri waandaayase Esawu niye alikho ni bubwooya bukali, ne bona shihaafu shase nisho shaamiliya busa mbaakho bubwooya ta. 12Ne kane shibe shiryeena siinga nga paapa wase akana khukhuumaambakho? Kane ise inyoolekhane nga umuwoombesi isi ali, ni naye kane antsube ise mu shifwo she khukhuumba tsikhabi.”

13Maayi weewe waamulomela ari, “Mwaana wase, khayo shitsubo isho shikwe khuusiise! Iwe n'utsye ukhole sheesi ikhulomeele khuukhola. Tsya undeerere tsimbusi.”

14Aryo Yakobo waatsya waareera tsimbusi tsana tsibili, waatsiwa maayi weewe, naye aryo maayi weewe waatsya waaŋoonaŋoona tsinyama buulayi musaambo isi paapa weewe abe aakikanamwo. 15Lwanyuma Rebeka waabukula bikwaaro bya Esawu bibifuura buulayi, byeesi aaba nabyo mu ntsu, waabikwaarisa Yakobo. 16Naluundi waabowa lihaafu lye mbusi khu makhono keewe, ni mu milo mweewe mumwaba nga mwaamiliya busa. 17Lwanyuma waabukula inyama yatsana, iyaba ili khuuwunya isilikakha buulayi, atweela ni kumukaati, waabyakaanisa Yakobo.

18Yakobo waabisuta, waabiyila isi paapawe, waamulaanga ari, “Paapa?”

Paapawe weelamwo ari, “Ise niyooyu, mwaana wase. Iwe niye naanu? Esawu namwe Yakobo?”

19Yakobo weelamwo ari, “Iseese niye Esawu, umusooleli woowo umukhulu. Bona naareerire isaanyi isi ukanile, naakiŋoonaŋoonile buulayi musaambo isi ukana. Ari yinyukha aasi, wikhale ulyekho, nio manya waamba tsikhabi tsoowo.”

20Kila Isaaka areeba umusooleli weewe ari, “Mwaana wase, iwe unyalisile uryeena khuufuna isaanyi khaangukho?”

Naye Yakobo waamwiilamwo ari, “Umukasya Wele woowo niye uwunyalisisile khuukifuna khaangukho.”

21Lwanyuma Isaaka waalomela Yakobo ari, “Yisyeenda aambi ano khubone. Ise ngana khuunyoowa khuukhuwaambakho nio inyale khuuŋaŋasila ilala oba nga iwe niye Esawu namwe ta.”

22Kila Yakobo esyeenda aambi isi paapa weewe Isaaka. Naye aryo n'amala khuumuwaambakho, waaloma ari, “Likono lili lya Yakobo, ne kamakhono niko kali ka Esawu.” 23Musaambo iyo s'anyalisa khuumanya ari niye Yakobo ta, lwekhuuba kamakhono ka Yakobo kaaba nga kalikho bubwooya khuufwaana nga ka Esawu. Aryo Isaaka waaloombela Yakobo tsikhabi. 24Indi luundi Isaaka waareeba ari, “Ne ilala iwe niye umwaana wase Esawu?”

Yakobo weelamwo ari, “Ee, ise niye.”

25Lwanyuma Isaaka waaloma ari, “Ari indeerere ano inyama yase indye. Indyo nga naamalile khuukilya, kane ikhuloombele tsikhabi, mwaana wase.” Aryo Yakobo waasuta biilyo ibyo waabireera isi paapa weewe. Isaaka waabilya, luundi waanywa ni viini isi Yakobo aamureerera. 26Lwanyuma paapawe Isaaka waamulomela ari, “Mwaana wase yisyeenda aambi ano, ungwekho mu shifuba.”

27 # Heb 11.20 Aryo Yakobo wesyeenda aambi, waamukwa mu shifuba. Aryo Isaaka n'awunyila luusu khukhwaama mu bikwaaro byeewe, aryo waamuwa tsikhabi nga aloma ari,

“Luusu lw'omusooleli wase luli luusu luluwunya buulayi

nga lwe mwirome lweesi Umukasya aawa tsikhabi.

28Khali Umukasya akhuweele iwe liime khukhwaama mwikulu,

khuutsowesa biilime biilayi,

uryo ufuna likyesa liilayi lye biilime ni viini.

29 # Rak 12.3 Khali kamanaambo kamakali keetsile kakhwakaanisatsaka iwe,

kamanaambo keenamisa kimirwe kyaabwe khwiloba khulwoowo.

Kane ube umukhulu we babandaayo boosi.

Babandaayo beene boosi babaama muunda ya maayi woowo,

kane beenamise kimirwe aasi nga baakhuboonekho.

Buli muundu yeesi ukhutsuba iwe kane atsubibwe,

ni nooyo yeesi ukhuwa iwe tsikhabi, kane aweebwe tsikhabi.”

30Aryo Isaaka nga nio aliimalile khuuwa Yakobo tsikhabi, nga naye Yakobo aliimalile khuururawo busa ari, Esawu naye waakobola nga aama khuyiima isaanyi. 31Esawu n'ola ingo, waaŋoonaŋoona inyama buulayi, musaambo isi paapawe afuura khuukikanamwo, lwanyuma waakimureerera. Aryo nga woolile isi paapawe, waamulomela ari, “Naakoboole paapa, ari yinyukha ulye isaanyi isi naama khuyiima. Yikhala buulayi ulye, lwanyuma unoombele tsikhabi tsoowo.”

32Paapawe Isaaka waamwiilamwo ari, “Iwe naanu?”

Esawu naye welamwo ari, “Ise niye Esawu, umusooleli woowo umukhulu.”

33Lwanyuma Isaaka nga alikho anikina busa, kila amulomela ari, “Ne naanu uwaama khwaama ano, uwungabuliile ise inyama iye saanyi, naakilya naakimalawo? Ise naama khulya inyama iyo, naawa n'umuundu mweene uyo tsikhabi, tsibeele tsikhabi tsitsikhanyala tsaashuukhamwo ta.”

34Aryo Esawu nga waamalile khuuwuliilisa biilomo byeesi paapawe aamuboolela, waarundukha waalila kamasika, ni luwuungu luukali lweene nga ekoontselela ari, “E paapa wase, nase n'umbe tsikhabi! Nase inoombele!”

35Naye Isaaka waamwiilamwo ari, “Waandaayo aama khuba ano, waakhalila ise kamakyesi ke angaaki naabi. Nashiryo waayilile tsikhabi tsoowo tsoosi.”

36 # Rak 25.29-34 Esawu naye weelamwo ari, “Isho nisho shishikila baamulaanga bari Yakobo#27.36 Yakobo: limanyisa uyo ukumila isukunyi, namwe uyo uuli umuwombesi? Lwekhuuba bona ari waanuulilekho ise kimiluundi kino kibili. Khuunyoowa aanuulakho kumukabo kwase kwe khuuba umwaana umukiboole, ni kumuluundi kuno bona waanuulakho tsikhabi tsase. Ne ari paapa, mbaawo ikhabi na ndweela isi undekheelekho ise ta?”

37Isaaka waamwiilamwo ari, “Ise naakholile Yakobo khuuba nga niye umukhulu woowo, naluundi naalakiile ndi, babaandaaye boosi babe babaakaanisi beewe. Ate naamuloombeele ndi, abe ni biilime biikali naabi atweela ni viini yeene. Ari iwe mwaana wase, inakhuwa shiina?”

38 # Heb 12.17 Esawu wekoontselela paapawe ari, “E paapa, mbaawo khaakhabi na khafwiiti khari kheesi unyala waanoombela nase ta? Paapa nase n'unoombelekho!” Aryo Esawu kumutaambo kwaamuwaamba luukali, waalila kamasika.

39 # Heb 11.20 Lwanyuma kila paapawe Isaaka amwiilamwo ari,

“Buumenyo bwoowo kane bube mu shibala shishoomu busa,

shishikhalimwo biilyo ta, naluundi mweesi liime lye mwikulu likharoonyamwo ta.

40 # Rak 36.8; 2 Bay 8.20 Kane umenyatsake nga wisoolanakho ni lurima wamweene.

Kane ubatsake umwakaanisi wa waandaayo, khuumalakho imbuka,

ne imbuka ilyoola, ulisoolanakho urure mu bubowe bweewe ube umukaangulule.”

Yakobo atitukha khuutsya wa Labani

41Esawu waabiiyila naabi Yakobo lwe tsikhabi tseesi aamwibakho khukhwaama isi paapawe. Isho shaakila Esawu weelomela mu mwoyo mweewe ari, “Bifukhu bye khuufwa khwa paapa wase bili aambi naabi khukhwoola. Lwanyuma ikhaakhoonye waandaayase Yakobo.”

42 # Makh 10.10 Ne yabawo umuundu uwawulila biilomo ibyo, waatsya waaboolelakho Rebeka. Kila Rebeka arumanisa isi Yakobo, waamulomela ari, “Waandaayo Esawu alikho eŋoonaŋoona luundi ariisariisa khuukhukhoonya iwe. 43Ni nashiryo mwaana wase, khola sheesi ikhuboolela khuukhola. Yinyukhilamwo khaangu, utitukhe utsye wa khootsa woowo Labani, i Harani. 44Tsya umenye ibweene iyo khuumalakho imbuka, khukhwoolesa nga lirima lya waandaayo lyaaweetsekheleele. 45Imbuka isi alibeela nga weebiliile ibyo byeesi iwe umukholile, ise ndirumanisa khuukhulaanga ukobole. Shiina shisheene shishikila ise naabafwiila inywe mweembi mu shifukhu shitweela?”

46Lwanyuma kila Rebeka alomela Isaaka ari, “Ise kumutaambo kwaamaambile naabi, luundi naaluwile naabi khulwe bakhasi ba Hiti bano. Siinga nga Yakobo naye akhwa umukhasi khukhwaama mu shibala she Hiti shino, kane shibe shiilayi ise khuufwa bufwi.”

Currently Selected:

Khuurakikha 27: LCE

Highlight

Copy