Khuurakikha 26

Isaaka ni Abimeleki

1Indi luundi aabawo intsala ikiindi mu shibala isho, ifwaananakho ni neeyo iyabawo khu muboolo kwa Iburayimu. Isaaka waatsya isi Abimeleki, umuyiinga we ba Firisitiya, uwaba nga amenya i Gerari. 2Umukasya waabonekhela Isaaka, waamulomela ari, “Ukhatsya i Misiri ta, ne uli ni khuumenya mu shibala sheesi kane ikhwookese khuumenyamwo. 3#Rak 22.16-18Uli ni khuumenya mu shibala isho nga umuwuyi busa, ni nase samweene kane imbaatsake ni nawe, ikhuwe tsikhabi. Lwekhuuba indyolelesa indakaano yase isi nakhola ni paapa woowo Iburayimu, nga ikhuwa iwe liiswa lino, atweela ni be lisaaye lyoowo boosi. 4Kane imbalaayise lisaaye lyoowo, lifwaane busa nga tsinieniesi tsitsibonekhela khwikulu. Naluundi kane ikhuwe liiswa lino lyoosi, ni isi babetsukhulu boowo. Ni babaandu boosi be mu shibala bakhaaweebwe tsikhabi khulweenywe. 5Bino byoosi bilikholekha biryo, lwekhuuba paapawo Iburayimu aawulila likono lyase, waakhola byoosi khuusiintsiila khu makaambila kaase, ni biilakilo byase.”

6Aryo Isaaka waamenyatsaka i Gerari. 7#Rak 12.13; 20.2Babaandu babaamenya ibweene iyo ni baamureebakho bibiwaamba khu mukhasi weewe, naye waabeelamwo ari ali umukooko weewe, lwekhuuba aarya khuubaboolela ari ali umukyelama weewe. Shaba shiryo lwekhuuba eyambaasa mu mwoyo kweewe ari, nga waababooleele ari ali umukyelama weewe, abe banyala baamwiira, lwekhuuba abe Rebeka abonekha buulayi naabi. 8Nga Isaaka waamalile khuumenyakho ibweene iyo imbuka indeeyikho, umuyiinga Abimeleki, uwe ba Firisitiya, waalola aasi khuubirira mwitilisa, waabona Isaaka nga ali khuutikita Rebeka. 9Kila Abimeleki alaanga Isaaka, waamulomela ari, “Shili sha lubuula shiri umukhasi uyu ali umukyelama woowo! Lwashiina iwe walomele uri ali umukooko woowo?”

Isaaka naye waamwiilamwo ari, “Lwekhuuba narya ndi banyala baantsira khu lweewe.”

10Kila Abimeleki naye elamwo ari, “Lwashiina wakhubirisile ifwe musaambo ifwaana iryo? Winyoola abe inyala yaabayo umusaani mutweela abe unyala waatsya waakona n'umukyelama woowo, abe shishinyala shaakhureerera ifwe shitsubo.” 11Abweene awo Abimeleki waalaangilila ari, “Umuundu yeesi ukhakakho khuubirisa umusaani yuno buubi musaambo yoosi, aakha khukhwiiribwa.”

12Isaaka waamiitsa bimiitswa biikali, ni mu mwiiko ukwo, waakyesa likyesa liikali naabi, nga bifuurisamwo ibyo byeesi aamiitsa shitoondo shibuufu, lwekhuuba Umukasya aamuwa tsikhabi tsingali naabi. 13Aryo Isaaka waaba umusaani umuyiindifu naabi, ni buyiindifu bweewe bweloosela busa khuubalaaha. 14Waabaya kamasheese kamakali naabi, atweela ni tsimbusi, ni kamataala ke tsikhaafu, naluundi waaba ni babaakaanisi baakali naabi, shaakila ba Firisitiya baamuwaambila liibuba. 15Kila batsya beeliilisaka tsisebele tse kameetsi ni liloba, tseesi babaakaanisi ba paapawe Iburayimu baayaba nga ashiili mulamu.

16Lwanyuma Abimeleki waalomela Isaaka ari, “Yinyukha urure mu linaambo lyeefwe utsye. Lwekhuuba bona ari wekyelile umuundu uwe kamaani naabi khuukhufuurakho ifwe.”

17Aryo Isaaka wenyukha waatsya mu Litila lya Gerari, waamenyatsaka ibweene iyo. 18Isaaka waakobola, weekulaka tsisebele tse kameetsi tsitsayabibwa nga paapawe Iburayimu ashiili mulamu, nga nitso tseesi ba Firisitiya beeliilisaka ni liloba nga Iburayimu waamalile khuufwa. Aryo waatsitwiikhaka kamasiina keene niko matweela keesi paapawe aatsitwiikhaka. 19Ne babaakaanisi ba Isaaka ni baalima aasi mwitila, baanyoolamwo kameetsi kakaarubukha khukhwaama mwiloba. 20Babaayi be Gerari iyo beetsa bakhaandisa babaayi ba Isaaka, nga baloma bari, “Isebele yino ili iyeefwe!” Isho shaakila Isaaka waatwiikha isebele iyo lisiina ari Eseki.#26.20 Eseki: Shino shimanyisa khuulomana lwekhuuba baakikhaabisanilakho.

21Lwanyuma babaayi ba Isaaka baayaba isebele ikiindi, ne ndi ni nayino nayo baakikhaabisanilakho, shaakila Isaaka waakitwiikha lisiina ari Sitina, (shishimanyisa shiri Buusiku). 22Nga waamile abweene awo, waatsya mu shifwo shishiindi, waayaba isebele ikiindi. Ni nayino nayo baakikhaabisanilakho. Yino nayo kila Isaaka akitwiikha lisiina ari Rehobosi (shishimanyisa shiri Shiifwo Shiibalaayi), nga aloma ari, “Aluno Umukasya waakhukholeele ifwe shiifwo shiibalaayi buulayi, nashiryo kane khuyiindile naabi mu shibala shino.”

23Khukhwaama ibweene iyo, Isaaka waatsya i Berisheba. 24Nga ali iyo, Umukasya weetsa waamubonekhela mu shilo sheene isho, waamulomela ari, “Ise niye Wele wa paapawo Iburayimu. Nashiryo ukharya ta, lwekhuuba ise ndi atweela ni nawe, kane ikhuwe tsikhabi, naluundi imbalaayise lisaaye lye babetsukhulu boowo, khulw'omwakaanisi wase Iburayimu.” 25Lwanyuma Isaaka woombekha shisheeso abweene awo, weesaaya Umukasya. Aryo woombekha abweene awo lisari lyeewe, babaakaanisi beewe baayaba isebele iye kameetsi.

Indakaano akari a Isaaka ni Abimeleki

26 # Rak 21.22 Nga abirirewo imbuka, Abimeleki waama i Gerari, nga ali ni Ahuzasi, umuwi weewe uwe kamakyesi, ni Fikoli, umukhulu we liiye lyeewe, beetsa khuubona Isaaka. 27Isaaka naye waabareeba ari, “Shiina shisheene shishibareerire isi indi, ate nga inywe mwaambirisa buubi naabi, mwaamboona nakhumboona?”

28Nabo baamwiilamwo bari, “Shili khuubonekhela ilala lubuula shiri Umukasya ali ni nawe. Ni shisheene isho nisho shishaama khukila khweetsa khuri khukhole indakaano akari eefwe ni nawe. 29N'ukhwitsubile nga uloma uri iwe singene ukhukholekho buubi bwoosi ta, nga nafwe ni khukhaakhukholakho buubi ta. Buli mbuka khwakhubirisa buulayi naabi, lwanyuma khwakhusiibula waatsya mu lukoosi. Ari bona isaambo isi Umukasya akhuweelemwo iwe tsikhabi!”

30Aryo Isaaka waabakholela kamayiiya kamaboofu, baalya naluundi baanywa. 31Uri kumutikhinyi mu mamilimili, beenyukha, beetsubanila bibitsubo bye buusaale. Lwanyuma Isaaka waabasiibula, beelayo ingo waabwe mu lukoosi. 32Khu shifukhu khweene ukhwo, babaakaanisi ba Isaaka beetsa baamulomela bibiwaamba khu sebele iye kameetsi ikiindi isi baayaba, nga baloma bari, “Khwaanyoolile kameetsi.” 33Isaaka waatwiikha isebele iyo lisiina ari Shiba, ni khukhwaamila abweene awo, lisiina lye shiriimba isho lyekyela Berisheba#26.33 Berisheba: Shiba shimanyisa isebele iye shishitsubo namwe, namwe shimanyisa musaafu, khukhwoolisa ni shaleelo shino.

Esawu ayila bakhasi banaambo

34Nga Esawu woolesile kimiiko kamakhumi kane kye buukhulu, waayila umukyelama isi baalaanga bari Judisi, umukhaana wa Beeri, umu Hiti. Waakyelawo ndi waayila Basemasi, umukhaana wa Eloni, naye umu Hiti. 35Ne shonyene ndi bakhasi ba Esawu bano baareerera Isaaka ni Rebeka kumutaambo kumukali naabi.

Currently Selected:

Khuurakikha 26: LCE

Highlight

Copy