Baroma 16

Khuusheesa Khuumaliilisi

1Naasiindikhile umukooko weefwe Foebe, uuli umwakaanisi mu baandu ba Wele, i Kengeliya, khukhwiitsa isi muli. 2Ni mumwakaanile mu lisiina ly'Omukasya, nga bakhosefu ba Wele ni bashiile khuukhola. Ni mumuwe buyeeti bwoosi bweesi kane ekoombe khukhwaama isi muli, khulwekhuuba abeele umuyeeti isi babaandu bakali, ni isi ise samweene.

3 # Bur 18.2 Ni mulome Pulisikila ni Akula, babaali baraambi bashaase mu Kristo Yesu, muli naabasheesele. 4Khulwase samweene ni khulwe Banaambo babaali bafukiilisi, isiima naabi Pulisikila ni Akula, khulwe khuwaanayo buulamu bwaabwe, khulweefwe. 5Naluundi ni musheesele bafukiilisi babaabuusanila mu ntsu iye babili abo. Musheesele umukanwa wase Epaeneto. Niye ali mutweela khu baandu babaali mu Asiya, uwanyoowa khushuukha wekyela umufukiilisi mu Kristo. 6Ni musheesele Malyamu, uraamba ni kamaani mus'iinywe. 7Musheesele balebe baase Anduroniko ni Yuniya. Nibo babaaba mu lipuusu atweela ni nase. Baamanyikhana naabi mu baarume naluundi nibo babanyoowa khuuba bakristo nga ise ishiili khushuukha ta.

8Musheesele Ambilato, umukanwa wase khulw'Omukasya. 9Musheesele Alubano, umuraambi uwashaase mu bwakaanisi bwa Kristo, n'umukanwa wase Sitakisi. 10Musheesele Apelesi, uli umwilama naabi mu khufukiilila mu Kristo. Ni musheesele ni naabo boosi be mu ntsu iya Alisitobulo. 11Ni musheesele umulebe wase, Helodioni. Musheese ni naabo boosi be mu ntsu iya Nakisosi babaali ni khufukiilila mu Mukasya.

12Musheese Tulifena ni Tolofosa, babaraambila Umukasya. Musheesele n'umukanwa wase Pelesisi, naye uraamba naabi khulw'Omukasya.

13 # Mako 15.21 Musheesele Rufusi, umanyikhanile naabi nga umwakaanisi w'Omukasya, musheesele ni maayi weewe, uyo uuli busa nga maayi wase.

14Musheesele Asingilito, Fulegoni, Herimesi, Patobasi, Heremasi, ni be buulebe boosi beesi bamenya ni nabo.

15Ni musheesele Filologasi, Yuliya, Neresi atweela n'umukooko weewe. Isheesele Olimbasi ni bakhosefu boosi beesi ali ni nabo.

16Ni musheesane nga buli mutweela akwa uwashe mu shifuba khukhosefu. Kamatuuli koosi kakafukiilila mu Kristo kabasindikhiile kimilembe.

Khuukaambila khuumalilisi

17Bebuulebe, imbakhupilisa ndi mwitsililise naabi babaandu babareera buwaangafu ni khukhwawukhanamo. Ni mwihalabe babaandu babaakhaandisa khuleekela khweesi inywe mwamala khukhwiyika. 18Khulwekhuuba babaandu babafwaana baryo sibaraambilila Kristo ta, ne akhali baraambilila kameelu kaabwe babeene. Baraambisa tsilomo tsaabwe tsitsikhongelesa, khuwombesa kimyoyo kyaabo babaashiili batoro mu khufukiilila. 19Buli muundu wamanya nga inywe ni muli babaandu babaloondelela kamakhuuwa kamalayi. Ni nase indi ni kumwikhoyo khulwe lomo yino. Ingana mwiloosele khuuba bakyesi mu khukhola bibiindu bilayi. Ni mulekhe khukhwihaambila mu khukhola bibyoonako ta, 20nio Wele nga niye isebele iye lukoosi, khaangu akho, asibiilisile Sitaani aasi, e bikele byeenywe. Bubweela bw'Omukasya weefwe Yesu Kristo bube ni nanywe.

21 # Bur 16.1 Timosewo umuraambi washaase wabasheesele. Akhaba ni balebe baase Lusiyo, ni Yasoni, ni Sosipateli, nabo babasheesele.

22Ise Telutisi, umuroni uwe baluwa yino, nabasheesele mu lisiina ly'Omukasya.

23 # Bur 19.29; 1 Kor 1.14; 2 Tim 4.20 Gayo naye washeesele. Ise imenya mu ntsu mweewe, naluundi mubweene umwo nimwo mweesi lituuli lye bafukiilisi lisaayila. Erasto, nga niye umubiikhi uwe mu shiriimba, naye wabasheesele. Akhaba Kwalito wandaayefwe, naye wabasheesele. 24Bubweela bw'Omukasya weefwe Yesu Kristo bube ni nanywe mweesi. Amiina.

Khuuloomba

25Ari lekha khuwe Wele shiriifwa. Khulwekhuuba niye unyala khubayeeta inywe nga abakumisila mu khufukiilila khwenywe, khulondekhana ni kamakhuuwa kamalayi, kakawaamba khu Yesu Kristo keesi ise nabaleekela. Naluundi niye unyala khubawandalasila mu khubiimbulilwa khwe shimoonyo sha ŋali abe shishabisibwa khumala kimiiko kimikali. 26Ne ari bwa ŋali buno bwakangululibwa khukhwaama mu shimoonyo sheesi bwabamo, bwarusibwa ibulafu. Ni khuubirira mu byaronebwa bikhosefu bye ba baŋoosi, kamanaambo koosi kamanya bwa ŋali buno, nio akile babaandu boosi baloondelele Wele uwe biilo ni biilo, nga babirira mu khufukiilila.

27Shiriifwa shibe isi Wele niye uwe kamakyesi koosi biilo ni biilo, khuubirira mu Yesu Kristo. Amiina.

Currently Selected:

Baroma 16: LPE

Highlight

Copy