Baroma 15

Ni mwikhoyese babaandi

1Ifwe babaali ni khuufukiilila khukhumala khwakhiile khuuyeeta abo babaashiili batoro mu khufukiilila khwaabwe, mu shifwo she khuuwosiina nga khubatsekhelela. 2Lekha buli mutweela khus'ifwe ekhoyese uwashe khuubirira mu bilayi byeesi khukhola, nio akile amwombakhe mu khufukiilila khweewe. 3#Zab 69.9Khulwekhuuba Kristo s'eyikhoyesa umweene ta, ne akhola nga ni sharonebwa shiri, “Tsikhomo tseesi bakhukhoma iwe, tsakwa khus'ise.” 4Khulwekhuuba buli shisharonebwa khaale, sharonebwa khulwe khuukhuleekela ifwe. Ari nio bibyaronebwa bikhosefu bikhureere ifwe khuba ni khukhwiyikina khuubirira mu khwikhalilikha ni khukhwisibwamo kamaani. 5Lekha Wele ukhuwa ifwe khukhwikhalilikha naluundi ukhwisamo ifwe kamaani, abawe inywe khukholakanila atweela, nga mulondelela Kristo Yesu, nga niye she khubonelakho. 6Nio inywe mweesi atweela, nga likono litweela mubuyile Wele, naluundi niye uli Paapa w'Omukasya weefwe, Yesu Kristo.

Kamakhuuwa Kamalayi isi Banaambo

7Buli mutweela ni ekhoyele uwashe, khulwe khuuwa Wele shiriifwa, nga Kristo n'amala khubekhoyela inywe. 8Khulwekhuuba imbaboolela inywe ndi ni Kristo ekyela umwakaanisi isi Bayudaaya ari nio okesanise bwa ŋali bwa Wele, ari nio awandalase byeesi Wele aloma nga abirira mu bakuuka beefwe. 9#2 Sam 22.50; Zab 18.49Naluundi ari nio be kamanaambo babuyile Wele khulwe shiisa sheewe. Nga bibyaronebwa bikhosefu ni biloma biri,

“Nashiryo kane ikhuyile iwe nga ndi akari mu manaambo.

Kane niimbe nga imbuyila lisiina lyoowo.”

10 # Maka 32.43 Naluundi sharonebwa shiri,

“Banaambo ni mwikhoyele atweela ni babaandu ba Wele.”

11 # Zab 117.1 Mu shifwo shishiindi bibyaronebwa biloma biri,

“Inywe be Kamanaambo kakakhali ke ba Isiraeli ta,

mweesi ni mubuyile Umukasya;

inywe babaandu boosi ni mumubuyile.”

12 # Isay 11.10 Naluundi Yisaaya eloosela khuloma ari,

“Umwitsukhulu uwa Yese aliitsa,

atsowesebwe khuuba umuwuli uwe kamanaambo,

ni Banaambo balira khukhwiyikina khwaabwe mu niye.”

13Khali Wele umweene uwe khukhwiyikina abetsusile inywe ni kumwikhoyo, ni lukoosi mu khufukiilila khwenywe, nio manya khulwe kamaani k'Omwoyo Umukhosefu mwiloosele khuuba ni khukhwiyikina.

Shishakila Paulo waarona aryo

14Bebuulebe, ise samweene ishihandalasa ndi inywe mwabeene mwetsuule buulayi, ni khumanya, naluundi namanyile ndi mwabeene khu mwabeene buli mutweela anyala khuleekela uwashe. 15Ne khu bilomo bitweela naabaronele ni bunyindaalifu mu saambo iye khubashebusa, khulwe bubweela bweesi Wele amba ise. 16Amba ise khuuba umwakaanisi wa Kristo Yesu isi Banaambo, mu khuboolela Kamakhuuwa Kamalayi ka Wele, nga umusaayi. Shino ise ishikhola nio akile Banaambo babe shiwaanwa sheesi Wele asiima, nga Umwoyo Umukhosefu abarobola khuuba ba Wele.

17Nashiryo indi ni shishikila nebuyila samweene khulwe buraambi bwase bweesi ikholela Wele, nga ndi atweela ni Kristo Yesu. 18Kane imbe umunyindalifu inganikhe khwibyo byonyene byeesi Kristo amalile khukhola khuubirira mus'iise, nga nikhwo khuraangilila Banaambo banyalisa khulondelela Wele. Ibyo Kristo wabikholile nga abirira mu byeesi ise ikholile ni byeesi ise inomile, 19nga araambisa kamaani ke bibibonekha ni bye kamakaanga, ni khulwe kamaani k'Omwoyo Umukhosefu. Shishikila khukhwaama i Yerusalemu, ni khukhwibotokhelela ilala mu Ilikumu, naboolela Kamakhuuwa Kamalayi kakawaamba khu Kristo. 20Shitsilililwa shase busheele shaba she khulaangilila kamakhuuwa kamalayi, mu bifwo mweesi bashiili khumanya Kristo ta. Khulwekhuuba ise nakana khunanikha mu shifwo sheesi ukuundi ashiili khunanikha ta.

21 # Isay 52.15 Ne akhali ndi ise ikhola nga ni sharonebwa shiri,

“Abo babaashiili khuwulila khu biwaamba khu Kristo ta, bali mubona,

ni naabo babaashiili khuwulila khu bimuwaambakho ta, balimanya.”

Paulo arengekharengekha khuukyeniya i Roma

22 # Roma 1.13 Ni khulwe ilomo yino, kimiluundi kimikali shayishinjilila ise khukhwiitsa isi muli. 23Ne ari khukhwaama nga ni malile buraambi bwase mu bisiintsa bino, naluundi khukhwaama nga abe namalile kimiiko mikali nga nikoomba khukhwiitsa khu babona, 24ari nambaasa khubabona nga ndi khu lukyeendo lwase, nga intsya i Sipeyini. Namanyile ndi lwanyuma lwe khuuba ni nanywe khafwiiti, kane munjeete nio niloosele mu lukyeendo lwase. 25#1 Kor 16.1-4Ne ari indikho intsya i Yerusalemu, nga nakaanisa buyeeti isi bakhosefu ba Wele. 26Khulwekhuuba babaandu be Masedoniya ni be Akaya baboone bari shili shilayi khubukula khu biindu byaabwe bayeete batweela khu bakhosefu ba Wele babaali mu Yerusalemu babaali bataambi. 27#1 Kor 9.11Nibo babeene babaakhalawo khukhola baryo. Ne nga washimenielesile, bali ni likatala lye khuyeeta babaandu be Yerusalemu. Khukhwaama nga ari bali shitweela ni Banaambo mu khukabanana tsikhabi tse mu mwoyo khukhwaama isi Wele, nabo shandyashiile babakabilekho tsikhabi tsye bibiindu byeesi bali ni nabyo. 28Nashiryo nindiba nga namalile shino, naluundi nga namalile khubakaanisa byeesi babaabuusanisiile, indibirira isi inywe muli nga intsya i Sipeyini. 29Ne namanyile ndi nga niitsa isi muli, indibareereera tsikhabi tsya Kristo mu bwitsufu.

30Indikho mbaloomba inywe be buulebe, indi khulw'Omukasya weefwe Yesu Kristo, ni khuukana khweesi Umwoyo areera, mukhakekho naabi muntsitubaasekho munoombele ise isi Wele. 31Ise ingana munoombele indi ni babaakhafukiilila mu Wele ta be mu Yuda balekhe khukhuntsolisakho ise bukosi bwoosi ta. Naluundi ndi nio bakhosefu ba Wele be Yerusalemu bafukiilise buraambi bwase. 32Noola abe Wele wakanile, shino shikile niitse isi muli nga ndi ni kumwikhoyo. Naluundi ndi nio mu khubakyeniyila inywe, nase ifune kamaani. 33Lukoosi lulwaama isi Wele lube ni nanywe mweesi. Amiina.

Currently Selected:

Baroma 15: LPE

Highlight

Copy