Matayo 5

Yesu aleekela nga ali khu Lukiingi

1Aryo Yesu n'abona kamatuuli ke babaandu, waaniina khu lukiingi, wekhala aasi. Baleekelwa beewe beetsa is'aali, 2waarakikha khuubaleekela nga aloma ari:.

Kumwikhoyo kwa ŋali

(Luka 6.20-23)

3“Bali n'ikhabi ibo babaali bataambi mu mwoyo, lwekhuuba Buyiinga bwe mwikulu bubwaabwe.

4 # Isay 61.2 “Bali n'ikhabi ibo babaali mu mutaambo, lwekhuuba balikhoyesebwa.

5 # Zab 37.11 “Bali n'ikhabi ibo babaali bawolu, lwekhuuba baliiba basikha be shiibala.

6 # Isay 55.1,2 “Bali n'ikhabi ibo babaali intsala ni bulesa bwe khuukhola byeesi Wele akana, lwekhuuba Wele alibekusila ilala.

7“Bali n'ikhabi ibo babaali be shiisa isi babaandu babaandi, lwekhuuba nabo Wele alibawaambila shiisa.

8 # Zab 24.3,4 “Bali n'ikhabi babaali bakwalaafu mu mwoyo, lwekhuuba balibona Wele.

9“Bali n'ikhabi ibo babaraambilila lukoosi, lwekhuuba balilaangibwa babaana ba Wele.

10 # 1 Pet 3.14 “Bali n'ikhabi ibo beesi babaandu bakubyeenga lwe bukwalaafu, lwekhuuba Buyiinga bwe mwikulu bubwaabwe.

11 # 1 Pet 4.14 “Inywe muli n'ikhabi, babaandu ni kane babaakhomatsake, babakubyeenge, luundi ni kane babakanikhekho mu lomo yoosi imbi lwe khuubafunisa ise. 12#2 Kim 36.16; Bur 7.52Nimwikhoye, luundi mwitikite, lwekhuuba kumukheemba kweenywe mwikulu mukali, lwekhuuba ni baŋoosi babaabanyoowa inywe baabakubyeenga musaambo nyeneyo.

Kumuunyu naluundi Buwaanga

(Mako 9.50; Luka 14.34-35)

13 # Mako 9.50; Luka 14.34,35 “Inywe muli nga kumuunyu kwe shiibala. Ne kumuunyu ni kuwamo itsamu, itsamu iyo yisibwamo iryeena luundi? Kuba sikushaakha luundi ta, khurusakho kutuumibwa ibulafu, ni babaandu bakusaambakilila.

14 # Yok 8.12; 9.5 “Inywe muli buwaanga bwe shiibala. Shiriimba shishombekhebwa khu lukiingi sishinyala khuubisibwa ta. 15#Mako 4.21; Luka 8.16; 11.33Namwe mbaawo umuundu uwaambisa itaala, waakifunikhilila mu shiipo ta, ne akira khu shisiindi khu ngaaki nio yaaburukhila buli mutweela uli mu ntsu. 16#1 Pet 2.12Musaambo niyo ndweela, khayo buwaanga bwenywe bwaaburukhe buryo mu moni tsye babaandu, nio babone buraambi bweenywe buulayi, baruuye Paapa weenywe uuli mwikulu.

Bibiwaamba khu makaambila ka Musa

17“Mukhambaasa muri ise neetsa khurusawo kamakaambila ka Musa namwe khuuleekela khwe baŋoosi ta. Ise sinayitsa khuubirusawo ta, ne njeeba khuubyoolelesa busa. 18#Luka 16.17Lwekhuuba ilala imbaboolela ndi, likulu ni shiibala biliwawo, ne mbaawo ni khanukuta na khatweela, namwe kharonyesi mu makaambila ka Musa, bibiilirusibwawo ta, khukhwoolesa nga byoosi byoolelele. 19Uyo yeesi ufuniaaka litweela khu makaambila kano, ikhaba lilyakamayo bufwiiti, luundi waleekela babaandi khuukhola baryo, naye aryo alilaangibwa khuuba ufuura bufwiiti mu Buyiinga bwe mwikulu. Ne buli mutweela ukana akholatsake byeesi kamakaambila ka Musa kaloma, luundi waaleekela babaandi khuukhola baryo, alilaangibwa umukhulu mu Buyiinga bwe mwikulu. 20Lwekhuuba imbaboolela ndi bukhosefu bweenywe ni bulilekha khufuurisakho bwe baleekeli be kamakaambila ka Musa, ni Bafarisaayo, simulinjila na khafwiiti mu Buyiinga bwe mwikulu ta.

Khuuleekela khu bye lirima

(Luka 12.57-59)

21 # Luky 20.13; Maka 5.17 “Inywe mwaawulila nga babaandu be khaale ni baabaloma bari, ‘Ukheera ta, n'umuundu yeesi uwiira alikhalilwa kumusaango.’ 22Ne ise imbaboolela ndi, umuundu yeesi urunyila yaayawe, alikhalilwa kumusaango, ni nooyo ukana alaangatsake yaayawe ari, ‘Iwe s'ulimo kamakesi ta,’ alireerewa mu lukhobo, ni nooyo ukana alomatsake yaayawe ari, ‘Iwe umusilu,’ aliiba mu shikosi she khutuumibwa mu mulilo kukukhasima ta.

23“Nashiryo, n'uba nga uyila shiwaanwa shoowo khu sheeso, ne washebulila uri yaayawo akhulikho ni lomo yoosi, 24lekha asheeselo awo shiwaanwa shoowo, ukoboleyo khaangu unyoowe utubaane ni yaayawo, nio ukobole uweyo shiwaanwa shoowo.

25“Fukiilisana khaangu n'umuundu utsya khukhuwaabila, nga mushiili khu ntsila. Ne nga akhukhola uryo ta, uyo uutsya khukhuwaabilayo, akhuwaanayo isi umukayi, n'umukayi naye kane akhuwaaneyo iwe isi umusilikhale, khuukhura iwe mu mapuusu. 26Ilala ikhuboolela ndi, s'uliruramo ta, khukhwoolesa n'ulisasula liwumule limalilisi lye likobi lyoowo.

Khuuleekela khu bye buyeeyani

27 # Luky 20.14; Maka 5.18 “Inywe mwaawulila nga ni shalomebwa shiri, ‘Ukhayeyana ta.’ 28Ne ise imbaboolela ndi, umuundu yeesi ulolela umukhasi ni khumwiikoomba aba waamalile khuuyeyana ni naye mu mwoyo kweewe. 29#Mat 18.9; Mako 9.47Noola imoni yoowo iye khu lubeka lulayi ikhuyila mu khwoneka, kirusemo, ukituume aleeyi. Shiba shiminyisa buulayi, shitweela khu bisiintsa bye kumubili kwoowo khuuhela, khufuurisa kumubili kwoowo kwoosi khuutsya mu mulilo kukuukhasima ta. 30#Mat 18.8; Mako 9.43Naluundi kumukhono kwoowo kwe khu lubeka lulayi ni kuba nga kukhuyila mu khwoneka, kuremekho ukutuume aleeyi. Shiminyisa bulayi shitweela khu bisiintsa bye kumubili kwoowo khuhela, khufuurisa kumubili kwoowo kwoosi khuutsya mu mulilo kukukhasima ta.

Khuuleekela khu bye khuwoona umukhasi

(Matayo 19.9; Mako 10.11-12; Luka 16.18)

31 # Maka 24.1-4; Mat 19.7; Mako 10.4 “Luundi shalomewa shiri, ‘Umuundu yeesi n'aaloba umukhasi weewe, akhila khuumuwa ibaluwa iye khuumuloba.’ 32#Mat 19.9; Mako 10.11,12; Luka 16.18; 1 Kor 7.10,11Ne ise imbaboolela ndi, buli muundu yeesi ukana awoonatsake umukhasi weewe, akhali lwe buyeyani, aba waamwikyelisile umuyeyani, n'umuundu uyila umukhasi uwawoonebwa, aba naye wayeyaane.

Khuuleekela khu bye khukhwitsuba

33 # Lev 19.12; Bala 30.2; Maka 23.21 “Luundi mwawulila nga babaandu be khaale ni baababoolela bari, ‘Ukhetsubatsaka bye bubeeyi ta, ne wolelesa bibitsubo byoowo byeesi wetsuba isi Umukasya.’ 34#Yak 5.12; Isay 66.1; Mat 23.22Ne ise imbaloma ndi, ukhetsuba na khafwiiti khoosi ta. Ukhetsubila likulu ta, lwekhuuba nilyo shitsoloŋo sha Wele; 35#Isay 66.1; Zab 48.2namwe shiibala, lwekhuuba nikhwo khweesi alaambisa bikyele byeewe; namwe isi Yerusalemu, lwekhuuba nisho shiriimba sh'Omuyiinga umukhulu. 36Namwe ukhetsubila kumurwe kwoowo ta, lwekhuuba s'unyala khukalusa lutsuune lwoowo lutweela khuuba luwaanga namwe lumali ta. 37Ne lekha ibyo byeesi uloma uri, ‘E e,’ bibatsake ‘E e,’ ni ‘Taawe,’ abatsake ‘Taawe’. Ni bibiindu bibiindi bibifuurakho awo, biba byaama isi umusiku.

Khuuleekela khu bye khukhwiiliyaasa

(Luka 6.29-30)

38 # Luky 21.24; Lev 24.20; Maka 19.21 “Mwawulila nga ni shalomewa khaale shiri, ‘Imoni iliyasibwa ni moni, ni liliino liliyasibwa ni liliino.’ 39Ne ise imbaloma ndi, mukhakhingililatsaka umuundu yeesi ubakhola buubi ta. Umuundu yeesi n'akhuupa luuyi khu lusaya lwoowo lwe khu lubeka lulayi,#5.39 Abe umuundu khukhuupa luuyi khu lusaya lwe khu lubeka lulayi shili shishiindu shiibi naabi. umuyuusila lwe khu lubeka lunyeletsi nalwo. 40Ni nooyo ukana khukhuwabila bari nio ayile isaati yoowo, n'umulekhe ayile ni kooti nayo. 41Naluundi nga umuundu waakhuwanyinyile khuutsya i kilomita ndweela, tsya ni naye tsi kilomita tsibili. 42Umuundu yeesi n'akhuloomba shishiindu, umuwatsaka, ni nooyo ukana khukhwiwolakho, ukhamwisisakula ta.

Khuukana basiku

(Luka 6.27-28,32-36)

43“Inywe mwaawulila nga ni shalomewa shiri, ‘Kanatsaka umwesanwa woowo, ubiyile umusiku woowo.’ 44Ne ise imbaloma ndi, ni mukanaatsake basiku beenywe, luundi muloombele ibo babaabakubyeenga, 45nio mube babaana ba Paapa weenywe uli mwikulu. Lwekhuuba inyaanga yeewe akyaburusila babaakhali babeyikinwa ta ni babeyikinwa, ni ifula yeewe yakhupila babaakhola biilayi ni babaakhakhola biilayi ta. 46Ne noola mukana abo babaabakana bonyene, mulifuna shiwaanwa shiina? Ni baabuusanisi be kumusolo nabo sibakhola baryo? 47Ne ni kane musheesatsake bayaaya beenywe bonyene, babaandu babaandi inywe mubafuurisakho shiina? Ikhaba ni bakhafukiilila nabo sibakhola baryo? 48#Lev 19.2; Maka 18.13Ni nashiryo, inywe mwaakha mwaba bakwalaafu nga Paapa weenywe uli mwikulu n'ali umukwalaafu.

Currently Selected:

Matayo 5: LPE

Highlight

Copy