Matayo 4
4
Khuukhakibwa khwa Yesu
(Mako 1.12-13; Luka 4.1-13)
1 #
Heb 2.18; 4.15 Lwanyuma Yesu waayilibwa n'Umwoyo Umukhosefu mu mubiimbi khuukhakibwa ni Sitaani. 2Ne n'amala khuubuya intsala khuumala bifukhu kamakhumi kane kumuusi ni shiilo, intsala yamulya. 3Umukhonjelesi weetsa is'ali, waamuloma ari, “Iwe noola uli Umwaana wa Wele, lakila kamabaale kano kekyelemo biilyo.”
4 #
Maka 8.3
Yesu welamo ari, “Sharonebwa shiri, ‘Umuundu s'aba mulamu lwe biilyo byonyene ta, ne nabuli lomo iyaama mukhanwa mwa Wele.’ ”
5Lwanyuma Sitaani ndi waamuyila mu shiriimba shikhosefu, waamwimisa khu litikiiyi lilifuura buleeyi lye Lisaayilo Likhulu, waamuloma ari, 6#Zab 91.11,12 “Iwe noola uli Umwaana wa Wele, suna aasi, lwekhuuba sharonebwa shiri,
‘Wele alilakila bamalayika beewe ibyo bibikhuwaambakho khwiiwe,
nabo balikhukaama mu mikhono kyaabwe,
nawe ulekhe khukhwituya shikyele shoowo khwibaale ta.’”
7 #
Maka 6.16
Yesu waamwiilamo ari, “Luundi ndi nasho sharonebwa shiri, ‘Ukhakhakatsaka Umukasya Wele woowo ta.’ ”
8Luundi ndi Sitaani waayila Yesu khu lukiingi luleeyi naabi, waamwokesa buyiinga bwoosi bwe mu shiibala, ni shiriifwa shabwo. 9Aryo kila Sitaani aloma Yesu ari, “Kane ikhuwe ibyo byoosi iwe n'ukane ufukhame aasi untsisaaye.”
10 #
Maka 6.13
Yesu waamuloma ari, “Rurawo tsya, Sitaani. Lwekhuuba sharonebwa shiri, ‘Wisaayatsaka Umukasya Wele woowo, luundi umwakaanisatsake niye yenyene.’ ”
11Ni abweenewo, Sitaani waalekha Yesu, ni bamalayika beetsa bamwakaanisa.
Yesu asimama buraambi bweewe mu Galilaaya
(Mako 1.14-15; Luka 4.14-15)
12 #
Mat 14.3; Mako 6.17; Luka 3.19,20 Yesu n'awulila ari Yokana Umubatisa baamuboyile mu mapuusu, welayo i Galilaaya. 13#Yok 2.12Nga waarurire mu Nazareesi, waatsya waamenya mu Kaperunaumu, shiriimba shishesaane ni inyaantsa ye Galilaaya, mu bisiintsa bya Zebuloni ni Nafutaali. 14Shino shakholekha khukhwoolelesa byeesi umuŋoosi Yisaaya aaloma ari,
15 #
Isay 9.1,2 “Iwe shishaalo sha Zebuloni ni shishaalo sha Nafutaali,
intsila ye khuutsya khu nyaantsa, shanjelekha wa Yorudaani,
i Galilaaya she Banaambo
16Babaandu babaamenya mu shilima,
baabone buwaanga bukali;
ni naabo babekhala mu shaalo she mu shisiisa she khuufwa,
buwaanga bwaababurukhiile.”
17 #
Mat 3.2
Khukhwaamila khu mbuka inyene iyo, Yesu waarakikha khuuboolela Kamakhuuwa Kamalayi ari, “Ni mwibiiyise bibyoonako byeenywe, lwekhuuba Buyiinga bwe mwikulu buli aambi.”
Yesu alaanga baleekelwa bane
(Mako 1.16-20; Luka 5.1-11)
18Yesu n'aba nga akyeendela khu ndulo khwe nyaantsa Galilaaya, waabona be buulebe babili, Simoni uwalaangiwa Petero, ni yaayawe Andereya nga bamwaata butiimba bwaabwe khu nyaantsa khuuloba, lwekhuuba baaba baalobi be tsinyeeni. 19Yesu waabaloma ari, “Ni mwiitse munondelele, ni nase ndibakalusa khuuba babaareera babaandu isiindi.” 20Khaangukho, baalekha butiimba bwaabwe, baaloondelela Yesu.
21Aryo Yesu welooselayo iburaangisi, waabona be buulebe babaandi babili, Yakobo ni Yokana, babaana ba Zebedaayo. Bano baaba bali mwikhoŋolo atweela ni paapa waabwe Zebedaayo, nga baŋoonaŋoona butiimba bwaabwe. Nabo Yesu wabalaanga. 22Khaangukho, baalekhawo likhoŋolo ni paapa waabwe, baamuloondelela.
Yesu aleekela naluundi awonesa
(Luka 6.17-19)
23 #
Mat 9.35; Mako 1.39 Aryo Yesu waatsya mu Galilaaya mwoosi, nga aleekela mu ntsu tsye khukhwisaayilamo, nga aboolela Kamakhuuwa Kamalayi ke Buyiinga luundi nga awonesa buli ndwaale yoosi ni butsiina mu baandu. 24Lubuyi lweewe lwafuma mu shiibala sha Siriya mwoosi, ni babaandu bareera babaandu babaaba balwaalile tsindwaale tsitsikhali ndweela ta, babataambisibwa ni kimisaambwa, babaaba bakwa tsifubu, ni babaakataala, naye Yesu waabawonesa boosi. 25Kamatuuli ke babaandu kaamulondelela nga kaama i Galilaaya, ni Dekapoli, Yerusalemu, Yuda, ni be mu byaalo bye shanjelekha wa Yorudaani.
Currently Selected:
Matayo 4: LPE
Highlight
Share
Copy
Want to have your highlights saved across all your devices? Sign up or sign in
The Bible in Lumasaaba © Bible Society of Uganda, 2016.
