Matayo 2

Baakeni khukhwaama i Bwamanyaanga

1Nga Yesu wasaalikhile mu Beselehemu shiriimba she mu Yuda, mu bifukhu bya Herode umuyiinga, aabawo basaani be kamakhula mu bye tsinieniesi babaama i Bwamanyaanga, babiitsa i Yerusalemu. 2Beetsa nga bareeba bari, “Umwaana usaalikhile khuuba umuyiinga we Bayudaaya, ali waheena? Khwaboone inieniesi yeewe i Bwamanyaanga kila khwiitsile khuumwisaaya.”

3Ne umuyiinga Herode n'awulila shino, weyembelela naabi, niye atweela ni be mu Yerusalemu boosi. 4Aryo wabuusanisa basaayi bakhulu be babaandu boosi atweela, ni baleekeli be kamakaambila ka Musa, waabareeba ari, “Kristo alisaalibwa waheena?”

5Nabo baamwiilamo bari, “Mu Beselehemu shiriimba she mu Yuda, lwekhuuba shiryo nga ni sharonebwa n'umuŋoosi shiri:

6 # Miik 5.2 ‘Ni nawe Beselehemu, shishaalo sha Yuda,

s'ulikho mukyeekhe nakhari ta mu bawuli ba Yuda,

lwekhuuba umuwuli ulyaayisa babaandu baase ba Isiraeli

alyaama mwiiwe.’”

7Lwanyuma Herode walaanga basaani tsana be kamakhula mu bye tsinieniesi mu shimoonyo busa, wabareebelesa nga akana amanye imbuka shiina esi inieniesi yababonekhelamo. 8Aryo waabarumana i Beselehemu, nga abaloma ari, “Ni mutsye mureebelese nga muwentelesa bulayi esi umwaana ali. Ne nga mwaamunyoolile, nase mwiitse muamanyise, nio manya nase naatsya khumwisaaya.”

9Baryo ni baamala khuuwulilisa byeesi umuyiinga aloma, beloosela mu ntsila yaabwe. Ne bona ndi inieniesi tsana yeesi baabonela i Bwamanyaanga, yaabaraangilila luundi khukhwoolesa ni yeetsa yeemikha angaaki e shiifwo mweesi umwaana aba. 10Ne ni baabona inieniesi, betsusibwa ni kumwikhoyo. 11Baryo nga benjiile mu ntsu, baabona umwaana ni Malyamu maayi weewe, baakwa aasi, besaaya umwaana. Lwanyuma baakangulula tsisutilo tsaabwe, baamuwa biwaanwa bye zaabu, ni bubaane, ni bye khukhwiyakha bibiwunya bulayi. 12Nga bakana khwiilayo, Wele waabareewulila mu marooro ari balekhe khukhwiilayo isi Herode ta, baryo beelayo iwaabwe mu ntsila ikiindi.

Khukhwiilukhila i Misiri

13Lwanyuma nga batsiile, malayika w'Omukasya waabonekhela Yusufu mu marooro, nga amuloma ari, “Yinyukha, uyile umwaana ni maayi weewe, mwilukhile i Misiri, mumenyeyo khukhwoolesa ise n'indikhuboolela. Lwekhuuba Herode ali aambi atsya khuweentsa umwaana khuumwiira.” 14Aryo Yusufu wenyukha, waayila umwaana ni maayi weewe mu shilo baatsya i Misiri. 15#Hos 11.1Ibweene iyo niyo isi aaba khukhwoolesa Herode n'afwa. Shino shakholekha khukhwoolelesa sheesi Umukasya aalomela mu muŋoosi ari, “Nalaanga umwaana wase khukhwaama mu Misiri.”

Khukhwiiribwa khwe babaana

16Aryo Herode n'abona ari basaani be kamakhula mu bye tsinieniesi baamukhaliile kamakyesi, waarafuwa naabi. Waalakila khukhwiira babaana besiinde boosi mu Beselehemu, ni biifwo bibyesaanewo, baboolesa kimiiko kibili ni khukhwiila aasi, nga emikha khu mbuka yeesi basaani be kamakhula tsana baamuboolelamo. 17Musaambo iyo, sheesi umuŋoosi Yeremiya aarona shoolelela shishiloma shiri,

18 # Yer 31.15 “Likono lyawulilikha mu Rama.

Khukhwiilootsa ni khusola khukali,

Lakeri nga alilila babaana beewe,

wekaana khukhwikhoyesebwa khwoosi,

lwekhuuba boosi bahela.”

Khuukobolayo i Nazareesi

19Lwanyuma lwa Herode khuufwa, bona, malayika w'Omukasya waabonekhela Yusufu i Misiri, 20nga amuloma ari, “Yinyukha uyile umwaana ni maayi weewe, mukoboleyo mu shiibala sha Isiraeli, lwekhuuba abo babaaba bakhakakho khuuweentsa buulamu bw'omwaana baafwa khaale.” 21Aryo Yusufu wenyukha, waayila umwaana ni maayi weewe, baatsya mu shiibala sha Isiraeli. 22Ne Yusufu n'awulila ari Arukelawo waayila mu bikyele bya paapawe Herode nga niye uwula Yuda bwoosi, waarya khukhwiilayo. Wele waamureewulila mu marooro, aryo waarurayo waatsya mu shaalo she Galilaaya. 23#Mako 1.24; Luka 2.39; Yok 1.45Waatsya waamenya mu shiriimba shilaangibwa Nazareesi. Shiryo, shilomo shishalomebwa ni baŋoosi shinyale khukhwoolelela shiri, “Alilaangibwa umu Nazareesi.”

Currently Selected:

Matayo 2: LPE

Highlight

Copy