Luka 4

Khukhakibwa khwa Yesu

(Matayo 4.1-11; Mako 1.12-13)

1Yesu wakobola nga ama khu luutsi Yorudaani nga witsuule Umwoyo Umukhosefu; Umwoyo uyo wamuraangilila wamuyila mu mubiimbi, 2ibweene iyo wamalayo bifukhu kamakhumi kane nga akhakibwa ni Sitaani. S'alyakho khakhaandu khoosi mu bifukhu ibyo ta, biryo nga byaweelekho intsala yamulya.

3Sitaani wamuloma ari, “Ilala iwe noola uli Umwaana wa Wele, lomela libaale lino likyele biilyo.”

4 # Maka 8.3 Yesu wamwiilamo ari, “Sharonebwa shiri, ‘Umuundu s'akana abatsake umulamu lwe biilyo byonyene ta.’ ”

5Lwanyuma Sitaani wamuniinisa khu shifwo shisheyingakho angaaki mu mbuka njeekhe busa, wamwokesa buyiinga bwoosi bwe mu shiibala. 6Sitaani waloma Yesu ari, “Kane ikhuwe bunyala ibwo bwoosi, ni shiriifwa shishiilimo shoosi, lwekhuuba byayimambisibwa ise, ni nase ngabila buli muundu yeesi isi ngana. 7Nashiryo singa ufukhama aasi wantsisaaya, bino byoosi kane bibe bibyoowo.”

8 # Maka 6.13 Yesu wamwiilamo ari, “Bibyaronebwa biloma biri, ‘Wisaayatsaka Umukasya Wele woowo, umwakaanisatsake niye yenyene.’ ”

9Sitaani wamuraangilila luundi wamuyila i Yerusalemu, wamwimisa khu ngaaki khu litikiiyi lilifuura buleeyi lye Lisaayilo Likhulu, wamuloma ari, “Iwe noola uli Umwaana wa Wele, suna aasi awo. 10#Zab 91.11,12Lwekhuuba sharonebwa shiri, ‘Wele alilakila bamalayika beewe bakhutseete bulayi.’ 11Naluundi sharonebwa shiri, ‘Balikhusutila angaaki mu makhono kaawe, nio ulekhe khukhwituya shikyele shoowo khwibaale ta.’ ”

12 # Maka 6.16 Yesu wamwiilamo ari, “Sharonebwa shiri, ‘Ukhakhakatsaka Umukasya Wele woowo ta.’ ”

13Sitaani n'amala khumukhakilisa musaambo tsoosi, wamulekhakho waatsya, khukhwoolesa luundi khu mbuka ikiindi.

Yesu asimama buraambi bweewe i Galilaaya

(Matayo 4.12-17; Mako 1.14-15)

14Abweenewo, nga ali ni kamaani k'Omwoyo Umukhosefu, Yesu wakobola i Galilaaya. Lubuyi lweewe lwafuma osi mu byaalo bibibotokhelelewo. 15Waleekela mu ntsu tsaabwe tse khukhwisaayilamo, nga boosi bamubuyila.

Yesu bamwikaana i Nazareesi

(Matayo 13.53-58; Mako 6.1-6)

16Lwanyuma Yesu weetsa i Nazareesi isi atsowela, waatsya mu ntsu iye khukhwisaayilamo, khu shifukhu sha Sabato, nga niyabatsaka isaambo yeewe. Wenyukha khusoma bibyaronebwa bikhosefu. 17Bamuwa buurone bw'omuŋoosi Yisaaya. Wabikhula shitabo, wanyoola shisiintsa isi sharonebwa shiri:

18 # Isay 61.1,2 “Umwoyo w'Omukasya andi khwiise,

Lwekhuuba wayintsukhakho kamafura,

khuboolela bataambi kamakhuuwa kamalayi.

Waandumile khuuboolela babowe ari kane balekhuuliwe,

n'isi baabofu ari kane babimbuliwe tsimoni,

ni khuulekhuula abo boosi babamiinilisibwa,

19ni khuuboolela babaandu kumwikhoyo kweesi

Umukasya atsya khutimiililamo babaandu beewe.”

20Aryo Yesu waafuumba buurone tsana, waabukoboselayo umwakaanisi, wekhala aasi. Babaandu boosi babaabawo mu ntsu iye khukhwisaayilamo, bamwomiisilakho tsimoni. 21Aryo waarakikha khuukanikha nga ababoolela ari; “Bibyaronebwa bikhosefu bino byoleleele lwe shaleelo, nga ni muwuliile ni kamaru keenywe.”

22Boosi baamulomakho bulayi, beyaanga lwe bilomo bilayi bibyetsula shiisa byeesi aakanikha. Baareeba bari, “Uyu s'ali niye umwaana wa Yusufu?”

23Yesu waabaloma ari, “Ilala mulinomela lusimo luno muri, ‘Umukaangi, yiwonesa wamweene.’ Luundi mulinomela muri, ‘Kholelela ni na ano, mu shiriimba shoowo, ibyo byoosi byeesi khwawulila nga ubikholela i Kaperunaumu.’ ”

24 # Yok 4.44 Yesu waalooselakho ari, “Ilala imbaboolela indi, mbaawo umuŋoosi isi babaandu be mu shiriimba she waabwe bafukiilisilamo ta. 25#1 Bay 17.1Ne muŋali imbaboolela ndi, abawo banamulekhwa bakali mu Isiraeli, mu bifukhu bya Eliya, mu mbuka yeesi likulu lyekaliwilawo ifula yalekha khukwa ta, khumala kimiiko kitaru ni kimyeesi kisesaba, ni ntsala ngali yaakwa mu shaalo shoosi. 26#1 Bay 17.8-16Ne Eliya s'arumiwa isi ikhaba na mutweela khu nibo ta, khurusakho isi namulekhwa we Zarefasi mu shaalo sha Sidoni. 27#2 Bay 5.1-14Luundi aabawo babaandu bakali mu Isiraeli babalwaala bulwaale bwe bikeenge, mu bifukhu by'omuŋoosi Elisa, ne mbaawo namutweela khu nibo uwaŋoonebwakho ta, khurusakho Nayamani yenyene, uwaba umu Siriya.”

28Babaandu boosi babaaba mu ntsu iye khukhwisaayilamo ni bawulila bilomo bino, betsula lirima. 29Baryo benyukha basindikhilisa Yesu khumurusa ibulafu we shiriimba, baamuyila khu ndulo khwe lukoongo khweesi shiriimba shaawe shombekhewa, nga bakana bari bamukholowe ilumya. 30Ne niye wababiramo boosi akari, wakyeenda waatsya.

Umuundu ulikho shisaambwa shiibi

(Mako 1.21-28)

31Lwanyuma Yesu weekha i Kaperunaumu, mu shiriimba she Galilaaya, khu Sabato waleekela babaandu. 32#Mat 7.28,29Babaandu beyaanga lwe saambo ye khuleekela kweewe, lwekhuuba aleekela ni bunyala.

33Muntsu iye khukhwisaayilamo mwabamo umusaani uwabakho shisaambwa shiibi, wayokesela angaaki ni likono likali ari, 34“Wo yaaya, iwe Yesu we Nazareesi, ukhufunisa ifwe shiina? Wetsile khukhuwesa ifwe? Ise nakhumanya iwe nga n'uli, Uli Umukhosefu wa Wele.”

35Yesu wakhookhela shisaambwa shiibi ari, “Sila busa umururekho!.” Shiryo shisaambwa shakhupa umusaani aasi akari mu baandu, shaamururakho nga sishamukholilekho buubi bwoosi ta.

36Babaandu boosi beyaanga busa, baloma bonyene na bonyene bari, “Khuleekela shiina khuno? Lwekhuuba ni bunyala ni kamaani, umusaani uyu alakila kimisaambwa kimibi khurura mu baandu!” 37Karyo Kamakhuuwa kano kakawaamba khu Yesu kasalanila mu byaalo byoosi bibibotokhelelewo.

Yesu awonesa babaandu bakali

(Matayo 8.14-17; Mako 1.29-34)

38Yesu wenyukha waarura mu ntsu iye khukhwisaayilamo, wenjila mu ntsu ya Simoni. Ne maayi umumasaala wa Simoni aba mulwaale nga alikho anikina, nga kamayima kamuwaambile, babaandu bekontselela Yesu bari amuyeete. 39Aryo Yesu waatsya weema isi umutsiina, wakhookhela kamayima, lubaluba kamururakho. Khaangukho wenyukha wabakholela she khulya.

40Lwanyuma angoloobe awo nga inyaanga yakwiile, ibo boosi babaaba ni babaandu baabwe nga balwaalile tsindwaale tsikhali ndweela ta, babareera isi Yesu, naye waatsya nga arakho kamakhono keewe khu buli mutsiina, wabawonesa boosi. 41Ni kimisaambwa kimibi kyaba nga kirura mu baandu bakali nga kiyokesa kiri, “Iwe Uli Umwaana wa Wele.” Yesu wakhookhela kimisaambwa nga s'akifukiilila khuloma ta, lwekhuuba kyamanya kiri niye Kristo.

42Kumutikhinyi mu mamilimili, Yesu waarura mu ntsu tsana, waatsya mu shifwo shikhalimo babaandu ta. Ne babaandu bamuweentsa, ne ni bamunyoola, balekha khukana bari abarurekho ta. 43Ne niye wabeelamo ari, “Shintsakhila khuboolela kamakhuuwa kamalayi ke Buyiinga bwa Wele mu biriimba bibiindi nabyo, lwekhuuba isho nisho shishakila Wele wanduma ise mu shiibala.”

44Aryo weloosela khuleekela mu tsintsu tsye khukhwisaayilamo tse Yuda.

Currently Selected:

Luka 4: LPE

Highlight

Copy