Khuurakikha 38

Yuda ni Tamari

1Yaba khu mbuka iyo, Yuda waarura mu bandaaye, waatsya khuumenya n'umusaani uwe Adulamu, abe isi balaanga bari Hira. 2Nga ali ibweene iyo, Yuda waakaananayo n'umukhasi umu Kanaani, abe isi balaanga bari Shuwa. Yuda waamuyila, waakona ni naye, 3waaba shisoombo, lwanyuma wasaala umwaana umusiinde waamutwiikha lisiina ari Eri. 4Lwanyumakho ndi waaba shisoombo shishiindi, waasaalayo umwaana ukuundi umusiinde, waamutwiikha lisiina ari Onani. 5Indi luundi waasaalayo umwaana umusiinde ukuundi, waamutwiikha lisiina ari Shela. Shiifwo mweesi aasaalilamwo umwaana yuno shaba bari Kezibu.

6Nga umusooleli weewe Eri waamalile khuutsowa, Yuda waamukhweela umukhasi, ni lisiina lyeewe abe bari Tamari. 7Ne shonyene ndi umusooleli wa Yuda Eri yuno, waaba umwoonaki luukali mu moni ts'Omukasya, shaakila Umukasya waamukhoonya.

8Lwanyuma lweebyo, Yuda waalomela Onani, waandaaye wa Eri ari, “N'utsye ukone n'umukhasi wa waandaayo uyo, unyale khukhwoolelesa buufunisi bw'omuseetsa isi umukhasi wa waandaayo uwafwa, nio manya umufunileyo lisaaye.” 9Ne shonyene ndi Onani n'ashimanya ari babaana abo sibatsya khuba babeewe ta, abe buli lweesi akonelakho n'umukhasi uyo, arusayo waatsukha ibulafu aasi, ari nio alekhe khumufunisa shisoombo khuusaalila waandaaye babaana ta. 10Isho sheesi aakhola shalekha khusangaasa Wele ta. Aryo naye Wele waamukhoonya. 11Lwanyuma Yuda waalomela umukhaana weewe umumasaala tsana ari, “Niwiileyo umenye nga namulekhwa muungo mwa paapa woowo, khukhwoolesa umusooleli wase Shela n'alitsowa akhuyile.” Ne shino aashiloma aryo, lwekhuuba aarya nga ambaasa ari Shela naye anyala khuufwa nga babandaaye ni baafwa. Aryo Tamari weelayo waatsya waamenya muungo mwa paapa weewe.

12Lwanyuma lwe khuubirawo imbuka indeeyikho, umukyelama wa Yuda, uwaba umukhaana wa Shuwa, waafwa. Yuda n'amala khuuwolakho kumutaambo, niye atweela n'umusaale weewe Hira, uwe Adulamu, baatsya i Timuna, isi baraambi beewe baabekatsakila kamasheese keewe bubwooya. 13Yabawo umuundu uwatsya waaboolela Tamari ari, “Paapawo umukhwe ali khuutsya i Timuna khuubeka bubwooya khu masheese keewe.” 14Tamari wenyukhilamwo khaangu, waashuusa bikwaaro byeewe bye bwanamulekhwa, webiimbilila shitambaala sheewe imurwe, nga s'akana amanyikhane ta. Lwanyuma wenyukha waatsya wekhala isi benjilila khuutsya i Enayimu, nga nilwo luguudo luluutsya i Timuna. Lwekhuuba aaba waamanya buulayi ari Shela abe waatsowa, ne nga baaba bashiili khumumuwa khukhwaalikhayo ta.

15Yuda n'alola ari waamubona, kila amwambaasilisa khuuba malaaya, lwekhuuba aaba nga webiimbilile abumoni. 16Kila amutsyayo abuundulo we luguudo, waamuloma ari, “Yiitsa khubone, ingana khuukonakho ni nawe.” Shino aashikhola lwekhuuba s'amumanya ari niye umukhaana weewe umukhwe ta.

Tamari naye waamwiilamo ari, “Ne shiina sheesi utsya khuumba nio ukone ni nase?”

17Yuda waamwiilamo ari, “Kane ikhwakaanise khaameeme khe mbusi khukhwaama mu byaayo byase.”

Ne Tamari waamureeba luundi ari, “Khabonelo shiina kheesi kane undekhele ise ari, khukhwoolesa n'ukane ukintsakaanise?”

18Yuda naye waamureeba ari, “Khabonelo shiina kheesi ukana ikhuwe?”

Tamari waamwiilamwo ari, “Intsiyi yoowo ilikho lisiina lyoowo ni kumunyololo kwayo, atweela ni miimbo yoowo iyo isi witiila.” Yuda waabimuwaambisa, waatsya waakona ni naye, waamufunisa shisoombo. 19Nga byaweele biryo, Tamari weelayo ingo, werusakho shitambaala, wakwaara luundi bikwaaro byeewe bye bwanamulekhwa.

20Yuda waaloomba umusaale weewe Hira khuuyila khaameeme khe mbusi, ari nio umukhasi amukobosele bibiindu byeesi aamulekhela. Ne shonyene ndi, Hira waalekha khunyoolawo umukhasi mweene ta. 21Kila areeba basaani babaaba nga bamenya ibweene iyo ari, “Malaaya uwabeele wekhaale khu ndulo khwe luguudo i Enayimu ano ali waheena?”

Nabo baamwiilamwo bari, “Ifwe khwaakhubonakho malaaya yeesi ano ta?”

22Aryo Hira waakobolayo isi Yuda, kila amulomela ari, “Umukhasi mweene ise simunyoolileyo ta. Ate ni shishiindi, basaani babaamenya ibweene iyo baambooleele bari, sibabonatsakakho malaaya yeesi mu shifwo isho ta.”

23Lwanyuma kila Yuda aloma ari, “Khakhumulekhe abe ni bibiindu ibyo. Lwe shishiindu nga isho, babaandu banyala baakhutsakhilila naabi. Ise abe ikhakilekho khuumuwaanda nga imwakaanisa khaameeme, ne bona iwe s'umunyoolileyo ta.”

24Uri abirawo kimyeesi nga kitaru, aabawo umuundu uweetsa waaboolela Yuda ari, “Umukhaana woowo umumasaala Tamari abeele akhola bwamalaaya, shaamwaamilamwo ari waahesa.”

Kila Yuda alakila ari, “Ni mumuyile ibulafu we shiriimba, mutsye mumwooshe kumulilo.”

25Baryo ni baaba nga bali khuurusa Tamari ibulafu, khuutsya khumwiira, waarumanisa buurume isi paapawe umumasaala nga aloma ari, “Shisoombo she ndi nasho shili sh'omuundu umweene we biindu bino. Ni mubiloleelese buulayi, intsiyi yino, ni kumunyololo kwakhwo kweene, atweela ni miimbo iye khukhwitiila bino, mumanye oba bili bya naanu.”

26Yuda waabyofwaasa buulayi, wenyoola nga bili bibyeewe, kila aloma ari, “Umukhasi yuno ali umukwalaafu khukhuufuurakho ni nase. Ise naakhaasikhile khukhwoolelesa ikifunisi yase, lwekhuuba sinamuwa umusooleli wase Shela khuuba umuseetsa weewe ta.” Yuda s'elayo luundi khuukonakho ni Tamari ta.

27Imbuka yeewe ni yoola iye khuusaala, waanyoolikhana nga waahesa bukhwaana. 28Aryo n'aaba nga alikho atsya khuusaala, mutweela khu bukhwaana ubwo waanyoowa khuurusa kumukhono kweewe ibulafu, kila umukaangi uwaba nga alikho amusaalisa, waabowa khaakoye khaabesemu khu mukhono ukwo, nga aloma ari, “Oyu niye unyoowile khuurura.” 29Ne shonyene ndi umwaana uyo n'akhweesa kumukhono waakwiisayo mukari, uwasheewe waanyoowa khuurura. Kila umukhasi umusaalisa waaloma ari, “Eyi niyo isaambo isi wiiminilisamwo khuurura!” Kila umwaana uyo baamulaanga bari Perezi. 30Nio lwanyumakho ukuundi uwabakho ni khaakoye khaabesemu khu mukhono naye waarura. Oyuno baamutwiikha lisiina bari Zera.

Currently Selected:

Khuurakikha 38: LPE

Highlight

Copy