Khuurakikha 37

Kamarooro ka Yusufu

1Yakobo waamenyatsaka mu shibala sha Kanaani mweesi paapa weewe Isaaka aamenyatsaka.

2Luno nilwo luukano lwe be muungo mwa Yakobo.

Umusooleli weewe Yusufu n'aba nga oolesa kimiiko likhumi na musaafu kye buukhulu, waaba nga ayisa kamasheese atweela ni babandaaye be ba maayi beewe babaandi, basooleli ba Bila ni ba Zilupa. Aryo waareerera paapa weewe kamakhuuwa kamabi kakawaamba khu byeesi babaandaaye baaba nga bali khuukhola.

3Yakobo abe akana naabi Yusufu khuufuurakho basooleli beewe babaaramile, lwekhuuba niye aasaalikha mu miiko kya Yakobo kye busaakhulu. Aryo kila amukholela itwaati indeeyi buulayi, nga ilikho kamakhono kaakhwo. 4Baryo babandaaye ni baabona bari paapa waabwe aaba amukana naabi khuufuurakho nibo, baamubiyila luukali naabi, nga mbaawo ni lomo indayi isi bamukanikhakho ta.

5Mu shilo shitweela, Yusufu waafuna kamarooro, ne naatsya khuukaboolelakho babaandaaye, beeloosela bwilooseli khuumubiiyilila ilala. 6Waabalomela ari, “Nimurekeerese kamarooro kano keesi ise naroorire. 7Khwabeele mu mukuunda nga khulikho khubowaka kimirwe kye ŋaano. Kumurwe kwase kwe ŋaano kweemikha khu ngaaki buulayi bubweene. Lwanyuma kikyeenywe kyoosi kyeetsa kyeemikha khukwibotokhelela, kyaafukhamila aasi mu bikyele byakwo!”

8Isho shaakila babandaaye baamureeba bari, “Ari umanyisa uri iwe utsya khuba umuwuli weefwe? Namwe uli khuutsya khuba ni bunyala khwiifwe?” Musaambo iyo, baamubiiyila luukali lweene, lwe kamarooro keewe, ni neebyo byeesi aababoolela.

9Lwanyuma ndi Yusufu waaroora kamarooro kakaandi, waatsya waakaboolela babandaaye. Waabalomela ari, “Nimurekeerese kamarooro kakaandi ndi keesi ise naroorire. Khu luno, inyaanga, kumweesi, atweela ni tsinieniesi likhumi na ndweela byeetsile byaafukhamila aasi mu bikyele byase.”

10Lwanyuma lwe khuuboolelakho babandaaye, waatsya waakaboolelakho paapa weewe. Isho shaakila paapa weewe waamurafuyila nga amuloma ari, “Marooro shiina kano keesi waroorire? Umanyisa uri iseese, ni maayi woowo, atweela ni babandaayo boosi, khutsya khwiitsa khufukhamile aasi mu bikyele byoowo?” 11#Bur 7.9Musaambo iyo babandaaye beeloosela bwilooseli khuubiyilila ilala Yusufu, ne paapa weewe waarama nga abyambaasakho naabi mu buulamu bweewe.

Yusufu bamukulisa

12Lwanyuma lwa bino byoosi, babandaaye ba Yusufu baatsya khukhwaayisa bibyaayo bya paapa waabwe aambi ni Shekemu. 13Kila Isiraeli akanikha isi Yusufu ari, “Babandaayo baatsiile khukhwaayisa bibyaayo aambi ni Shekemu. Ari yiitsa ikhurume isi bali.”

Yusufu naye weelamwo ari, “Indi mwirekefu khuutsya.”

14Paapawe waamulomela ari, “N'utsye ubone noola babandaayo bali buulayi, atweela ni bibyaayo, lwanyuma ukobole umboolele.” Aryo waarumana Yusufu khuutsya i Shekemu, nga amila muungo mwaabwe mumwaba mwitila lye Heburoni.

Yusufu n'ola i Shekemu, 15yabawo umusaani ukuundi uwamunyoola nga ali khuutiimatiimila iyo mwirome, kila amureeba ari, “Iwe uli khuuweentsa shiina?”

16Naye waamwiilamwo ari, “Indi khuweentsa babandaayase. Naakhwikoontseleele, n'umboolele eena isi bali khukhwaayisila bibyaayo.”

17Kila umusaani uyo amulomela ari, “Baakha khuuba nga baarurirewo ano baatsiile. Lwekhuuba nabawuliile nga baloma bari, ‘Khakhutsye i Dosani.’ ”

Aryo Yusufu waaloonda khu bandaaye, waabanyoolela i Dosani. 18Ne ni baamubona nga ashiilikho aleeyikho eetsa isi bali, beekuta nga baloma bari bamwiire.

19Kila baloma bari, “Bona namarooro uyo, ali khukhwiitsa. 20Ari lekha khumwiire, lwanyuma khutuume kumulaambo kweewe mu litweela khu malowo kano. Isho nga shaaweele, khutsye khuboolele paapa khuri isolo iye mwirome yaamuliile. Lwanyuma kane khubone isaambo isi kamarooro keewe kanaraambila.”

21Ne Rewubeni n'ashiwulila aryo, waakhakakho khuumuwonesa, waabalomela ari, “Khukhamwiira ta! 22Lwashiina khutsukha kamafuki khuryo? Khakhumutuume busa mwilowo lino, ne khukhamwiira ta.” Rewubeni aaloma shino nga akana busa ari amuwonese khukhwaama isi bali, lwanyuma amwiiseyo isi paapawe.

23Aryo Yusufu n'aboolayo busa ari, baamukulukhila, baatyenuulaka shikwaaro sheewe, shishibonekha buulayi sheesi aaba nga wakwaarire. 24Lwanyuma baamuyila, baamutuuma mwilowo tsana. Lilowo lino lyaba lilyoomu busa nga mbaamo kameetsi ta.

25Nga baamalile baryo, baatsya beekhala aasi khuulya biilyo. Ne ni beenyusa tsimoni tsaabwe, baabona kumukhweende kwe babaandu ba Ishimaeli, babaakholatsaka bye khuukulaana, nga balikho beetsa khukhwaama i Gileyadi. Tsiŋamila tsaabwe tsaba tsekokomeele bibiindu byeesi batubaasa mu bilyo, ni bibiindi bibiwunya buulayi, nga bali khuutsya kwe Misiri.

26Kila Yuda areera shishambaaso isi babandaaye waabalomela ari, “Mafuurisa shiina keesi khunafuna nga khwaakhoonyile waandaayeefwe, lwanyuma khutsisatsise khuufwa khweewe? 27Lekha khumukulise isi ba Ishimaeli bano, isho shikuyeete khulekhe khumwiira ta. Ilala ali waandaayeefwe umweene, uwe mu mubili ni mu mafuki keefwe.” Baryo babandaaye baafukiilisana ni naye. 28Lwanyuma nga baasubusi ba Midiyani boolile isi bali, baatsya baakhweesa Yusufu khukhwaama mwilowo tsana, baamukulisamwo bisiintsa bye feetsa kamakhumi kabili isi ba Ishimaeli, nabo baamuyila i Misiri.

29Lwanyumakho Rewubeni n'akobolayo khwilowo, waanyoola nga Yusufu s'alimwo ta, wetyenuulakakho bikwaaro byeewe. 30Waamawo waatsya isi babandaaye, waabaloma ari, “Nga umwaana mwilowo s'alimo ta! Ari inakhola ndyeena?”

31Nga bili biryo, baakhoonya imbusi ndweela, baasenyaka shikwaaro sha Yusufu mu malasile. 32Lwanyuma bashisuta, baashiyila isi paapa waabwe, baamulomela bari, “Khwanyoolile shikwaaro shino mwirome iyo. Shilole buulayi khubone, manya shinyala khuuba sh'omusooleli woowo Yusufu namwe ta.”

33Paapa waabwe waashibonela ilala nga nisho, kila aloma ari, “Shino nisho shikwaaro sh'omusooleli wase shisheene! Yakhiile khuuba nga isolo iye mwirome yaamuliile. Shino shikakasa shiri Yusufu ari ali mu bipatu busa!” 34Lwe shisheene isho, Yakobo wetyenuulakakho bikwaaro byeewe, lwanyuma waakwaara isawu ya makoongwe, waasola umusooleli weewe khuumala bifukhu biikali busa. 35Babaana beewe boosi besiinde ni be khaana, beetsa bari bamukumise, ne niye wekaana, nga aloma ari, “Mu mutaambo kumukali nase samweene indiikha i makoombe isi umwaana wase ali.” Musaambo iyo, waaba alila lw'omusooleli weewe.

36Bibya biryo, mu Misiri ba Midiyani baakulisa Yusufu wa Potifari, uwaba mutweela khu bakhulu be mu lubili lwa Faraawo, nga niye ukhulila baaliindi.

Currently Selected:

Khuurakikha 37: LPE

Highlight

Copy