Buraambi 7

Inganikha ya Sitefano

1Umusaayi ufuura bukhulu kila areeba Sitefano ari, “Ibyo byeesi balomile bya ŋali?” 2#Rak 12.1Sitefano welamo ari: “Bebuulebe ni ba paapa, ni mundekeerese. Wele uwe shiriifwa aabonekhela kuuka weefwe Iburayimu, nga ali mu Mesopotamiya, nga ashiili khuutsya khumenya mu Harani ta. 3Wele waamulomela ari, ‘Rura mu shikuuka shoowo, ni mu linaambo lyoowo, utsye mu shiibala sheesi kane ikhwokese.’

4 # Rak 11.31; Rak 12.4 “Aryo Iburayimu waarura mu shiibala she babaandu ba Kalediyani, watsya wamenya mu Harani. Ne lwanyuma paapawe nga n'amala khuufwa, Wele wamumusa khukhwaamayo wamureera khwiloba lino lyeesi inywe mumenyakho aluno ari lino. 5#Rak 12.7; 13.15; 15.18; 17.8Ne Wele s'amulomela niye ari aliyila liiloba ilyo ta, abe ikhaba shikyele shitweela shonyene ta, akhali ndi amulomela busa khulimuwa niye ni lisaaye lyeewe, akhaba nga saaba n'umwaana ta. 6#Rak 15.13,14Ne Wele waaloma ari, ‘Lisaaye lyoowo liliba liliitswa mu shiibala she babaandu babaandi, babaalibawaambilila mu bukulwa nga bababirisa buubi, khumala kimiiko bitoondo bine. 7#Luky 3.12Ne ise indikhalila kumusaango linaambo ilyo lyeesi baliraambila mu bukulwa. Ne ndi lwanyuma balirurayo beetse bantsisaayile mu shifwo shino.’ 8#Rak 17.10-14; Rak 21.2-4; Rak 25.26; Rak 29.31—35.18Kila Wele akhola ni Iburayimu indakaano ye khukhwinjila imbalu. Aryo Iburayimu wasaala Isaaka, yeesi akheba khu shifukhu she shinaane. Isaaka naye wasaala Yakobo, ni Yakobo naye wasaala bakuuka bakhulu liikhumi na babili.

9 # Rak 37.11; Rak 37.28; Rak 39.2,21 “Khulwe libuba, bakuuka bano bawaamba Yusufu baamukulisa mu Misiri, ne Wele aaba ni naye. 10#Rak 41.39-41Waamuwonesa khukhwaama mu mitaambo kyoosi kyeesi abiramo. Aryo waamuwa bubwiyikino ni kamakhula mu moni tsa Farawo, umuyiinga we Misiri. Aryo Farawo wamwikyelisa gafana uwe Misiri, ni khuuba umubiikhi we bibiindu bye ntsu yeewe yoosi.

11 # Rak 42.1,2 “Lwanyuma aakwawo intsala mu Misiri ni mu Kanani mwoosi, yaareera kumutaambo kumukali, ni bakuuka beefwe baalekha khuuba ni she khuulya ta. 12Ne Yakobo n'awulila ari mu Misiri iliyo biilyo, waarumanayo bakuuka beefwe kumuluundi kukwanyoowa. 13#Rak 45.1; Rak 45.16Ne ni beelayo kumuluundi kukuukhola khabili, Yusufu webuula isi babandaaye, ni Faraawo naye waamanya beenda ya Yusufu. 14#Rak 45.9,10,17,18; Rak 46.27Kila Yusufu arumanisa ari batsye bamulaangile paapawe Yakobo khukhwiitsa, ni balebe beewe boosi, nga atweela bali babaandu kamakhumi musaafu na baraano. 15#Rak 46.1-7; Rak 49.33Yakobo wenyukha weekha khuumenya i Misiri. Aryo niye ni bakuuka beefwe ni baafwa, 16#Rak 23.3-16; 33.19; 50.7-13; Yos 24.32baabasuta baabeesayo i Sekemu, baabasiikha mu ŋani isi Iburayimu aakula khukhwaama khu basooleli ba Hamoli mu Sekemu, nga abawa tsinusu.

17 # Luky 1.7,8 “Ne imbuka ni yaba aambi khukhwoola khu sheesi Wele asuubisa Iburayimu, babaandu bano babalaaha, luundi betsula mu Misiri, 18khukhwoolisa umuyiinga ukuundi ukhamanya Yusufu ta, n'etsa mu buwuli mu Misiri. 19#Luky 1.10,11; Luky 1.22Umuyiinga uyu wabirisa babaandu beefwe buubi naabi, shino shahanyiinya bakuuka beefwe khumwaata ni babaana baabwe baŋaalye bari bakhaba balamu ta.

20 # Luky 2.2 “Mu mbuka nyeneyo, Musa wasaalikha, nga abonekha bulayi naabi mu moni tsa Wele. Aryo wabiikhibwa muungo mwa paapawe khumala kimyeesi kitaru. 21#Luky 2.3-10Ne n'atuumibwa, umukhaana wa Farawo wamwangala, wamulela, wamutsowesa wafwaana nga umwaana weewe. 22Musa bamuleekela mu makhula koosi ke ba Misiri, naluundi waba umuundu uwe angaaki mu bilomo ni mu buraambi bweewe.

23 # Luky 2.11-15 “Ne Musa aryo n'olesa kimiiko kye bukhulu kamakhumi kane, waafuna shishambaaso mu mwoyo kweewe she khuukyeniyilakho babandaayeewe, babaana ba Isiraeli. 24Musa n'abona mutweela khu ba Isiraeli abirisibwa buubi, wayeeta uyo isi baaba babirisa buubi, welihaasa nga akhupa umu Misiri, waamwiira. 25Shino Musa aashikhola nga ambaasa ari babandaayeewe baamanyile bari Wele alikho abawa nibo buwonesi khuubirira mu niye, ne khana yaba sibashimanyile ta. 26Khu shifukhu shishelakho, Musa waanyoola ba Isiraeli babeene nga balikho basoolana, waakhakakho khuureerawo lukoosi nga aloma ari, ‘Inywe mumubeele babandaayeenywe, mumuli be muunda ndweela, shiina kila mubirisana buubi muryo?’ 27Ne uyo uwaba nga alikho abirisa buubi uwashe, waasiindikha Musa andulo nga aloma ari, ‘Naanu ukhureerewo iwe khuuba nga umuwuli luundi umukayi akari efwe? 28Ukana khukhuntsira ise nga ni weerire umu Misiri ingoloobe?’ 29#Luky 18.3,4Musa naawula shino, welukha watsya, wekyela nga umukyendaani busa mu shiibala sha Midiyani. Nibweeneyo, niyo yeesi asaalila babaana beewe besiinde babili.

30 # Luky 3.1-10 “Ne lwanyuma nga abirirewo kimiiko kamakhumi kane, Musa nga ali mu mubiimbi khu lukiingi Sinaayi, malayika wamubonekhela mu shitsakha she kamawa nga shaaburukha. 31Ne Musa n'abona shino, washiyaanga naabi, wesyeenda ambi khushofwaasa, ne likono ly'Omukasya lyeetsa nga liloma liri, 32‘Ise niye Wele we bakuuka boowo, Wele wa Iburayimu, naluundi uwa Isaaka, naluundi uwa Yakobo.’ Khulweesho, Musa warya naabi, walekha khulolayo ta.

33“Lwanyuma Umukasya waamuloma ari, ‘Yifuula bilaalo khukhwaama mu bikyele byoowo, lwekhuuba shiifwo sheesi wemilemo shili shiifwo shikhosefu. 34Ise naboone kumutaambo kwe babaandu baase babaali mu Misiri, naluundi naawulile khukhwilootsa khwaabwe, ari nekhile aasi khuubawonesa. Nashiryo, ari yiitsa, ngana khukhurumana i Misiri.’

35 # Luky 2.14 “Musa uwatsana yuno isi ba Isiraeli baaloba, nga baloma bari, ‘Naanu ukhureerewo nga umuwuli naluundi umukayi?’ Wele aamurumana nga umukayi luundi umuwonesi, nga abirira mu malayika isi aabona mu shitsakha she kamawa nga shaburukha kumulilo. 36#Luky 7.3; Luky 14.21; Bala 14.33Musa yuno waarusa ba Isiraeli i Misiri, lwanyuma lwe khukhola bye kamakaanga ni bibiyaangisa mu Misiri, ni khu Nyaantsa Imbesemu, ni mu mubiimbi, khumala kimiiko kamakhumi kane.

37 # Maka 18.15,18 “Oyuno niye Musa tsana uwalomela ba Isiraeli ari, ‘Wele alirobola umuŋoosi khukhwaama mu bandaayeenywe, nga n'andobora ise.’ 38#Luky 19.1—20.17; Maka 5.1-33Oyuno niye uwaba mu lubusano lulwaba mu mubiimbi ni malayika uwakanikha is'ali khu lukiingi Sinaayi, naluundi atweela ni bakuuka beefwe. Niye uwawaambisibwa bilomo bye buulamu khukhuwa ifwe.

39“Ne bakuuka beefwe baalekha khumurekeeresa niye ta, baamwiisa andulo, kimyoyo kyaabwe kyaaba nga kikana khukhwilayo i Misiri, 40#Luky 32.1nga baloma Aroni bari, ‘N'ukhubuumbileyo ba wele bakhuraangilile ifwe, lwekhuuba Musa uyu uwakhurusa ifwe mu liloba lye i Misiri, sikhumanya oba wakholile aryeena ta.’ 41#Luky 32.2-6Ni mu mbuka nyeneyo, babuumbayo imoosi, bawaanayo isaayilo nga besaaya shibuumbe shaawe, naluundi bekhoya bari bakholile kumulimo kumulayi. 42#Amos 5.25-27Ne Wele waalekha khubenaanayo ta, waabawa liye lye mwikulu ari balisaaye. Nga ni sharonebwa mu burone bwe baŋoosi shiri,

‘Inywe babaandu ba Isiraeli, simwawaanayo isi ise tsisaayilo ni biwaanwa byeenywe,

mu miiko kamakhumi kane kyeesi mwamala mu mubiimbi ta.

43Akhali ndi mwasuta iweema ya wele Moloki khu mabeka keenywe,

ni inieniesi nga niyo shifwaani sha wele Refani,

nga ibyo nibyo bifwaani byeesi mwabuumba khukhwisaaya.

Nashiryo kane imbayile mu bubowe mu shifwo she aleeyi khuminyisa Babulooni.’

44 # Luky 25.9,40 “Bakuuka beefwe baaba ni weema iye bujulisi mu mubiimbi, musaambo isi uyo uwalomela Musa n'amuloomba khukikhola, khulondekhana ni saambo yeesi abe akibonamo. 45#Yos 3.14-17Bakuuka beefwe nabo basuta iweema iyo nga bali ni Yoswa, nga bamalile khusoolanisa naluundi khufuura kamanaambo keesi Wele atimisa karura mu shifwo isho nga bakuuka beefwe ni beetsa. Bakuuka beefwe baraambisa iweema yino khukhwoolesa khu mbuka ya Dawudi uwaba nga ali umuyiinga. 46#2 Sam 7.1-16; 1 Kim 17.1-14Dawudi niye asiimibwa mu moni tsa Wele aryo waloomba khukhwombakhela Wele e khumenya. 47#1 Bay 6.1-38; 2 Kim 3.1-17Ne Solomoni niye uwamwombakhila Wele intsu.

48“Ne bona Wele Uuli Angaaki Lukali s'amenya mu ntsu tsitsombekhebwa ni kamakhono ke babaandu ta. Nga umuŋoosi n'aloma ari,

49 # Isay 66.1,2 ‘Likulu nilyo shitsoloŋo she buyiinga bwase, ni shiibala nisho sheesi ise inaambisakho bikyele byase.’

Kila Umukasya areeba ari,

‘Intsu shiina isi kane inywe muntsombakhile ise,

namwe shifwo shiina sheesi ise inawolelamo?

50Shikuli kumukhono kwase nikwo kukwakhola bibiindu bino byoosi ta?’

51 # Isay 63.10 “Inywe nga muli babaandu be kimirwe kimiboofu, beesi bakhaakheba mu myoyo ni mu maru ta, inywe babaakhaandisa Umwoyo Umukhosefu busheele. Nga bakuuka beenywe ni bakhola ni nanywe mukhola muryo. 52Muŋoosi shiina isi bakuuka beenywe bakhaakubyeenga ta? Naluundi beeratsaka abo babakuukuula khukhwiitsa khw'Omukhosefu nga bushiili, uyo yeesi inywe mwalyamo luwomelo mwamwiira. 53Inywe beesi malayika baawa kamakaambila, ne shitweela busa mwaloba khukalondelela ta.”

Sitefano bamukhupa kamabaale

54Ne ni baawulila bilomo bya Sitefano bino, baakhalala naabi, beelya kiminwa khu lweewe. 55Ne Sitefano nga wetsusibwile n'Umwoyo Umukhosefu, walolelela mu ngaaki mwikulu, waabona shiriifwa sha Wele, ni Yesu nga wemikhile khu mukhono kumulayi kwa Wele. 56Sitefano kila aloma ari, “Bona, naboone likulu nga lyabikuliwile, n'Umwaana w'Omuundu wemikhile khu mukhono kumulayi kwa Wele.”

57Ne nibo bayokesela angaaki ni kamakono kamakali, bekala kamaru kaawe, boosi baatima baamuweelakho kumuluundi mutweela. 58Lwanyuma baamusiindikhilisa, baamurusa ibulafu we shiriimba, baamukhupa kamabaale. Bajulisi baara tsingubo tsaabwe aasi e bikyele by'omusoleeli mutweela, ulaangibwa bari Saulo.

59Ne ni baaba nga bakhupa Sitefano kamabaale, Sitefano mweene waaloomba ari, “Umukasya Yesu, yakaanila kumwoyo kwase.” 60Waafukhamila aasi welootsa ni likono lye angaaki ari, “Umukasya, ukhabakhalila kumusaango khulwe shishoonako shino ta.” Ne n'amala khuuloma aryo, waafwa na khufwa.

Currently Selected:

Buraambi 7: LPE

Highlight

Copy