Buraambi 6

Khuurobola Badikoni Musaafu

1Mu bifukhu ibyo, bukali bwe baleekelwa ni bweloosela, Bayudaaya babaakanikha Luyonaani beŋuluŋuunya isi ba Heburaniya. Lwekhuuba banamulekhwa be mwituuli lye Bayonaani baabebililatsaka mu khukaba biilyo khwa busheele. 2Baryo kila baarume liikhumi na babili balaanga lituuli lyoosi lye baleekelwa atweela, babaloma bari, “Sishili shilayi ifwe khuulekha khuboolela Ilomo ya Wele, khweela mubye khukhwakaanisa bye khulya ta. 3Nashiryo be buulebe, ni mwirobolemo babaandu musaafu babaali balayi, babetsuule Umwoyo Umukhosefu ni kamakhula, beesi kane khure khu mulimo kuno. 4Ne ifwe kane khurabilatsake mu khuloomba, ni mu khuboolela Ilomo ya Wele.”

5Shishambaaso isho shasiimibwa ni lituuli lyoosi. Baryo baarobola Sitefano, umusaani uwetsula khufukiilila n'Umwoyo Umukhosefu. Baarobola ni Filipo, Purukolo, Nikanoli, Timoni, Pamena, ni Nikolawo uwama i Antiyoki, uwashuukha winjila mu Shiyudaaya. 6Bareera babaandu bano babara mu moni tse baarume, babaloombela, babarakho kamakhono kaawe.

7Shiryo Ilomo ya Wele yeloosela, ni bukali bwe baleekelwa mu Yerusalemu bweloosela lukali naabi, ni basaayi bakali busa baaloondelela khufukiilila khuno.

Khuuwaambibwa khwa Sitefano

8Aryo Sitefano, umusaani uwetsusibwa ni bubweela bwa Wele ni kamaani, waakholatsaka bye khukhwiyaangisa bikali, ni bubonelo bukali mu baandu. 9Ne aabawo lituuli lye babaandu babaandi bentsu iye khukhwisaayilamo lilaangibwa bari Balekhuule (nga ni balaangiwatsaka). Mubweenemwo mwabamo Bayudaaya babaaba be Kurene, nibe Alekizandereya, ni babaandi babaama mu bisiintsa bye Kilikiya, ni Asiya. Bano boosi benyukha bakhaandisana ni Sitefano. 10Ne nga sibanyala khukhaandisana khufuura Sitefano ta, lwe kamakyesi n'Umwoyo uwamulomesatsaka aryo.

11Baryo mushimoonyo busa, baasuluusa babaandu babaandi khuuloma bari, “Khwawuliile Sitefano nga akanikha bilomo bibifwotsola Musa ni Wele.”

12Baryo musaambo iyo baasokosana babaandu ni basakhulu, ni baleekeli be kamakaambila ka Musa, beetsa bawaamba Sitefano, baamuyila mu lukhobo lukhulu lwe Bayudaaya. 13Baareera bajulisi tsana be bubeeyi babaloma bari, “Umusaaniyu busheele afwotsola shiifwo shino shikhosefu, ni kamakaambila ka Musa. 14Lwekhuuba khwamuwuliile niye nga aloma ari, ‘Yesu uyu uwe Nazareesi, alifuniaaka Lisaayilo Likhulu lino, luundi ashuuse bye tsisaambo tseefwe byeesi khwaweebwa ni Musa.’ ”

15Abo boosi babaaba bekhaale mu lukhobo lukhulu, bawunguusa tsimoni tsaabwe khu Sitefano, baabona nga mu moni mweewe mufwaana nga mwa malayika.

Currently Selected:

Buraambi 6: LPE

Highlight

Copy