Mk 9

1Yeso nyaʼa yì ghà əmbɨ mɨ̀mə̌d ni, “Mə ghà rəsìʼ ɨ nən ni chəi bə̂d mɔʼɔ rəbɔʼ mbɔ̂ nɨ təmbɨ əgha bɨrɨ kwɨ zɨ rɨ tɨ̀ mbɨ zə ɨchî nɨ Ŋwìə̀ ə tùmbɨ̀ə̀ mbi bə̂d ɨchî nɨ kaanɨ.”

Yeso nyaʼa bèŋ sɨə teə

(Mt 17.1-13; Lk 9.28-39)

2Ənɨ ɨni nyaʼa chè rɨ̀fuə, Yeso nyaʼa nɨŋ ə Pità mbɨ Jems fɔrɨ ə Jɔ̌n mbɨ kɔʼ wò ɨkaŋ ɨwum se mɔʼɔ, əsɨ nɨ àmei mɨ̀mə̌d nyaʼa əŋgu. Ənɨ mbɨ nyaʼa pè əŋgu, ɨnyod məd nyaʼa kwepə ɨfě mɨ̀mə̌d. 3Ngywɨ̌ rɨ məd nyaʼa sɨə fuə teenɨə, nɨ chəi ənɨ tɨ̀ wə̀d mɔʼɔ rɨ ɨgwɨ ə si sò tɨ fu əne. 4Èlaijà mbɨ Mose nyaʼa jwɨ̀ ɨfě mɨ̀mə̌d. Mbɨ nyaʼa jwɨ̀ əne kɔ ghambɨ mbɨ Yeso. 5Ənɨ Pità nyaʼa zə əne, wɨ̀ nyaʼa ghà əmbɨ Yeso ni, “Əchwiə̀-ɨnû, zɨə bɔ̀ŋ ni tɨ̀ wɨ əgha. Tɨ̀ bɨrɨ kod mɨŋwenɨ tad, wɨ fibɨ̀ ɨ ne, wɨ fibɨ̀ əmbɨ Mose, wɨ fibɨ̀ əmbɨ Èlaijà.” 6Chəi wɨ̀ nyaʼa kyerɨ ənû nɨ ghà. Àyɨə wɨ̀ nyaʼa ghà əne ɨmbə̀ʼ ɨghəm nɨ məd mbɨ mə̀mə̀ə̀nɨ̀-ɨnû mbə mɨbe mbɨə nyaʼə bɔə kwàʼ rɨŋgəʼ.

7Pàʼ mɔʼɔ nyaʼa kubrɨ mɨ̀mə̌d, əne gɨ̂ mɔʼɔ rɨŋga pàʼ ze nyaʼa ghà ni, “Wɔ̂ yɨə mɨ Wan nɨ mə̀ ghaʼi kwàʼ rɨŋgəʼ, mbə̀ zu ənû ze nɨ wɨə ghàə̀!” 8Ənɨ mbɨ nyaʼa zu gɨ̂ ze, mbɨ nyaʼa kɨ bèŋ nèŋ, àyɨə chəi mbɨ nyaʼa wɨrɨ zə wə̀d mɔʼɔ, chè rɨ ənɨ Yeso rə̀zìʼ wi.

9Ənɨ mbɨ nyaʼə swiʼə rɨkaŋ ɨwum we, wɨ̀ nyaʼa patɨ mɨ̀mə̌d ni tɨ mbɨ tɔ ghà ə ənû ze nɨ mbɨ zə əmbɨ wə̀d mɔʼɔ, pè ənɨ Wan Wə̀d fə zwemə.

10Ənû ze ə nyaʼa tèn àmei mbɨ mɨ̀mə̌d, àyɨə mbɨ nyaʼə biirɨə mbənə mbənə ɨmbə̀ʼ əton nɨ zwemə. 11Mbɨ nyaʼa biirɨ əmbɨ Yeso ni, “Əton nɨ məchwiə̀ rɨ̀kə̌ ə ghàə̀ ni Èlaijà berɨ be yeʼe kɨ ɨmbə̀ʼ ə yè ə?”

12Wɨ̀ nyaʼa wììrɨ̀ əmbɨ mɨ̀mə̌d ni, “Èlaijà berɨ be yeʼe ɨmbə̀ʼ wɨrɨ tekɨ ɨnû jìm ɨchî nɨ mbɨ nyaʼa bèi. Əton nɨ mbɨ ŋwaʼnɨ ɨmbə̀ʼ Wan Wə̀d ni wɨ̀ bɨrɨ zə ŋgəʼ nɨ che əbɔ, mbɨ bə̀ ton əməd, kɨ ni yè ə? 13Mə ghà ɨ nən ni Èlaijà fə yeʼe, àyɨə bə̂d mɔʼɔ nyaʼa ghɨ̀ mbɨ məd ɨchî nɨ zɨə nyaʼa bɔŋ əmbɨ mɨ̀mə̌d. Mbɨ nyaʼa ghɨ̀ əne àmei ɨchî nɨ mbɨ nyaʼa ŋwaʼnɨ ɨmbə̀ʼ əməd.”

Yeso nyaʼa vɨ̀ wan mbaŋə̀ nɨ əzwî rɨbɔ̀ŋ ə nyaʼa ɨŋga məd

(Mt 17.14-21; Lk 9.37-43a)

14Ənɨ Yeso mbɨ mə̀mə̀ə̀nɨ̀-ɨnû mbe nɨ nyaʼa mbɨ məd nyaʼa swiʼi wò kɔɔrɨ mə̀mə̀ə̀nɨ̀-ɨnû mbə, mbɨ nyaʼa zə ɨnɔ̂n bə̂d nɨ nyaʼa kwàʼ wɨ kyeŋ nɨ nyaʼa kad mɨ̀mə̌d. Mbɨ nyaʼa bə̀ zə məchwiə̀ rɨ̀kə̌ nɨ nyaʼə tàŋə̀ mbɨ mɨ̀mə̌d. 15Ənɨ ɨnɔ̂n bə̂d we jìm nyaʼa zə ə Yeso, mbɨ nyaʼa yiirɨ kwàʼ rɨŋgəʼ, əne nòrə̀ wò əsɨ məd, pè chàʼrɨ̀ əməd. 16Wɨ̀ nyaʼa biirɨ əmbɨ mə̀mə̀ə̀nɨ̀-ɨnû mbe ni, “Mbə kɨə tàŋə̀ mbɨ ə bə̂d mbɔ̂ ɨmbə̀ʼ ə yè ə?”

17Mbaŋə̀ mɔʼɔ rɨŋga ɨnɔ̂n bə̂d we nyaʼa wììrɨ̀ ɨ bɔ ni, “Əchwiə̀-ɨnû, mə kə̀ʼ yeʼe əsɨ ne mbɨ mɨ wan nɨ əzwî rɨbɔ̀ŋ ə ghɨ̀ ni tɨ wɨ̀ gham i. 18Ənɨ mɨ̀nyùmə̀ jìm mbe nɨ əzwî rɨbɔ̀ŋ ze ə yim əməd, ə zɨə mèʼ əməd ə si, tɨjo jwɨ̀ rɨ ɨchû ɨməd, wɨ̀ kud e əsɔŋ, ɨnyod məd jìm kà. Əne mə kə̀ʼ ghà əmbɨ mbe mə̀mə̀ə̀nɨ̀-ɨnû ni mbɨ chɨ əzwî ze, àyɨə chəi ənɨ tɨ̀ mbɨ chɨ̀.”

19Yeso nyaʼa ghà əmbɨ mɨ̀mə̌d ni, “Chəi ɨghəm bə̂d wɔ̂ berɨ ɨbenɨ! Mə̀ kɨə wò chubɨ mbɨ nən ənɨ əgha nɨ sa rɨ ye ə? Mə̀ kɨə wò yim fîŋ mbɨ nən ənɨ əgha nɨ sa rɨ ye ə? Mbə nɨŋ əməd yeʼe nàʼ ɨ num!” 20Mbɨ nyaʼa nɨŋ wan mbaŋə̀ we wò nàʼ ɨ bɔ. Ənɨ əzwî rɨbɔ̀ŋ ze ə nyaʼa zə ə Yeso, zɨə nyaʼa chìʼ wan we əwu əwən, wɨ̀ gù ə si, biŋgə, tɨjo kɔ jwɨ rɨ ɨchû. 21Yeso nyaʼa biirɨ əmbɨ ə mbǎʼ wan mbaŋə̀ we ni, “Əgha ə fə sà rɨ ye nɨ əwɔn zɔ̂ ə yeʼ ɨgun ə wan wɔ̂ ə?”

Wɨ̀ nyaʼa wììrɨ̀ ɨ bɔ ni, “Zɨə nyaʼa kɔ ənɨ wɨ̀ nyaʼa kɨrɨ wan bɔd. 22Ə zɨə kɨə mèʼ əməd ɨŋga ɨwid bə̀ fɔrɨ ɨŋga mɨnib, ɨmbə̀ʼ zwiirɨ əməd. À mɨ yeʼ nɨ tɨ̀ à ghɨ̀ ənû ə mɔʼɔ, njɨ kaŋ dììrɨ̀ əwa bə̀ wèèrɨ̀ əwa.”

23Yeso nyaʼa ghà ɨ bɔ ni, “À ghà ni, 'A mɨ yeʼ nɨ tɨ̀ à ghɨ̀ ənû ə mɔʼɔ!' Kyerɨ ni chəi ənû ə mɔʼɔ nɨ tɨ̀ zɨə chè wə̀d we nɨ benɨ.”

24Àmei əwu əwən, mbǎʼ wan we nyaʼa kyeŋ rɨkǎ ghà ni, “Mə benɨ, àyɨə mɨ ɨbenɨ ə bɔd. Weerɨ əmɨ ghɨ̀ ni wɨ kaanə!”

25Ənɨ Yeso nyaʼa zə ənɨ ɨnɔ̂n bə̂d nyaʼə nòrə̀ yeʼe fetɨə, wɨ̀ nyaʼa ghàm əbɔʼ əzwî rɨbɔ̀ŋ ze ni, “Àwɔ̀ əzwî ze nɨə ghɨ̀ ni tɨ wə̀d gham i bə̀ ghɨ̀ə̀ ni tɨ wɨ̀ zu i ənû, mə ghà ɨ ne ni à jwɨ̀ e rɨŋga wan mbaŋə̀ wɔ̂. Tɨrə̀ tɔ wɨrɨ nyɨ e ɨŋga məd.”

26Ənɨ wɨ̀ nyaʼa ghà əne, əzwî ze ə nyaʼa kyeŋ, chìʼ wan mbaŋə̀ we kwàʼ rɨ̀kǎ, jwɨ̀ rɨŋga məd. Wan we nyaʼa sɨ ɨghabɨ əvɨ ə wə̀d. Əze ə nyaʼa ghɨ̀ bə̂d mɨ̀nɔnɔʼ ghà ni, “Wɨ̀ fə kwɨ!” 27Àyɨə Yeso nyaʼa yim əbɔ əməd, nɔ̀ əməd, wɨ̀ nɔ̀ʼ təm rətiə.

28Ənɨ Yeso nyaʼa wò nyɨ ɨŋga nəb, mə̀mə̀ə̀nɨ̀-ɨnû ɨməd nyaʼa biirɨ ɨ bɔ ənjìm ənjìm ni, “Əton nɨ chəi tɨ kə̀ʼ chɨ̀ əzwî ze ə kɨ ɨmbə̀ʼ ə yè ə?”

29Wɨ̀ nyaʼa wììrɨ̀ əmbɨ mɨ̀mə̌d ni, “Chəi ənɨ tɨ̀ mbə chɨ̀ ɨkwɨ əzwî wɔ̂ ənɨ əghɨ ə cherə chè rɨ ənɨ ə̀kɔ̀ŋgɨ̀.”

Yeso nyaʼa bə̀ yì ghà ɨmbə̀ʼ i ɨvɨ

(Mt 17.22-23; Lk 9.43b-45)

30Yeso mbɨ mbi mə̀mə̀ə̀nɨ̀-ɨnû nyaʼa nɔ̀ʼ rɨ əsɨ ze wò chè ə Galiliî. Chəi wɨ̀ nyaʼa kəb ni wə̀d mɔʼɔ kyerɨ əsɨ ze nɨ wɨ̀ nyaʼə əŋgu. 31Wɨ̀ nyaʼa ghɨ̀ əne ɨmbə̀ʼ ɨghəm nɨ wɨ̀ nyaʼə chwi ɨnû əmbɨ mbi mə̀mə̀ə̀nɨ̀-ɨnû ni, “Mbɨ bɨrɨ fen Wan Wə̀d əmbɨ ə bə̂d, mbɨ zwiirɨ əməd, àyɨə ɨni nɨə chè ɨtad, wɨ̀ wɨrɨ zwemə.” 32Chəi ɨtu mɨ̀mə̌d nyaʼa zeŋ ɨmbə̀ʼ ənû ze nɨ wɨ̀ nyaʼə ghàə̀, àyɨə mbɨ nyaʼa bɔ nɨ biirɨ ɨ bɔ.

We nɨ yeʼ wɨ kyeŋ ɨŋga ənû ɨfɔ̀n rɨkaŋ

(Mt 18.1-5; Lk 9.46-48)

33Yeso mbɨ mbi mə̀mə̀ə̀nɨ̀-ɨnû nyaʼa wò ə Kàpenàhom. Ənɨ mbɨ nyaʼa fə sɨ ɨŋga nəb, wɨ̀ nyaʼa biirɨ əmbɨ mɨ̀mə̌d ni, “Mbə kɨə kə̀ʼə̀ tàŋ ənû ə ye ɨnə̂njɨ̀ ə?”

34Mbɨ nyaʼa kəm rəziə, ɨmbə̀ʼ ɨghəm nɨ ɨ mbɨ nyaʼə yènə̀ taŋ ɨmbə̀ʼ we nɨ yeʼ wɨ kyeŋ. 35Wɨ̀ nyaʼa chub ə si, tɔŋ mə̀mə̀ə̀nɨ̀-ɨnû mbe wum chɔ̀b rɨ̀be, ghà əmbɨ mɨ̀mə̌d ni, “Wə̀d mɔʼɔ mɨ kəb yeʼ wɨ rɨmbì, wɨ̀ berɨ be yeʼ we nɨ sɨ nwìə̀, bə̀ yeʼ we nɨə fàʼ əmbɨ mbɨ mɨjìm.” 36Wɨ̀ nyaʼa ghà əne, nɨŋ wan kwa mɔʼɔ nùŋ wɨ̀ təm ɨŋga mɨgharə̀ mɨ̀mə̌d. Wɨ̀ nyaʼa yim wan we, ghà əmbɨ mɨ̀mə̌d ni, 37“Wə̀d mɔʼɔ we nɨ nɨŋ wan kwa mɔʼɔ ɨghabɨ wɔ̂ ənɨ mɨ ɨkum, fə bə̀ nɨŋ əmɨ. Wə̀d mɔʼɔ we nɨ nɨŋ əmɨ, kaʼ i wɨ nɨŋ əmɨ, wɨ nɨŋ yeʼ wə̀d we nɨ nyaʼa tom əmɨ.”

Wə̀d we nɨ chəi wɨ̀ ton əwa wɨ i mbɨ na

(Lk 9.49-50)

38Jɔ̌n nyaʼa ghà əmbɨ Yeso ni, “Əchwiə̀-ɨnû, tɨ̀ kə̀ʼ zə wə̀d mɔʼɔ nɨə chɨ̀ ɨzwî rɨbɔ̀ŋ ənɨ e ɨkum, əne tɨ̀ kə̀ʼ kə̀b nɨ təmnɨ əməd, ɨmbə̀ʼ ɨghəm nɨ kaʼ məd yɨ i wɨ mɔʼɔ rəbɔʼ na.”

39Yeso nyaʼa ghà ni, “Tɨ mbə̀ təmnɨ ə məd, ɨmbə̀ʼ ɨghəm nɨ chəi wə̀d we nɨə ghɨ̀ ɨnû yiirɨ ənɨ mɨ ɨkum, nɨ əmad ə bɨrɨ zombɨ, wɨ̀ bèŋ ghà yeʼ ɨnû rɨbɔ̀ŋ ɨmbə̀ʼ əmɨ. 40Wə̀d we nɨ chəi wɨ̀ ton əwa wɨ i mbɨ na. 41Mə ghà rəsìʼ ɨ nən ni chəi wə̀d mɔʼɔ we nɨ naʼ toʼ mɨnib ɨ nən ni mbə̀ nɔ ɨmbə̀ʼ ɨghəm nɨ mbə̀ ben ɨkum Kristo bɨrɨ nim i ɨchɔʼ ə̀fàʼì.

Ɨnû mbe nɨə ghɨ̀ ni wə̀d ghɨ ɨnû rɨbɔ̀ŋ

(Mt 18.6-9; Lk 17.1-2)

42“Wə̀d mɔʼɔ rəbɔʼ nən mɨ ghɨ̀ ni wan kwa mɔʼɔ rəbɔʼ mbɔ̂ nɨ ben əmɨ ghɨ ənû rɨbɔ̀ŋ, njɨ zɨə bɨrɨ bɔ̀ŋ ni mbɨ tiŋ ɨti ŋgə̀ŋ kyeŋ ədɔʼ ɨ bɔ wò màʼ ɨŋga rɨ̀bàà. 43E əbɔ ə mɨ ghɨ̀ ni à ghɨ ənû rɨbɔ̀ŋ, sob. Zɨə bɔ̀ŋ ni à jɨg ɨ̀tènɨ̀ mbɨ əbɔ ə mɔʼ, chè ɨchî nɨ à bɨrɨ berɨ ɨbɔ be Ŋwìə̀ màʼ əwe ɨŋga ɨwid rɨ nìmə nɨ yeʼ əsɨ ɨchə. [ 44Əŋgu, chəi tɨgwid te nɨə kurə nyamnyod bə̂d ə nɔ̀ kwɨə, chə bəi ɨwid we nɨə tɔ̀n mɨ̀mə̌d ə nɔ̀ nìmə.] 45E əwù ə mɨ ghɨ ni à ghɨ ənû rɨbɔ̀ŋ, sob. Zɨə bɔ̀ŋ ni à jɨg ɨ̀tènɨ̀ mbɨ əwù ə mɔʼ, chè ɨchî nɨ à bɨrɨ berɨ ɨwu be Ŋwìə̀ màʼ əwe ɨŋga əsɨ ɨchə. [ 46Əŋgu, chəi tɨgwid te nɨə kurə nyamnyod bə̂d ə nɔ̀ kwɨə, chə bəi ɨwid we nɨə tɔ̀n mɨ̀mə̌d ə nɔ̀ nìmə.] 47E ɨghə mɨ ghɨ̀ ni à ghɨ ənû rɨbɔ̀ŋ, chɔʼ. Zɨə bɔ̀ŋ ni à nyɨ ɨŋga ənû ɨfɔ̀n ə Ŋwìə̀ mbɨ ɨghə mɔʼ, chè ɨchî nɨ à bɨrɨ berɨ əghə əbe Ŋwìə̀ màʼ əwe ɨŋga əsɨ ɨchə. 48Əŋgu, chəi tɨgwid te nɨə kurə nyamnyod bə̂d ə nɔ̀ kwɨə, chə bəi ɨwid we nɨə tɔ̀n mɨ̀mə̌d ə nɔ̀ nimə.

49“Mbɨ bɨrɨ zeŋnɨ wə̀d jìm ənɨ ɨwid, [ɨchî nɨ mbɨə zeŋnɨ ɨghɨ ə̀fà jìm ənɨ fɨ̀ŋgwaŋ.]

50“Fɨ̀ŋgwaŋ ə bɔ̀ŋ, àyɨə fɨ mɨ ton wɨrɨ nəm i, à wɨrɨ tekɨ rɨ ye ni fɨ wɨrɨ nə̀m ə? Mbə̀ yeʼ ɨghabɨ fɨ̀ŋgwaŋ, əne mbə̀ chub ənɨ əbɔrəbɔd mbɨ mbə bɔŋgɔb.”

Currently Selected:

Mk 9: mgo

Highlight

Copy