Mk 10
10
Ənû nɨ saanɨ ɨnamɨ
(Mt 19.1-12; Lk 16.18)
1Yeso nyaʼa nɔ̀ʼ rɨ əsɨ ze wò əbà əbeŋ ze rɨ ə Jùdeyà bə̀ fɔrɨ ɨnjin ɨgyɨ̂ Jodàn. Mɨnɔ̂n bə̂d nyaʼa yì wò fetɨ ɨban ɨməd. Əne wɨ̀ nyaʼa kɔ chwi ɨnû əmbɨ mɨ̀mə̌d ɨchî nɨ wɨ̀ nyaʼə mɨ̀ə̀ ghɨ̀ə̀.
2Mɨ̀Farisiî mɔʼɔ nyaʼa wò əsɨ məd ɨmbə̀ʼ kwaʼnɨ əməd. Əne mbɨ nyaʼa biirɨ ɨ bɔ ni, “Tɨkə ə wa chwiə ni mbaŋə̀ saanɨ ɨnamɨ mbɨ i ɨwi ə?”
3Wɨ̀ nyaʼa wììrɨ̀ əmbɨ mɨ̀mə̌d ni, “Mose nyaʼa ghà ɨ nən ni ye ə?”
4Mbɨ nyaʼa ghà ni, “Mose nyaʼa ben ni mbaŋə̀ naʼ ə̀ŋwàʼnɨ̀ nɨ chwi ni tə fə saanɨ ɨnamɨ mbɨ i ɨwi bɔŋ chɨ əməd rɨ ə nəb.”
5Àyɨə Yeso nyaʼa ghà əmbɨ mɨ̀mə̌d ni, “Mose nyaʼa ŋwàʼnɨ̀ ɨkə wɔ̂ ɨ nən ɨmbə̀ʼ ɨghəm nɨ tə fîŋ ə tu. 6Àyɨə tɨ ənɨ ɨsɨg nyaʼa kɔ, 'Ŋwìə̀ nyaʼa tekɨ bə̂d mbaŋə̀ mbɨ əyi. 7À yɨ əton nɨ mbaŋə̀ bɨrɨ saŋ i mbǎʼ mbɨ i nɨŋ wò fɔtɨ mbɨ i ɨwi, 8əne mɨ̀mə̌d mbe mɨbe bɨrɨ sɨə nyamnyod mɔʼ.' Əne ka mbɨ yɨə wɨrɨ əwən bə̂d mɨbe. Mbɨ yɨə sɨə nyamnyod mɔʼ. 9Əne tɨ wə̀d mɔʼɔ saanɨ i bə̂d mbe nɨ Ŋwìə̀ fə fɔtɨ.”
10Ənɨ mbɨ nyaʼa bəndɨ wò nyɨ ə nəb, mə̀mə̀ə̀nɨ̀-ɨnû mbe nyaʼa yì biirɨ ənû zɔ̂ ɨ bɔ. 11Wɨ̀ nyaʼa ghà əmbɨ mɨ̀mə̌d ni, “Mbaŋə̀ mɔʼɔ ze nɨ saanɨ ɨnamɨ mbɨ i ɨwi, nam əyi cherə, njɨ wɨ̀ fə ni əyi cherə. 12Əyi mɨ bə̀ saanɨ ɨnamɨ mbɨ i ɨnom, nam wɨ cherə, əne wɨ̀ fə ni mbaŋə̀ cherə.”
Yeso nyaʼa zɨ̀ əbɔrəbɔd ɨgun ə bɔn kwa
(Mt 19.13-15; Lk 18.15-17)
13Bə̂d mɔʼɔ mbɨə nyaʼə nɨŋə bɔn kwa wò əsɨ Yeso ɨmbə̀ʼ wɨ̀ betɨ mɨ̀mə̌d. Mə̀mə̀ə̀nɨ̀-ɨnû ɨməd nyaʼa ghàm əbɔʼ ə bə̂d mbe. 14Àyɨə ənɨ Yeso nyaʼa zə ənû ze, wɨ̀ nyaʼa sə ɨtəm, əne ghà əmbɨ mbi mə̀mə̀ə̀nɨ̀-ɨnû ni, “Mbə̀ saŋ bɔn kwa mbe yeʼe əsɨ num. Tɨ mbə̀ kən ə mɨ̀mə̌d, ɨmbə̀ʼ ɨghəm nɨ à yɨə bə̂d ɨghabɨ mbɔ̂ bɨrɨ jɨg ənû ɨfɔ̀n ə Ŋwiə̀. 15Mə ghà rəsìʼ ɨ nən ni, ka wə̀d mɔʼɔ we nɨ chəi wɨ̀ ben ənû ɨfɔ̀n ə Ŋwiə̀ ɨghabɨ ə wan kwa bɨrɨ nɔ nyɨ i ɨŋga ənû ɨfɔ̀n ze.” 16Ənɨ wɨ̀ nyaʼa ghà əne, wɨ̀ nyaʼa nɨŋ bɔn kwa mbe kyìə, zab mbi ɨbɔ ɨgun mɨ̀mə̌d, bə̀ zɨ̀ əbɔrəbɔd ɨgwɨ mɨ̀mə̌d.
Ənû ɨmbə̀ʼ mbaŋə̀ nɨ nyaʼa berɨ mbɔ̂n
(Mt 19.16-30; Lk 18.18-30)
17Ənɨ Yeso nyaʼə jwɨ̀ə̀ wò i ɨghanɨ, mbaŋə̀ mɔʼɔ nyaʼa nòrə̀ wò pè chìndɨ̀ ɨtu ɨnywɨ ɨfě ɨ bɔ, biirɨ ɨ bɔ ni, “Əchwiə̀-ɨnû chɔ̀m, mə̀ kɨə wo ghɨ ənû ə yè bɔŋ jɨg ɨ̀tènɨ̀ rɨ mì ə?”
18Yeso nyaʼa ghà ɨ bɔ ni, “À tɔŋ əmɨ ənɨ ə wə̀d chɔ̀m ɨmbə̀ʼ ə yè ə? Chəi wə̀d mɔʼɔ əŋgu nɨ bɔŋɨ chè rɨ ənɨ ə Ŋwìə̀ rə̀zìʼ wi. 19À kàŋ kyerɨ e tɨkə rɨ Ŋwiə̀. Tɨ ghà ni, 'Tɨrə̀ zwiirɨ e wə̀d. Tɨrə̀ ni e əyi kɨ mbaŋə̀ cherə. Tɨrə̀ jɨ e. Tɨrə̀ ben e zərɨmbin mɨghab. Tɨrə̀ fɨg e wə̀d. Wumnɨ e mbǎʼ mbɨ e nɨ̌ŋ.'”
20Mbaŋə̀ ze nyaʼa ghà ɨ bɔ ni, “Əchwiə̀-ɨnû, mə nyaʼa fə kɔ nùŋ tɨkə tɔ̂ rɨjìm tɨ ənɨ mə nyaʼə wan kwa.”
21Yeso nyaʼa nèŋ əməd ghaʼ, əne ghà ɨ bɔ ni, “À kwaŋ əghɨ ə mɔʼɔ. Ndə̀ wò fèndɨ̀ ɨghɨ mbe nɨ à berɨ, wò nàʼ ɨkab we əmbɨ ə bə̂d ɨkwaŋ, əne à bɨrɨ berɨ mbɔ̂n ɨkaŋ. À mɨ ghɨ̀ əne, à yeʼe beenɨ əbɔʼ num.” 22Ənɨ mbaŋə̀ ze nyaʼa zu ənû zɔ̂, ɨnyod ɨməd bɔd, əne wɨ̀ nyaʼa nɔ̀ʼ wò i yènə̀ kə̀nə̀, ɨmbə̀ʼ ɨghəm nɨ wɨ̀ nyaʼa kaŋ berɨ ɨghɨ nɔnɔʼ.
23Yeso nyaʼa nèŋ ɨsɨ kad, əne ghà əmbɨ mbi mə̀mə̀ə̀nɨ̀-ɨnû ni, “Zɨə bɨrɨ nɨ se əmbɨ ə bə̂d mbɔ̂n nɨ nyɨ ɨŋga ənû ɨfɔ̀n ə Ŋwiə̀!”
24Mə̀mə̀ə̀nɨ̀-ɨnû mbe nyaʼa zu ɨŋgam we, yiirɨ kwàʼ rɨŋgəʼ. Àyɨə Yeso nyaʼa yì ghà əmbɨ mɨ̀mə̌d ni, “Bɔn, zɨə kàŋ seə nɨ nyɨ ɨŋga ənû ɨfɔ̀n ə Ŋwiə̀! 25Zɨə zàm əmbɨ ə kàmel nɨ che ɨbɨgɨ saʼ, chè ɨchî nɨ wə̀d mbɔ̂n bɨrɨ nyɨ ɨŋga ənû ɨfɔ̀n ə Ŋwiə̀.”
26Mə̀mə̀ə̀nɨ̀-ɨnû mbe nyaʼa yiirɨ kwàʼ rɨŋgəʼ, əne ghà mbənə mbənə ni, “Zɨə nɨə yeʼ əne, njɨ à kɨə we nɨ tɨ̀ wɨ̀ jwɨ̀ rəŋgəʼ ə?”
27Yeso nyaʼa neŋ mɨ̀mə̌d əne ghà ni, “Ənû ə zɨə chè yeʼ bə̂d, kaʼi Ŋwiə̀, ɨmbə̀ʼ ɨghəm nɨ chəi ənû ə mɔʼɔ nɨ tɨ̀ zɨə chè ə Ŋwiə̀.”
28Pità nyaʼa kɔ ghà ɨ bɔ ni, “Zə, tɨ̀ fə sàŋ ɨghɨjìm beenɨ əbɔʼ ne.”
29Yeso nyaʼa ghà əmbɨ mɨ̀mə̌d ni, “Mə ghà rəsìʼ ɨ nən ni, chəi wə̀d mɔʼɔ we nɨ saŋ i nəb, kɨ̀ mbi bɔŋgɔb, kɨ̀ ti njàbɨ, kɨ̀ i nɨ̌ŋ, kɨ̀ i mbǎʼ, kɨ̀ mbi bɔn, kɨ̀ mbi ɨsɨ si ɨmbə̀ʼ əmɨ fɔrɨ ɨmbə̀ʼ ɨkə̂n chɔ̀m, 30nɨ chəi wɨ̀ bɨrɨ wɨrɨ nɨŋ ɨghɨ mbɔ̂ tɨ̀nîn ənɨ ə nyùmə̀ wɔ̂ ɨghəm ɨkɨ fibɨ̀. Wɨ̀ bɨrɨ nɨŋ nəb, nɨŋ bɔŋgɔb mbɨ ə njàbɨ, nɨŋ mɨ̀nɨ̌ŋ, nɨŋ bɔn bə̀ nɨŋ ɨsɨ si, mbɨ bə̀ nwèndɨ̀ tɨkyerɨ-ɨwu ɨməd. Wɨ̀ bɨrɨ jɨg ɨ̀tènɨ̀ rɨ mì ənɨ ə nyùmə̀ we nɨə yeʼe. 31Àyɨə bə̂d mɨ̀nɔnɔʼ mbe nɨ yeʼ mbɨ rɨmbì, bɨrɨ yeʼ mbe nɨ sɨ nwìə̀. Mbe nɨ sɨ nwìə̀ sɨ yeʼ mbɨ rɨmbì.”
Yeso nyaʼa ghà ənû ɨmbə̀ʼ i ɨvɨ ənɨ ɨghəm nɨ pe tad
(Mt 20.17-19; Lk 18.31-34)
32Ənɨ Yeso mbɨ mbi mə̀mə̀ə̀nɨ̀-ɨnû nyaʼə kɔʼə wò ə Jèrusalèm, Yeso wɨə nyaʼə yèn ɨmbì. Ənû ze ə nyaʼa chè mə̀mə̀ə̀nɨ̀-ɨnû mbe. Bə̂d mbe nɨ nyaʼə beenɨə rɨ ənjìm nyaʼa bɔ. Wɨ̀ nyaʼa bə̀ yì nɨŋ mə̀mə̀ə̀nɨ̀-ɨnû mbe wum chɔ̀b rɨ̀be ɨban ɨban kɔ ghà ənû ze nɨ bɨrɨ ghɨ ənɨ ni əmbɨ mɨ̀mə̌d. 33Wɨ̀ nyaʼa ghà əmbɨ mɨ̀mə̌d ni, “Mbə̀ zə, tɨ̀ yɨ əni kɔʼə wò ə Jèrusalèm. Tɨ̀ mɨ pè əŋgu, mbɨ bɨrɨ yim Wan Wə̀d nàʼ əmbɨ bə̂d kyeŋ mbe rɨ ə mbàn Ŋwìə̀ mbɨ məchwiə̀ rɨ̀kə̌. Bə̂d mbɔ̂ bɨrɨ sob ɨsaʼi ni mbɨ zwiirɨ əməd. Mbɨ bɨrɨ ghɨ əne, nàʼ əməd əmbɨ ə bə̂d mbe nɨ kaʼi mɨ̀Jû. 34Bə̂d mbe nɨ kaʼi mɨ̀Jû bɨrɨ baʼrɨ əməd, chèd mad ənɨ məd, te əməd ənɨ ə ŋgwad bə̀ zwiirɨ əməd. Ɨni nɨə che ɨtad, wɨ̀ zwemə.”
Jems mbɨ Jɔ̌n nyaʼa biirɨ ənû ə mɔʼɔ rɨ əmbɨ Yeso
(Mt 20.20-28)
35Jems mbɨ Jɔ̌n nɨ nyaʼə bɔn Zebèdiî nyaʼa wò əsɨ Yeso pè ghà ɨ bɔ ni, “Əchwiə̀-ɨnû, tɨ̀ kə̀b ni à ghɨ ənû ə mɔʼɔ ze nɨ tɨ̀ biirɨ ɨ ne.”
36Wɨ̀ nyaʼa biirɨ əmbɨ mɨ̀mə̌d ni, “Mbə̀ kɨə kə̀bə̀ ni mə̀ ghɨ ənû ə ye ɨ nən ə?”
37Mbɨ nyaʼa ghà ɨ bɔ ni, “Ənɨ à chub ɨŋga e ənû ɨfɔ̀n, ben ni wə̀d fìbɨ̀ rəbɔʼ na chub ənɨ e əbà əbɔ ə jɨgɨ, wɨ fìbɨ̀ bə chub ənɨ e əbà əbɔ ə tweŋ.”
38Yeso nyaʼa ghà əmbɨ mɨ̀mə̌d ni, “Chəi mbə̀ kyerɨ ənû ze nɨ mbə̀ə biirɨə.” Ənɨ wɨ̀ nyaʼa wiirɨ əne, wɨ̀ nyaʼa biirɨ əmbɨ mɨ̀mə̌d ni, “Tɨ̀ mbə zə ɨkwɨ ŋgəʼ ze nɨ mə bɨrɨ zə, kɨ̀ tɨ̀ mbə nɨŋ mɨnib ɨchî nɨ mə bɨrɨ nɨŋ ə?”
39Mbɨ nyaʼa wììrɨ̀ ɨ bɔ ni, “Tɨ̀ we tɨ̀ rɨ̀ ghɨ̀ əne.”
Yeso nyaʼa sɨ ghà əmbɨ mɨ̀mə̌d ni, “Mbə bɨrɨ zə ŋgəʼ ze nɨ mɨə zəə, bə̀ nɨŋ mɨnib ɨchî nɨ mə bɨrɨ nɨŋ; 40àyɨə kaʼi əzum rɨmbin nɨ chɔʼ wə̀d we nɨ bɨrɨ chub ənɨ mɨ əbɔ ə jɨgɨ kɨ̀ we nɨ chub ənɨ mɨ əbɔ ə tweŋ. Mbɨ̀rɨmbin mbɔ̂ yɨ mbɨ bə̂d mbe nɨ Ŋwìə̀ nyaʼa fə tekɨ nùŋ əmbɨ mɨ̀mə̌d.”
41Ənɨ mə̀mə̀ə̀nɨ̀-ɨnû mbə wum nyaʼa zu ənû ze, mbɨ nyaʼa kɔ sə ɨtəm əbɔʼ ə Jems mbɨ Jɔ̌n. 42Əne Yeso nyaʼa tɔŋ mə̀mə̀ə̀nɨ̀-ɨnû mbe mɨ̀jìm, ghà əmbɨ mɨ̀mə̌d ni, “Mbə kyerɨ ni bə̂d mbe nɨə tùmbɨ̀ə̀ bə̂d mbe nɨ kaʼi mɨ̀Jû mbɨə nyèm ɨnû nyemɨ ɨgwɨ mɨ̀mə̌d. Mbə bə̀ kyerɨ ni bə̂d kyeŋ rəbɔʼ mɨ̀mə̌d ə berɨ ɨka nɨ tumbɨ mɨ̀mə̌d ənɨ ɨnû jìm. 43Àyɨə kaʼi əne əkaʼ nən. Àyɨə wə̀d mɔʼɔ we nɨə kə̀b yeʼ wɨ kyeŋ əkaʼ nən berɨ yeʼ we nɨə fàʼ ɨ nən. 44We nɨə kə̀b yeʼ wɨ rɨmbì əkaʼ nən berɨ yeʼ ə̀bòʼò əmbɨ mbən mɨjìm. 45Mə wɨə ghà əne ɨmbə̀ʼ ɨghəm nɨ chəi Wan Wə̀d nyaʼa yeʼe ni bə̂d faʼ ɨ bɔ. Wɨ̀ nyaʼa yeʼe ɨ fàʼ əmbɨ ə bə̂d, bə̀ kwɨ ɨmbə̀ʼ choʼ ɨtu bə̂d mɨ̀nɔnɔʼ.”
Yeso nyaʼa vɨ̀ ə Batimeòs nɨ nyaʼa ɨfɨgɨ
(Mt 20.29-34; Lk 18.35-43)
46Yeso mbɨ mbi mə̀mə̀ə̀nɨ̀-ɨnû nyaʼa wò ə Jerikò. Ənɨ mɨ̀mə̌d mbɨ ɨnɔ̂n bə̂d nɨ nyaʼa kwàʼ wɨ kyeŋ nyaʼə jwɨ̀ rɨ ə Jerikò, Batimeòs nɨ nyaʼa ɨfɨgɨ, bə̀ yeʼ wan Timeòs, nyaʼa chub ɨban ɨnə̂njɨ̀ ɨ nɔn ɨghɨ. 47Ənɨ wɨ̀ nyaʼa zu ni à yɨə Yeso rɨ ə Nazàret nyaʼə chèə̀, wɨ̀ nyaʼa kɔ kyeŋ ghà ni, “Yeso, Wan Dèvîd, diirɨ əmɨ!”
48Ənɨ wɨ̀ nyaʼa ghà əne, bə̂d mɨ̀nɔnɔʼ nyaʼa ghàm əbɔʼ məd ni wɨ̀ kəm rəziə. Àyɨə wɨ̀ nyaʼa wɨrɨ yì jeŋgɨ kyeŋ ghà ni, “Wan Dèvîd ə, diirɨ əmɨ!”
49Yeso nyaʼa təm əne ghà ni, “Mbə̀ tɔŋ əməd.” Ənɨ mbɨ nyaʼa tɔŋ ə mbaŋə̀ ze, mbɨ nyaʼa ghà ɨ bɔ ni, “Bɔtɨ e fîŋ! Nɔʼ rətiə, ɨ wɨə tɔŋ e.”
50Wɨ̀ nyaʼa zu əne, chɨ i ngywɨ̌ maʼi màʼ ə yɨə, nɔʼ tòm, wò əsɨ Yeso.
51Yeso nyaʼa biirɨ ɨ bɔ ni, “À kə̀b ni mə̀ ghɨ ənû ə ye ɨ ne ə?”
Mbaŋə̀ ze nyaʼa ghà ɨ bɔ ni, “Masà, mə kə̀b ni à ghɨ mə zə ɨsɨ.”
52Yeso nyaʼa ghà ɨ bɔ ni, “Sɨ wò e. E ɨbenɨ fə ghɨ̀ ni à bɔtɨ e.”
Àmei əwu əwən, mbaŋə̀ ze nyaʼa wɨrɨ kɔ zə ɨsɨ, əne wɨ̀ nyaʼa nɔʼ beenɨ əbɔʼ ə Yeso wò əsɨ ze nɨ wɨ̀ nyaʼə wòə̀.
Currently Selected:
Mk 10: mgo
Highlight
Share
Copy
Want to have your highlights saved across all your devices? Sign up or sign in
© 2013, Cameroon Association for Bible Translation and Literacy
