Mk 11

Yeso nyaʼa nyɨ ə Jèrusalèm ɨghabɨ ɨfɔ̀n

(Mt 21.1-11; Lk 19.28-40; Jn 12.12-19)

1Ənɨ Yeso mbɨ mbi mə̀mə̀ə̀nɨ̀-ɨnû nyaʼa sɨə tiinɨ ɨban ə Jèrusalèm, mbɨ nyaʼa pè ə Bètfagè mbɨ ə Betanì nɨ nyaʼa ɨbom Ɨwum mɨ̀Olìf. Ənɨ mbɨ nyaʼa pè əŋgu, Yeso nyaʼa tom mbi mə̀mə̀ə̀nɨ̀-ɨnû mɨbe. 2Wɨ̀ nyaʼa ghà əmbɨ mɨ̀mə̌d ni, “Mbə̀ wo nyɨ ɨŋga əsɨ ze nɨ yeʼ ɨmbì ɨ nən. Mbə mɨ nyɨ ə nyɨ, mbə bɨrɨ zə wan jàkas nɨ mbɨ tiŋɨ, nɨ chəi wə̀d mɔʼɔ kweʼ kɨrɨ kɔʼ ɨgun. Mbə̀ za nɨŋ yeʼe. 3Wə̀d mɔʼɔ mɨ biirɨ ɨ nən ni, 'Mbə̀ kɨə zàə̀ wan jàkas we ɨmbə̀ʼ ə yè ə?' mbə ghà ni, 'À yɨ Ə̀nùŋɨ̀sɨg kəb ə jàkas wɔ̂. Wɨ̀ bɨrɨ wɨrɨ cha rəbɔʼ àmei əwu əwən.'”

4Mbɨ nyaʼa wò pè zə wan jàkas nɨ mbɨ nyaʼa tiŋ ɨfě nəb ɨban ɨnə̂njɨ̀. Ənɨ mbɨ nyaʼə zàə̀, 5bə̂d mbe nɨ nyaʼa təmbɨ ɨban ɨban nyaʼa biirɨ əmbɨ mɨ̀mə̌d ni, “Mbə̀ kɨə əni ghɨ̀ ə ye ə? Mbə̀ kɨə zàə̀ wan jàkas we ɨmbə̀ʼ ə yè ə?”

6Mbɨ nyaʼa ghà ənû ze nɨ Yeso kəʼ ghà əmbɨ mɨ̀mə̌d. Bə̂d mbe nyaʼa zu əne sàŋ ni mbɨ wò mbɨ wɨwən. 7Mbɨ nyaʼa wò mbɨ wan jàkas we pè nàʼ əmbɨ Yeso. Mbɨ nyaʼa nàʼ əne, zì tə ngywɨ ɨgun ə wan jàkas we. Yeso nyaʼa kɔʼ chub ɨgun. 8Bə̂d mɨ̀nɔnɔʼ nyaʼa zì tə ngywɨ̌ ɨgun ɨnə̂njɨ̀. Mbɨ cherə nyaʼa sè ɨza ɨzed rɨŋga bǔʼ bə̀ wò zì ɨgun ɨnə̂njɨ̀. 9Bə̂d mbe nɨ nyaʼə wò ɨmbì mbɨ mbe nɨ nyaʼə beenɨə nyaʼə kyeŋə ghàə̀ ni,

“Tɨ̀ yiirɨ ə Ŋwiə̀!

Ŋwìə̀ zɨ əbɔrəbɔd ɨgun ə wə̀d we nɨə yeʼe ənɨ ɨkum Ə̀nùŋɨ̀sɨg!

10Ŋwìə̀ zɨ əbɔrəbɔd ɨgun ənû ɨfɔ̀n ze nɨə yeʼe, nɨ yeʼ əzɨ a mbǎʼ Dèvîd.

Tɨ̀ yiirɨ ə Ŋwìə̀ we nɨ yeʼ ɨkaŋ!”

11Yeso nyaʼa wò nyɨ ə Jèrusalèm chè wò ɨŋga mbàn Ŋwìə̀. Wɨ̀ nyaʼa pè nèŋ ɨghɨjìm kad. Àyɨə ɨchî nɨ nyùmə̀ nyaʼa fə kən chè əku, wɨ̀ nyaʼa jwɨ̀ wò ə Betanì mbɨ mə̀mə̀ə̀nɨ̀-ɨnû mbe wum chɔ̀b rɨ̀be.

Yeso nyaʼa fə əzed ə fîg

(Mt 21.18-19)

12À nyaʼa əni ze nɨ beenɨ, ənɨ Yeso mbɨ mbi mə̀mə̀ə̀nɨ̀-ɨnû nyaʼə bə̀ndɨ̀ rɨ ə Betanì, njì rɨ nyaʼa zaŋ əməd. 13Wɨ̀ nyaʼa təm zə əzed ə fîg əsa əgha nɨ nyaʼa mbɨ rɨfuʼ ɨkaŋ. Wɨ̀ nyaʼa zə əne tindɨ wò ɨban ɨ zə ni tə wa bɨrɨ zə əghɨ ə mɔʼɔ ɨkaŋ ə. Ənɨ wɨ̀ nyaʼa pe əton əzed ze, wɨ̀ nyaʼa zə àmei rɨfuʼ, ɨmbə̀ʼ ɨghəm nɨ ka nyùmə̀ we yɨə nyaʼa i nyùmə̀ nɨ mɨ̀fîg ə kɔə. 14Əne Yeso nyaʼa ghà əmbɨ əzed ə fîg ze ni, “Chəi wə̀d mɔʼɔ bɨrɨ nɔ wɨrɨ kud fɨtam nɨ à kɔ̌!” Ənɨ wɨ̀ nyaʼa ghà əne, mə̀mə̀ə̀nɨ̀-ɨnû ɨməd nyaʼa zu.

Yeso nyaʼa wò nyɨ ɨŋga mbàn Ŋwìə̀

(Mt 21.12-17; Lk 19.45-48; Jn 2.13-22)

15Ənɨ Yeso mbɨ mbi mə̀mə̀ə̀nɨ̀-ɨnû nyaʼa wò pè ə Jèrusalèm, wɨ̀ nyaʼa wò nyɨ ɨŋga mbàn Ŋwìə̀ pè kɔ kəndɨ bə̂d mbe nɨ nyaʼə fèndɨ̀ ɨghɨ bə̀ kəndɨ mbe nɨ nyaʼə zòndɨə. Wɨ̀ nyaʼa kub mɨ̀tebrə̀ bə̂d mbe nɨ nyaʼə kobrɨ ɨkab bə̀ kub ɨtən bə̂d mbe nɨ nyaʼə fèndɨ̀ mbɨ̀rə̀bəŋə. 16Chəi wɨ̀ nyaʼa ben ni wə̀d beʼ əghɨ mɔʼɔ che ɨŋga mbàn Ŋwìə̀. 17Wɨ̀ nyaʼə chwi ɨnû əmbɨ mɨ̀mə̌d ghàə̀ ni, “Chəi mbɨ wa ŋwaʼnɨ ni, 'Mbɨ bɨrɨ sɨə tɔŋə mɨ nəb ənɨ ə nəb ə̀kɔ̀ŋgɨ̀ əmbɨ ɨbeŋ jìm ə'? Àyɨə mbə fə bèŋ ənɨ əsɨ nɨ mɨjɨ ə nə̀mbɨ̀ ɨŋga.”

18Bə̂d kyeŋ mbe rɨ ə mbàn Ŋwìə̀ mbɨ məchwiə̀ rɨ̀kə̌ nyaʼa zu ənû ze nɨ wɨ̀ nyaʼə ghàə̀ əne mbɨ nyaʼa kə̀b ɨnə̂njɨ̀ nɨ zwiirɨ əməd. Àyɨə ɨ mbɨ nyaʼə bɔ əməd ɨmbə̀ʼ ɨghəm nɨ ɨnɔ̂n bə̂d we jìm wɨə nyaʼə yiirɨ ɨnû mbe nɨ wɨ̀ nyaʼə chwiə.

19À nyaʼa sɨ ɨkwirɨ kwirɨ, Yeso mbɨ mbi mə̀mə̀ə̀nɨ̀-ɨnû nyaʼa jwɨ̀ rɨ ə Jèrusalèm wò əwən.

Ənû nɨ kwembɨ rɨ ənɨ əzed ə fîg ze

(Mt 21.20-22)

20À nyaʼa ɨsɔsɔ we nɨ beenɨ, ənɨ Yeso mbɨ mbi mə̀mə̀ə̀nɨ̀-ɨnû nyaʼə chèə̀, mbɨ nyaʼa zə əzed ə fîg ze. Zɨə nyaʼa fə kwɨ wò pè ənɨ ɨghaŋ. 21Pità nyaʼa zə əne, kɔndɨ ənû ze nɨ Yeso kəʼ ghà, əne ghà ɨ bɔ ni, “Masà, neŋə! Əzed ə fîg ze nɨ à kəʼ fə kwɨ!”

22Yeso nyaʼa wììrɨ̀ əmbɨ mɨ̀mə̌d ni, “Mbə zɨ tə fîŋ ɨgun ə Ŋwiə̀. 23Mə ghà rəsìʼ ɨ nən ni, wə̀d mɔʼɔ we nɨ gha əmbɨ ɨwum wɔ̂ ni, 'Mən e, wò feŋ ɨŋga rɨ̀bàà,' zɨə bɨrɨ bɨ ghɨ àmei ɨchî nɨ wɨ̀ ghǎ. Ənû ze nɨ yeʼ əŋgu yɨ ni tɨ wɨ̀ bid i ɨŋga i fîŋ, àyɨə wɨ̀ ben ni ənû ze nɨ tə gha ə bɨrɨ ghɨ àmei ɨchî we. 24Əne mə ghà ɨ nən ni, ɨnû jìm mbe nɨ mbə̀ kɔŋgɨ ə Ŋwiə̀ nɔnə ɨ bɔ, mbə̀ ben ni mbə fə berɨ, əne mbɨ bɨrɨ yeʼ mbən. 25Ənɨ mbə̀ təm ɨ kɔŋgɨ ə Ŋwiə̀, mbə̀ waʼ ɨnû mbe nɨ mbə bɔŋgɔb ghɨ ənɨ ə nən, ɨmbə̀ʼ ə Mbǎʼ we nɨ yeʼ ɨkaŋ bə waʼ mbə ɨnû rɨbɔ̀ŋ. [ 26Mbə mɨ ton waʼ ə ɨnû rɨbɔ̀ŋ bə̂d cherə, njɨ ka ə Mbǎʼ we nɨ yeʼ ɨkaŋ bɨrɨ bɨ waʼ i mbə ɨnû rɨbɔ̀ŋ.]”

Ɨbiirɨ ɨmbə̀ʼ wə̀d we nɨ naʼ ɨka əmbɨ Yeso

(Mt 21.23-27; Lk 20.1-8)

27Yeso mbɨ mbi mə̀mə̀ə̀nɨ̀-ɨnû nyaʼa wɨrɨ bə̀ndɨ̀ wò ə Jèrusalèm. Ənɨ wɨ̀ nyaʼə yèn ɨŋga mbàn Ŋwìə̀, bə̂d kyeŋ mbe rɨ ə mbàn Ŋwìə̀ mbɨ məchwiə̀ rɨ̀kə̌ fɔrɨ bə̂d kyeŋ mbe rɨŋga əbeŋ nyaʼa wò əsɨ məd, 28pè biirɨ ɨ bɔ ni, “À kɨ ənɨ ɨka we nɨ à ghɨ ɨnû mbɔ̂ ə? À kɨə we naʼ ɨka wɔ̂ ɨ ne ə?”

29Yeso nyaʼa ghà əmbɨ mɨ̀mə̌d ni, “Mə bɨrɨ bɨ biirɨ ənû ə mɔʼɔ ɨ nən. Mbə wiirɨ ɨ num, əne mə bɨrɨ bə̀ sɨ ghà əsɨ ze nɨ mə nɨŋ ɨka rəŋgu bɔŋ sɨə ghɨ̀ ɨnû mbɔ̂. 30À kɨə Ŋwìə̀ nyaʼa naʼ ɨka əmbɨ Jɔ̌n ni wɨ̀ nàʼ mɨnib kɨ̀ à kɨ̀ ə bə̂d ə? Mbə̀ wiirɨ ɨ num.”

31Mbɨ nyaʼa kɔ tàŋɨ mbənə mbənə ghàə̀ ni, “Tɨ̀ mɨ ghà ni, 'À yɨə Ŋwiə̀', wɨ̀ bɨrɨ biirɨ ɨ na ni, 'À nɨə yeʼ əne, njɨ chəi mbə̀ nyaʼa ben əməd ɨmbə̀ʼ ə yè ə?' 32Tɨ̀ wa ghà ni, 'À yɨə bə̂d'…” Ɨ mbɨə nyaʼə bɔə bə̂d mbe ɨmbə̀ʼ ɨghəm nɨ mbɨ nyaʼa ben ni Jɔ̌n yɨə nyaʼə wə̀d ɨ̀kə̀n Ŋwìə̀ rəsìʼ. 33Əne mbɨ nyaʼa wììrɨ̀ əmbɨ Yeso ni, “Chəi tɨ̀ kyerɨ.”

Yeso nyaʼa bə̀ ghà əmbɨ mɨ̀mə̌d ni, “Chəi mə bɨrɨ bɨ ghà wə̀d we nɨ naʼ ɨka ɨ num ni mə̀ ghɨ ɨnû mbɔ̂.”

Currently Selected:

Mk 11: mgo

Highlight

Copy