Mk 12

Ənû ə mɨgɨ ɨmbə̀ʼ bə̂d nɨ nyaʼa yim mbeŋ vaìn

(Mt 21.33-46; Lk 20.9-19)

1Yeso nyaʼa kɔ gha ɨnû mɨgɨ əmbɨ ə bə̂d mbe nɨ nyaʼə tekɨ ɨnû ɨŋga əbeŋ mɨ̀Jû ni, “Mbaŋə̀ mɔʼɔ nyaʼa kon mbeŋ vaìn, kod ɨkam ghab, toŋ ɨbɨgɨ nɨ mbɨ bɨrɨ sɨə mìn mɨ̀noʼ ɨŋga, bə̀ bɔm nəb ɨkaŋ nɨ wə̀d bɨrɨ chub ɨŋga nəŋgɨ mbeŋ ze. Wɨ̀ nyaʼa ghɨ̀ əne əne nàʼ mbeŋ ze əmbɨ ə bə̂d mɔʼɔ ni mbɨ faʼ ɨŋga. Wɨ̀ nyaʼa nàʼ əne, nɔ̀ʼ wò ɨŋga əbeŋ ə cherə. 2Ənɨ nyùmə̀ nyaʼa kuʼu nɨ mbɨ bɨrɨ kab tɨtam rɨ vaìn te, wɨ̀ nyaʼa cha i wə̀d ə̀fàʼì əmbɨ ə bə̂d mbe nɨ nyaʼa yim mbeŋ ze ni wɨ̀ wo nɨŋ əbà əməd tɨ ənɨ rɨtam vaìn te. 3Bə̂d mbe nyaʼa yim wə̀d ə̀fàʼì we, som əməd, əne chà əməd rəbɔʼ ɨbɔ-ɨbɔ. 4Wɨ̀ nyaʼa yì chà wə̀d ə̀fàʼì cherə əmbɨ mɨ̀mə̌d. Mbɨ nyaʼa som we toʼ ətu, bə̀ bəə ghɨ̀ə̀ mbɨ məd ɨchî nɨ chəi mbɨ kəʼ berɨ ghɨ̀. 5Wɨ̀ nyaʼa yì chà wə̀d ə̀fàʼì cherə. Mbɨ nyaʼa zwiirɨ we. Wɨ̀ nyaʼa bə̀ chà bə̂d ə̀fàʼì cherə nɔnɔʼ. Mbɨ nyaʼa som mbɨ mɔʼɔ bə̀ zwiirɨ mbɨ mɔʼɔ. 6Mbaŋə̀ ze nyaʼa kɨrɨ berɨ wə̀d cherə mɔʼ, nɨ nyaʼə wan məd nɨ wɨ̀ nyaʼa ghaʼi kwàʼ rɨŋgəʼ. Wɨ̀ nyaʼa sɨ nwìə̀ chà we əmbɨ mɨ̀mə̌d, ghàə̀ ni, 'Mbɨ bɨrɨ wumnɨ mɨ wan.' 7Àyɨə bə̂d mbe nɨ nyaʼa yim mbeŋ ze nyaʼa ghà mbənə mbənə ni, 'À yɨ əjɨnəb məd wɔ̂. Mbə yeʼe tɨ̀ zwiirɨ əməd, ɨmbə̀ʼ ɨghɨ mbɔ̂ sɨ yeʼ mba.' 8Mbɨ nyaʼa ghà əne yim wan we zwiirɨ, màʼ əməd ənjìm ɨkam mbeŋ vaìn ze.

9“Mbaŋə̀ ze nɨ nyaʼa berɨ mbeŋ vaìn ze kɨə wo ghɨ ye ə? Wɨ̀ bɨrɨ wo zwiirɨ bə̂d mbe nɨ nyaʼa yim mbeŋ ze, sɨ nàʼ mbeŋ ze əmbɨ ə bə̂d cherə. 10Chəi mbə̀ kɨrɨ foŋ ənû zɔ̂ ɨŋga Ə̀ŋwàʼnɨ̀ ə Ŋwiə̀ ni,

'Ɨti we nɨ məbɔmɨ nəb nyaʼa tonɨ,

fə bèŋ ənɨ ɨti rɨ ɨbu nəb.

11Ənû zɔ̂ yɨ Ə̀nùŋɨ̀sɨg ghɨ̌.

À yɨ ənû ə yiirɨ ɨ na nɨ zə!'”

12Bə̂d mbe nɨ nyaʼə tekɨ ɨnû ɨŋga əbeŋ mɨ̀Jû nyaʼa zu əne, kəb gywɨ əməd ɨmbə̀ʼ ɨghəm nɨ mbɨ nyaʼa kyerɨ ni ɨ wɨə nyaʼə ghà ənû ə mɨgɨ ze ɨmbə̀ʼ əwən. Àyɨə mbɨ nyaʼa bɔ bə̂d mɨ̀nɔnɔʼ mbe. Əne mbɨ nyaʼa sàŋ əməd nɔ̀ʼ wò əwən.

Ɨbiirɨ ɨmbə̀ʼ ənû nɨ maʼ mɨ̀tagsɨ̀

(Mt 22.15-22; Lk 20.20-26)

13Bə̂d mbe nɨ nyaʼə tekɨ ɨnû ɨŋga əbeŋ mɨ̀Jû nyaʼa tom mɨ̀Farisiî mɔʼɔ fɔrɨ bə̂d mbe nɨ nyaʼə tìmbɨ̀ ə Herɔ̀d ni mbɨ wo əsɨ Yeso ɨmbə̀ʼ zɨ ətam ɨ bɔ ənɨ ɨŋgam məd. 14Mbɨ nyaʼa wò pè ghà ɨ bɔ ni, “Əchwiə̀-ɨnû, tɨ̀ kyerɨ ni à wɨə ghà rəsìʼ, fɔrɨ ni chəi àwɔ̀ ə bɔə bə̂d, ɨmbə̀ʼ ɨghəm nɨ chəi àwɔ̀ ə ghɨ̀ ɨghə. Àyɨə à wɨə chwiə rəsìʼ ɨmbə̀ʼ ɨchî nɨ Ŋwìə̀ kəb ni bə̂d chubɨ. Tɨkə ə wa chwiə ni tɨ̀ maʼ mɨ̀tagsɨ̀ əmbɨ Kaisà, kɨ̀ chə ə? 15Tɨ̀ maʼa kɨ̀ tɨ rɨ̀ maʼ əwa ə?”

Yeso nyaʼa kyerɨ ɨbekɨ ɨnû mɨ̀mə̌d, əne wɨ̀ nyaʼa ghà əmbɨ mɨ̀mə̌d ni, “Mbə̀ kɨə kəb kwaʼnɨ əmɨ ɨmbə̀ʼ ə yè ə? Mbə̀ yeʼe mbɨ ɨkab ətənɨ mɔʼɔ mə zə.”

16Mbɨ nyaʼa wò nàʼ wɨ mɔʼɔ ɨ bɔ. Əne wɨ̀ nyaʼa biirɨ əmbɨ mɨ̀mə̌d ni, “Ɨfě wɔ̂ mbɨ ɨkum wɔ̂ kɨ wɨ we ə?”

Mbɨ nyaʼa wììrɨ̀ ɨ bɔ ni, “À yɨ wɨ Kaisà.”

17Yeso nyaʼa ghà əmbɨ mɨ̀mə̌d ni, “Mbə̀ naʼ ɨghɨ Kaisà əmbɨ Kaisà, bə̀ nàʼ ɨghɨ Ŋwiə̀ əmbɨ ə Ŋwiə̀.”

Mbɨ nyaʼa kàŋ yiirɨ ɨchî nɨ wɨ̀ nyaʼa wiirɨ ɨŋgam we.

Ɨbiirɨ ɨmbə̀ʼ ənû nɨ zwemə

(Mt 22.23-33; Lk 20.27-40)

18Mɨ̀Sadusiî mbɨə nyaʼə ghàə̀ ni chəi bə̂d bɨrɨ zwemə. Əne mbɨ mɔʼɔ rəbɔʼ mɨ̀mə̌d nyaʼa wò əsɨ Yeso pè biirɨ ɨ bɔ ni, 19“Əchwiə̀-ɨnû, Mose nyaʼa ŋwàʼnɨ̀ ɨ na ni aŋgɔb mbaŋə̀ mɔʼɔ mɨ kwɨ nùŋ i ɨwi nɨ chəi wan, mbaŋə̀ ze berɨ nɨŋ ɨku əyi we gywɨ bɔn mbɨ məd, nɨ bɨrɨ yeʼ bɔn aŋgɔb məd we nɨ nyaʼa kwɨ. 20Bɔŋgɔb mɔʼɔ sambe nyaʼa əŋgu, wɨ rɨtu nyaʼa nam i ɨwi, kwɨ nɨ chəi wɨ̀ berɨ bɔn. 21We nɨ beenɨ nyaʼa nɨŋ ɨku əyi we, bə̀ kwɨ nɨ chəi wɨ̀ berɨ bɔn. Zɨə nyaʼa ghɨ̀ àmei əndəŋ əndəŋ mbɨ we nɨ nyaʼa pe ənɨ mbɨ tad. 22Zɨə nyaʼa chè ni bɔŋgɔb mbe sambe nyaʼa kwɨ nɨ chəi mbɨ berɨ bɔn. Əyi we nyaʼa bə̀ sɨ nwìə̀ kwɨ i. 23Ənɨ bə̂d bɨrɨ zwemə, ɨku əyi we kɨə wo yeʼ ɨwi we, ɨchî nɨ bɔŋgɔb mbe sambe nyaʼa nam əməd ə?”

24Yeso nyaʼa wììrɨ̀ əmbɨ mɨ̀mə̌d ni, “Əton nɨ mbə̀ febə yɨ ni chəi mbə̀ kyerɨ Ə̀ŋwàʼnɨ̀ ə Ŋwiə̀ kɨ̀ bè kyerɨ ɨka Ŋwiə̀. 25Ənɨ bə̂d bɨrɨ zwemə, chəi mbɨ bɨrɨ wɨrɨ nam, chəi mbɨ bɨrɨ wɨrɨ naʼ bɔn ə nəb ɨnamɨ. Bə̂d bɨrɨ sɨ ɨghabɨ mbɨ̀aŋgɨrə̀ mbe nɨ yeʼ ɨkaŋ. 26À yeʼ ɨmbə̀ʼ ənû nɨ ɨvɨ bə̂d bɨrɨ zwemə, chəi mbə̀ kɨrɨ foŋ ɨŋga ə̀ŋwàʼnɨ̀ ze nɨ Mose nyaʼa ŋwaʼnɨ, ɨŋga əsɨ ze nɨə ghà ɨmbə̀ʼ ətud nɨ nyaʼə fɨə, ɨchî nɨ Ŋwìə̀ nyaʼa gha ɨ bɔ ni, 'Mɔ̌ yɨə Ŋwìə̀ Abràham, Ŋwìə̀ Aizìk, mbɨ Ŋwìə̀ Jakɔ̂b ə'? 27Kaʼ məd yɨ i Ŋwìə̀ ɨvɨ bə̂d. Məd yɨə Ŋwìə̀ bə̂d mbe nɨ yeʼ ɨkǎ. Mbə fə kàŋ febə.”

Ɨkə we nɨ che tɨkə rɨjìm

(Mt 22.34-40; Lk 10.25-28)

28Əchwiə̀ rɨ̀kə̌ mɔʼɔ nyaʼa zu ɨchî nɨ Yeso mbɨ mɨ̀Sadusiî mbe nyaʼə ghàmə̀, bə̀ zə ɨchî nɨ Yeso nyaʼə wììrɨ̀ ɨŋgam əmbɨ mɨ̀mə̌d ɨchî chɔ̀m, əne wɨ̀ nyaʼa biirɨ ɨ bɔ ni, “Ɨkə we nɨ che tɨkə rɨjìm kɨ wi ə?”

29Yeso nyaʼa wììrɨ̀ ɨ bɔ ni, “Ɨkə we nɨ che tɨkə rɨjìm yɨ ni, 'Mbə̀ zu, kyɨə mɨ̀Izre! Ə̀nùŋɨ̀sɨg a Ŋwìə̀, Ə̀nùŋɨ̀sɨg mei we mɔʼ. 30À berɨ ghaʼ Ə̀nùŋɨ̀sɨg e Ŋwiə̀ ənɨ e fîŋ jìm, ənɨ e ɨ̀tènɨ̀ jìm, ənɨ te rɨkɔndɨ rɨjìm bə̀ fɔrɨ ənɨ e ɨka jìm.' 31We nɨ beenɨ yɨ ni, 'À berɨ ghaʼ wə̀d nɨ tindɨ ɨban ne ɨchî nɨ à ghaʼ e nyamnyod.' Chəi ɨkə cherə nɨ che tɔ̂ rɨ̀be.”

32Əchwiə̀ rɨ̀kə̌ we nyaʼa ghà ɨ bɔ ni, “Əchwiə̀-ɨnû, à fə ghà ənû nɨ kuʼnɨ. À fə ghà rəsìʼ ni Ŋwìə̀ mei we mɔʼ, fɔrɨ ni chəi wɨ cherə. 33Ənû nɨ ghaʼ əməd ənɨ ə fîŋ jìm, ənɨ ɨwe jìm, ənɨ ɨka jìm bə̀ fɔrɨ nɨ ghaʼ wə̀d nɨ tindɨ ɨban ne ɨchî nɨ à ghaʼ e nyamnyod ə chè nyam rɨ̀jìm te nɨ mbɨə tɔ̀n əmbɨ ə Ŋwiə̀ bə̀ chè ɨghɨ ə̀fà jìm.”

34Ənɨ Yeso nyaʼa zə ni wɨ̀ fə wììrɨ̀ ənɨ ɨwe, wɨ̀ nyaʼa ghà ɨ bɔ ni, “À fə tiinɨ ɨban ənû ɨfɔ̀n ə Ŋwiə̀.”

Ɨ kɔ rɨ ənɨ ə nyùmə̀ we, chəi wə̀d mɔʼɔ nyaʼa wɨrɨ yim fîŋ biirɨ ənû mɔʼɔ ɨ bɔ.

Ɨbiirɨ ɨmbə̀ʼ Wə̀d we nɨ Ŋwìə̀ zɔʼɔ

(Mt 22.41-46; Lk 20.41-44)

35Ənɨ Yeso nyaʼə chwi ɨnû ɨŋga mbàn Ŋwìə̀, wɨ̀ nyaʼa biirɨ ni, “Məchwiə̀ rɨ̀kə̌ kɨə ghàə̀ ni Wə̀d we nɨ Ŋwìə̀ zɔʼɔ yɨə wan tɨ ənɨ əghaŋ ə Dèvîd rɨ ye ə? 36Əzwî ə Zeŋɨ ə nyaʼa fe ə Dèvîd wɨ̀ ghà ziə ni,

'Ə̀nùŋɨ̀sɨg nyaʼa ghà əmbɨ mɨ Ə̀nùŋɨ̀sɨg ni,

Chub ənɨ mɨ əbɔ ə jɨgɨ,

pè ənɨ mə̀ nuŋ mbe bə̂d pə̀n əton mbe ɨwu.'

37Dèvîd ziə wɨə tɔŋ əməd ənɨ Ə̀nùŋɨ̀sɨg. Zɨə sɨ wɨrɨ chè rɨ ye ni məd yɨə wan tɨ ənɨ əghaŋ əməd ə?”

Ɨnɔ̂n bə̂d we nyaʼa ghaʼ nɨ zu ənû ze nɨ wɨ̀ nyaʼə ghàə̀.

Yeso nyaʼa patɨ bə̂d dè məchwiə̀ rɨ̀kə̌

(Mt 23.1-36; Lk 20.45-47)

38Ənɨ Yeso nyaʼə chwi ɨnû, wɨ̀ nyaʼa ghà ni, “Mbə̀ we əwən ɨmbə̀ʼ məchwiə̀ rɨ̀kə̌. Mbɨ ghaʼ nɨ zɨ ngywɨ̌ rɨ se ghanə yènə̀ mbɨ rɨwən. Mbɨ bə̀ ghaʼ ni bə̂d chaʼrɨ əwən mbɨ ɨwumnɨ ɨŋga mɨ̀wǐn. 39Mbɨ ghaʼ nɨ chub ɨgun ɨtən mbe nɨ yeʼ ɨfě ɨŋga nəb tɨ ə̀kàtɨ̀. Mbɨ bə̀ ghaʼ ɨsɨ ɨwumnɨ ənɨ bə̂d kaʼ ɨchwɨ̂. 40Ɨ mbɨə tambɨə mɨku əyi ɨmbə̀ʼ fe ɨghɨ mɨ̀mə̌d. Mbɨ mɨ nɨə ghɨ̀ əne, mbɨ sɨ bègrɨ̀ kɔŋgɨ ə Ŋwiə̀ ənɨ əgha ə se. Ŋwìə̀ bɨrɨ zɨ ɨsaʼi nɨ che əbɔ ɨgwɨ mɨ̀mə̌d.”

Əghɨ nɨ ɨku əyi nyaʼa chəmnɨ ə Ŋwiə̀ əŋgu

(Lk 21.1-4)

41Yeso nyaʼa chub ɨban rɨkub ze nɨ mbɨ nyaʼə zɨ̀ ɨchəmnɨ Ŋwiə̀ ɨŋga. Wɨ̀ nyaʼə neŋ ɨchî nɨ bə̂d nyaʼə zɨ̀ ɨkab ɨŋga rɨkub ze. Bə̂d ɨkab mɨ̀nɔnɔʼ nyaʼə zɨ̀ ɨkab nɨ nɔʼɔ. 42Ɨku əyi kwaŋ mɔʼɔ nyaʼa pè zɨ̀ ɨkab ɨtənɨ mɨ̀kɔpà be nɨ ɨnun nyaʼa ɨghabɨ mɨ̀fraŋ wum. 43Yeso nyaʼa zə əne tɔŋ mbi mə̀mə̀ə̀nɨ̀-ɨnû əsɨ ni ghà əmbɨ mɨ̀mə̌d ni, “Mə ghà rəsìʼ ɨ nən ni ɨku əyi kwaŋ wɔ̂ fə zɨ̀ ɨkab nɨ nɔʼɔ chè wɨ bə̂d mɨ̀jìm mbe nɨə zɨ̀ ɨkab ɨŋga rɨkub ze, 44ɨmbə̀ʼ ɨghəm nɨ mɨ̀mə̌d mɨjìm mbɨə nàʼə̀ wən tɨ ənɨ ɨkab nɔnɔʼ, àyɨə məd we nɨ yeʼ əyi kwaŋ fə kùtɨ̀ ə̀bàm zɨ̀ ɨkab jìm we nɨ wɨ̀ berɨ.”

Currently Selected:

Mk 12: mgo

Highlight

Copy