Matiu 9

1Yeezu yaa ga jo ŋaaruŋku po a ŋman pilim lo nyakpiemu jueli cheŋ wadek tɛŋka.

2Dula jigini ate nuru a boro ate wa nisima ale wa naŋsa a kpi. Nuruba yaa pai wa dueni tiak po a ta jam Yeezu jigi. Yeezu le nya ba siaka ale soa diila, wa yaa weeni nuru waai nisimaŋa ale wa naŋsaŋa ale kpi la ayen, <<M biiga, yik fidek. M vɔŋ fi wabaataŋa a te fu kama.>> 3Sinsak sagrɔma gela yaa weeni badek ayen, <<Wa ale a biisi diila wa a lɛ Wen kama.>>#9:3 Kaabka 24:15-16 4Yeezu a poom seba wa popola po ba ale a poli diila kama yaa bek ba ayen, <<Ka boan popola baata ate nama a poli? 5Kun dek ale moali ate fi weeni nuruwa de ate wa nisima ale wa naŋsa a kpi la ayen m vɔŋ wa wabaataŋa a te wa yaase wa yiti a cheŋ? 6Mi a yaali kama ayen ni seba ayen Mi Saalɔbiika a ta pagrim kama tɛŋzuk meena a baga vɔŋ nuruba wabaata a te ba.>> Wa yaa weeni nuru waai ale a yuak la ayen, <<Yiti a zaani abe fi pai fi tiaka a cheŋ kuli fi yenni.>> 7Nuruwa yaa deri yiti a zaani a pai wa tiaka a cheŋ kuli. 8Yɔgsum nna yegayega yaa deri yik baai meena ale jam za dula la. Ba yaa te Wen pimpauk, dii nyiŋla wa ale te Yeezu suik ate wa baga a tom tuini de la.

9Yeezu yaa le basi dula jigini ale a taam la, wa yaa nya nuru wa yuei jam le Matiu. Wa jam kala ka lampoo cheesika dɔkku po a tuesi lampoo. Yeezu yaa weeni wa ayen, <<Yiti va mu.>> Wa yaa yiti va wa.

10Yeezu ale wa ŋaaŋviirɔma yaa cheŋ Matiu yenni ayen ba dɛ ŋandiinta. Lampoo cheesirɔba ale wabaata nyam nna yegayega yaa jam gum wa ale wa ŋaaŋviirɔma po, ate ba meena yaa kala a dɛ ŋandiinta. 11Farisiiba gela yaa nya ba ale ba a dɛ ŋandiinta. Ba yaa bek wa ŋaaŋviirɔma ayen, <<Ka boa ate ni sagrɔwa ale wabaata nyam ale lampoo cheesirɔba a dɛ ŋandiinta ale chaaba?>> 12Yeezu yaa wom dii ate ba a bek la yaa tulisi ba ayen, <<Baai ale ta nyiŋyɔgsa la kan yaali tebirɔ alege ka baai ale a yuak la.>> 13Ba jam a ŋmarisi Wen gbaŋka dipo ayen wa weeni ayen, <Nama ale ta jiirim ale chaab diila a peenti mi sui a gaam nama ale a ko duŋsa a kaabi a te mi la kama.>#9:13 Yosea 6:6 Ni be cheŋ a ga gisi dii ate Wen a weeni ni la kiri. Mi an jam ayen m wi ka wayɔrisima nyama alege ka wabaata nyam.>>

14Jɔɔn Sokateerɔwa ŋaaŋviirɔma a yaa jam Yeezu jigi a bek wa ayen, <<Ka boa ate tama ale Farisiima a kasim a bobi nɔi alege fi ŋaaŋviirɔma a kan bobi?>> 15Yeezu yaa weeni ba ayen, <<Ase nuru a dan faari nipok, wa doama sui a kaasi kama? Aaya, ŋa kan kaasi. Alege ku cheena ate ba le yik nipok fiaka nyɔnɔwa a ta cheŋ, dila powa ba yaa le bobi nɔi. 16Nuru a kan pai garuchiak paalik a laŋ garuk kpaga. Ba dan nye dila, garukku a kan beni ku le cheeri a gum du. 17Ba kan pai da paalib a su bunlɔk kpak po. Ba dan nye dila, bunlɔkku a na kama ate daamu a waaŋ ate bunlɔkku a kaasi. Ba pai da paalib a su ka bunlɔk paaluk po ate ba waai kan kaasi.>>

18Yeezu ale diem a biisi ale ba, kpagi yaa jam a kpi duna tɛŋ wa niŋ a weeni wa ayen, <<Ka m lie ale deri kpi. Mi a saalim fu ayen fi jam a pai fi nisaŋa a tiri wa ate wa yiti kum po.>> 19Yeezu yaa yiti va wa ate wa ŋaaŋviirɔma mɛ a va cheŋ.

20Nipok ale jam bo dula a lo chiak bena pi ale ŋaye.#9:20 Kaabka 15:25-30 Wa yaa va Yeezu ŋaaŋ a mak tiri wa garukku.#9:20 Chiinika 15:37-41 21Wa jam poli wa suinum po ayen, <<M dan baga a paari wa garukku nɔnni a tiri, m le nya nyiŋyɔgsa.>> 22Yeezu yaa viriŋ ŋaaŋ a nya wa ale weeni ayen, <<M lie pii nyiŋ. Fi ale ta siaka ale mi diila a basi kama ate fi nya nyiŋyɔgsa.>> Wa le weeni nya kude la, nipowa yaa deri nya nyiŋyɔgsa.

23Yeezu ale ga paari kpagni yenni la, wa yaa nya yiyiirisa ale ba kala dula jigini alege baai mɛ a kum. 24Wa yaa weeni ba ayen, <<Ni meena a yiti nyini. Biika an kpiya, alege wa a goa kama.>> Ba ale wom dila la, ba yaa deri a la wa. 25Nuruma meena yaa le nyini la, Yeezu yaa jo biika dɔkku po a yik wa nisaŋa ate wa yiti. 26Dii ate Yeezu a nye la, a yaa deri waaŋ tɛŋ sii meena ale gilim dula jigini la.

27Yeezu ale nyini dula jigini a nyini a cheŋ la, yeeba baye yaa wom wa a yaa deri cheŋ va wa. Ba yaa kaari a wi wa a weeni ayen, <<Deevid Nidoabinni, ta jiirim ale ti.>> 28Yeezu ale ga jo yenni la, yeema bayewa yaa jam wa jigi. Yeezu yaa bek ba ayen, <<Nama ta siaka ayen mi baga a tebi ni?>> Ba weeni wa ayen, <<Mm, m Nyɔnɔ Yeezu.>> 29Dula jigini Yeezu yaa tiri ba ninaŋa ale weeni ba ayen, <<Basi ate ku nye ase ni siaka ale ka diila.>> 30Ba ninaŋa yaa deri lagri ate ba a nya. Yeezu yaa kaam ba ayen, <<Ku a fɛ kama ate ni kan weeni waai dii ale nye la.>> 31Alege nuruba bayewa de a ta ga weeni ate ku tagli tɛŋ sii meena ale moata dula jigini la.

32Ase nuruba bayewa ale jam a cheŋ la, nuruba gela yaa jam ta nuru wa choa jam Yeezu jigi. Chichirik biok ale jam ta wa ate wa an jam baga a biisi. 33Yeezu ale yiak chichirik bioku ate ku nyini nuruwa po a nyini la, wa yaa deri a biisi. Ku yaa deri cha nuru baai meena ale za dula la. Ba yaa weeni chaab ayen, <<Tama an diem a nya wanni de choa Izirali.>> 34Alege Farisiima a weeni ayen, <<Ka chichirik baataŋa kpagni ale te wa pagrimu ate wa baga a yiak chichirik baata nuruba po.>>

35Va ŋala po Yeezu yaa kasim a nyiem tɛŋ kpieŋsaŋa ale tɛŋ kpaŋsaŋa meena. Wa jam a sak nuruba Wen naamu wie ba tuka diinaŋa po, ale a tebi nyiŋtuila ale tueta meena.

36Wa ale ga nya nuru boanni la, wa jiirim yaa jam bo ale ba dii nyiŋla ku jam a daani ba kama nna yegayega ate ba yaa yaali maarika. Ba jam a nye ase ka piisa ale kan ta naapeerik la. 37Wa yaa jam weeni wa ŋaaŋviirɔma ayen, <<Cheka tuima ale boro nna yegayega, alege tuimtomdɔma an piisi ya. 38Ni puusi a te Wen dii ale ka cheka nyɔnɔwa la ate wa basi ate tuimtomdɔba yegayega a jam.>>

Currently Selected:

Matiu 9: BWU

Highlight

Copy