Matiu 8

1Yeezu ale jam nyini guuku zuk a siŋ la, nuru boari yegayega yaa va wa. 2Gami#8:2 Kaabka 13:45-46 dinyi yaa yiti a cheŋ ga kpi duna wa niŋ a saalim wa ayen, <<M Nyɔnɔ Yeezu, be tebi m tuemu de a te mu ase fi nin a yaali.>> 3Yeezu yaa teeri nisa a tiri wa ale weeni wa ayen, <<M tebi fu kama, dii nyiŋla mi a yaali kama ayen fi nya nyiŋyɔgsa.>> Wa ale weeni dila la, gamini tuemu a yaa deri basi wa ate wa nya nyiŋyɔgsa. 4Yeezu a ŋman weeni wa ayen, <<Kan weeni a sak waai ya, alege be cheŋ kaabteerɔwa jigi ate wa nya fu. Pai fi tiirimu a te ase Moosis ale jam a sak ti dii dipo la. Kula ale sak nuruba ayen fi tuemu a basi kama.>>#8:4 Kaabka 14:1-32

5Yeezu ale ga paari Kapernaum tɛŋka la, tugurik tɔŋdɔba kpagi yaa jam tu wa a saalim ayen wa maari wa. 6Wa yaa weeni Yeezu ayen, <<M Nyɔnɔ Yeezu, m tomteerɔ ale bo yeri ate wa naŋsa ale wa nisima kpi ate wa a nam nna yegayega.>> 7Yeezu yaa weeni wa ayen, <<M le jam a nye ate wa nya nyiŋyɔgsa.>> 8Tugurik tɔŋdɔba kpagni yaa ŋman weeni wa ayen, <<M Nyɔnɔ Yeezu, mi daa nuru waai ale magsi ayen fi jam m yenni la. Juijui ate ti za nna, fidek a weeni fi wanni ate m tomteerɔwa a nya nyiŋyɔgsa. 9Mi mɛ ka nuru waai ale a tom a te kpaga ŋa chaab la. Alege m ta tugurik tɔŋdɔba kama a nya ba zuk. M dan weeni ba wanyi ayen wa cheŋ dela, wa a cheŋ kama, m dan weeni wanyi mɛ ayen wa jam de, wa a jam kama, m dan weeni m tomteerɔwa ayen, <Nye nna,> wa a nye kama.>> 10Wa ale weeni diila, yaa deri cha Yeezu nna yegayega. Wa yaa cheem weeni nuru boanni meena ale va wa la ayen, <<Mi a weeni ni ka wensie, mi an nya nuru Izirali ate wa ta siaka ase nuruwa dɛ la. 11Ni wom mi wieŋa de nalimnyiini. Dai yeŋ po nuruba ale nyini konni ale yeniŋka geŋ a jam jo Wen naamu po a dɛ ŋandiinta ale Abrayam ale Aizik ale Jekob. 12Alege baai ale magsi ayen ba jo dula jigini la, Wen ale yuk ba basi legini po, dula ba le kasim a kum kama ale a ŋɔbi nyina.>> 13Yeezu yaa ŋman cheemu tugurik tɔŋdɔma kpagni jigi a weeni wa ayen, <<Kuli yeri. Fi ale ta siaka la nyiŋ, mi le nye a te fu.>> Wa tomteerɔwa a yaa deri nya nyiŋyɔgsa.

14Yeezu yaa cheŋ ga jo Piita yenni po a nya ale wa ŋanuba a yuak. Wa nyiŋ ale jam toliŋ ate wa doa. 15Yeezu yaa tiri wa nisaŋa ate wa deri nya nyiŋyɔgsa. Wa yaa yiri yaali nyiam a te wa. 16Wein ale jam siŋ la, tɛŋka demma yaa ta yuarɔba ale baai ate chichirik baata a bo ba zuima po la a jam Yeezu jigi. Wa yaa pai wa wanni a yiak chichirik baataŋa nuruba zuima po a basi alege a tebi yuarɔma meena. 17Wa nye nya kude kama ate ku sak ayen dii ate Wen biisiteerɔwa Azaya a ŋmarisi Wen Gbaŋka po dipo la a jam ka wensie. Wa jam a weeni ayen, <<Wala dek le pai ti nyiŋtuilaŋa ale ji ti tuetaŋa meena.>> (Azaya 53:4)

18Yeezu ale nya nuru boanni ale ba gilim wa la, wa yaa weeni wa ŋaaŋviirɔma ayen ba lo nyakpiemu a jueli kauk kunkula. 19Sinsak sagrɔ yaa jam Yeezu jigi a weeni wa ayen, <<M sagrɔ, m gomsi a magsi kama ayen m va fu a cheŋ juijui meena ate fi a cheŋ la.>> 20Yeezu yaa weeni wa ayen, <<Suemkpatta a ta vie kama a jo, nuinsa mɛ abe ta tugta kama mɛ a jo, alege Mi Saalɔbiika potim ka m dek yeri a goa.>> 21Yeezu ŋaaŋviirɔma wanyi yaa ŋman weeni wa ayen, <<M Nyɔnɔ Yeezu, mi mɛ a yaali kama ayen m va fu, alege basi ate m liŋ a ga pai m kowa a gu.>> 22Yeezu yaa weeni wa ayen, <<Jam a va mi yɔgyɔgla de, abe fi basi ate baai ale kpi la a gu badek kpiema.>>

23Yeezu ale jam jo ŋaaruŋku po la, wa ŋaaŋviirɔma yaa jam va wa. 24Ase ba ale jam a cheŋ la, va kpioŋ yaa deri yiti a fuk nna yegayega. Ku yaa fɔbi nyiamu ate bu yiti a nak ŋaaruŋku ate bu gela mɛ a jo ŋaaruŋku po ate ku a nye ku siŋ nyiamu tɛŋ. Nya kude meena ale jam nye la, Yeezu a jam doa ŋaaruŋku po a goa kama. 25Wa ŋaaŋviirɔma yaa nak wa yiti a weeni wa ayen, <<M Nyɔnɔ Yeezu, tama a bo ka kum po. Vari ti a basi.>> 26Yeezu yaa yiti a bek ba ayen, <<Ka boa ate nama a chali yɔgsummoa? Ni siaka an soa diiya?>> Wa yaa weeni vioku ayen ku basi alege weeni nyiamu mɛ ayen bu baliŋ. Vioku a deri basi ate nyiamu mɛ a baliŋ. Bu an ŋman a choa ale magadek mɛ. 27Ku yaa deri cha ba nna yegayega. Ba yaa bek chaab ayen, <<Ka boan jaab nuru ale nna? Wa baga a biisi ale vioku ale nyiamu ate ba a wom wa nɔi.>>

28Ba ale gaam taam paari nyakpiemu kauk kunkula la, ba yaa ga paari nuru baai ate ba a wi ba ayen Gadara demma la tɛŋka. Nuruba baye ale jam bo dula jigini a ta chichirik baata ba zuima po. Nuru waai an jam baga a nyiem a va suik kula. Yeezu ale ga nyini ŋaaruŋku po a siŋ tɛŋ la, nuruba bayewa yaa deri nyini juijui ate ba a gu nuruba la, a jam tu wa. 29Ba yaa kaari a bek wa ayen, <<Fi Wen Nidoabinni, ka boa ate fi a yaali ti jigiya? Dai dii danni ate Wen ayen wa jam bo tɛŋka meena demma buusa la an diem a paariya. Fi liŋ a dɛ ka niŋ jam ayen fi basi ate ti nam abe fi ge ate dai dila danni a paari?>> 30Dula jigini die a yaa jam za guuk zuk a dɛ. 31Chichirik baataŋa yaa saalim Yeezu ayen, <<Fi dan a yaali ayen fi yiak ti ate ti nyini be basi ate ti nyini a ga jo deeŋa po.>> 32Yeezu yaa weeni ti ayen, <<Ni be cheŋ dula jigini.>> Ti yaa nyini nuruma jigi a ga jo deeŋa po ate deeŋa a chali a ga va guuku nakpiak a sali siŋ a lo nyakpiemu po a kpi. 33Baai ale jam a nya deeŋa zuk la yaa chali cheŋ ba tɛŋka a ga weeni baai ale bo dula la dii ale nye nuruma bayewa ate chichirik baataŋa a jam bo ba zuimaŋa po la. 34Tɛŋ kala demma ale jam wom dii ate ba weeni la, ba meena yaa nyini ba yeeŋa po a jam tu Yeezu a saalim wa ayen wa basi ba tɛŋka.

Currently Selected:

Matiu 8: BWU

Highlight

Copy