Matiu 7

1<<Ni be kan bo ni chaab buusa ate Wen kan bo nama mɛ buusa. 2Nama ale a bo ni chaab buusa diila, Wen mɛ ale bo ni buusa ka dila dek. Ni ale pai dii a nye, nuruba la, Wen mɛ ale pai dila dek a nye ale ni. 3Ka boa ale soa ate fi a nya yeoku fi suoku nummu po alege kan kpesi da koluku ale bo fidek nummu po la? 4Yaase fi ale nye ka sɛ a weeni fi suok ayen, <M suok, basi ate m yeeri yeoku fi nummu po, alege fidek an nya dakoluku ale bo fi nummu po la? 5Sakpaŋ zula nyɔnɔ, dɛ niŋ a yeeri dakoluku fidek nummu po, ate fi ale baga nya nalimnyiini a yeeri yeoku fi suoku nummu po.

6<<Ni kan pai tuilum ŋanta a te baasa, ni kan pai ŋan maŋsa a te die, ni dan nye dila ŋa le tabi ba zuk a kaasi abe ba chiem dom ni kaasi.

7<<Waai a daa yaali jaab, wa bek Wen ale wa le te wa, wa gisi mɛ ale wa le nya, wa dan za dɔkku nɔi a nak ku le lak te wa. 8Dii nyiŋ la nuru waai abe le a bek jaab wari la a nya kama, waai mɛ abe le a gisi jaab la a nya kama, waai mɛ abe le a nak dɔkku nɔnni la, ku a lagri kama a te wa. 9Nama baai ale ka koba la, kom a dan ta fi biik ate wa bek boroborok, fi le pai tintain a te wa? 10Wa dan bek jum wa le pai waab a te wa? 11Nama ka nuru baata, alege ni seba ŋan maŋsa a pai a te ni bisaŋa. Ni Kowa waai ale bo wenŋmazuk la, a baga a te baai ale a puusi a te wa la, ŋan maŋsa kama.

12<<Ni a tom tuimaŋsa a te nuruba ase nama ale a yaali ayen ba tom dii a te ni la. Moosis Sinsaŋŋa ale Wen biisiteerɔma Sinsaŋŋa kiri ale la.

13<<Ni va nansuiŋ kuui ale migla la a jo, dii nyiŋla nansuiŋ kuui ale a jo kaasuŋ jigini la a lagri kama. Ate suik kuui ale a cheŋ du la po chelim an tua. Nuruba yegayega abe le a va ku. 14Alege nansuiŋ kuui ale a jo nyuvuri dii ale kan ta kpeglimka jigini la po chelim tua kama. Nuruba maga ale nya suik kula a va.

15<<Ni kpesi a nya venta biisiteerɔma. Ba dan jam ni jigi, ba a nye ase ka piisa la, alege ba suiniimaŋa po ba a nye ase ka piina la. 16Ni le seba ba ale ka baai la ba tuima nyiŋ. Kangbegi an baga a yɔni chicheba, zauŋ mɛ an baga a yɔni kinkama. 17Tiib maŋ a yɔni ka yɔn maŋsa. Tiib biok mɛ a yɔni ka yɔn baata. 18Tiib maŋ a kan yɔni yɔn baata. Tiib biok mɛ an baga a yɔni yɔn maŋsa. 19Tiib buui ale kaa a yɔni yɔn maŋsa la, ba a che bu kama a yuk a basi bolim po ate bu a dɛ. 20Dila la ni le seba venta biisiteerɔma ba tuimaŋa nyiŋ.

21<<Ku daa waai meena ale a wi Mi ayen, <Naawen, Naawen,> la ale ba nya suik a jo mi naamu po, alege ka baai nyiini ale a tom dii ate mi Kowa waai ale bo wenŋmazuk a yaali la, bala le ba jo wa naamu po. 22Wa dan jam ayen wa bo tɛŋka meena demma buusa, nuruba yegayega ale weeni wa ayen, <Naawen, Naawen, tama a sak nuruba kama fi wamaŋsaŋa wie fi yuenni nyiŋ. Ti be ŋman pai fi yuenni nyiŋ a yiak chichirik baata nuruba zuima po a basi. Ti be pai fi yuenni nyiŋ mɛ a tom wakperikaliisa nna yegayega.> 23Mi le weeni ba ayen, <Mi zɛ ni. Nama baai ale tom wabaata la, ni cheŋ du mi tɛŋ.>

24<<Waai meena ale a wom mi wieŋa de ale a va ŋa la, bala a nye ase ka yam nyɔnɔ waai ale se wa yeri a zaani pinjaaliŋ zuk la. 25Dai yeŋ po ate ŋmoruk a yaa jam ni nna yegayega ate viok kpioŋku mɛ a fɔbi wa yenni ate belaŋa a sueri a nyini, alege di an loya dii nyiŋla yenni nyɔnɔwa a se di ka pinjaaliŋ zuk. 26Waai meena ale a wom mi wieŋa de alege kan va ŋa la, bala a nye se ka beruk kuui ale se ku yeri a zaani tintain busuŋ zuk la. 27Dai yeŋ po ate ŋmoruk a yaa jam ni nna yegayega ate va kpioŋku mɛ a fɔbi wa yenni ate belaŋa a sueri a nyini, ate di yaa deri lo burum.>>

28Yeezu ale biisi wieŋa de meena a nueri la, ku yaa cha nuru boanni meena wa sinsaŋŋa nyiŋ. 29Wa sak ba kama ale wadek pagrim. Wa ale a sak ba diila ale Sinsak sagrɔma sakka a jam daa wayeŋŋa.

Currently Selected:

Matiu 7: BWU

Highlight

Copy