Luuk 21
21
1Yeezu yaa jam kala Wen yenni po a moata juijui ate jigsirɔba ta ba ligra a jam a nyoro a te Wen la, a yaa nya ba. 2Wa yaa nya pukɔgi jak a yaa maa ta wa ligbie ŋaye a jam ayen wa lɔnsi du. 3Yeezu yaa weeni ayen, <<Wensie ate mi a weeni ni, pukɔgi niwoba wade ale nyo ligri ŋaai du la, wa tiirimu a gaam mbala meena tiiritaŋa kama. 4Dii nyiŋla, mbala te ka ligra dii ale kan toa ale ba pai teka la alege pukɔgi niwoba wade a pai ka wa ligraŋa meena ate wa ta la a ta jam nyoro.>>
5Yeezu ŋaaŋviirɔma ba gela a jam a weeni ka Wen yenni ale nala dii ale di tintain naliŋsaŋa ale tiirim tii meena ate nuruba te Wen ate ba ŋmirisi di la. Yeezu yaa weeni ayen, 6<<Dii meena ate ni a nya nna la, di danni cheena ate nuruba jam nak di a lɔnsi. Ba kan basi tintain yeŋ mɛ la di choa zuwa.>>
7Ba yaa bek wa ayen, <<Sagrɔ, ka dimpo ate wieŋa de ayen ŋa nye? Ka boan daana ale ku nye ate ku sak ti ayen danni a moata?>> 8Ate wa weeni ba ayen, <<Ni kpesi nidek ate waai a kan paasi ni, nuruba yega ale jam mi yuenni nyiŋ ayen ka mi ale Kirisitawa, danni abe moata kama, ni kan va ba. 9Ni dan wom tugurisa wie ale kpaga ale a nya baai zuk la, a nye kpaliŋ ale ba kpaŋŋa ni kan a chali yɔgsum. Ku a fɛ kama ayen nyaŋa de meena a nye alege ku kan sak kama ayen tɛŋka kpeglimka ale deri jam kama.>>
10Wa weeni ba ayen, <<Tɛŋ ale ta chaab ale tɛŋ ka choa, ate naam a ta chaab ale naam bu choa. 11Tɛŋka mɛ ale choa nna yegayega ate kɔm ale nyiŋtuila pagrisa jam jigi meena, wie ŋaai ale ŋa te nuruba yɔgsum ate daana a nyini wenŋmazuk.
12<<Alege wieŋa de a daa yaali ŋa nye, ku a fɛ kama ayen nuruba ale ba yik ni ale pagrim a basi ate ni nam nna yegayega. Ba le yik ni a ta ni cheŋ ba tuka diinaŋa kpaŋŋa jigi ate ba bo ni buusa yaase ba ta ni a ga lik likka diina po yaase ba le ta ni a cheŋ ga zaani nalima ale tɛŋ nyam niŋ, mi yuei nyiŋ. 13Dila powa nya kude ale te ni suik ate ni baga weeni mi wie a sak ba. 14Ni nye ni popola ate ni kan ŋaam gomsi ayen ni biisi a vari ni dek a basi, 15dii nyiŋla mi le weeni sak ni ni le ni weeni diila. M be le te ni yam ate ni dachaasaŋa a kan ba a biisi gaam ni. 16Nidek koba ale ni maba ale ni suata ale ni kobisa ale ni mabisa ale ni doaba ale yik ni ale pagrim a te ate ba ko ni ba gela. 17Waai meena ale kisi ni kama mi nyiŋ. 18Alege zuik yeŋ mɛ la ni zuimaŋa po a kan bɛ. 19Ni ŋmaglika nyiŋ ni le nya ni nyuvooŋa.
20<<Ni dan ga nya ale tugurik tɔŋdɔba a gilim Jerusalem tɛŋka, ni be seba ayen ka kaasika a moata kama. 21Ni dan nya ale dila boro a nye, nama baai ale bo Judia tɛŋka po la ni chali a ga suk guutaŋa suŋsuŋ. Baai ale bo tɛŋka dek po la, ba basi dula jigini. Baai mɛ ale bo peelim la, ba kan cheŋ tɛŋka dek po. 22Dii nyiŋla, ase ba ale ŋmarisi dii Wen Gbaŋka po ayen da ŋala po ka waalika dai la le sum chim ka wensie. 23Da ŋala po, nipok baai ale ta puusa ale buluata la jɔk wein kama. Dii nyiŋla, kaasuŋ nna yegayega ale ku jam tɛŋka de, waalika nna yegayega mɛ ale ka jam nuruma de jigi. 24Ba ale pai ka gebik woŋta mɛ a ko ba gela. Ba ale yik ba gela mɛ a ta cheŋ tɛŋsa yegayega. Nuru baai ale kan daa Juuba la, ale kaasi Jerusalem abe ba bo ka po paari ba danni ate ba ale basi.
25<<Wakperikaliisa ale nye wenbinni ale chiika ale chiŋmarisaŋa po. Sui kaasuŋ nna yegayega ale ku jam tɛŋzuk de nuruma meena jigi ate yɔgsum yik ba ale nyakpiemu ale a wuuri dii ate bu nyamiisaŋa mɛ a nye diila. 26Yɔgsum ale yik nuruba ate ba cha abe ku a daani ba dii ale cheena tɛŋka meena po la nyiŋ.#21:25-26 Azaya 34:4 27<<Dila po nuruba ale nya Mi Saalɔbiika ale nyini chiŋmari po a cheena ale pagrim ale zula yega. 28Wieŋa de a dan piilim nyeka ni yiri zaani ŋmai abe, ni zak ni zuima ŋmai dii nyiŋla, ni da tuesika danni moata kama.>>
29Yeezu yaa magsi wamagsini ayen, <<Ni nya kiŋkaŋ ale tiisaŋa meena. 30Ase ni dan nya ale si a pusi vaata, ni seba ayen kpari wein a moata kama. 31Ni be dan nya wieŋa de mɛ ale ŋa piilim boro a nye, ni yaa be seba ayen Wen naamu a moata kama. 32Wensie ate mi a weeni ni gaŋka de a kan sum taam ka wieŋa de meena a nin nye. 33Wenŋmazuk ale tɛŋzuk meena ale jam taam dai yeŋ po, alege mi wieŋa a kan taam diipo diipo.
34<<Ni kpesi nidek ate ni kan pai nidek meena a te dɛka ale nyuka abe ni kan daani nidek ale nyeboka wie, kan daa di, da dila danni ale jam diiri ni kama ase baruk la. 35Dii nyiŋla, ku le jam ka baai meena ale bo tɛŋzuk de la zuk. 36Alege, m ŋman a weeni kama ayen ni kpesi nidek daa meena, a puusi Wen ayen ni ale ta pagrim ate ni baga nyini wieŋa de meena ale cheena ayen ŋa nye la po a nyini ate ni baga zaani Mi Saalɔbiika niŋ.>>
37Yeezu a jam pai ka da ŋala meena a kasim a sak nuruba Wen yenni po. Junɔi nyiem a dan jam paari, wa a nyini kama a cheŋ guuk kuui ate ba a wi ayen Olivi Guuk la. 38Saluik yokyok foribi, nuruma meena a nyiem jam ka Wen yenni a wom wa sinsaŋŋa.
Currently Selected:
Luuk 21: BWU
Highlight
Share
Copy
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation