Luuk 20
20
1Dai yeŋ ase wa ale jam bo Wen yenni po a sak nuruma ale a biisi Wen wieŋa la, kaabteerɔ kpaŋŋa ale Sinsak sagrɔma ale nisɔmma yaa jam 2a bek wa ayen, <<Ka wana pagrim nyiŋ ate fi a nye wieŋa de? Ka wana ale te fu suiwa?>> 3Yeezu yaa tulisi ba ayen, <<Ni basi ate mi mɛ bek ni wari. 4Jɔɔn ale jam a te nuruba soka la, wa jam nya wa pagrimu ka Wen jigi yaa nurubiik jigiya?>> 5Ba yaa deri a zɔk ale chaab ayen, <<Ti ti tulisi wa ayen ka boa? Ti be dan weeni ayen bu nyini ka Wen jigi wa le bek ti ayen be ka boa ate ti jam ka siaka ale Jɔɔn wieŋa. 6Alege ti dan weeni mɛ ayen bu nyini ka nurubiik jigi, nuru boanni ale yuk ti kama ale tintana dii nyiŋla, ba seba chak kama ayen Jɔɔn ka Wen biisiteerɔ.>> 7Ba yaa tulisi ayen, <<Ti zɛ bu ale nyini juijui la.>> 8Yeezu yaa weeni ba ayen, <<Mi mɛ a kan weeni ni pagrim buui ate mi ta a tom wieŋa de la.>>
9Yeezu yaa magsi wamagsini de a sak nuruma ayen, <<Nuru ale jam kpa wa kaduk, a vuk tiisa ka po. Wa yaa pai nuruba ayen ba a limisi ka alege yaa yiri nyiem a cheŋ tɛŋ ka choa ate ku beni.#20:9 Nya fotowa, 1 Nalima 21:1. 10Wa kadukka tiisaŋa yɔnaŋa pisika ale jam paari la, wa yaa tom tomteerɔ ayen wa ga tuesi yɔna ŋaai ate wa soa la wa nuruma jigi a ta jam te wa. Nuruma yaa yik wa a nak yiak wa ate wa cheŋ ale nisim koruta. 11Wa yaa ŋman tom tomteerɔ wa choa alege ba ŋman yik wa mɛ a nak ate wa nya chivie a yiak wa ate wa cheŋ ale nisim koruta. 12Wa ŋman tom tomteerɔ wa choa a nye buta, ba ŋman yik wa mɛ a nak a te wa tuem a yiak wa ate wa nyini. 13Kadukka nyɔnɔwa yaa bek wadek ayen, <M le nye ka sɛ nna? M le tom ka m dek nidoabinni waai ate m mariŋ la ate wa cheŋ, da dii dai ba ale te wa zula.> 14Nuruma yaa ale ga nya nuruwa dek biika la, ba yaa weeni chaab ayen, <Kadukka nyɔnɔwa dek nidoabinni ale nna. Wa dan kpi, ka wala le soa wa ŋantaŋa. Basi ate ti ko wa ate wa ŋantaŋa meena a chim tama ŋanta.> 15Ba yaa yik wa a ta wa nyini kadukka po a nyini a ko wa. Kadukka nyɔnɔwa le nye nuruma de ka sɛ?>> 16<<Wa le jam ko ba kama abe wa pai kadukka a nyo nuruba ba chaab nisima po.>> Nuruma ale wom nna la, ba yaa weeni ayen, <<Ti a saalim Wen ayen wa kan basi ate dila nye.>> 17Wa yaa nya ba ale weeni ayen, <<Be ka boa ate ba ŋmarisi Wen Gbaŋka po ayen, <Tain dii ate seerɔma a zɛri ayen di an nala la, tain dila dek ale tulim a chim tain maŋ.> (Yiila 118:22) 18Nuru waai a dan lo tintain dila zuk wa a ŋɔriŋ ka bunabuna, alege di be dan lo waai zuk, di le piak wa.>>#20:18 Azaya 28:16; Daniel 2:44-45
19Sinsak sagrɔma ale kaabteerɔ kpaŋŋa a jam pii ka nyiŋ ayen ba yik Yeezu dipo, dii nyiŋla, ba jam miŋ kama ayen wa pai ka ba a magsi wamagsini. Alege ba an jam nya suik a yik wa dii nyiŋla, yɔgsum ale jam ta ba nuruma nyiŋ. 20Dila ba yaa kpesi a nya wa, a tom nuruba, ayen ba tagri a nye ase wensie nyam la ate ba wom dii ate wa ale weeni la, ate ba le nya suik a pai wa a nyo kpaŋŋa ale tɛŋka nyɔnɔwa nisima po. 21Ba yaa weeni wa ayen, <<Ti sagrɔ, tama seba ayen fi a biisi ale a sak wensie, kan luk nuruba, alege fi a sak ka wensie sinsaga ŋaai ate Wen a yaali la. 22Be weeni nya kude a sak ti, tama Sinsaŋŋa a siak ate ti tuni ti lampoowa a te naab kpioŋku Siiza yaa Sinsaŋŋa kan siagi?>> 23Alege Yeezu poom seba ba yammu nɔi po kama ate wa yaa weeni ba ayen, 24<<Ni sak mu ligbiri.>> Ba yaa ta ligni jam ate wa bek ba ayen. <<Ka wana zuk ale wa yuei ale dua di nyiŋŋa?>> Ba yaa tulisi wa ayen, <<Ka Siiza.>> 25Yeezu yaa weeni ba ayen, <<Ni pai ŋan baai ate Siiza a soa la a te wa, abe ni pai ŋan baai mɛ ate Wen a soa la a te Wen.>> 26Wa ale jam tulisi ba dii nna la, ku yaa cha ba, ate ba yaa sina. Ba an jam baga a yik wa nuruma nimbie po, wa ale tulisi ba dila la nyiŋ.
27Sajusiiba yaa jam wa jigi, bade ka baai ale a weeni ayen nuru a dan kpi wa kan ŋmaa yiti la, 28ba yaa bek wa bega ayen, Sagrɔ, Moosis a ŋmarisi te ti kama ayen ase nidoa suok a dan kpi alege wa pok, ba abe ka bisa, wa suok kuui ale vua la a baga ta nipowa kama ate ba biak bisa a te kpiewa.#20:28 Teerika 25:5 29Yɔgyɔgla de, nuruba bayopɔi ale jam boro a chim suata ate ba sua kpagni a faari nipok an biak ale wa a nya ya alege kpi. 30Waai ale pai a saŋ wa la mɛ a faari wa suoku powa alege nipowa ale wa an biak a nya ya alege ate wa kpi. 31Ba suok kuui ale pai a saŋ butawa la, a nye kula dekdega. Ba meena bayopɔiwa a faari nipok wala kama a taam tu alege ba waai ale wa an biak a nya ya alege kpi. 32Ku ŋaaŋnyiŋ ate nipowa mɛ a kpi. 33Yɔgyɔgla de, ate nuruma bayopɔiwa de meena a faari wa a nya la, da dii dai ate nuruba meena ayen ba yiti kum po la, ka wana le wa soa nipowa de?>>
34Yeezu yaa tulisi ba ayen, <<Tɛŋzuk de demma a faari ka nipooba, a pai ba lieba mɛ a yalisi chorɔba, 35alege nuru baai ale magsi ba yiti kum po a bo tɛŋ kaai ale bo ŋaaŋ cheena la, ba kan faari chaaba. 36Ba ale nye ase ka Wen maarɔma la. Ba kan ŋman maari a kpi. Ba yaa ka Wen biika dii nyiŋla, ba yiti kum po kama. 37Moosis a jam nya chak kama ayen kpieba ale yiti kum po kama, ase wa le ŋmarisi bolimu ale jam bu a dɛ tiib fiik la, wa jam weeni ayen, <Naawen ka Abrayam Wen ale Aizik Wen ale Jekob Wen.#20:37 Nyinika 3:6 38Wa daa kpilima Wen ya, alege wa ka ŋanvuta Wen, waai meena vua kama wa jigi.>> 39Sinsak sagrɔma gela yaa weeni ayen, <<Sagrɔ, fi biisi ka nalimnyiini.>> 40Dii nyiŋla, ba ŋman ka suik a bek wa bega ŋa chaaba.
41Alege wa weeni ba ayen, <<Ka boa ate ba a weeni ayen Kirisitawa ka Deevid nidoabili yaa? 42Deevid dek a weeni Yiila Gbaŋka po kama ayen, <Naawen a weeni mi Nyɔnɔwa ayen, <Kali m juga nisa geŋ 43a ta cheena diipo ate m le basi ate fi nya pagrim fi dachaasaŋa zuk.> (Yiila 110:1) 44Ase Deevid dek dan wi Kirisitawa ayen wa Nyɔnɔ, ku be zaani ka sɛ ate Kirisita a baga a chim Deevid nidoabili yaa?>>
45Nuruma meena a jam za a wom kama ate Yeezu yaa weeni wa ŋaaŋviirɔma ayen, 46<<Ni kpesi nidek ale Sinsak sagrɔma baai ale a yaali ayen ba jo ba kasaautaŋa a nyiem a cheŋ a yaali ayen ba a puusi ba, yaba peelitaŋa po la, baai ale a yaali mɛ ayen ba kali zukpaglik sii ate ba lueri zaani tuka diinaŋa po la. Ba ka nuru baai mɛ ale a yaali ayen ba kali nuru kpienta zukpagliksa zuima ŋandiin kpienta tiŋŋa po la. 47Ba be ka baai mɛ ale a yaali pukɔga paasi dɛka la, ale baai mɛ ale a puusi Wen venta puusa woŋta la. Bala chaab waalika le gaam taam ka nna yegayega.>>
Currently Selected:
Luuk 20: BWU
Highlight
Share
Copy
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation