Jɔɔn 21

1Ku le ga nye maga la, Yeezu yaa ŋman pai wadek a sak wa ŋaaŋviirɔma Tiberiasi nyakpiemu nɔi. Dii ale nye la ale nna. 2Wa ŋaaŋviirɔma baai ale jam tigsi dula jigini la, ale Simon Piita ale Tomasi yibika ale Natani waai ale nyini Kena ate ka bo Galili tɛŋka po la, ale Zebedi bisaŋa ale mba baye. 3Simon Piita yaa weeni ba ayen, <<Mi a cheŋ kama ayen m yik juma.>> Ba yaa weeni wa ayen, <<Tama mɛ a yaali kama ayen ti va fu a cheŋ.>> Ba yaa deri ga jo ŋaaruŋ po a cheŋ. Yok kula ba an jam nya juma a yik ya.

4Vari ale veenti la saluik ba yaa nya Yeezu ale wa za nyiamu nɔi, alege ba an jam baga a miŋ wa. 5Ba le diem a bo niŋ a cheena Yeezu jigi la wa yaa wi bek ba ayen, <<M bisa, ni an nya juma a yik ya?>> Ba yaa weeni wa ayen, <<Ti an yik jaaboa.>> 6Wa yaa weeni ba ayen, <<Ni pai ni ŋmiaka a yuk basi ŋaaruŋku juga geŋ ate ni nya juma a yik dula jigini.>> Ba le ga nye dii ate wa weeni ba la, ba yaa deri yik juma nna yegayega ate ba an ŋman baga a dari ba ŋmiaka ate ka a jo ŋaaruŋku po. 7Yeezu ŋaaŋviirɔwa waai ate wa jam a yaali nna yegayega la ale ga nya dii ale nye la, wa yaa weeni Piita ayen, <<Nuru waai ale za ti niŋ la, ka ti Naawenni ale la.>> Simon Piita ale ga wom wa le weeni diila, wa yaa pai wa tuimaŋa garukku a jo lik wadek yaa yɔk zi nyiamu po ayen wa ga tu Yeezu. 8Ŋaaruŋku a diem jam yalima ase ka naŋtuok nɔi kobsita la ale ge ate Piita a yɔk zi. Yeezu ŋaaŋviirɔma baai ale diem a jam bo ŋaaruŋku po la yaa dari ba ŋmiaka a ta paari nyiamu nɔi.

9Ba le ga nyini ŋaaruŋku po a siŋ tɛŋ la, ba yaa nya Yeezu ale wa kala a se juma kaala bolim zuk ale pai boroborok mɛ a dueni wa tɛŋ. 10Wa yaa weeni ba ayen, <<Ni ga lueri jumaŋa gela a ta jam.>> 11Simon Piita yaa dɛ ba niŋ a ga yik ŋmiaka a dari ka a ta jueli kunkɔŋni, a yaa yeeri jumaŋa. Ŋa meena a jam ka juma kook ale pisinu ale ŋata. Ŋa jam a piisi kama nna yegayega alege ba ŋmiaka an jam a cheeri ya.

12Yeezu yaa weeni ba ayen, <<Ni jam de saluik ŋandiinta.>> Ba wanyi mɛ an jam a bek wa le ka waai la, dii nyiŋla ba meena a jam seba ayen wa ka ba Naawen. 13Yeezu yaa pai jumaŋa ale boroboroku a chari ba meena. 14Wa le yiti kum po diipo la, wa ale wa ŋaaŋviirɔma tu chaab nna la a nye ka ku buta.

15Ba le ga dɛ a nueri la, Yeezu yaa weeni Simon Piita ayen, <<Fi Simon, Jɔɔn nidoabiliga, fi a yaali mi a gaamu nnala?>> Piita yaa weeni wa ayen, <<M Nyɔnɔ Yeezu Kirisita, fi seba ayen mi a yaali fu kama.>> Yeezu yaa weeni wa ayen, <<Be a nya baai ale a va mu la zuk ase naapeerik ale a nya wa pabisa zuk diila.>> 16Yeezu a ŋman bek wa ayen, <<Fi Simon, Jɔɔn nidoabiliga, fi a yaali mu?>> Piita yaa weeni wa ayen, <<M Nyɔnɔ Yeezu Kirisita, fi seba ayen mi a yaali fu kama.>> Yeezu yaa weeni wa ayen, <<Be a nya baai ale a va mu la zuk ase naapeerik ale a nya piisa zuk diila.>> 17Yeezu a ŋman pilim bek wa ku nɔi butawa ayen, <<Fi Simon, Jɔɔn nidoabiliga, fi a yaali mu?>> Piita ale ga wom Yeezu ale bek wa dii ku nɔi butawa la, wa sui yaa deri kaasi ate wa yaa weeni wa ayen, <<M Nyɔnɔ Yeezu Kirisita, fi seba wie meena kama. Fi seba ayen mi a yaali fu kama.>> Yeezu yaa ŋman weeni wa ayen, <<Be a nya baai ale va mu la zuk ase naapeerik ale a nya wa piisa zuk diila.

18Wensie ate mi a weeni fu. Ase fi ale diem a jam ka paalik la, fi nyiem a gomsi ka fidek a cheŋ fi le a yaali juijui meena la. Fi dan jam kpaŋ, fi ale zaani kama ate nuruba a bobi fu a ta cheŋ juijui ate fi kan yaali la.>> 19Yeezu a weeni nya kude ayen ku sak Piita ka wa le wa kpi suik kuui po a te Wen zula la. Wa le biisi nya kude a ga nueri la, wa yaa weeni Piita ayen, <<Jam va mu.>>

20Piita yaa cheem nya Yeezu ŋaaŋviirɔwa waai ate wa a yaali nna yegayega la ale wa bo ba ŋaaŋ a vi. Wala a jam le waai ale jam kala a moata Yeezu Gaambasika Tigini danni ale bek wa ayen, <<Ka wana ale wa ta wa a ga bobri sak la?>> 21Piita ale ga nya wa ale wa a vi ba ŋaaŋ la, wa yaa bek Yeezu ayen, <<M Nyɔnɔ Yeezu Kirisita, alege nuruwa de?>> 22Yeezu yaa weeni wa ayen, <<Mi a daa yaali ayen wa boro ate m pilim jam paari wa, fi niŋ karo, fidek tin jam va mu.>> 23Yeezu ale biisi dii ale wa ŋaaŋviirɔ nwala la, ku yaa deri tagli wa ŋaaŋviirɔma mbala meena jigi ayen waai ate Yeezu a yaali nna yegayega la, a kan ŋman maa kpi diipo diipo. Yeezu an jam a weeni ayen wa kan maa kpi, alege wa weeni ka Piita ayen wa dan yaali ayen wa boro ate wa pilim jam paari wa, wa niŋ karo.

24Ka ŋaaŋviirɔwa de ale nya wieŋa de a weeni ale ŋmarisi ŋa, ti abe seba kama ayen ŋa ka wensie.

25Yeezu a tom ka tuima nna yegayega a gum mi ale ŋmarisi dii gbaŋka de po la. Mi a poli ayen ŋa meena a dan ŋmarisi a nyo gbaŋsa po dɔk a kan bo tɛŋka zuk ate ka dueni du.

Currently Selected:

Jɔɔn 21: BWU

Highlight

Copy