Jɔɔn 20

1Bakoanni piilimka danni Laasidi dai saluik yokyokwa ate Mɛɛri Magdalene a yaa jam boosuku jigini, ku an diem jaa nya a paari ale tintanni a doa nakpiak ale ge boosuku. 2Wa yaa ŋmani chali cheŋ Simon Piita ale Yeezu ŋaaŋviirɔ waai ate wa jam a yaali wa nna yegayega la jigi a weeni ba ayen, <<Ba pai ti Naawenni boosuku po a ta cheŋ kama. Ti be zɛ ba le ta wa a cheŋ juijui la.>> 3Piita ale Yeezu ŋaaŋviirɔ nwala yaa deri yiti chali cheŋ dula jigini. 4Yeezu ŋaaŋviirɔ waai ate wa jam a yaali wa nna yegayega la, a liŋ dɛ Piita niŋ kama a chali paari vɔrumu jigini. 5Wa le chuiri nya la, ka guka garukku ale doa wa an jo du.#20:5 Nya fotowa, Luuk 24:12. 6Simon Piita yaa jam a fɔbi taam a ga jo vɔrumu po a nya ale ka guka garukku ale doa du. 7Wa ŋman nya garuk kuui ate ba jam pai bobi Yeezu zukku la ale ku doa ku tɔga, garuk kula ale guka garukku an jam a doa ale chaaba. 8Ŋaaŋviirɔ waai ale dɛ niŋ a paari boosuku la mɛ yaa jo du, a nya a ta siaka. 9Ba an diem jam miŋ dii ale ŋmarisi Wen Gbaŋka po ayen, <<Ku a fɛ kama ate wa yiti kum po la.>> 10Ba yaa basi dula ale ge a kuli ba yeeŋa.

11Mɛɛri Magdalene a jam za ka peelim a kum. Wa mɛ a yaa chuiri ayen wa nya bu po. 12Wa yaa nya Wen maarɔba baye ale ba jo garuk peelita a bo vɔrumu po. Ba jam kala ka juijui ate ba jam pai Yeezu a dueni la ate wanyi a kala wa zukku duaka jigini ale ge nwala mɛ a kala wa naŋsaŋa jigini. 13Maarɔma yaa bek wa ayen, <<Ka boa ate fi a kumu?>> Wa yaa weeni ba ayen, <<Ba pai m Naawen a ta cheŋ, ate m zɛ ba le ta wa a ga dueni juijui la.>> 14Wa le a weeni nya kude la, wa yaa cheem a nya Yeezu ale wa za wa ŋaaŋ, alege wa an jam miŋ wa. 15Yeezu yaa bek wa ayen, <<Nipowa, ka boa ate fi a kumu? Fi a gisi ka wana?>> Mɛɛri a jam a poli ayen ka waai ale a limisi tiisaŋa la ale la a yaa weeni wa ayen, <<Dan ka fi ale yeeri m Naawenni, weeni mu juijui ate fi ta wa ga dueni la ate m ga pai wa.>> 16Yeezu yaa weeni wa ayen, <<Mɛɛri.>> Ate wa yaa cheem wa jigi a weeni ale wadek tɛŋka biika ayen, <<Araboni.>> Ku kiri ale, M Sagrɔ. 17Yeezu yaa weeni wa ayen, <<Kan yik mu, ale mi an diem jueli Kowa jigi ya, alege cheŋ m ŋaaŋviirɔma jigi a weeni ba ayen, <Mi a jueli ka m Kowa ale nama Kowa jigi, mi Wenni ale nama Wenni jigi.> >> 18Mɛɛri yaa cheŋ ŋaaŋviirɔma jigi a weeni ba ayen wa nya ba Naawenni kama ale dii meena ate wa weeni a sak wa ayen wa weeni ba la.

19Laasidi dai junɔi yok, Yeezu ŋaaŋviirɔma jam tigsi ka chaab a bo yeri dinyi po ale lik tuataŋa meena, dii nyiŋla ba jam a chali ka Juuma kpaŋŋa yɔgsum. Yeezu a deri jam jo za ba suŋsuŋ a weeni ba ayen, <<Suiyɔgni a bo le ni.>> 20Wa yaa lagri wa nitalaŋa a sak ba ale a ŋman cheem wa gauŋku mɛ ayen ba nya. Ba suiniima yaa peenti nna yegayega. 21Yeezu yaa ŋman weeni ba ayen, <<Suiyɔgni a bo le ni ase mi Kowa ale tom mi ate m jam tɛŋzuk de suik kula po mɛ ate mi a tom nama mɛ.>> 22Wa le weeni ba dila a ga nueri la, wa yaa vuusi a basi ba nyiŋ ale weeni ayen, <<Ni ŋoa Wen Chiika.>>#20:22 Piilimka 2:7; Ezekiel 37:1-14 23Ni dan vɔŋ nuruba wabaata a te ba, Wen ale vɔŋ te ba alege ni dan kan vɔŋ nuruba wabaata a te ba, Wen a kan vɔŋ te ba.

24Yeezu ale jam wa ŋaaŋviirɔma jigi la, ba po wanyi Tomasi yibika, a jam ka ba po. 25Ba yaa weeni wa ayen, <<Tama nya ti Naawenni kama.>> Tomasi yaa weeni ba ayen, <<Mi kan baga siagi, ka mi a nin nya wa nitalaŋa po juijui ate ba pai peemaŋa a kpi la abe m pai m nisaŋa a su wa gauŋku vurika jigini a nya.>>

26Daa naaniŋ ale jam taam la, Yeezu ŋaaŋviirɔma ale Tomasi a ŋman jam a tigsi chaab yenni po ale lik tuataŋa meena. Yeezu yaa ŋman jam zaani ba suŋsuŋ a weeni ba ayen, <<Suiyɔgni a bo le ni.>> 27Wa yaa weeni Tomasi ayen, <<Pa fi nisaŋa a tiri mi nitalaŋa a nya juijui ate ba pai peemaŋa a kpi la abe fi pai fi nisaŋa a su m gauŋku po a nya. Basi fi chichamaŋa abe fi ta siaka ale mi.>> 28Tomasi yaa weeni wa ayen, <<M Naawen ale m Wenni.>> 29Yeezu a weeni wa ayen, <<Fi ale nya mi la ate fi ta siaka ale mi. Niauŋ ale baai ale kan nya mi ale ta siaka ale mi la.>>

30Ŋaaŋviirɔma nimbie Yeezu a tom ka wakperikaliisa nna yegayega ate ŋa an ŋmarisi gbaŋka de po. 31Alege ŋade a ŋmarisi kama ayen ni ta siaka ayen Yeezu ale Kirisitawa, Wen Nidoabinni ate ni siaka nyiŋ ni nya nyuvuri dii ale kan ta kpeglimka la Wa Yuenni nyiŋ.

Currently Selected:

Jɔɔn 20: BWU

Highlight

Copy