Piilimka 35

1Ate Wen yaa weeni Jekob ayen, <<Yiti cheŋ ga kali Betel, abe fi sɛ kuŋkuŋ dula a te Wen dii ale jam fi jigi diipo ate fi jam chali a nyini fi suoku Iisɔ jigi la.>>

2Ate Jekob yaa weeni wa yenni demma ale baai meena ale bo ale wa la ayen, <<Ni yuk ni wen chaŋsaŋa ale bo ale ni la a basi, abe ni so nidek, abe ni tagri ni gattaŋa. 3Abe ni jam ate ti cheŋ jueli Betel, ate m sɛ kuŋkuŋku a te Wen dii ale tulisi mu diipo ate m bo daanika po la ale kasim a cheŋ ale mu juijui meena ate mi a cheŋ la.>> 4Ate ba yaa pai ba wen chaŋsaŋa meena a te Jekob ale ba tukpanaŋa ale bo ba tueŋa po la, ate Jekob yaa pai ŋa a gu Sikiim tiimu tɛŋ. 5Ate ba yaa lɔ suik po ate Wen yɔgsum a jam tɛŋ sii ale moata la, ate waai an jam a vi ba.

6Jekob ale nuru baai meena ale maa bo ale wa la yaa jam Luz tɛŋka. Betel ale la a bo Keenan tɛŋka po. 7Ate wa sɛ kuŋkuŋ dula, ate wa te jigini yuei ayen El Betel, diila ka dula ate Wen a jam yeeri wadek a sak wa diipo ate wa jam chali a nyini wa suoku jigi la.

8Yɔgyɔgla Debora ale ka Aribeka tomteerɔ la, yaa jam kpi ate ba gu wa Betel tiib tɛŋ ate ba a wi jigini yuei ayen Allon Bakut.

9Jekob ale nyini Paddan Araam la, Wen a ŋman jam wa jigi a yaa niak wa. 10Wen yaa weeni wa ayen, <<Fi yuei ale Jekob, alege ba a kan ŋman wi fu ayen Jekob. Fi yuenni ale Izirali.>> Ate wa te wa yuenni ayen Izirali.

11Ate Wen yaa weeni wa ayen, <<Mi le Wen Dii Ale A Niak La. Be biak a piisi. Fi ka tɛŋ kpieŋ ale tɛŋsa ate nuruba a sueri si po, ate nalima ale nyini fi nyiŋ po a nyini. 12Tɛŋka ate m jam pai te Abrayam ale Aizik la, m le pai a te fi mɛ, ate m le pai te fi ŋaaŋbisa baai ale za ba nyini fi ŋaaŋnyiŋ a jam la.>> 13Ate Wen a cheŋ jueli a nyini juijui ate wa biisi ale wa la.

14Ate juijui ate Wen a biisi ale Jekob la wa yaa feri buntain ase zaŋi la a zaani, ate wa yaa kpiiri nyiam tiirim di zuk. Wa jam kpiiri kpaam mɛ di zuk. 15Jekob a wi juijui ate Wen a biisi ale wa la ayen Betel.

16Ate ba cheŋ nyini Betel. Ba ale jam yalima maga a nyini Efrat la, Arekel yaa jam boro a yaa yen wa biak ate ku jam tua te wa. 17Ate ku ale jam tua wa biamu po la, waai ale jam boro yik wa la yaa weeni wa ayen, <<Kan chali yɔgsummoa, fi ale nya ka nidoabili.>> 18Wa le vuusi kpeglim la, wa yaa te biika yuei ayen Ben Oni, alege yaa kpi. Alege wa kowa a te wa yuei ayen Benjamin.

19Ate Arekel a kpi ate ba gu wa ase ba ale jam bo Efrat ale ka Betiliyem suik po la. 20Ate Jekob a feri buntain ase zaŋi la wa boosuku zuk, a jam paari jinla tanni a za kama a teeri Arekel boosuku wari.

21Izirali a ŋman cheŋ wa niŋ nyiŋ a gaam Migdal Eder a ga ti wa viuku. 22Izirali ale jam bo tɛŋ kala po la, Aruben yaa cheŋ a ga bobi Bilya ale ka wa kowa pok la a goa ale wa, ate Izirali a jam wom. Jekob a jam ta ka nidoabilisa pi ale baye. 23Leya nidoabilisaŋa ale nna. Aruben jam le Jekob bikpagni, ate baai ale paasaŋ la ale nna. Simeyon ale Livai ale Juda ale Isaka ale Zebulun. 24Arekel nidoabilisaŋa ale nna. Josefi ale Benjamin. 25Arekel dɔkliewa Bilya nidoabilisaŋa ale nna. Dan ale Nafitali. 26Leya dɔkliewa Zilpa nidoabilisaŋa ale nna. Gad ale Asɛ. Ba ale jam biak nidoabili sii Paddan Araam tɛŋka a te Jekob la ale la.

27Jekob yaa jam yiti wa kowa Aizik jigi a ga bo Mamre tɛŋka po, a moata Kiriat Arba, Yebron ale la, juijui ate Abrayam ale Aizik a jam kali la. 28Aizik a jam kali ka bena kook ale pinaanuŋ. 29Ate wa yaa vuusi wa vuusumu a kpeglim alege yaa kpi, ate wa maa ga gum wa nuru baai ale kpi la po, wa jam kpaŋ kama ate wa benaŋa mɛ a piisi. Ate wa nidoabilisaŋa Iisɔ ale Jekob a gu wa.

Currently Selected:

Piilimka 35: BWU

Highlight

Copy