Mâk 6

Ghɨ mana Jisòs a Nasalì

(Mat 13.53-58; Lûk 4.16-30)

1Jisòs lo afû kahi kolo yen yi tèk ye wù tì ləmne kwoka atɨ̂n, jùmtìbàmsu wunsu yen kə wun yi bàm. 2Tuku yû a ghɨna tuku laku, wù yen yîmì hi yikî a ndâ chìnti, ghɨt a dona ghê ghɨna ndùku yute yikî tɨni hì mô nì kani jîsà na, “Wùt wunâ yu afa gha ghɨna agha? À fo nde yina nki tofi ha wûn agha? Wù gbi yàni hi tè mòmà gha kanana ghɨ̂n ni? 3Ba mò kə nâ wâ wùt wuna wù gbè kwoma mwə̀lû ni, kə nâ wâ Mèli. Ba wana ne wuna mò Jêms, Josìs nì Judàs, nì Samùn agha? Ba jâmtù su wunsu chyə kə nâ a ghàhnà fùtɨ̂n agha? Te ghɨna jìsa yâ, yîmì kə hi tè bàn à wûn.”

4Jisòs ki jîs ha ghɨna na, “Ghɨ ngumle lò fòktè Fùyèn nâbi afa, a bu kə wu lùk a afa wù fwo atɨ̂n. Ghɨt a wuna yi laka nì sah yi nda wuni yè ngumle wi wûn.”

5Jisòs tê fè yena wu lûm hi nè gha kanani afû, a bu kə te wù tì lèma wo a ghɨt a yablena wu wùn ghɨ tâ. 6Jisòs yen ya te ghɨna tunhi hi bimî hì mô nì kani. Jisòs lô hì gbê yike yênà nì ghɨta a tu tèktu letu te ndùku bakhe bênà afû.

Jisòs tum jùmtìbàmsu wunsu njwòsù bà

(Mat 10.5-15; Lûk 9.1-6)

7Wù toŋa jùmtìbàmsu wunsu njwòsù bà tum ghɨna kə à bà à bà fî fo ghɨna nì jyaka a tô yohnù be. 8-9Wù jis ha ghɨna na, ghàn shihi yèn, kə wùt nè lyê shyə ale a bu kə mbàŋ nì gwusu wùsu, kə wùt lyi shyə yəna, kə wùt lyi bàlì, kə wùt lem ka a wuna bàlì, kə wùt lyi nju sùbà. 10Wù jis kəbi ha ghɨna na, “Ghàn lye yi tèk ghàn ben nâbi a yìni ndâ, ghɨ fyi ghàn, ghàn hi chyə kə ndâ afû shyəma ghàn bê lo yi tèk afû.” 11Ghàn yen yi tèk ghɨ tunhi hi fye ghàn yi tèk afû, tunhi hi yute gha yani ye ghàn jìsà, ghàn lo afû. Ghàn shihi lò “Ghàn bukti jɨm su wùlu sanisu ha ghɨna shyəma ghɨna hi khə na ghɨna ti ni bobhî.”

12Ghɨna fwu hì yikê na ghɨta kahi təm a ghɨna sùbe. 13Ghɨna tî jum fihi yohnù be a ghɨta wù wùn wu dô kə ni fî yuhi à ghɨ̂t a yablena ghɨ dô kə ni, chwuk ghɨna.

Te Jon Fo Mòlû tì kpo

(Mat 14.1-12; Lûk 9.7-9)

14Ghɨta tî yû gha ghe Jisòs ndùku nê luk tù jɨ̀m, nâbi fə̀n Helòd boŋ yû. À ndùku mô yâ ghɨta gbê jîsà na, à mò Jon Fo Mòlû te wù kaha lote a yi kpû, a ni gha ye wù kəta jyaka hi tè nè a gha ghɨ̂n ni.

15Te ghɨt atɨna jìsa ni, ghɨta jis na, à mò fòktì Ìlajà te wù kaha bena.

Ghɨ le hì jîsà na, à mò fòktì wù chìk wùlè te we wù ndùku mô wu tuk wu shyə.

16Helòd yu yâ jis na, “À mò Jon Fo Mòlû hamok. Mu tî nì ghɨ kat a to wuna biyani wù ti kahi lôtì a yi kpû!” 17À mô yâ, ma à tì jis nâ wûn a wun a ngɨŋ na ghɨ kwo Jon Fo Mòlû ma kwut wûn ma lem a chyâk, ne yâ nâ te wun Helòd khɨte fye Hèlodiyàs a malâ, nâbi te à ndùku mô ywê wâ nè wûn Filîb. 18Yi bàm yi tɨ̂n Jon Fo Mòlû faŋ hì kumtè kə yi kûmtì ha wun na, “Wò ti ni gha ye saki bime wi na wò mala ywê wâ nâ!”

19Hèlodiyàs hì bâŋhè wu lâ ha Jon, khɨŋa wu lum hi ywe wûn biyani yena wi, 20beka Helòd ndùku fânà Jon fê khə na Jon mò wùt à chilichili mô kə nâ wùt à Fùyèn. Helòd ndùku bime wi na ghɨ ni gha be ha Jon, kôŋà hi tè yute gha ghe wù jìsà nâbi te ghɨ ndùku fumhe wûn nâ haŋaŋ.

21To Hèlodiyàs jwof tuk lefu Helòd hì yə tuk we ghɨ tì bwə wûn atɨ̂n ghê ghɨt ghe ghê ghɨna ndùku saka laki nì tu sù sojà nì ghɨt a ta ale yi lak yi Galìlî. 22Wâ Hèlodiyàs wù ywên lyi ben hì binâ, gha tɨni hì foma ha Helòd nì ghɨt a wuna benana, Helòd jis ha wan wù ywên àtɨ̂n na, “Buf nâbi ghə wò kòŋà ma mu fo ha wò.” 23Fî jis ha wun na, “Wò buf nâbi ghə ha mu ma mu fo ha wò, wò shìki kôŋ ma mu jyati lak yi mi fùtɨ̂n, fùtɨ̂n ma mu fo ha wò.”

24Wan àtɨ̂n fwu yen buf ha nè wûn na yi mò hi buf nâ ghə agha?

Nè wun jis na, “Ndù jis na wù kat a fo to Jon Fo Mòlû ha wò.”

25Wù kahi nyâŋhì lyi jis kə ha fə̀n na, “Mu bufa kə shyə à mòk, kàt lèm to Jon Fo Mòlû a khət à khɨ̀ŋa ma wò fo ha mu kə chîn.”

26Gha tɨni ni fə̀n hì jyê wu wun nâ haŋaŋ biyani kôŋà wi hi bobhe chwunu wunu ha wan we beka wù mò ma wù tì jis nì kântìnì a ghɨt a benana ashyə̂. 27Wù tum sojà wùlè atɨ̂n à se su ndùku chînà tôk jis na wù yê ben nì to Jon Fo Mòlû. Wù yên wu lùk afa Jon ndùku mô atɨ̂n a chyâk kat a to wuna, 28ben nì ghɨna a khət à khɨ̀ŋa fo ha wan wù ywên atɨ̂n wù yen fo ha nè wûn. 29À hì mô te jùmtìbàmsu Jon su ywo, ghɨna yen lyi gun yi Jon gûmàlò. 30Ghɨt a Jisòs ghɨ tumana tî kahi yen ha wûn fôktì gha ghe ghɨna gbe ne fî yikilò, 31Jisòs ki jîs ha ghɨna na, “Ghàn tet à ben ma ghàhnà yen wu lùk wu letenu ma ghɨ yuti.” Wù ndùku jîsà ni beka ghɨta hidù ndùku motè kə ni ghɨ benlò ghɨ le motì kə ni ghɨ lolò, ghɨna kəta wi nâ yu ghɨna wu ngɨŋu hi yə̂.

32Ghɨna lyi a ngwùk kə ghɨna nòn lô hì yênà wu lùk wùt bu afû. 33Ghɨta fî yen dô kə ni te ghɨna yena khɨli na mò ghɨna, fwu kə tèk tù jɨ̀m nyɨŋ yen a ghɨna ashyə̂. 34Wù lo hì fwo yênà kə ni fî yen kə ghɨt ghe ghɨ dô kə ni, seni kwo wûn ha ghɨna beka ghɨna ndùku mô kə ni te sù njyə̀ kəta wi chìn. Wù hì yike ghɨna nì gha ghɨ dô kə ni. 35Yu hì chyâlà jùmtìbàmsu wunsu ben jis ha wûn na, “Luk wuna mò yi bàm ma tuku hi jə bênàlò. 36Jis ha ghɨt ghɨ̂n ma ghɨna kahè lye yen a sù ngûn se su bakhe, ma fê lye a tu tèk ma yun mwə̀ mù yə̂mù afû ma yə.”

37Jisòs jis ha ghɨna na, “Nâ ghàn fo shyə ale ma ghɨna yə.”

Ghɨna buf ha wûn na, “Ba yi mô na ghàh yê yun mwə̀ mù yə̂mù a wu ka yi ghə yì bà ma fo ma ghɨna yə ma?”

38Wù fî buf kə na, ghàn kəta tuku ban wu wù sek? Ghàn kina.

Ghɨna kinâ jis na, “Wu mô kə wù tân nì yila à bà.”

39Jisòs jis na ghɨna ndoko a chyə̂ a to wù wə̀lâ kə wu nòn wu nòn. 40Ghɨna ndoktì, nôn ale hì kəta à ghɨ̂t wu wə ghɨ le mtân. 41Wù fihi tuku bân we wù tân nì yila ghê à bà ki kokhi a nyə̂, fo àyòŋnà ha Yènfù, ki bəkte ban wu tɨnu fo na jùmtìbàmsu wunsu tomte a ghɨt ashyə̂. Wù fî lyi yila ghê à bà jyâtì ha ghɨna à jɨ̀m.

42Ghɨna yə̂ kwut kə à jɨ̀m. 43Jùmtìbàmsu Jisòs sù kumti beku ban we nì beku yìlu, wu lûn sùkà njwòsù bà. 44À mô yâ ma ghɨta ti yə̂ mwə̀ mù yə̂mù tɨ̂n dô kə ni, lɨmànà mô a ghɨna fùtɨ̂n kamsu tân.

Jisòs gbi a tô mòlû

(Mat 14.22-33; Jon 6.15-21)

45Ghɨt ghe yə mihì nâbi a wùni yu, Jisòs jis ha jùmtìbàmsu wunsu na, su lyi a ngwùk ma daŋ à yen yi jin yi Bèsadà ashyə̂, ghàn ndokò ghàn jis na nôn à ghɨ̂t ghê kolo. 46Te wù jìsa yani ghê ghɨna toŋtî, wù lo kwok a tô kùn hì jə̂mà. 47Tuku hì jyə bênà jùmtìbàmsu wunsu baha daŋà yênà kə ngwùk afâ wu baha mô yi jin yile ye kə wù nɨ̂ŋ. 48Wù yen ghɨna fuma nì ngwùk te fufa ndùku bênà a ghɨna ashyə̂. À hì mô te tuku yula bênà wù lô hì gbê yênà a tô mòlû hi yè yena jùmtìbàmsu wunsu, yen tan a ghɨna ngwùŋ hì khɨŋa hi chyà. 49Ghɨna yen te wù gbè bênà a tô mòlû, kpu sanlò beka ghɨna ndùku kwâktè na à mò wut à chyə̂, ghɨna bwat. 50Kə à jɨ̀m kə wu yu wù jis jyan ha ghɨna na, “Kə ghàn fan. À mò mu. Ghàn kwut təmi.” 51Te wù jìsa yâ lyi chîntì ghê ghɨna a ngwùk, kə wu yu fufa tɨna tənâ kə yi tənâ, jwo yum ghɨna, 52a mô kə beka ghɨna tà tì kwâktì jə gha kani ye yi tì gàna nì ban we ya, yi ye hì chwûtè na ghə agha, bukhi kə yi bukhî.

Jisòs chwuk à ghɨ̂t a Gènesalèt

(Mat 14.34-36)

53À hì mô te ghɨna dàŋa mihe jwò, tan yi tèk yi Gènesalèt, ghɨna tom ngwùk su ghɨna su yi bì jwôlì, 54hì fwo bê kə ngwùk ni, kə wu yu, ghɨta yen khɨli Jisòs, 55nyɨŋ lyi kə tù lùk tù jɨ̀m a bàh a yi lak afû hì buŋa ghɨt a yablena a fù shɨ̂ŋ yênà nì ghɨna nâbi afa ghɨna ywo na Jisòs mò afû. 56Jisòs hì yênà nâbi afa, kə à hi mô nâbi yi tèk yi tetani makə à mò nâbi atɨ̂n à tèk yi chiki, kəbi a ngunsu fùksù ghɨ fwo lêmà kə ghɨt a yablena wu fàf, ghɨ chyate wûn na wù de ma ghɨna kum nâ kə ghaŋi wuni sùnju, ghê ghɨ kuma tâ kə nâ à jɨ̀m.

Currently Selected:

Mâk 6: bmv

Highlight

Copy