Mâk 5

Jisòs jum a yohnà be a wùt wù wùn

(Mat 8.28-34; Lûk 8.26-39)

1À ndùku mô te Jisòs dàŋa lwî Galìlî ghê jùmtìbàmsu wunsu yen fwu a bàh à lak afa a ghɨ ndùku toŋte na Gèlègosà, 2hì fwo bê a ngwùk ni, kwônà ghê wùt, wu kəta a yohnà be, ma wù lo a sù gùma.#5.2 Sîtù ndùku mô a mu tuk afû ghɨ chûfà a yi wo. 3A mô yâ wùt àtɨ̂n yê chyə ye kə gùma, wùt bu nâ wù mòk hi kwuta lèma wûn wu lùk kəbi nâ nì chyaksu, 4beka ghɨ ndùku faŋa wi hi fà fwəni wuni nì chyaksu nì hi kwuta khəna wuna, wu tenti kə yi tentî, nâ wùt laha bu hi kwo lèma wûn wu lùk wù mòk. 5Wu gbê bwate a sù gùma te tuku yula jyə, kwoka bwate a sù kùn, bwate yâ lemhê ngɨŋ à wûn nì te.

6Wu yen yen nì Jisòs hadà nyɨŋ yen fen a wun ashyə̂ 7Bwat nâ jyə̂ yì tâ jis na, “Wò khɨŋa ghə ha mu Jisòs Wâ Fùyèn fe fu ngaŋte kpene? Mu chyate wò yi yet yi Fùyènì na kə wò fo ngə̂k ha mu!” 8Wù ndùku jîsà yâ te Jisòs kàna ha wûn jis na, “Fwu a wùt wunâ wu wùn yohnà be ghɨ̂n!”

9Jisòs ki buf ha wùt àtɨ̂n na, “Yet ya mò nde?”

Wù fîsì na, “Yet yi mi mò a nôn, beka ghàh mò nâ hidù.” 10Wù jis yâ hì chyate kə yi chyatî Jisòs jîsà na kə wù jum fihi lô yohnà be wûn a bàh à lak afû.

11À ndùku mô yâ nôn à kùnduku a dona ale mô bakhe afu yə̂ a wùnu kunu. 12Yohnù be mu we chyati Jisòs jis na, “Tum ghàh wu lùk wu kùnduku a fokô ma ghàh lye a wunu wu wùn.” 13Wù de ghɨna, ghɨna fwu a wùt we wu wùn yen lye a kùnduku we wu wùn. A mô yâ kùnduk we kwoka chəma yènà kam sùbà, wu shɨ̂ŋ nì nyiŋi yen tan a mbok yìlè yi bi lwi chyəmle a jwô kputilò.

14Ghɨt ghe ghɨ ndùku kine kùnduku tɨnu nyiŋ kolô, fôktì gha ye yi gana yi tèk afû fî gbî fôktì a sù ngûn ha ghɨta. Ghɨta fwu yên, hi yena gha ye yi gana, 15ben yen Jisòs. Wùt we wù ndùku kəta nôn à yohnù be we mô kə na afû ma wù ti mak njusu, hì mô kə nâ wun wu tof. Ghɨt atɨna yen yâ hì fânà. 16Ghɨt ghe ghɨ tì yena te gha tɨni gana fôktì gha ye yi tì gàna nì wùt à yohnù be we nì yê yi ye gana ha kùnduk we. 17Ghɨt atɨ̂na yu ni hì chyate Jisòs, jîsà na wù lo a ghɨna bàh à yi laka. 18Jisòs shihi lyi a ngwùk hi lò wùt à yohnù be we hì chyate wûn na ghê wûn lo. 19Biyani Jisòs tunhî jis ha wun na, “Kahi kolô ndù yen ghɨt gha ma wò fokti gha ghe Bâba ne ha wò, fòkti te wù ye kwohe seni ha wò.” 20Wù boŋ lo kə yâ yen lye a Tèktu Ìwûm hì gbê fôktè yênà gha ye Jisòs ne ha wûn. Fôktè yâ ghɨt à jɨ̀m mô kə nì kani.

Jisòs chwuk wùt ywên fî lôhì wâ Jalòs a yi kpû

(Mat 9.18-26; Lûk 8.40-56)

21Jisòs kahi daŋ lo yen tan yi jin yile, nôn à ghɨ̂tà ben a wun a ngwùŋ dô kə ni, wù fwu timi yi bi jwôlì. 22Kə ni wùt we wù tihe ghɨta a ndâ yùŋtì, yet yi wuni mô Jalòs bên hì yena bê nì Jisòs ni, fen a wun ashyə̂, 23hì chyate wun nâ haŋaŋ jîsà na, “Wâ mù yafalò kə̂kà hi kpû. Bi kùm kə yi kûm wûn ma wù ta ma wù hi mô.” 24Jisòs yen yen wûn, nôn à ghɨ̂t ale hì kwoka lye yênà kə wun yi bàm. 25À ndùku mô yâ, wùt ywen wùlè mô afû motè kə ni wu yen wu yu wunu ma yafi tɨni ti chyə a wun wu wùn a wu lɨ̀m njwòsù bà, 26wu fê yena ngə̂k nâ haŋaŋ dâŋtè a ghɨt a mfo wô ghɨ dô kə ni, fê lâkà nâbi ghə ghe ghɨna ndùku bufa ha wûn biyani tê bona jə̀ na hakoh yafi tɨni ta yê kə ashyə̂. 27À ndùku mô yâ ma wùt ywen àtɨ̂n ti yu gha ghe Jisòs ndùku nê. Wù fahi ben kə wun yi bàm atɨ̂n a nòn afû kum njusu wunsu, 28kwâktì kə wuna ngɨŋ na wu yu afa mu kùma kə nâ njusu wunsu ma mu ta. 29Te wù kwàkte yâ, hì kumà yênà kə nì njusu tɨnsu ni, yu tɨnu mî, wù yu khɨlî kə wun a ngɨŋ na yi ti tâ. 30Jisòs yu te jyaka fwo a wun wu wùn, shɨŋ kahi wu wun atɨ̂n à nòn afû buf na, “À kum nde nju samsu?” 31Jùmtìbàmsu buf ha wun na, “Wò ti yen kəbi te ghɨta fahe bê kə wo ngwùŋ ni, wo fê bufa na à kum nde wò agha, kum ghə?” 32Jisòs hì ke atɨ̂n à ghɨt na yi kum nde. 33Wùt ywen àtɨ̂n hì chɨŋtê fânà te wù yena gha ye yi gana ha wûn ki yê fen a Jisòs ashyə̂, fôktì gha ye yi gana hamok. 34Jisòs jis ha wun na, “Wâ mù, bimî ya ti ni wò ti tâ. Kolo nì yutìnì, wò kolô, kə wò fi yaf.” 35Te Jisòs baha jîsà kə yi jîs, ghɨta ma ghɨ lo a to ndâ chìnti ghê nda ben jis ha wun na, “Wan wâ we ti kpû, wò fè fo ngə̂k à ghə ha chichà?” 36Biyani Jisòs bukhî jis ha to ndâ chìnte ghe na, “Kə wò fan khɨti kə bimî yâ, ma wù ta.” 37Wù shihi yèn a wùt àtɨ̂n a ndâ tè lyè wut a bu kə Bità ghê Jêms nì Jon wâ nè Jêms. 38Ghɨna yen tan a Jalòs a ndâ Jisòs yen à ghɨ̂t, ghɨ luŋle fê bwate jyê. 39Wù lye a ndâ ki jîs ha ghɨna na, “Luŋlî yîn nì jî mò kum ghə? Wan wûn tà kpu jə̂, wù bwune yi bwunî.” 40Ghɨt atɨ̂na hì chəka wûn. Wù jum fihi ghɨna a bɨn na à jɨ̀m, lyi kə bè wan àtɨ̂n nì nè wan, nì jùmtìbàm se su tì yena wu lùk afa wan we tì nìŋe atɨ̂n. 41Jisòs khɨti a wo wan atɨ̂n, jis ha wun na, “Tàlità, kumi,” ma wù ya jis na “Wan wù ywên, mu jìsà ha wò na wò loti!” 42Kə ni, wan wù ywen àtɨ̂n lôtì hì gbê a baha mô kə wan lɨ̂m njwòsù bà. Te wù lòte yâ, jwo yum ghɨt ghê. 43Jisòs chîhì ha ghɨna na kə wùt nè ywo gha yê yi gana, fî ki jîs na ghɨna fo shyə ma wan àtɨ̂n yə.

Currently Selected:

Mâk 5: bmv

Highlight

Copy