Mâk 4

Ngàn kum bè fùk

(Mat 13.1-9; Lûk 8.4-8)

1Jisòs fî yîmì hi yike à ghɨ̂t a yi bi lwi Galìlî, nôn à ghɨt à ben dô kə ni, wù yen ni, lyi ndokò a ngwùk atɨ̂n à jwò, ghɨta timi tala a yi bi jwolì. 2Wù yiki ghɨna nì gha ghɨ dô kə ni kə ha sù ngàn. Wù jis ha ghɨna na, 3“Ghàn yuti! Wùt lè tî shik hi mù à ngwìk, 4shihi mù, yìlè chemli a sùbelâ, nyɨ̀mû ben chubli kut nâ yì jɨ̀m. 5Se ale chemlî a chyə te mô yi dèt chyəfu dô wi afû, yì nyâŋhì fwu kə ni beka chyəfu ndùku dô wi. 6Chwì ban nâbi yini nyok shôŋfu tɨnfu yîm beka ghaŋtu tɨntu ndùku mô teka tu fwu. 7Se ale chemlî wu lùk sòtoŋsu kwoka atɨ̂n, sòtoŋsu tɨnsu fwu tâhì saŋ atɨna ghɨ tê bwùs. 8Se ale chemlî kə nâ a chyə fu jûŋ fù saŋ atɨna kwôk bwuslò bilò. Ghɨ hi shika sama, se saŋa hì fwo a to saŋ ale mtât, fwo a to ale mtufa, fwo atɨ̂n ale wu wə.” 9Te Jisòs jìsa ni ki jîs ha ghɨna na, “À tofa nâbi nde wu hi tòkà yutê.”

Gha ye ghɨ ma ngàn sîn kum yini

(Mat 13.10-17; Lûk 8.9, 10)

10Ghɨta jyâhì a Jisòs à ngwùŋ wù faŋ kə ghê ghɨt ghe ghɨ ye ndokò bakhe ha wûn nì jùmtìbàmsu wunsu njwòsù bà, ghɨna ki buf ha wun na, ngàn sîn chwùtè na ghə. 11Wù jis ha ghɨna na, “Yènfù ti fo tofu ha ghàn na ghàn hi ywo khɨle gha letena ghe ghɨ mô kum fə̂n wù Fùyènù, biyani ghɨ kəta hi tè yike ghɨt ale nì gha tɨna kə ha sù ngàn. 12Shyəma,

Ghɨna hi ke kə nâ yi kî

yena khɨle wi,

yute kə nâ yi yutî gha

biyani ywo khɨle wi gha ye ghɨ jîsà,

beka ghɨna hì yena fê ywo khɨle, ma ghɨna kahà ben ha Yènfù,

ma fu lêhèfo besu ghɨna su.”

Jisòs fôktì gha ye ngàn àtɨ̂n yike

(Mat 13.18-23; Lûk 8.11-15)

13Te Jisòs jìsa ni, ki buf ha ghɨna na, “Ba yi mô na ghàn tà yu khɨli jə ngàn yina agha? Ghàn shìki khə wi gha ye ghàn yike, ghàn khɨli yàni ghê ngànsu lesu yike nâ sù jɨ̀m agha? 14Ngwìk ye wùt we tì mo à mò yi gha Fùyènì. 15Təma ghɨt ale mò ni te tu lûm, ghɨna yen yu gha Fùyènì ye ghɨ yome a ghɨna təm, Satàn nyiŋ ben fihi kə yi fihî. 16Təma mô te fu chyə a tô ti a wu yu afa ghɨ mo ngwìk a tû. Nki ghɨt mi ghɨ̂n ni ywo gha Fùyènì ghɨna nyâŋhì bimi kə yi bimî nì saŋlînì. 17Ghɨna ywô yi tê khɨte tu ghaŋ a ghɨna təm, ghɨ bimi kə afu yula ni. Ngə̂k ben ha ghɨna makə ghɨ bânà ghɨna kum gha Fùyènì kə wu yu, ghɨna nyâŋhì fən kə yi fə̂n. 18Təm a ghɨt ale fe mô kəbi te luku sù sòtoŋu. À mô ghɨt ghe ghɨ yute kə nâ gha Fùyènì, 19biyani fuma mbye nì kôŋ ye ghɨna kòŋà ghaki nì mwə̀ mù mbyî yi bên tàhì gha Fùyènì yi tê mo jə̀ tamu a ghɨna chyənà. 20Təm ghe ghɨ mô te chyəfu jûŋ fù à mò təm a ghɨt ghe ghɨ ywo gha Fùyènì, ghɨ khɨti kə yi khɨtî yi mu wu tam a ghɨna chyənà, ghɨ hi kpê sama se saŋa fwo yi saŋ yile mtât, fwo atɨ̂n à yile mtufa, fwo atɨ̂n à yile wu wə.”

Ngàn à lâm

(Lûk 8.16-18)

21Jisòs fî jis ha ghɨna na, “Ghɨ lye nì lâm a ndâ ghɨ baŋa wi a sah à kà, ghɨ wi hi lèt a chiŋkì. Ba ghɨ lyê ghɨ tom a lùk wu ngaŋtenu kum agha?” 22Ghɨ lêtà kata nâbi nì ghə, ghɨ wi hi bè faŋ hi yên, ghɨ leti nâbi yìni gha, yi bè faŋa wi hi fwo a ndan. 23À hì kəta nâbi nde tofu wu hi tòkà yute gha mi yîn! 24Wù fî jis kəbi ha ghɨna na, “Ghàn tokna nì gha ghe ghàn ywo! Ghàn fo mwə̀lû ha ghɨta nâbi nì ghɨ̀ni fêkà ma Yènfù bê fo ha ghàn kəbi a fèk afû, 25yi ni chwùtè na a kəta nâbi nde ma ghɨ fo kpenhi ha wûn, à hì gha nâbi nde ma ghɨ fyi fu teta fe wù kəta.”

Ngàn yi se ngwìkì

26“Fə̂n wù Fùyènù ləmne kəbi te wùt yè nê wu mu ngwìk a chyə, 27wu kolô, ntuksu wu hi bwunê, tuku yû wu yemà lò, kə ya ngwìk atɨ̂n fwu yi ləmalò, wu fê khə wi na gha tɨni ye gan yàni agha. 28À mò yani a nê fu chyə na ngwìk àtɨ̂n ləma. Sàtusu yitì fwo a to saŋ ashyə̂ shyəma se saŋa fwu a to saŋa afû. 29Saŋ atɨ̂na bî, ghɨ shik yi kpî, beka yu kpenu kpena.”

Ngàn yì se ngwìk fùkàk fu mostà fu

(Mat 13.31, 32, 34; Lûk 13.18, 19)

30Jisòs fî buf na, “Ghɨ mò hi fə̀knà fə̂n wù Fùyènù nâ nì ghə, ghɨ ni mò hi ma nâ ngàn à ghə hi chwùte lum we fə̂n wù Fùyènù mò atɨ̂n agha? 31Wu mò kəbi te fu sêlà fu ngwìk à fùkàk fu lefu ghɨ toŋte na mostà, à mò wu yu afa ghɨ mu, fu hi tobte chyâ nâbi yìni se ye ghɨ ye mu a fùk. 32Biyani ghɨ mu ngwìk àtɨ̂n, kâk fu tɨnfu fwu kwok fu yam hi ghaka chyâ nâbi fùni kâk fù, kpoŋtu tɨntu hi ghakle kpene shyəma nyɨ̀mû hi ba ndasu ghɨna su atɨ̂n.” 33Jisòs fôktì gha Fùyènì ha ghɨna tohna a sù ngàn su dô kə ni wu lum na ghɨna ywo khɨli. 34Wu tà tì fôktì jə gha ha ghɨna nâ yì mòk bu atɨ̂n à ngàn. Wù ndùku fôktè ya, wu ne kahi yen a yi bàm, wu fati fôktì gha ye ngànsu tɨnsu yike ha jùmtìbàmsu wunsu.

Jisòs chîtì fufa ta

(Mat 8.23-27; Lûk 8.22-25)

35À hi mò kəbi wu tuk afu metì te wù ndùku yike ghɨta yâ, leŋ yu kolô kpên, wù jis ha jùmtìbàmsu wunsu na, “Ghàhnà daŋ à yen a yi jin yi lwi a fokô.” 36Ghɨna de a nôn à ghɨta lyi daŋ nì Jisòs, wu baha mo kəbi te wù ye lyi ndokò a ngwùk. Ngwùksù lesu tì daŋ kəbi a wun yi bàm. 37Ghɨna shihi daŋ, fuf ale yîmì hi chyà ta kə ni, hi china jwò yi bê kun à ngwùk, kwoka lye atɨ̂n, yi hì khɨŋa hi sàŋà. 38A mô yâ ma Jisòs ti niŋì atɨ̂n à ngwùk, yikti a to wuna wu kpòk wu tu khɨ̀ hì bwunê. Ghɨna yemhì wùn buf ha wun na, “Chichà ba yi ni mò na ghàh ni kpute yê ni wo khə wi agha?” 39Wù yemà kântì agha ha fuf atɨ̂na jis ha jwò na, “Bona timi kə yâ!” Kə wu yu fuf atɨ̂na bot luktu china kə moŋ. 40Wù ki buf ha ghɨna na, “Ghàn fànà ghə ni? Ba yi ni mò na ghàn bime wi Yènfù ma?” 41Gha tɨni nî ghɨna hì fânà nâ haŋaŋ, ki buf kə na “Wùna mò nâ nde a fufa ywo wûn nì jwò?”

Currently Selected:

Mâk 4: bmv

Highlight

Copy