Mâk 3

Jisòs chwuk kpen wu wûtù te wu kpo

(Mat 12.9-14; Lûk 6.6-11)

1À hì mô kəbi wu tuk wule Jisòs yen lye a ndâ yì yùŋtì wùt lè mô afû ma kpen wu wunu ti kpû. 2Ghɨta lem yi se a wun wù wùn hi yen na, wù nè chwuka lò wùt wu tuk wu laku shyəma ghɨna khɨli hi tè ngane wûn. 3Wù jis ha kpû kpen we na, “Chyâ bî afân.” 4Wù lôtì, Jisòs ki buf ha ghɨna nâ, “Saki bimelò na ghɨ ni jùŋ wu tuk wu laku ma be, Yi bimelò na ghɨ bonhi wùt ma ghɨ ywi yi ywî agha?” Biyani ghɨna china kə moŋ. 5Jisòs ki tala ghɨna ni ma lâ ti baŋ wûn. Wù hì fê kwohe yi sen a ghɨna to tana, ki jîs ha kpû kpen we na, “Nànti kpen wa.” Wù nântì kə wu yu, kpen wu tɨnu tâ. 6Te ghɨt a Falàsî fwu, khɨti yi yûŋtì nì ghɨt a Helòd hì fate wu wun hi ywe Jisòs.

Nôn à ghɨta ben hi yena Jisòs yi bi lwi

7Jisòs lo yen ghê jùmtìbàm su wunsu yi bi lwi Galìlî, ghɨta yen a ghɨna yi bàm, dô kə ni ma ghɨna lo a Galìlî fî lo a Jùdiyà, 8Ghɨta lo a Jèlusalèm, lo Ìdùmiyà ghɨta daŋ ben lumu yi jin yi Jodàn, ghɨta fî lo ben a bàh a Tayà nì Sidòn kə te ghɨna ywo gha ye Jisòs ndùku nê. 9Jisòs ki jîs ha jùmtìbàmsu wunsu na ghɨna bê bakhi nì ngwùk, ma yi lyi atɨ̂n bu ya ma ghɨta hi fahe chyâhè yi. 10Beka a ndùku mô yâ ma wù ti chwuk ghɨta ghɨ dô kə ni, à hì mô nâbi nde te wù yafa, fahe bênà kə hi kùm à wûn. 11Ghê ghɨna ndùku kəta yohnù be yen wûn, yohnù tɨnu nî ghɨna fən a chyə̂ wu hì bwata jê jîsà na, “Wò mò kə nâ wâ Fùyèn!” 12Te ghɨna shihi bwati ni Jisòs chîhì ha ghɨna na kə ghɨna fokti gha kum nì yi ha wùt.

Jisòs chwokti ghɨt a wun a tuma njwòsù bà

(Mat 10.1-4; Lûk 6.12-16)

13À hì mô te Jisòs fwo kwoka ye nì lumu a tô kùn, wù toŋa ghɨt ghe wù tite, ghɨna boŋ kwôk, 14wù yen chwokti à ghɨ̂t a ghɨna fùtɨ̂n njwòsù bà na ghɨna hi gbê bakhe ha wûn, fî lem ghɨna ha ghɨt a wuna a tumana na ghɨna hi gbê fôktè gha Fùyènì, 15fê kəta a jyak hi jùm à fihe wu yohnù be. 16Ghɨt a tumana tɨna ndùku mô Samùn a we Jisòs tì kpenhe yet yi wuni na Bità, 17nì Jêms ghê wâ nè wûn Jon, wana Sebedì. Jisòs chwu kpenhi yet yile ha ghɨna na Bòwanajìs, a mô na wana wuli bwatini. 18À hì fê mô Andùlù nì Filîb nì Bàtòlòmiyà nì Matiyò nì Tomòs kəbi nì Jêms wâ Àfeyòs nì Tàdiyòs nì Samùn wùt wù lùmana à ghɨt a Jûs, 19nì Judàs Ìskaliyòt a we wù tì kaha bəkle Jisòs.

Gha kum Bèlsibùl

(Mat 12.22-32; Lûk 11.14-23; 12.10)

20Jisòs kaha kolô, ghɨta ben yuŋ a wun a ngwùŋ dô kə ni lumu hi fê bu shyəma wù yə ghê jùmtìbàm su wunsu. 21Ghɨt a wuna yen te wù fètà yênà kə yi yên khɨŋ yên nì wûn hi tese wûn, ma ghɨna hì kwâktè kə na to wuna ti fwû 22À ndùku mô ya ma chichàsu saksu ti chwo ben a Jèlusalèm, hì jîsà kə na, “Bèlsibùl mò a wun wu là. Wù mò ya jûmà fihe yohnù be nì jyaka a fo fə̀n à yòhnù be.” 23Jisòs toŋa ghɨna ma ngàn ha ghɨna na, a Satàn làhi tè jùm à fihe satàn a ghɨta wu wùn agha? 24Ghɨta shìki tê mò a ghɨt yi lak yì mòk, hì kəta a jyàhì, ma lak yi tɨni tê faŋ hi fə̂n. 25Ghɨta hì mô yi sah yi nda yì mòk hì kəta a jyàhì ma sah yi nda tɨni bê ghaŋ gha ma yi jyahi. 26Satàn hì mô ma wù ti kahi hì kəta jyàhè wùna, mô wu nòn wu nòn hì nô ngɨŋ à wun ma wù fən, ma yi hi chwûtè na gokhi wuni ti bên. 27“Wò wi hi lye a wùt wu ta a ndâ hi lyè fwu nì mwə̀ mù wûn, a bu kə na wò kwo kwutlô wûn laŋ.” 28“Mu jìsà ha ghàn hamok na, à hì mô nâbi be ghə a ghɨta nè Yènfù làhi lèhèfo, Fu lèhèfo nâbi yìni ndi a ghɨna sùle wûn atɨ̂n. 29Biyani a sùli nâbi nde Yohnà Yulena ma fu bê tè lèhèfo jə̀ wûn. Wùt ki môm ma be wûn faŋa a wun a tû kə hamok.” 30Jisòs ndùku jîsà ha ghɨna ni beka ghɨna ndùku jîsà na, “Wù kəta a yohnà be.”

Jisòs fôktì nè wûn nì wana ne wuna

(Mat 12.46-50; Lûk 8.19-21)

31Nè Jisòs nì wana ne wuna ben time a bɨn tum na ghɨ toŋa Jisòs. 32A mô yâ ma nôn à ghɨ̂tà ti ndokò jiŋ kat wûn. Ghɨna jis ha wûn na, “Yên, nâ nì wana na khɨŋa wò.” 33Wù buf ha ghɨna na, “Nôm nì wana noma mò nde agha?” 34Te wù jìsa ni, ki tala nì ghɨna ki jîs na, “Nôm nì wana noma mò a ghɨt ghɨ̂n. 35À ni nâbi nde gha ye Yènfù khɨŋa ma wù hi mô wâ nôm mô jàmtè mì nì nôm.”

Currently Selected:

Mâk 3: bmv

Highlight

Copy