Mâk 2

Jisòs chwuk wùt wù kə̀blena

(Mat 9.1-8; Lûk 5.17-26)

1Te tuku chyàla kə mù sek ni, Jisòs kaha yen a Kàbanùm, ghɨta yu na wù ti kolô, 2Yen yûŋtì a nda afû dô kə ni, luku hì bu kə nâ yi jwô ndâ hi timî, wù hì fôktè gha Fùyènì ha ghɨna.#2.1 Ghɨta tofana: Ghɨna ndùku taŋa gha a mu jèn. 3Kə ni ghɨt ale à kìk bêkà ben nì wùt ha wûn ma wù ti kə̂blì. 4Te ghɨna bèna yani ghɨta du ghak ghɨna hi chyà, ghɨna kwok a tô ndâ chwok a bûk a bàh afa Jisòs ndùku mô atɨ̂n. À hì mô te ghɨna chwoka bûk ghê chwohi wùt àtɨ̂n nîŋhì a Jisòs ashyə̂ ma wù ti nîŋì a fu ghàm.#2.4 Hi kwok a tô ndâ: Ndasu ndùku mô ma ghɨ ba lem luku a tô àtɨ̂n ghɨ mô hi kwok a ndòkò atɨ̂n.

5Jisòs yen bimî ye ghɨt atɨna ndùku kəta, jis ha wùt wu kə̀blena we na, “Wâ mù mu ti lehìfo be sasu.”

6Chichàsu saksu lesu se su ndùku mô afû ki gha tɨni ni hì nyama kana kə ghɨna sù ngɨŋ, 7“Njwô ghə te wùt wuna jìsà wu lum afân ni? Wù sùlè kə nâ yi sûlì nì Yènfù ni! À mò nde hi lèhèfo besu wût sù a bu kə Fùyèn?”

8Kə wu yu, Jisòs khɨli gha ye ghɨna ndùku kwâktè ki buf ha ghɨna na, “Ghàn kwàktè nâ gha mɨ ghɨ̂n ni njwô ghə? 9À bona hi jìs ha wùt wu kə̀blena wuna na, ‘Ghɨ ti lèhìfo be sasu,’ ma hi jìs ha wun na ‘Lòtî ma wò lyi shɨ̂ŋ fafu ma lo agha?’ 10Mu chwùtè ha ghàn chîn na Wâ Wùt kətalò jyaka a chyə afân hi tè lèhèfo besu ghɨ̂tsù.” 11Te wù jìsa yâ, ki jîs ha wùt wù kə̀ble we na, “Mu jìsà ha wò na wò loti ma wò lyi ghâm fafu ma wò kolo.”

12Kə wu yu, wù lôtì kə ghɨna ashyə̂ lyi shɨ̂ŋfu wun fu hì kolê. Nâ ghɨna à jɨ̀m hì mô nì kani hì kokhe Yènfù jîsà na, “Ghàhnà ti timi yen gha ale ni agha?”

Jisòs toŋa Lefì

(Mat 9.9-13; Lûk 5.27-32)

13Jisòs kaha yen yi bi lwi Galìlî, ghɨta fî ben yûŋtì kə wuna ngwùŋ kə à jɨ̀m, wù hì yike ghɨna. 14Ne lô shihi yèn, yen Lefì wâ Àfeyòs, wu mô a wì afa ghɨ kâtà ŋwàklànà atɨ̂n jis ha wun na, “Jumti mu.” Kə wu yu wù lôtì yen kə wun yi bàm.

15Jisòs yen ndokò wu lùk wu yənu a Lefì a ndâ, ghɨt ghe ghɨ ndùku kâtà ŋwàklànà nì ghɨt a be ghɨ le ghɨ dô kə ni, ben ndokò ghê jùmtìbàmsu wunsu. À mô yâ ghɨta gbê a Jisòs yi bàm dô kə ni. 16Chichàsu sak se à ndùku mô ghɨt a Falàsî ki yen te Jisòs yə nì ghɨt a gha be nì ghɨt ghe ghɨ kâtà ŋwàklànà, ki buf ha jùmtìbàmsu Jisòs sù na, “Njwô ghə te wù yə ghê ghɨt ghe ghɨ kâtà ŋwàklànà nì ghɨt a be ale agha?”

17Jisòs yu gha ye ghɨna bufa, buf ha ghɨna na, “À jwof ndâ nde ma wu khɨŋ wùt a fù agha? À yè khɨŋa kə ghɨt a yablena. Mu tà che ben jə hi tihe ghɨt ghe ghɨna chyə chilichili, mu che ben hi tihe ghɨt a be.”

Jisòs jis kum bam yi jwo

(Mat 9.14-17; Lûk 5.33-39)

18Tuku tî yû tuk lefu jùmtìbàmsu Jon su nì su ghɨt a Falàsî su hì bama yi jwô, ghɨta ben buf ha Jisòs na, “Jùmtìbàmsu Jon su bama yi jwô, jùmtìbàmsu ghɨt a Falàsî sù bamâ, sasu yə kə yi yə̂ njwo ghə?”

19Jisòs jis ha ghɨna na, “Ghɨta wi hi shika malâ hi tè bama yi jwô lɨm à wùt ywên baha mô kə afû. Wu mô kəbi afû ma ghɨna tê faŋ hi yə. 20Tuku bè bê lò ma ghɨ lyê lo ni lɨm à wùt ywên a ghɨna fùtɨ̂n ma ghɨna shìki bama yi jwô.”

21Wùt wi hi lyè bâh à sùnju ghɨ fe hi bàtà njusu mwusu atɨ̂n beka wù ki nì yâ ma bâh à fe ghe nê kahà chwoka, ma ghɨ shihi chwokâ, ma ghɨ ghakhi bûk ghe ghɨ ye bata. 22Wùt wi hi lèmà sìŋ à mù lùk a sàlsu gwusu nyâm su mwusu. Wù ki lêm ma lùk mù tɨ̂n nê shihi tâ ma mù bati sàlsu tɨnsu ma à hi mô na lùkû ti ləhà bakhi nì sàlsù. Yi jwôfà hi lèmà lùk mù tofa mù a sàlsu fesu.

Jisòs jis kum tuk wu laku

(Mat 12.1-8; Lûk 6.1-5)

23À ndùku mô wu tuk wule, Jisòs hì tohne chyâ yi bat yi saŋa boti ghê jùmtìbàmsu wunsu, ghɨna hì yole tu saŋu wule.

24Ghɨt a Falàsî ki buf ha wun nâ, “Njwô ghə te jùmtìbàm sasu nè nki gha yina wu tuk wu laku saki bime wi agha?”

25Wù buf ha ghɨna na, “Ghàn tà timi taŋ yu jə gha ye Defìt tì ne wu tuk afa wù ndùku khɨŋa shyə hi yə̂ te jìŋ ndùku yafa wun nì ghɨt a wuna agha? 26Wù tì lye a ndâ Fùyèn ghê ghɨt a wuna. À mô Àbyatà ngàŋ à ndâ Fùyèn a mu tuk afû lyi yə mwə̀ mù yə̂mù Fùyèn saki chwûtè na à yə kə ngàŋ à ndâ Fùyèn yì ngaŋtena.”

27Wù jis ni ki fê kaha jìs à mihì na, “Yènfù tì fati tuk wu lak mu wûn ha jùŋ à wùt, wù tà tì fati jə wùt na wù hi lêmà tuk wu laku halô. 28À ni gha ye Wâ Wùt kəta jyaka hi nè kəbi ghə nâbi tuk wu laku.”

Currently Selected:

Mâk 2: bmv

Highlight

Copy