Mâk 1

Yi fêt yì Jon Fo Mòlû

(Mat 3.1-12; Lûk 3.1-18; Jon 1.19-28)

1Yin mò yi yimi tum yì jùŋ à Jisòs we ghɨ tì chwoka lema, Wâ Fùyèn. 2Fòktì Ìsayà ndùku mô ma wù ti nyak tum à Fùyèn yi jîsà na,

“Kike, mu bè chinhelò wùt à mù wù tum

ma wù yen a wo ashyə̂, ma wù fati lum wa.

3Wùt wu toŋa jîsà bênà yi lak yi Sùsi na,

‘Ghàn fati lum wu Bâba.

Ghàn fati lumlà mù wûn ma mù hi nânà.’”

4Jon Fo Mòlû tì fwu ben yi lak yi Sùsi hì fôktè tum à Fùyèn jîsà na, ghɨta kahi təm a ghɨna ma ghɨ fyi mòlû ma Yènfù tahi lèhèfo besu ghɨna su. 5Ghɨta fwu yi lak yi Jùdiyà kə yì jɨ̀m nì Jèlusalèm hì yênà ha wûn jyê khɨmte wu wun kum besu ghɨna su, wù fo mòlû ha ghɨna a jwô à Jodàn.

6À ndùku mô ya, Jon mâkà njusu ma ghɨ ba nì nyuŋsu nyàm yìlè ghɨ toŋte na kàmêl.

7Wù hì fôktè gha Fùyènì jîsà na, “Wùt bènàlò a mu yi bàm chyâ mu, mu kpene wi hi fèt ha wûn te a kwôs ghe ghɨ ngumte a wun ashyə̂ yentè gwusu wùsu wunsu. 8Mu fo mòlû ha ghàn kə nì mòlû mù jwò, biyani wu mô hi bè fo mòlû ha ghàn nì Yohnà Yulena.”

Te Jisòs tì fye mòlû ghɨ mômhì wûn

(Mat 3.13–4.11; Lûk 3.21, 22; 4.1-13)

9À ndùku mô a mu tuk afû, Jisòs lo yi tèk yi Nasalì a Galìlî yen yen Jon, wù fo mòlû ha wûn a jwô à Jodàn. 10À hì mô te wù fye mòlû fwo kwoka bênà a jwô ni, yen te jwo nyə jìme Yohnà Yulena fwu chwo ben a wun a tû, kə ni te fùlàtà. 11Jyə̀ fî fwu kəbi a nyə̂ jîsà na, “À mò kə nâ wò wâ mù wù kòŋ mu saŋlê ha wò hanɨ̂ŋ.”

12Kə wu yu, Yohnà Yulena ni Jisòs wù lo yen yi lak yi sùsi, 13wù chyə afû a mu tuk mkìk, Satàn mômhì wûn, wu chyə kə wu lùk afa nyamsu ghə̀nsù ndùku chyə atɨ̂n, anjèlsù Fùyènsu kine wûn.

Jisòs toŋa ghɨt a kìk a mô à ghɨ̂t kwo a yila

(Mat 4.12-22; Lûk 4.14, 15; 5.1-11)

14À hì mô te ghɨ fa Jon a chyâk, Jisòs kaha lyi yen a Galìlî hì fôktè tum à Fùyèn yì jùŋ, 15jîsà na, “Yu ti kpên fə̂n wù Fùyènù ti bakhâ. Ghàn kahi təm ghana a ghàn a sùbe ma ghàn bimi tum yì jùŋ yinâ.”

16Tuk lefu Jisòs shihi chyà yi bi lwi Galìlî yen Samùn ghê wâ nè wûn Andùlù, ghɨna tuma yênà nì wəlu a jwô hi kwo yila, a mô fêt yi ghɨna. 17Wù ki jîs ha ghɨna na, “Ghàn jumti mu ma mu yiki ghàn ma ghàn hi bɨlà kwola ghɨta.” 18Kə wu yu ghɨna de wətu ghɨna tu fwu jûmtì yen nì Jisòs.

19Ghɨna khɨŋti yen kə ni, Jisòs fî yen Jêms ghê Jon a mô wana Sebedì à bà ghɨna mô a ngwùk, tumte wətu ghɨna tu. 20Te Jisòs yena be nì ghɨna ni, fî toŋa kə yi toŋâ. Ghɨna fwu de bè ghɨna nì ghɨt ghe ghɨna ndùku fêtà a ngwùk, jûmtì yen nì Jisòs.

Jisòs jum fihi a Yohnà be a wùt wu wùn

(Lûk 4.31-37)

21Ghɨna yen tan yi tèk yi Kàbanùm, à hì mô wu tuk wu laku, wù yen a ndâ yì yùŋtì hì yike à ghɨ̂t afû.

22Jisòs yiki ni, jwo yim ghɨna beka wù ndùku yike wijə te chichàsu saksu. Wù ndùku yike kə nâ te wut kəta a jyak.

23Kə ni ghɨ bûŋtì yen wùt a ndâ yi yùŋtì afû wu kəta yohnà be. Ghɨ nê wu bwatlò, 24ghɨ jis na, “Jisòs wâ wùt à Nasalì, wò khɨŋa ghə a ghàh a fùtɨ̂n, wò ben hi bobhe ghàh ma? Mu khəlò shyə ghe wò mò ghɨna. À mò kə nâ wò Wùt wù yulena wù Fùyèn.”

25Jisòs kântì a ghâ ha yohnà be atɨ̂na jis na, “China moŋ ma wò chyà fwu a wùt wuna wu wùn!”

26Yohnà be atɨna shik wûn nâ haŋaŋ, wù fî bwat nâ a jyə̂ yì tâ shyəma yohnà be ghe fwu a wun wù wùn. 27Ghɨna hì mô nì kani, ki buf kə na, “À mò yìni nki yikî fe ni? Wù kàntè a gha nì jyaka ha yohnù be wu ni kə te wù jìsa.”

28Hi yìmì kə wu yu afû, gha kum yikî wuni waŋ kə tu luk tù jɨ̀m a Galìlî.

Jisòs chwuk ghɨta nâ hidù

(Mat 8.14-17; Lûk 4.38-41)

29Jisòs ghê Jêms nì Jon tì fwu a ndâ yì yùŋtì afa nâbi wùni yu, nan yen kə Samùn ghe Andùlù a ndâ. 30A mô yani nè ywê Samùn kəta a gut. Te wù lye bena, ghɨ fôktì yaf yi tɨni ha wûn. 31Wù yen khɨti a wo wuna lôhì wûn, gut atɨ̂na mî, wù lôtì chyâhì mwə̀ mù yə̂mù ghɨna yə̂.

32À hì mò wu yu kolô, ghɨ lyi ben nì ghɨt a yablena ha wûn nâ à jɨ̀m, nì ghe ghɨ ndùku kəta yohnù be. 33Ghɨta fî fwu yi tèk afû nâ à jɨ̀m ben yûŋtì yi jwô ndâ. 34Wù chwuk ghɨta nâ hidù ghɨ kəta tu yaf a tu nkì a tu nkì jum fihi yohnù be a ghɨta wù wùn wu dô kə ni, jûmà fihe yâ, bime wi na yohnù be tɨnu jis gha beka wu ndùku khə wûn.

Jisòs fôktì gha Fùyènì a Galìlî

(Lûk 4.42-44)

35Te tuku ndùku baha yula bê, Jisòs lôtì yen wu lùk wu letenu kə wù nɨ̂ŋ hì jə̂mà. 36Samùn nì sunsu wunsu hì gbê khɨŋa wûn. 37À hì mô te ghɨna yena wûn, ghɨna jis ha wun na, “Ghɨt à jɨ̀m khɨŋa wò.”

38Wù jis ha ghɨna na, “Ghàn ben ma ghàhnà yen a tu tèk tu letu, ma mu boŋà fòktê yen nì gha Fùyènì afû beka à mò gha ye mu che bena hi nì.”

39Wu jis ni, gbi luk tù jɨ̀m a Galìlî, gbi lyi a ghɨna ndasu yuŋtesu fôktè tum à Fùyèn fê jûmà fihe yohnù wu be a ghɨta wu wùn.

Jisòs chwuk wùt wù kùhana

(Mat 8.1-4; Lûk 5.12-16)

40Wùt ben ha Jisòs kəta a kùh, tum a lwe a wuna a chyə̂ hì chyate wun jîsà na, “Wò shìki kôŋ wo chwuk mu.”

41Jisòs kwohi yi sen ha wun nâ haŋaŋ nâhì a wo kum wun jis na, “Mu kòŋàlò tâ.” 42Kə wu yu kùh àtɨna mî a wun wu wùn wù tâ. 43Jisòs jyan na wù hi yê, fî chîhì ha wun na, 44“Kə wò nè mômhè hi fòktè gha ye yi gana ha wùt. Ndù chwùti ngɨŋ yâ ha tu ndâ Fùyènà ma wò fo fo ye sak yi Musìs tì jìsa na wùt ki tâ nì kùhà wu folò shyəma ghɨta khɨli na wù ti tâ.”

45Biyani wù fwu hì kwote nâbi nde fôktè kə yi fôktì gha tɨni, yi waŋ kə luk tù jɨ̀m, nâ yi hì ghaka Jisòs hi lye atɨ̂n à yì lak a ndan, wù hì yênà kə bàh wù sù ngunu biyani ghɨta yu kə tu luk tù jɨ̀m fî yen yen kə wun afû.

Currently Selected:

Mâk 1: bmv

Highlight

Copy