Matiyò 27

Ghɨ lyi yen nì Jisòs ha Balèt

(Mâk 15.1; Lûk 23.1-2; Jon 18.28-32)

1Te tuku tì yula, ngàŋsu ndâ Fùyènsu chiksu nì chəhsu lak su sù jɨ̀m lem hi ywe Jisòs, 2kwut wûn lyi yen fo wun ha Balèt we ghɨ tì tuma a Lûm na wù hi saka bâh à lak atɨna.

Judàs shɨ̂ŋà

(Fêt 1.18-19)

3Judàs we wù tì bəkle Jisòs yu na ghɨ kəta hi ywe Jisòs hì jyê wu wun nâ haŋaŋ, lyi katà fê ghɨ tì fo ha wûn kahi yen hi fo ha ngàŋsù ndâ Fùyènsu chiksu nì chəhsu lak su. 4Te wù yèna hi fô ki jîs ha ghɨna na, “Mu ti ni be beka mu bəkle wùt teka wù bobhi gha yile.”

Ghɨna fîsì ha wûn na, “Ghàh kəta ghə atɨ̂n? À khə wò.” 5Kə wu yu, Judàs tum lihi ka tɨnu a ndâ Fùyèn lô yen shɨ̂ŋàlò.

6Ngàŋsu ndâ Fùyènsu chiksu boŋti ka tɨnu jis na, “Wùna mò ka mu luŋu sak yi ghàhnà bime wijə na ghɨ lem a bàlì ndâ a Fùyèn,” 7ghɨna lem na ghɨ lyi ka tɨnu ma yê yun luku ha wùt we wù bwəma khɨŋa ma hi gûmà tumu atɨ̂n. 8À mò gha ye ghɨ baha toŋte kə luk wu tɨnu na fûk à mu luŋa hi tàn lân.

9Yi tì gan ni hi lunhe tum à Fùyèn ye fòktì Jèlìmayà tì nyàka na, “Ghɨ ti lyi ka kahu shilì we mtât a ghɨt a Isalì tì bime na ghɨ yun wûn atɨ̂n, 10yun luku atɨ̂n ha wùt we wù bwəma khɨŋa a mô kə gha ye Bâba tì jìsa ha mu na mu ni.”

Balèt bufti a gha ha Jisòs

(Mâk 15.2-5; Lûk 23.3-5; Jon 18.33-38)

11À ndùku mô te ghɨ lye ye nì Jisòs ha Gòbnà Balèt, wù buf ha wun nâ, “Wò mò fə̀n ha ghɨt a Jûs?”

Jisòs fîsì na, “Yi mô kə te wò jìsa.” 12Biyani, wù tunhi na yi nè jîsà wi gha yile kum gha ghe ngàŋsù ndâ Fùyènsu chiksu nì chəhsu ndùku ngane wun atɨ̂n.

13Balèt ki buf ha wun na, “Wò ywo kəbi lò gha ghe ghɨ ngane wò atɨ̂n ni?”

14Biyani, Jisòs tunhî hi fîsì kə nâ gha yi mòk. Gha tɨni hì bəma kə ni ha Balèt.

Ghɨ lem hi ywi Jisòs

(Mâk 15.6-15; Lûk 23.13-25; Jon 18.39–19.16)

15À ndùku bê tânà a wu yu afa ghɨ yə yi Yə Daŋa chyalani, Gòbnà jis na ghɨ chwok wùt we ghɨna kòŋà na wù fwu a ndâ chyâk, wù fihilò. 16À ndùku mô ni wùt lè mô a ndâ chyâk ghɨ toŋte wun na Jisòs Bàlabàs, ghɨt a dona khə wun khə gha ghe wù ne. 17Te ghɨta be yuŋte a Balèt ashyə̂, wù ki buf ha ghɨna na, “Ghàn kòŋà na mu fihi nde ha ghàn, a Jisòs Bàlabàs ma Jisòs wuna ghɨ toŋte na Klistù ni agha?” 18Wù ti buf ni beka wù ndùku khə na a mò kə ghə̀k yê yì ne na ghɨta kwo ben nì Jisòs ha yi.

19Balèt hì baha saka kə yi sâk sak à Jisòs mi yê, ywê wûn chinhi tum ha wûn jis na, (Fihi wo gha a wùt wuna yi ghâ a wù kpo teka wù bobhi gha yile beka jèm te chyə fo ngə̂k ha mu lân nâ haŋaŋ kum wûn.)

20Te Balèt bufa gha ye ni, ngàŋsu ndâ Fùyènsu chiksu nì chəhsu lak su chinti à ghɨ̂t na ghɨ jîsà kə na, Balèt fihi Jisòs Bàlabàs ma bɨlà fo Jisòs ma ghɨna ywi. 21Balèt buf ha ghɨna na, “Ghàn jis na mu fihi nde atɨ̂n à ghɨta afân à bà?”

Ghɨna jis kə na, “Fihi Jisòs Bàlabàs.”

22Balèt buf ha ghɨna na, “Ghàn khɨŋa na mu fihi wun ma mu ni ghə nì Jisòs wuna a ghɨ toŋte na Klistù ni agha?”

Ghɨna à jɨ̀m jis kə na, “Ghɨ banti wun a kàkfùtàfù!”

23Balèt fî buf na, “Njwô ghə, wù bobhi ghə.”

Ghɨna fî bwat yen kə ashyə̂ na, “Ghɨ banti wûn a kàkfùtàfù!”

24Balèt yen na yi yena kə ngə̂k halô ma ngə̂k làhi lòtì, lyi mòlû su wo wunu a ghɨt atɨna ashyə̂ jis ha ghɨna na, “Wo mu mò wu yîm kum kpu wùt wuna. À mò gha yani.”

25Ghɨna fîsì kə à jɨ̀m na, “De ma ngə̂k à wûn yì kpû faŋ a ghàh a tû nì mwəlà mâhù!”

26Balèt ki fihi Jisòs Bàlabàs a chyâk fo Jisòs na ghɨ sam nì wànsù, shyəma lyê yê banti a kàkfùtàfù.

Sojàsù hì nyikhè Jisòs

(Mâk 15.16-20; Jon 19.2-3)

27Sojàsu Balèt sù lyi lyi nì Jisòs atɨ̂n à tôk, nâ sojàsu jɨ̀m ben yûŋtì a wun a ngwùŋ. 28Ghɨna chwok nju se wù tì màka a wun wu wùn, mak nju mù tùfə̀n su baŋasu. 29Ghɨna fati fota tù tùŋà so a wuna a tû, fo mbàŋ yì gbèna ha wûn, hì ngumte a wun ashyə̂ jîsà na Mbè ghɨt a Jûs! 30À ben tàn a leŋ ale, ghɨna hì chwule chwâmù a wun wu wùn, kaha fyi mbàŋ yê a wun a wô hì sama wun atɨ̂n kə a tû. 31Ghɨ nyikhì mihì wûn, chwok njusu baŋa se ghɨ tì màka a wun wu wùn yâ, kaha mak njusu wunsu shyəma lyê fwu nì wûn hi yê banti a kàkfùtàfù.

Ghɨ banti Jisòs a kàkfùtàfù

(Mâk 15.21-32; Lûk 23.26-43; Jon 19.17-27)

32Te ghɨ ndùku yê hi bante wûn yâ, yen wùt à Sìlên wùlè wu lûm, a toŋte na Samùn, kan na wù beka kâkfùtàfù Jisòs. 33À hì mô te ghɨna yê tana wu lùk afa ghɨ ndùku toŋte na Golgotà a mô na Luk wu Wok yi Tu, 34ghɨ fo mu lûk ha wûn afû, ma ghɨ ti lem shyə lwena atɨ̂n. Wù mom kə yi môm tunhi na yi nyo wi.

35Te bante mihe wûn lem njusu wunsu hì tuma byè atɨ̂n jyâtè, 36ghɨna ni mihì ndokò afû hì chìn à wûn. 37Ghɨ tî nyak kəbi gha ye ghɨ tì jìsa na wù ti bobhî a bàŋ a fùkàk banti a wun a tô kàkfùtàfù. Ghɨ ti nyak na, “WÙNA NI, MÒ JISÒS FƏ̀N À GHƗT A JÛS.”

38Ghɨ tî banti kəbi ghɨt a chwoŋana ale à bà a Jisòs a ngwùŋ, banti wù mòk a kàkfùtàfù a bàh a kpen wu wo ta, banti wùlè a tô ghɨ le a kpen wu wo kôwì.

39Ghɨta hì chyàlâ a wu lum, shiktè wu tû sûlè wûn 40jîsà na, “Ba wò chehì jîsà na wò làhi shàktè ndâ Fùyèn yì chìk hi kaha bâ a tuk mù tât? Bònhi lê ngɨŋ yâ Chîn! Wò hi mô kə nâ Wâ Fùyèn, wo chwo a tô kàkfùtàfù afa ma ghàh yen.”

41À ndùku mô ni, ngàŋsu ndâ Fùyènsu chiksu nì chichàsu saksu nì chəhsu lak su boŋa nyikhè nâbi wûn, 42jîsà na, “Wù chehì bônhè kə à ghɨ̂t, chin wu mô bu hi bònhè ngɨŋ à wûn. Wù ni mò jyâna wù mò fə̀n à Isalì. Wù chwo lê a tô kàkfùtàfù afân ma ghàh bimi ha wûn. 43Wù mò ni yiktê kə Yènfù wùn, ghàhnà yen nâ Yènfù nè gàmtèlò wun chin agha, beka wù ndùku jîsà na yi mò kə nâ Wâ Fùyèn.”

44Nâbi nì ghɨt a chwoŋa ghe a ghɨ tì bante ghê wûn hì boŋa sûlè wûn.

Jisòs kpû

(Mâk 15.33-41; Lûk 23.44-49; Jon 19.28-30)

45Te chwì bana ta kə ni luktu kaha fîn kə tù jɨ̀m, ne fî kaha ban kə ma bɨna hì bota yê lò. 46À hì mô te bɨŋlu sù tât, Jisòs bwat jis a jyə̂ yì tâ wu yu mefû na, “Èli, Èli, lama sàbatani?” Ma wù jis na, “Yèn famfu, Yèn famfu, njwô ghə te wò màka mu ni agha?”

47Ghɨt ale ghe a ghɨ ndùku mô a fù yu ni jis na, “Wùt wuna toŋa Ìlajà.” 48Kə wu yu wùt lè a ghɨna fùtɨ̂n nyiŋ yen lyi kùncha chwu a mu lùk, ma mu ti tâ fat a jwô fùkàk fo na wù nyu.

49Biyani, ghɨt ale jis ha wun na, “ghàhnà tet ni ma yen na, Ìlajà tê bê bônhè lò wun agha.”

50Jisòs fî jî nâ a jyə̂ yì tâ ki dê yohnà wuna.

51Kə yu mefû, bâh à sùnju ghe ghɨ tì khə̀ta na ghɨ kana ndâ Fùyèn yì chìk atɨ̂n ghɨ bâhà kə fùtɨ̂n fùtɨ̂n, hi yìme a tû hi chwo fwu yi sah, luktu hì nêkà te kputê, 52sî tê ghɨ tì gumà ghɨta atɨ̂n sen. Ghɨt a Fùyènà kaha lôtì a yi kpû dô kə ni, 53Yu we Jisòs tì kaha lôtì a yi kpû, ghɨna lye yi lak yi yuleni a Jèlusalèm yen chwûtì ngɨŋsu ghɨna su ha ghɨta ghɨ dô kə ni.

54To sù sojà ghe ghɨ ndùku chînà Jisòs yen nì sojàsu lesu boŋ yen te luktu nèkà gha kanana ale gânà hì fânà nâ haŋaŋ jis na, “Hamok, wùt wuna chehì mô kə nâ Wâ Fùyèn!”

55Gha mɨ ghɨ̂n ndùku gânà ni, ywen ale ke dô kə ni mô kə a ghaf, mô ya ma ghɨna lo a Galìlî ghê Jisòs hì gbê gâmtè bê nì wûn. 56À ndùku mô atɨ̂n à ywen afû, a mô Mèli wù Màtalà nì Mèli nè Jêms nì Josèf nì wùt ywên we wù tì bwə wana Sebedì.

Ghɨ gumà Jisòs

(Mâk 15.42-47; Lûk 23.50-56; Jon 19.38-42)

57Te yu kolô tì kpene wùt wù kâ wùlè yi tèk Àlìmàtiyà fwu bên, yet yi wuni mô Josèf a mô kəbi jùmtìbàm à Jisòs, 58yen jis ha Balèt na yi khɨŋa hi lyè gun yi Jisòs hi gùmà. Balèt jis na ghɨ fo ha wûn. 59Ghɨ fo gun yi Jisòs wù fyi lim nì mbalaŋa, 60yen gumà a yi sì afa wù tì chwùfa yi wo lem na ghɨ bê guma yi atɨ̂n. Te wù gùma ni, bɨŋhi yi ti chiki baŋ yi jwô tɨni atɨ̂n ki lô. 61A mô ni ma Mèli wù Màtalà nì Mèli wùlè ti ndokò hì ke dâŋhè yê ni sî tɨni.

Ghɨ lem ghɨta na ghɨ hi chînà sî Jisòs

62Ghɨ gûmà Jisòs wu tuk afa ghɨ ndùku yusa bakte hi yə wu tuk wu laku atɨ̂n. Tuku yû wu tuk wu laku, ngàŋsu ndâ Fùyènsu chiksu nì ghɨt a Falàsî yen ha Balèt 63jis ha wun na, “Ghàh ti yɨ̂ŋtì a bâ, na à ndùku mô te wùt yi fəm wunâ baha mô wu tâ, jis na, ‘Mu bè kpô ma mu kaha lòti yi bàm yi tuk mù tât.’ 64Chin ni, tum ghɨta ma yê hì chînà sî wuni a tuk mù tât à hì bu yâ ma jùmtìbàmsù wunsu nê yê chwoŋ gun yi wuni ma ghɨna hi gbê wama fəmi ha ghɨta na Yènfù ti lôhì wûn a yi kpû. Ghɨna ki fê wama nki fəm yîn ghɨta bimî ma gha tɨni nê hi bəma chyâ yi shyə.”

65Balèt jis ha ghɨna na, “Ghàn lyi sojàsu ma ghàn yê lem afû, ma ghɨna hi fate chînà sî tɨni.”

66Ghɨna yen lem a lâŋ yi ti yi jwô yi sì afâ, lem sojàsu na su hi chînà sî tɨni.

Currently Selected:

Matiyò 27: bmv

Highlight

Copy