Matiyò 26

Ghɨ lem hi ywe Jisòs

(Mâk 14.1-2; Lûk 22.1-2; Jon 11.45-53)

1À ndùku mô te Jisòs yike mihe gha ghɨ̂n, wù jis ha jùmtìbàmsu wunsu na, 2“Ghàn khə na à faŋ kə tuk mù bà chin shyəma ghɨ yimi hi tè yə yi yə Daŋa chyalani. Ghɨ kəta hi kwo fo Wâ Wùt na ghɨ banti a kàkfùtàfù.”

3À ndùku mô ni, ngàŋsù ndâ Fùyènsu chiksu nì chəhsu lak su yûŋtì a ngàŋ à ndâ Fùyèn yì ngaŋtena ndâ, ghɨ toŋte na Kàyafàs, 4hi khɨŋa lum we ghɨ mô hi nyama kwo Jisòs atɨ̂n hi ywî. 5Ghɨna bakti mihì, kaha jis ha ngɨŋsu ghɨna su na, “Kə ghàhnà nè kwo wûn a mu tuk mù Dàŋa chyala muna, beka ghɨta làhi yen hi bèn nì ngə̂k.”

Wùt ywên wùlè yuhi Jisòs a Betanì

(Mâk 14.3-9; Jon 12.1-8)

6Te Jisòs yèna a Betanì, hì mô a wùt a ndâ, ghɨ toŋte na Samùn ma wù tì yaf nì kùhà, 7wùt ywên wùlè ben nì shàŋfù lefu, ma ghɨ tì fati nì ti yile ghɨ toŋte na àlàbastà, yuhì yì lɨ̀mtena mô atɨ̂n ta wu kâ nâ jùŋ suhlì a Jisòs a tû wu mô wu lùk wu yənu. 8Te jùmtìbàmsu Jisòs su yena ni, gha tɨni hì yafa ghɨna, ghɨna buf nâ, “Wù bobhe yàni yûhì yina ni agha? 9Ghɨ làhi bəkle yûhì yinâ wu kâ donu hi fo ka tɨnu ha ghɨt a fufana.”

10Jisòs khɨli gha ye ghɨna kwàktè ki jîs ha ghɨna na, “Ghàn fo ngə̂k à ghə ha wùt ywên wunâ? Wù ti ni gha ha mu yi jwôfà kə ni. 11Ghɨt a fufana mò ghàn à ghɨna kə yu mù jɨ̀m, biyani mu nè faŋa wi nì ghàn. 12Wù ye suh yûhì yinâ a mu wùn ni hi fate wunu mu na wu kpen shyəma ghɨ guma. 13Mu jìsà ha ghàn hamok na ghɨ bè hì fôktè nâbi afa tum yì jùŋ a mbyî, ghɨ boŋ fôktì gha yina wùt ywên wuna ne ni shyəma ghɨta hi kwàktè wûn.”

Judàs bimi hi bəkle Jisòs

(Mâk 14.10-11; Lûk 22.3-6)

14Wùt lè wù mòk atɨ̂n à jùmtìbàmsù Jisòs su njwòsù bà, ghɨ toŋte na Judàs Ìskaliyòt lo yen yen ngàŋsu ndâ Fùyènsu chiksu 15buf ha ghɨna nâ, “Ghàn mò hi fo ghə ha mu a wu yu afa mu gàmte na ghàn kwo Jisòs?” Ghɨna taŋ fo ka silfà ha wûn mtât. 16Kə wu yu Judàs yîmì hi tè khɨŋa wu lum hi bəkle Jisòs.

Jisòs yə mwə̀ mù yə̂mù Dàŋa chyalamù ghê jùmtìbàmsu wunsu

(Mâk 14.12-21; Lûk 22.7-13, 21-23; Jon 13.21-30)

17À ndùku baha mô wu tuk wu shyə a mu tuk afa ghɨ yə̂ bana chɨmlana bu atɨ̂n jùmtìbàmsu wunsu ben buf ha wun nâ, “Wò khɨŋa na ghàh yê fati afa mwə̀ yə̂mù Dàŋa chyalamù ha wò?”

18Wù fîsì ha ghɨna na, “Ghàn lye yen atɨ̂n à yi tèk afân ma ghàn yen wùt lè afû, ma ghàn jis ha wun na, ‘Chichà jis na yu wunu kponu ti kpên ghê jùmtìbàmsu wunsu kəta hi yə yi yə Daŋa chyalani a wo ndâ.’”

19Ghɨna yen ni kə te wù jìsa, lyi yên atɨ̂n à yi tèk fati mwə̀ yə̂mù Dàŋa chyalamù afû.

20À hì mô yu kolô, Jisòs ghê jùmtìbàmsù njwòsù bà ndokò hì yə̂. 21Wù jis ha ghɨna na, “Mu jìsà ha ghàn hamok na wùt wù mòk làwû a ghàn a fùtɨ̂n, mô hi bəkle mu.”

22Gha tɨni fo ngə̂k ha jùmtìbàmsù wunsu nâ haŋaŋ ghɨna hì bufa ha wûn wù mòk wù mòk na, “bâ, à mò mu ma?”

23Wù jis na, “À mò kə nâ wùt ghàh à wûn ti yə a kaŋ à mòk wu mô hi bəkle mu. 24Wâ Wùt nê lô kə te ghɨ mô ma ghɨ ti nyak lem a ŋwàklù Fùyèn. Biyani, ngə̂k yì chìk mò ha wùt we wù bəkle wûn! Ghàn hi khə na yi ndùku bɨlà jwôfàlò na kə ghɨ bwɨ wûn hakoh.”

25Nâbi Judàs we wù ndùku mô hi bəkle wûn boŋ buf ha wun na, “Chichà, a mò mu ma?”

Wù jis na, “Yi mò kə yâ te wò jìsa.”

Jisòs yə gokhì ghê jùmtìbàmsu wunsu

(Mâk 14.22-26; Lûk 22.14-20; 1Kò 11.23-25)

26Te ghɨna ndùku yə, Jisòs lyi a bân fo àyòŋnà ha Yènfù bəktilò fo ha jùmtìbàmsù wunsu jis na, “Ghàn ko yə. Wùna mò wun wu mu.”

27Wù fî lyi bòm à mu lùk fo àyòŋnà ha Yènfù fo ha ghɨna jis na, “Ghàn nyu nâ ghàn à jɨ̀m. 28À mò mu luŋ mâmù me mu baŋa kàn mù Fùyèn te mu sùha hi lèhèfo besu ghɨta dona su atɨ̂n. 29Mu jìsà ha ghàn na mu bè fè nyo wi lùk munâ hi bè tàn wu tuk afa mu bè kaha nyo wu fê a Bom a fə̀n wù Fùyènù.”

30Te ghɨna yə mihe, yem njàŋ fwu kwok a tô kùn à sù Olìf.

Jisòs fôktì na Bità nè manelò yi

(Mâk 14.27-31; Lûk 22.31-34; Jon 13.36-38)

31Jisòs ki jîs na, “À nê hì mô ntuksu kə nâ lân ma ghàn nâ à jɨ̀m nê tet à de mu kəbi yi ghəl te ghɨ mô ma ghɨ ti nyak a Ŋwàklù Fùyèn na, ‘Mu nè ywe lò chìn à sù bwû ma su jyahi.’ 32Biyani ma à nê hi mô te lohe mu a yi kpû ma mu yen a ghàn ashyə̂ a Galìlî.”

33Bità jis na, “Ghɨ mô nâbi hi tet à dè wò à jɨ̀m, ma mu nê tê mòm.”

34Jisòs jis ha Bità na, “Mu jìsà ha wò hamok na lɨm à ngwû nè shihi toŋ ntuksu lân ma wò ti mana mu a ghan à tât.”

35Bità fî jis na, “Mu mò kəbi hi kpû ghàh à wò, mu wi hi nè mana wò.”

Jùmtìbàmsù jɨ̀m boŋ jis yen kə yâ.

Jisòs jə̂m a kùn à Gètsemanì

(Mâk 14.32-42; Lûk 22.39-46)

36Jisòs ghê jùmtìbàmsù wunsu yen tan wu lùk wule ghɨ toŋte na Gètsemanì, jis ha ghɨna na, “Ghàn ndòko afân, ma mu yen a fokô hi jə̀m.” 37Te wù jìsa ni, shihi lò, lyi Bità nì wana Sebedì à bà hì yênà, gha yimì hì fo ngə̂k a wun yi təm nâ haŋaŋ. 38Wù ki jîs ha ghɨna na, “Gha ale fumhe mu a mu yi təm nâ haŋaŋ, ma yi làhi ywe mu. Ghàn ndòko kə afân, ma ghàn hi boŋa yutê ma mu ben.”

39Wù jis ni, khɨŋti yen ashyə̂ kə fù jiti ni, tum kuhi kə̂k yi wuni a chyə̂ hì jə̂mà, jîsà na, “bâ mù, lumu hì mô wo fyi bòm à ngə̂k yinâ a mu wô. Biyani nì gha ye yi kpene ha wò kə wò ni yami.”

40Te wù jə̀ma mihe kaha yen yen jùmtìbàmsù wun se sù tât su bwunê. Wù buf ha Bità na, “Ba yi mô na ghàn wi hi motè a nyə̂ hi tè gbûtè afû yulâ ni ma? 41Ghàn hi gbûtè, jə̂mà kə mômhìnì nê ben ha ghàn. Mu khə na a mò ha ghàn yi təm gha tɨni làwû, jyaka bu.”

42Wù fî kaha yen hì jə̂mà jîsà na, “Bôm, wò hi bu hi fye bòm à ngə̂k yina ha mu ma ya jyana mu kəta kə hi nyû, wò nì yi gan kə te wò khɨŋa.” 43Wù jəm ni, shihi fè kaha bèn fî yen ghɨna bwune kə yi bwunî beka bwunisu ndùku laha mô a ghɨna sê.

44Wù fî kaha lô yen hì jə̂mà na hi mô a ghan à tât jîsà kə gha ghe wù ndùku jîsà ashyə̂. 45Wù jə̀m mihì kaha yen buf ha ghɨna na, “Ba yi mô na ghàn baha yê bwune kə yi bwunî, yùtè? Ghàn hi khə na yu ti kpên shyəma bəkli Wâ Wùt ha ghɨt a be wô. 46Ghàn lòti ma lo. Ghàn yen. Wùna bè wùt we wù bəkle mu.”

Ghɨ kwo Jisòs

(Mâk 14.43-50; Lûk 22.47-53; Jon 18.3-12)

47Te Jisòs ndùku baha jîsà, Judàs we wù ndùku mô kəbi wùt wù mòk atɨ̂n à jùmtìbàmsù wunsu njwòsù bà yâ, kwok ben nì nôn à ghɨta ghɨ dô kə ni, ghɨna kəta fâtù nì mbàŋsù. A mò yâ, ma à tum ngàŋsu ndâ Fùyènsu nì chəhsu lak su, 48Ghɨna bê nì wùt we wù tì bəkle wûn mò ma wù ti fo chwena ha nôn àtɨna jis na, “Nâbi nde we mu nè baŋle, ghàn kwo kə yi kwô.”

49Judàs ben ni, nan yen kə ha Jisòs jis na, “Chichà mu wu toŋte baŋli wûn!” Kə wu yu ghɨ kwo wûn.

50Jisòs ki jîs ha wun na, “Nì kə gha ye a wò bè hi nì a bə.” Kə wu yu, ghɨta ben kwo wûn. 51Jùmtìbàm à Jisòs wùlè chwok yi fâ yi wuni baŋ fihi tûŋla wùt fètana ngàŋ à ndâ Fùyèn yì ngaŋtena. 52Jisòs jis ha wun na, “Kaha lihi fâ ya a mba. À kakli nâbi nde ghɨta ma wù bê kpu ma ghɨ kaklilô wûn. 53Ba ghàn khə na, à yê hì mô yi nô, mu làhi chyate Bôm ma wù chinhi anjèlsù wunsu a su kam a su kam na su no ha mu. 54Biyani mu ni kə ni, ma gha ye ghɨ nyàka a ŋwàklù Fùyèn te yi kəta hi gàn ma yi tê kpên.”

55Jisòs kaha buf ha nôn à ghɨt ghe na, “Ghàn fwu ben nì fâtù nì bàŋsù ni te ghàn nyiŋa a wùt wu chwoŋana yi bàm kə nâ hi kwo a mu? Ba ghàhnà chehì yusa kə ndâ Fùyèn yì chìk, yike a ghɨt afû, ghàn kwo wi mu? 56Biyani, gha ghɨ̂n kətalò hi gàn hi lunhe tum à Fùyèn ye fòktìsu chiksu tì nyàka.”

À hì mô wu yu mefû, jùmtìbàmsù wunsu tet de wun nâ sù jɨ̀m.

Jisòs timî ashyə̂ yi sak

(Mâk 14.53-65; Lûk 22.54-55, 63-71; Jon 18.13-14, 19-24)

57Ghɨt ghe ghɨ tì kwo Jisòs lyi yen nì wûn a Kàyafàs a bɨn, ngàŋ à ndâ Fùyèn yì ngaŋtena ashyə̂ nì chichàsu saksu nì chəhsu lak su yûŋtè afû. 58Ghɨna shihi yèn, Bità hì jùmtè yênà nâ ha ghaf, yen lye ngàŋ à ndâ Fùyèn yì ngaŋtena a bɨn hì mô nì ghɨt a chinana ghe ghɨ ndùku fêtà a bɨn afû, hi yena gha ye yi nè gânà nì Jisòs a gòkhi. 59Ngàŋsu ndâ Fùyènsu chiksu nì nôn wu ghɨt a sakana à jɨ̀m hì khɨŋa à ghɨ̂t na ghɨna bê wam fəmi a Jisòs a tû ma ta hi ywe wûn, 60biyani tê yena jə̀ nâ yi gha yi mòk. Ghɨta fwu nâ hidù hi wama tu fə̂m, tu kwônà wi. Ghɨt ale ghaŋ a ghâ, fwu ben à bà 61ki jîs na, “Wùt wunâ tì jis na, yi làhi shyàktè ndâ Fùyèn yì chìk hi kaha bâ kə mu tuk mù tât.”

62Ngàŋ à ndâ Fùyèn yì ngaŋtena lôtì jis ha Jisòs na, “Wò jìsà wi agha? Wò kəta wi gha yile hi jìs kum gha ghɨ̂n ghɨ ngane wò atɨ̂n agha?” 63Biyani, Jisòs china kə moŋ. Ngàŋ à ndâ Fùyèn yì ngaŋtena mi yê ki jîs ha wun na, “Mu jìsà ha wò, jìs kə hamok a Yènfù yi yet fe fu chyə. Fokti ha ghàh na wò mò kə nâ we ghɨ chwoka lema Wâ Fùyèn agha?”

64Jisòs bimî jis na, “Yi mò kə ya te wò jìsa,” ki fê jìs na, “Mu jìsà ha ghàn à jɨ̀m na, hi yìmì chîn ghàn bè yenalò Wâ Wùt te wu ndòko a Bè wun a kpen wu wò ta Bè jyak wù jɨ̀m ma wù bê hi chwo bênà a nyə̂ atɨ̂n à sù mbàk.”

65Ngàŋ yì ngaŋtena yê kaha kwo bàh njusu wunsu kə wuna ngɨŋ jis na, “Wù sùlè Fùyèn! Ghàhnà fè khɨŋa bɨn à sak ha ghə? Ba ghàn ti yû te wù jìsa gha be kum Yènfù? 66Ghàn kòŋà na ghɨ gbi yàni ni wûn agha?”#26.66 À ndùku mô a mu tuk afû, gha laha yaf wùt wu kwo bah njusu wunsu hi chwùtì na wù ti laha bàŋhi lâ.

Ghɨna fîsì kə à jɨ̀m na, “Wù kəta hi kpû.”

67Te ghɨna jìsa ni, hì chwule chwâmù a Jisòs yi kə̀k, sama wûn, ghɨt ale kûnlè wûn, 68jîsà na, “Fokti lê ha ghàh a Klistù na wò sam nde agha?”

Bità mana Jisòs

(Mâk 14.66-72; Lûk 22.56-62; Jon 18.15-18, 25-27)

69Bità hì baha mô kə wu wən te wù ye be ndokne, wan wù ywên wùlè a we wù ndùku fêtà a bɨn afû ben jis ha wun na, “Wò chehì boŋa gbêlò a Jisòs yi bàm, wùt Galìlî wunâ.”

70Biyani, wù tunhi kə ghɨna ashyə̂ à jɨ̀m jis na, “Mu ywo khɨle wi gha ye wò jìsà.” 71Bità jis ni, lo fwu yen wu lum a jwô bɨn afû. Wan wù ywên we fî yen wûn jis kə ha ghɨt ghe ghɨ ndùku mô afû na, “Wùt wuna ndùku gbêlò ghê Jisòs wùt à Nasalì wunâ.”

72Bità fî kân, tunhilò jis na, “Mu jìsà hamok na mu khə wi wùt àtɨ̂n!”

73Ghɨ fî motì kə ni, ghɨt ale ghe ghɨ ndùku mô afû yen jis ha Bità na, “Yi mô kə nâ hamok na wò mò wùt wù mòk a Jisòs a nòn beka wò lofa jîsà kəta wut à Galìlî.” 74Bità jis na, “Fùshâŋ mu hì wama yi wâm, ma Yènfù chəbhi mu. Mu khə wi wùt àtɨ̂n!”

Te wù jìsa kə ni lɨm à ngwû toŋ. 75Wù kaha kwâktì te Jisòs tì jìsa ha wun na, “Lɨm à ngwû nè shihi toŋ lân ma wò ti tunhi mu a ghan à tât.” Kə wu yu Bità fwu yen a bɨn jî nâ haŋaŋ.

Currently Selected:

Matiyò 26: bmv

Highlight

Copy