Matiyò 25

Jisòs yiki na ghɨ kəta hi tè mò yu mù jɨ̀m yute kə yi

1Jisòs tî fî ma ngàn yìlè jis na, “Bên yì Wâ Wùtì bè hì mô, kəbi te fù màgân kum ngònsu lesu ìwûm. A su tì yênà hi yute wùt te wù ndùku bê hi malâ te wù bênà a yi gbì ghɨna shihi yèn, ghɨna lyi lâmsù ghɨna su kə ghɨna à jɨ̀m. 2A mô ni, ghɨ le à tân tofâ, ghɨ le à tân jɨ̂ŋtè. 3Ghɨ jɨŋte ghê lyi lâmsù ghɨna su tê lyè jə̀ mòlû mù lâm hidù. 4Biyani, ghɨ tofa ghê lyi sòksù lem kpenhi mòlû mù lâm atɨ̂n.” 5Wùt àtɨ̂n lala chyâhì, hì bênà ma ghɨna à jɨ̀m ti njɨ̂ŋnà bwunilò. 6Wù shihi bèn yâ ma à hì mô nâ ntênàsê, ghɨ hi toŋa jîsà na, ‘Wùt lɨmà we wù bê hi malâ yâ, wu bènà, ghàn bê yen wûn!’ 7Ngòn sê lôtì kə sù jɨ̀m, kokhî lâmsù ghɨna su. 8Ghɨ jɨŋte ghê jis ha ghɨ tofa ghe na, ‘Ghàn fo ghàh nì mòlû mù lâm, lâm sahisu hì lɨma yênà lò.’ 9Ghɨna tunhî jis na, ‘Mòlû mù lâm mù tɨ̂n wi hi kpen ha ghàhnà à jɨ̀m, ghàn làhi yèn a wu lùk wu bəklenu ma ghàn yun mânù afû.’ 10Te ghɨna tì yê, wùt lɨmà we bên, ghe ghɨ ndùku mô ma ghɨ tì fati wunu jûmtì yen lye ndâ malâ afâ, ghɨ sen fa jwo nda.

11“Ngònsu le se su tì yèna hi yun a mòlû mù lâm yâ, kaha ben hì toŋa jîsà na, ‘Bâba, Bâba, jimi jwo nda ha ghàh.’ 12Lɨm à wùt ywên we fîsì kə na, ‘Mu jîsà ha ghàn hamok na, mu khə wi ghàn.’”

13Jisòs ki jîs na, “Kum ni ghàn hi chyə yutê, beka ghàn khə wi tuku makə yu we Wâ Wùt bè kaha bênà atɨ̂n.”

Jisòs ma ngàn kum bì yì fèt nì ghɨt a wuna ghɨ fetana

(Lûk 19.11-27)

14Jisòs tî fî jis ha ghɨna jyâna, “Fə̂n wù Fùyènù bè hì mô kəbi te fù màgân fu wùt lè fu wù tì yê yi gbî toŋti ghɨt a wuna ghɨ fetana fo mwə̀lû ha ghɨna na ghɨna faŋ à hi kinê. 15Wù fo bàlìsù kasu sù tân ha wùlè, fo bàlìsù kasu sù bà ha wùlè, fo yì mòk ha wùlè, fo kə yi ghəl nâbi ha nde a wù yena na wù làhi tòknà nì wunu, fo ni yen yi gbî wuni. 16Kə wu yu, wùt fètana we ghɨ tì fo bàlìsu tân yen wu lùk wu bəklenu, kwoti mbì kəbi bàlìsù kasu sù tân. 17We ghɨ ti fo bàlìsù kasu sù bà ha wûn yâ, boŋ fêt kwoti kəbi mbì bàlìsù kasu sù bà. 18Biyani, we ghɨ tì fo bàlì wù kâ yì mòk ha wûn yâ chɨm yi be let bàlì wù kâ ye bì yi fèt tì fo ha wûn.”

19Bì yi fèt chyə nâ wu yu dâ kaha benlò, toŋa ghɨna hi yû na ghɨna tì faŋ fet yàni nì ka we agha. 20Wùt à bàlìsù kasu sù tân we shihi bèn lyi bakhi nì bàlìsù kasu sù tân se wù tì kwote ha mbì a tô wù kâ afa ghɨ tì fo ha wûn bèn jis na, ‘Bâba, yen ke! Wò tì fo bàlìsù kasu sù tân ha mu. Mu ti fî kwoti mbì bàlìsù kasu sù tân a tô àtɨ̂n.’ 21Bì yi fèt à wûn we jis ha wun na, ‘Wò ti ni kə nâ a jûŋ. Wò mò kə nâ wùt wù fèt wù jùŋ, fê tôknè. Wò che tôknà nì mwə̀ mù tetamù. Mu nè lêmàlò wò chin ma wò hi tôknè nì mwə̀ mù do mù. Bî, ma ghàn à bì fèt wâ hi dɨ̂ŋhè.’ 22Wùt fètana we ghɨ ti fo bàlìsù kasu sù bà ha wûn yâ, boŋ bên jis na, ‘Bâba, wò tì fo bàlìsù kasu ha mu sù bà. Yen ke, mu ti kwoti kəbi mbì bàlì sù bà.’ 23Bè wûn wù fèt we jis ha wun na, ‘Wò ti nî kə nâ a jûŋ. Wò mò kə nâ wùt wù fètana wù jùŋ, fê tôknè. Wò che tòknà nì mwə̀ mù tetamù. Mu te lêmàlò wò chin a tô mwə̀ mù domù. Bî ma ghàn à bì yì fèt wâ hi dɨ̂ŋhè.’ 24Wùt we wù tì fye bàlì wu kâ yì mòk yâ ben jis na, ‘Bâ, mu khə na wò mò ni bəmâ, ghana teka wò fet, kpê teka wò yomi.’ 25À ni mò gha ye mu chehì fànà wò, lyi bàlì wu kâ yâ yê yen chɨm wu luk let atɨ̂n, à mò ka wa we ni. 26Bè wûn wù fèt we jis ha wun na, ‘Wò mò kə nâ wùt fètana wù be, fê yolê! Wò chehì khə kə nâ na mu ghana teka mu fet, kpê teka mu yomi, 27à che ni ghə na kə wò lem ka mu a ndâ wù kâ, ma mu nê ben hi lyì ma mu lyê bakha nì mbì agha?’ 28Wù jis ni, kaha jis kə ha ghɨt a wuna ghɨ fetana ale ghe na, ‘Ghàn fyi bàlì wu kâ yê ma ghàn fô kpenhi ha wùt we wù kəta bàlìsu ka sê ìwûm yâ. 29Beka à hì kəta nâbi nde ma ghɨ nê fo kpenhi ma wù tokà khɨti, à hì gha nâbi nde ma ghɨ fyi kə nâ fu teta fê wù kəta. 30Ghàn lyi nam a kwôs ghɨ̂n, ma ghàn tum à fihi wûn a bɨn a finana, a wu lùk afa ghɨ luŋle jyê kuta a soŋ.’

Jisòs jis kum tuk wu saku

31À bè hì mô wu tuk afa Wâ Wùt bènà te fə̀n nì anjèlsu Fùyènsu nâ sù jɨ̀m, ma wù ndokò wu kpòk wu tù fə̀n atɨ̂n à ban yi chiki a nyə̂. 32-33Ma ghɨt a lak tu mbyi tu tù jɨ̀m ma ghɨ bê yuŋti a wun ashyə̂ ma wù bê jyahi ghɨna wu nòn wu bwà kəbi te chìn à sù bwû yè jyàhè njyə̀sù nì bwusu doŋsu, ma wù bê lem njyə̀sù a bàh a kpen wu wo ta ma wù lem bwusu doŋsu a bàh a kpen wu wo kôwì. 34Ma fə̀n ki jîs ha ghɨt ghe ghɨ mô a wun a bàh à kpen wu wo ta na, ‘Ghàn ghɨ̂n a Bôm bònhe ghàn ni, ghàn lyê ben a wun a sah yì sâk ma ghàn hi yə jùŋ ye wù tì fate lema ha ghàn shyəma mbyi yimi. 35Beka à ndùku mô te jìŋ yafa mu, ghàn fo a shyə mu yə̂, kuŋ à mòlû hì yima mu, ghàn fo mòlû mu nyû. Mu ndùku mô wùt wù bènana, ghàn lyi mu a ghàn a sù ndâ. 36Mu ndùku mô nì sah yi yumi, ghàn fo njusu na mu tam, mu hì yafâ, ghàn tôknà nì mu, ghɨ fa mu a chyâk, ghàn hì kina mu.’ 37Ma ghɨt mu ghe ki buf na, ‘Bâ, ghàh tì yen afa wò, jìŋ yafa wò ghàh fo shyə na wò yə, yen afa wò kuŋ à mòlû yima wò fo mòlû wò nyû? 38Wò ndùku mô afa wùt wù benana ghàh lyi wò a ghàh a sù ndâ, wò ndùku mò afa nì sah yi yimi, ghàh fo njusu wò tâm? 39Wò ndùku yafa afa makə a ndâ chyâk ghàh ben hì tôknè nì wò?’ 40Ma fə̀n ki jîs na, ‘Mu jìsà ha ghàn hamok na, nâbi ghə a ghàn tì ne ha wù mòk we wù tobte gokhe a mu fùfɨ̂n à mwəlà afân ghàn tì ni ha mu.’

41“Ma fə̀n ki kaha jìs ha ghê ghɨ mô a wun wu kpen wu wo kôwì na, ‘Ghàn lo a mu shyə̂ ghàn ghɨna Yènfù sùle ni. Ghàn ye lye wu wùs we wu bame bu hi bè lɨmâ ma fati ha deblì nì anjèlsu wunsu. 42Mu jìsà ni beka à ndùku mô te jìŋ yafa mu, ghàn tê fo jə̀ shyə na mu yə, kuŋ à mòlû hì yima mu, ghàn tê fo jə̀ mu nì mòlû. 43Mu hì mô wùt wù bènana, ghàn tunhî hi lyè mu a ghàn a sù ndâ. Mu hì mô nì sah yi yimi, ghàn tunhî hi fo njusu na mu tam, hì yafâ, ghàn tunhî hi tòknà ha mu, ghɨ fa mu a chyâk, ghàn tunhî hi bè kina mu.’ 44Ma ghɨt mu ghe boŋà buf na, ‘bâ, ghàh tì yen afa wò, jìŋ yafa wò, kuŋ à mòlû yima wò, wo mô wùt wù bènana, mô nì sah yi yimi, mô a ndâ chyâk, ghàh faŋ hi gàmtè wò?’ 45Ma wù jis na, ‘Mu jìsà ha ghàn hamok na, nâbi ghə ghe ghàn tì tunhi hi nì ha wùt wù mòk we wù tobte gokhe atɨ̂n à wan afân mò ma ghàn ti tunhi hi nì ha mu.’ 46Ma fə̀n jis ni, ma ghɨna lo ye lye atɨ̂n à ngə̂k ye yì bè mê wi, ghɨt a chilichili ghe kəta chyəna ghe ghɨ bè mê wi.”

Currently Selected:

Matiyò 25: bmv

Highlight

Copy