Matiyò 24

Jisòs jis kum gokhini mbyi

(Mâk 13.1-2; Lûk 21.5-6)

1Te Jisòs tì fwo a bɨn a ndâ Fùyènà, jùmtìbàmsu wunsu gbi bakhi yen ha wûn ki jîs ha wun na, wù yen te ghɨ ba bɨn a ndâ Fùyènà atɨ̂n. 2Wù jis ha ghɨna na, “Te ghàn yena bɨn ghɨna ni, mu jìsà ha ghàn hamok na yu bakhe bê lò a ghɨ bè bwûtè ma ti bê hi bu a tô yile.”

(Mâk 13.3-13; Lûk 21.7-19)

3Jisòs yen kwok ndokò a kùn à sù Olìfs, jùmtìbàmsu wunsu yen ndokò a wun a ngwùŋ ki nyamte jìs ha wun na, “Fòkti ha ghàh tuk we gha ghɨ̂n bè gânà. Wò bè shihi kaha bèn ma chwena bê hi mô ghə? Ghɨ bè khɨle nâ ha ghə na gokhi mbyi ti bên?”

4Jisòs jis ha ghɨna na, “Ghàn hi tôknè kə wùt bê jɨŋhi ghàn. 5Ghɨta bè bê lò, dô kə ni, a mu yi yet a bê nâbi nde jîsà na, ‘À mò kə nâ mu Klistù wê!’ Ma ghɨ bê jɨŋhi ghɨt a dona.” 6Ghàn bè ywolò kum nì woŋtu a tu lùk, ma fê yu na woŋtu letu bènàlò. Ghàn yu yâ, kə ghàn fan beka gha ghɨ̂n kətalò hi gàn, biyani a bu gokhini mbyi. 7Lak tu bê hi nô, fə̂ntù nô fə̂n tu letu, kunsu senâ, ma jìŋ kwo lak tu a tu lùk a tu lùk. 8Gha ghɨ̂n bè gânà à jɨ̀m ni, a baha mò kə yìme ngə̂k yì chìk.

9“Ghɨta bè kwo falò ghàn ma fo ngə̂k ha ghàn, ma fê ywiti ghàn. Nâ ghɨt à jɨ̀m bè bânàlò ghàn kə kum mu. 10Ghɨt a dona bè fenalò a ghɨna yi bimî wu tuk mefû ma ghɨna kahà hi bânà wana nè ma bəkli ghɨna, 11ma fòktìsu fəmsu fwu dô kə ni ma su jɨŋhi ghɨt a dona. 12Ma gha be bê dô tan wu lum wule, ma ghɨt a dona bê hi fê kôŋà wi ghɨta. 13Biyani, à wunhi nâbi nde hi bè tàn a gòkhi, ma wù bê bon. 14Ghɨta bè fòktèlò tum yì jùŋ yinâ kum fə̂n wù Fùyènù ha mbyi yì jɨ̀m shyəma ghɨta lak tu khɨli hamok, ma hi mô yi bàm yi tɨ̂n ma gokhi mbyi ben.”

Ngə̂k yì bəmana

(Mâk 13.14-23; Lûk 21.20-24)

15(Wò taŋ wo tôk yuti yinâ.) Ghàn bê ki yen a shyə bəmana ale ghɨ liŋa tu luk, ma ghɨ ti timi a lùk wu yulenu a ndâ Fùyèn yì chìk, (a mô kə gha ye fòktì Danyèl tì jìsa.) 16Nâbi nde a Jùdiyà tet à kwok a sù kùn. 17Yi gân, wùt mô nâbi a tô ndâ kə wù fi chwo hi lyè a shyə a ndâ shyəma wù tet. 18Wùt hì mô kəbi a fùk, kə wù fi kolo a ndâ hi lyè waf a wuna. 19Tuk mù tɨ̂n bè hì bəma kə ni hanɨ̂ŋ ha ywen ghe ghɨ mô mu lâ nì ghe ghɨ nyoŋhe mwəlà! 20Ghàn hi jə̂mà na kə ghàn bê hi mô hi tet ma bɨ̀ŋ ti chwû təmnà makə à bê hi mô wu tuk wu laku, 21beka yu mu we bè kpena, ma ngə̂k yì chìk bê hi mô chyâ, teka wùt timè yen nâ te mbyî tì yìme, bu hi bè fè yên. 22Yi mô na Bâba ti fabtì tuk mù ngə̂k munâ, à hì bu yâ, nâ wùt wù mòk bê tê bòn. Wù fabtì tuk munâ kum ghɨt a wuna ghe wù chwoka lema.

23À bè hì mô a mu tuk afû, wùt jis ha ghàn na, ‘Ghàn yen, Klistù wuna afân!’ Makə wù jis na, ‘Wù mò a fokô!’ Kə ghàn nè bime gha ye wù jìsa, 24beka Klistù su fəmsu nì fòktìsu fəmsu bè fwo mu tuk afû ma ghɨna chwuti chwènu bəmanu, ma fê mom gha kanana kə hi mômhì hi yen na ghɨna làhi jɨ̀ŋhì nâbi ghɨt ghe Yènfù chwoka lema. 25Ghàn tokâ yuti! Mu ti nyâŋhì fôktì gha ghɨ̂n ha ghàn ghɨ baha mô hi gàn.

26À ki bê jìs kəbi nde ha ghàn na, ‘Wù mò yi lak yi sùsi,’ kə wùt nè fwo yênà afû. Wùt ki jîs na, ‘Wù wunâ atɨ̂n à ndâ afân,’ kə ghàn bimi, 27beka bên yì Wâ Wùtì bè hì mô kə a ndan ni te wuli mwanani, yi shihi mwàn yi ban kə luk tù jɨ̀m.

28Wâ Wùt bè shihi bèn, ma nâbi nde hi khə, yi bè hi mô kəbi yi ghəl te shyə kpona yè mô wu lùk ngùluŋu khɨlî, wu yen yûŋtì afû kə wù jɨ̀m.

Jisòs jis kum nì chwesu Wâ Wùt su benasu

(Mâk 13.24-27; Lûk 21.25-28)

29Ngə̂k yì chìk yinâ bè gânà mihè kə ni ma yuchwî bê kaha fin, ma njoŋ hi fê bana wi, ma njènû chəmli a nyə̂, ma mwə̀ me mù mô a nyə̂, nâ mù jɨ̀m ma mù nek. 30Yi bàm yi tɨ̂n, ma chwena ben na Wâ Wùt ti fwu a nyə̂, ma ghɨta a lak tu mbyi tu nâ tù jɨ̀m bê hi luŋle jyê te ghɨna yena Wâ Wùt wu chwo bê atɨ̂n à sù bàk, kəta a jyak nì ban yi chiki. 31Ghɨ bè toŋ soŋi nâ haŋaŋ, ma wù tum anjèlsu wunsu a bûlà tu mbyi tu tù jɨ̀m na su gbê yuŋti ghɨt ghe Yènfù mò ma fu ti chwok lêm.

(Mâk 13.28-31; Lûk 21.29-33)

32Ghàn yiki ha kâk fu fikfù. Ghàn yen nâbi wùni yu fu to bê, ghàn hi khə na bɨ̀ŋ hì chwô bê lò. 33Yi mô kəbi yi ghəl te ghàn bè yena gha ghɨ̂n à jɨ̀m te gânà. Ghàn hi khə na yu Wâ Wùt wu benanu ti bakhâ. 34Mu jìsà ha ghàn hamok na, ghɨt a mbyi ghɨ̂n chîn bè kpute mihè wi teka gha ghɨ̂n gan nâ à jɨ̀m. 35Nyə nì chyə bè chyà mêlò, biyani ma gha ale bê tê kwunâ atɨ̂n à gha afân a mu jìsa ni.

Wùt khə wi tuk we Wâ Wùt bè bênà

(Mâk 13.32-37; Lûk 17.26-30, 34-36)

36“Nâ wùt wù mòk khə wi tuku nì yu we gha ghɨ̂n bè gânà atɨ̂n. Nâbi anjèlsu Fùyènsu a nyə̂ nì Wan khə wi, a bu kə Bì. 37Wâ Wùt bè shihi bèn, ma gha bê hi mô kə te ghɨ ndùku mô a Nuwà mu tuk. 38À ndùku mô a mu tuk afû shyəma kwuŋa ben, ghɨta yə̂, nyô, gbê a ywên, bime a lɨmà, fo mwəlà ha lɨma, hi kwok a tàn wu tuk afa Nuwà tì lye a bâŋ. 39Ghɨna ndùku nê ni, khə wi gha ye yi ndùku mô hi gàn, kwuŋa ben ywiti ghɨna kə à jɨ̀m. Gha bè hì mô kə ya wu tuk afa Wâ Wùt bè bênà. 40À bê hi mô wu tuk wu tɨnu ma lɨmànà bê hi fêtà a fùk à bà, ma ghɨ bê lyi wù mòk ma de wù mòk. 41Ywena bè hì gwô a bân yi ti à bà, ma ghɨ bê lyi wù mòk ma de wù mòk. 42Ghàn hi chyə nì fati wùni beka ghàn khə wi tuk we Bâba wânù bè bênà atɨ̂n. 43Ghàn khə na bè ndâ hì khə yu we wùt wù chwoŋa nè bê atɨ̂n ntuksu, ma wù tè bwunî, ma wù hi mô kə nyə̂ chînà na kə wùt chwoŋana nê bè chwoŋ mwə̀lû a wun a ndâ. 44Yi chwûtè na ghàn kəta hi tè mò yu mù jɨ̀m nì fati wùni, beka Wâ Wùt bè kaha bê wu yu afa, ghàn khə wi na wù làhi bèn atɨ̂n.”

Jisòs yiki na jùmtìbàmsu wunsu faŋ à hi nê gha ye wù tì jìsa

(Lûk 12.41-48)

45Jisòs fî buf na, “Wùt wù fètana we wù ywo ha bè à wûn wu fèt fê tofâ mò wùni? À mò we bì yi fèt shihi yèn yi gbî, wù lem wûn te a tû, wù fo a jyak ha wûn shyəma wù nê hi tôknè nì ndâ wûn, fo mwə̀ mù yə̂mù ha ghɨta a yu afa ghɨna khɨŋa. 46Ma wùt wù fètana àtɨ̂n nê hi saŋlê a yu afa bì yi fèt kaha bena, yen wûn wu nê gha ghe wù tì jìsa. 47Mu jìsà ha ghàn hamok na yi ki gân ni, ma bì yi fèt àtɨ̂n lem wûn na wù hi tôknè nì mwə̀ mù wûn nâ mù jɨ̀m. 48Biyani wùt mu wunâ shìki tê mò wùt wù be, kwâktè kə wun a ngɨŋ na bè yi fèt nè chyətelò shyəma wù kahà ben, 49yîmì hì sama ghɨt a fetana ale, yə̂, nyô ghê kwôsù mu lùkù, 50ma bì yi fèt à wûn bê kaha ben tuk lefu wu kwâktè wi na wù làhi kaha bèn atɨ̂n, 51ma wù fo ngə̂k ha wûn nâ haŋaŋ, ma wù lem wûn a nòn a ghɨt a kam kamanena, ma ghɨna hi luŋle jyê kuta a soŋ.”

Currently Selected:

Matiyò 24: bmv

Highlight

Copy