Matiyò 23

Jisòs fî kɨ̂n kum nì chichàsu saksu nì ghɨt a Falàsî

(Mâk 12.38-39; Lûk 11.43, 46; 20.45-46)

1Jisòs fî kahi hì jîsà ha ghɨt a dona ale nì jùmtìbàmsu wunsu, 2jis na, “Chichàsu saksu nì ghɨt a Falàsî mò à ghɨ̂t kəta a jyak hi yike lâŋ wù Musìs. 3Yi chwûtè na ghàn kətalò hi tè nì nâbi ghə ghɨna jìsà na ghàn hi nê. Biyani, kə ghàn bè sine chyəna ghɨna beka ghɨna nè wi gha ghe ghɨna yike.” 4Ghɨna chinte na ghɨta hi nê gha ghɨ ta ghaka ghɨna, jità kə ni hi bèkà, biyani kôŋà wi hi gàmtì nâ kəbi nì wanfu wofu. 5Ghɨna nê nâbi ghə hi chwùtè ngɨŋsu ghɨna su na ghɨta yen ghɨna. Ghɨna lyè bâŋà me ghɨ lêmà ŋwàklù me ghɨ nyaka saktu Fùyèn tu atɨ̂n ghɨ kwut a wu yulu shyə mu ghaka kə ni, ghɨ lyi njiŋ se ghɨ kwuta soŋa sùnju atɨ̂n ghɨ ni mu hi dablè kə ni. 6“Ghɨna yênà wu lùk wu yənu ghɨna hi kôŋà kə hi kwok a ndòkò wu lùk wu ngaŋtenu, fê yênà a ndasu chintesu ghɨ kwok ndokò kə ashyə̂. 7Wùt ha ghɨna hi kôŋà na ghɨ hi toŋte yi na, ‘Chichà,’ fê fwo yê a fàf, wu hi kôŋà na ghɨta hi nyiŋa bê toŋte ha yi. 8Ghàn mò kə wana ne à jɨ̀m, kəta kə chichà wù mòk. Kə ghàn de na ghɨta hi toŋte ghàn na chichà. 9Kə ghàn bè toŋte wùt a chyə̂ afân na, ‘Bâ njwo ghàn kəta kə Bì wù mòk wu mô a nyə̂ 10Ghàn kəta wi hi dè na ghɨta hi toŋte wùt ha ghàn na wùt wù tihena, beka wùt wù tihena mò kə wù mòk, a mô mu Klistù. 11Wùt we wù ngaŋte chyâ nâbi nde a ghàn a fùtɨ̂n kəta hi tê mò wùt wù fètana ha ghàn. 12À kokhi nâbi nde ngɨŋ à wûn, ma Yènfù chwohi wûn a chyə̂; à chwohi nâbi nde ngɨŋ à wûn a chyə̂, ma Yènfù kokhi wùn a nyə̂.’”

Yi kamanì ghɨt a tihena

(Mâk 12.40; Lûk 11.39-42, 44, 52; 20.47)

13-14Jisòs kahi hì jîsà ha chichàsu saksu nì ghɨt a Falàsî na! Ghàn kòŋà wi hi lye lùk wu fə̀n wù Fùyènù, “Ghàn ghɨ̂n ghàn kama nê ni, ngə̂k yì chìk mò ha ghàn. Ghàn fê tâmtè ghɨt ghe ghɨ kôŋà hi lyî.”

15“Ngə̂k yì chìk mò ha ghàn chichàsu làŋsù ghɨt a Falàsî, ghàn ghɨ̂n ghàn kama nê gha ni! Ghàn nè ghɨ gbi lumtu dâtù ghɨ daŋ sù jwô khɨŋa kə hi nì na wùt yu ma wù bimi gha ye ghàn yike. Wù shihi bime mihì, ghàn fî ni wù hì fê chyâ ghàn hi lye wu lùk wu wùsu.”

16“Ngə̂k yì chìk mò ha ghàn ghe ghàn tihe ghɨta ma ghàn ti fêf! Ghàn jìsà na wùt ki chwûnà yi ghâ, kan ndâ Fùyèn yì chìk, faŋ hi nè gha tɨni ma ngə̂k hi bu. Biyani, a fê yiki kəbi ghàn na wùt ki chwûnà yi ghâ kan mwə̀ me mù mò a ndâ Fùyèn ma ghɨ fati nì gûl ma wù hi kəta hi nì gha tɨni.” 17Ngwò wûn wu mô ma wu ti fêf ni! À kokne chyâ mwə̀ muna ghɨ chwe lema atɨ̂n ma, a kokne chyâ ndâ Fùyèn ye yì nè na wu hi mô nì yulînì agha? 18Ghàn yike kəbi na a wu yu afa wùt chwùna hi nè yi ghâ, kan baŋ a fona ma ngə̂k hi bu wu yu afa wù faŋa hi nè yi gha tɨni, biyani ma wù ki chwûnà yi ghâ ki kân nì fo ye yi mô a tô bâŋ, ma wù hi kəta hi nè gha tɨni. 19Ghàn ghɨ̂n ghàn fèfa ni! À chyà yi fo ma à chyà a bâŋ ghe ghɨ nê na fo tɨni hi mô nì yulînì agha? 20Yi chwûtè na à kan nâbi nde a baŋ a fona, ma hi mô na wù kan bakhi nì mwə̀ me mù mò a tô àtɨ̂n. 21Wù ki kân ndâ Fùyèn, ma à hi mô na wù kan bakhi kə nì Yèn fe fu mô atɨ̂n. 22A wu yu afa wù ki kân a nyə̂, ya mò na wù ti kân kpok wu fə̀n wù Fùyènù bakhi kə ni funfu te fu ndokne a tû.

23“Ngə̂k yì chìk mô ha ghàn chichàsu làŋsù nì ghɨt a Falàsî! Ghàn ghɨ̂n ghàn kam kama nê gha ni. Ghàn lyè mwə̀ mù lɨ̀mtemù ghɨ lema atɨn à mwə̀ mù yə̂mù, ghàn jyâtì tu luk ìwûm ghàn fo luk wù mòk ha Yènfù, kə te sak yi Musìs yike, biyani chaha gha ghe ghɨ mô yi sak, à ta chyâ yina meti ni te ghe ghɨ jîsà na, wùt kəta hi tè nè a gha ghɨ mô chilichili ha ghɨta, kwohe yi sen ha ghɨta, fê ywo kə ha Yènfù. Ghàn yê hì mô hi tè nè gha mɨ ghɨ̂n, chaha wi ghɨ le. 24Ghàn ghɨ̂n ghàn tihe ghɨta ma ghàn ti fêf ni! Ghàn yile fihe yukayuka me a ghàn a mlûk, ghàn fî nyu mi nyàm à kwaŋ!”

25“Ngə̂k yì chìk mô ha ghàn chichàsu saksu nì ghɨt a Falàsî. Ghàn ghɨt a kamanena! Ghàn lyè kaŋ wanu nì bomsu, ghɨ su kə jɨmsu tɨnsu, mwə̀ me ghàn lèma atɨ̂n mu mô ma ghàn khɨti fyi ha ghɨta ha jyak nì se fwona, nê kə gha ye yi kpene ha ghàn. 26Ghàn ghɨt a Falàsî ghɨ̂n a ghàn fèfa ni! Ghàn sò ten wanu wu kaŋu nì ten wanu sù bomu ma jɨmsu tɨnsu nê hi boŋa mô nì yulînì.”

27“Ngə̂k yì chìk mô ha ghàn chichàsu saksu nì ghɨt a Falàsî. Ghàn ghɨt a kamanena! Ghàn mò te tu sî te ghɨ fate bwəma, chiklò tu hi fufa jwôfà kə ni, biyani a mô kə wuf wu ghɨta kputena a fùtɨ̂n nì mwə̀ mu tu liŋ. 28Yi mô kəbi yi ghəl te ghàn jwòfà kə njàsu wùnsu, biyani a fùtɨ̂n ma ghàn ti lun kə nì gha kamanena nì gha be ale.”

(Lûk 11.47-51)

29“Ngə̂k yì chìk mò ha ghàn chichàsu làŋsù nì ghɨt a Falàsî. Ghàn ghɨt a kamanena! Ghàn ba tusî ha fòktìsu chiksu labhe fê ba tusî ha ghɨt ghe ghɨ ndùku chyə̂ chilichili, 30jîsà na, ‘À ndùku mô na ghàh hi mô a mu tuk nì be bì ghaha ma ghàh tà tì ywi jə̂ fòktìsu chiksu te ghɨna tì ne.’ 31Yi ni chwùtè na ghàn bimelò be ye hamok te ghàn bime na ghàn mò mwəlà mu ghɨt atɨna ghe ghɨ tì ywite fòktìsu chik sê. 32Ghàn yen lê ashyə̂ nì fêt yì mbyi ye bì ghana tì yìme. 33Ywosu be sîn! Ghàn bè nê nâ yàni na kə Yènfù bê sak ghàn ma fu tum ghàn wu lùk wu wùsu? 34Mu jìsà bê ha ghàn na, mu nè tumalò fòktìsu chiksu nì ghɨt a tofana nì chichàsu saksu, mu khəlò na ghàn nè ywitelò ghɨ le ma ghàn banti ghɨ le, ma sam ghɨ le a ghàn a ndasu chintesu, ma ghàn fê jum ghɨna a tu tèk a tu tèk. 35Mu nè tumalò ghɨna, ma ghàn ni ya shyəma luŋ mu ghɨt a chilichili à jɨ̀m ghe ghɨ ywite yâ a chyə̂ ma mù faŋ a ghàn a tû, kə hi yìmì ha Abèl we ghɨ tì ywe teka wù bobhi gha, hi kwok a tàn a Sàkàliyà a wâ Bàlàkayà we ghàn ti ywe a faklusu baŋ a fona nì luk wu yulenu. 36Mu jìsà ha ghàn hamok na, ngə̂k kum gha be mɨ ghɨ̂n à jɨ̀m yi bènà kə ngwàk yina tû.”

Jisòs chwûtì kôŋ ye wù ndùku kəta ha Jèlusalèm

(Lûk 13.34-35)

37Jisòs fî jis jyana, “Wonê, ghàn ghɨt a Jèlusalèm ghɨ̂n ghe ghàn ywite fòktìsù chiksu ni, tumli ywiti sulesu se ghɨ tuma ha ghàn! Mu ti mômhì kə yu mu yu hi toŋa yùŋtè ghàn ni te nè ngwû nè wu toŋa yùŋtì mwəlà mù wûn a wun a sah à tù ghà biyani ghàn teta kə yi têt! 38Chin ni, Yènfù nè kinelò tèk yani ma yi bef ma yi faŋ yi yîm. 39Mu jìsà ha ghàn na, ghàn bè fê yena wijə mu hi tàn kə na à bè bênà wu tuk we ghàn bè jîsà atɨ̂n na, ‘Yutìnì mò ha we wù bênà a Bâba yet.’”

Currently Selected:

Matiyò 23: bmv

Highlight

Copy