Matiyò 22

Jisòs ma ngàn kum yə malâ

(Lûk 14.15-24)

1Jisòs tî fî ma ngàn yìlè ha ghɨna jis na, 2“Ghɨ làwû hi fəknà fə̂n wù Fùyènù nì màngân fù fə̀n wùlè wù tì fate yə malâ wâ wun wù lɨmà 3tum ghɨt a wuna fetana na yê toŋa ghɨt ghe wù tì làka, biyani ghɨt atɨna tunhi na ghɨ bê wi.” 4Wù fî tum kpenhi ghɨt a wuna ghɨ fètà ale na yê jis ha ghɨt atɨna na, ghɨ ti fati mihì mwə̀ mù yə̂mù, kâtì mbòŋsù nì nàksù, nâbi ghə hì mô kə hi yə̂ na ghɨna ben wu lùk wu yənu. 5Ghɨna yen lâkà wùt tê kà jyə̂ yi gha tɨni, nâbi nde hì fwo yê kə wun wù lùk. Wùt lè shik a fùk, wùlè lô hì fate yê nì gha wuna. 6Ghɨt a fə̀n ghɨ tum ghe yen ha ghɨt ale, ghɨ kwo ghɨna nyâblì nì ghɨna, ywitilò. 7Fə̀n yu gha tɨni, yi yaf wun nâ haŋaŋ, wù tum sojàsu wunsu na su yê ywiti ghɨt atɨna ma fê nyok tèk yi tɨni. 8Wù ki jîs ha ghɨt a wuna fetana na, ‘Ghɨ ti fati mihì mwə̀ mù yə̂mù malâ, biyani ghɨt ghe mu che laka ghɨ kpene wi hi bèn. 9Ghàn fwo yen a tu fàf tu lumtu nâbi nde ghàn yena ghàn toŋalò na ghɨ ben a malâ.’ 10Ghɨt a fetana ghê fwu yen toŋa nâbi nde we ghɨna tì yena, ghɨt a be nì ghɨt a jûŋà ben lun a ndâ à malâ.

11“Te fə̀n bèna hi toŋti ha ghɨta, yen wùt lè wu mô afû teka wù mak njusu malâsù 12wù buf ha wun nâ, ‘Bə wò gbi yàni hi tè mò afân kə ni agha?’ Wùt àtɨ̂n yumi china kə moŋ. 13Fə̀n jis ha ghɨt a wuna fetana na, ‘Ghàn kwut khəni wuni nì fwəni ma ghàn tum à fihi a bɨn a finana, wu lùk afa ghɨ luŋle jyê kuta a soŋ afû.’”

14“Jisòs ki jîs na, à mò ni te Yènfù toŋa ghɨta hidù, biyani chwokti kə se ghɨta ni.”

Ghɨta buf na yi mô a jûŋ hi làk à ŋwàklànà ha fə̀n wù chìk agha

(Mâk 12.13-17; Lûk 20.20-26)

15Ghɨt a Falàsî ghɨ le fwu yen hì khɨŋa wu lum na Jisòs jis à njah, 16ki tuma ghɨt a ghɨna nì ghɨt ale a Helòd a bàh ghɨ le jis na ghɨna yê jis ha Jisòs na, “Chichà, ghàh khə na wò jìsà kə hamok, yike kə gha hamok kum Yènfù, bisà wi na ghɨta kwàktè na ghə agha, beka a mò ha wò, ghɨt à jɨ̀m mò yi ghəl. 17Fokti ha ghàh na à wò yi kwàktì na saki bimelò na ghàh lak ŋwàklànà ha fə̀n à Lûm ma yi bime wi agha?”

18Jisòs khɨli mùnàŋ mù ghɨna ki jîs ha ghɨna na, “Ghàn ghɨ̂n ghàn kama nê gha ni! Ghàn fùklè jwo mi kum ghə? 19Ghàn chwutê ben nì ka kahu we ghàn làk à ŋwàklànà atɨ̂n yâ ha mu,” kə wu yu, ghɨna ben nì ka tɨnu ha wûn. 20Wù buf ha ghɨna na, “À mò lîŋhà nde ghɨ kə̀kà atɨ̂n nì yeti ni agha?”

21Ghɨna fîsì na, “À mò kə̂k yi fə̀n wù chìk a Lûm nì yet yi wuni.”

Jisòs ki jîs ha ghɨna na, “Yi hì mô ni, ghàn hi fo mwə̀ mù fə̀n ha fə̀n, fo mwə̀ mù Fùyèn ha Yènfù.”

22Ghɨna yu te wù fìse ni, jwo yum ghɨna, ghɨna lo de wûn.

Jisòs yiki kum lôtì kpu

(Mâk 12.18-27; Lûk 20.27-40)

23À hì mò kəbi wu tuk afû, ghɨt a Sadùsî ale ben ha Jisòs, à mô ghɨt ghe ghɨ bime wi na wùt làhi lòtì a yi kpû, buf ha wun na, 24“Chichà, ba Musìs tì jis ha ghàhnà na, ‘Wâ nè wùt ki kpû kəta ywi biyani kəta wi wan, ma wâ nè wùt wù kpona hi kəta hi lyè ywê nkwû àtɨ̂n, na ghê wûn bwɨ wan ha wâ nè wûn wù kpona we agha? 25Wana ne ale ndùku mô afan sàmba, wù shyə̂ lyi wùt ywên kpulò kəta wi mwəlà, de wùt ywên àtɨ̂n ha wâ nè wûn. 26Wâ nè wûn fî kpû de wùt ywên àtɨ̂n kə yâ teka wù bwɨ mwəlà, kùmti lyi kpu de kə yâ. À hì lyê nâbi nde kpo kə yâ. Ghɨna be kputi kə ni yen milò. 27Yi bàm atɨ̂n wùt ywên àtɨ̂n boŋ kpû. 28À bè hì mô wu tuk afa ghɨ kaha lòtè a yi kpû, ma wùt ywên àtɨ̂n bê hi mô ywê nde, beka wana nì ghɨna à jɨ̀m tî lyi wûn ha ywi?’”

29Jisòs ki jîs ha ghɨna na, “Ghàn chyàblè jîsà ni beka ghàn khə wi gha ye ŋwàklù Fùyèn jìsà, fè khə wi gha ye Yènfù mò hi nì. 30À bè hì mô te ghɨta lôtè a yi kpû, ma wùt ywên hi lyê wijə wùt lɨmà, wùt lɨmà lyê wijə wùt ywên. Ghɨta bè hì mô kə te anjèlsu Fùyènsu mò a nyə̂. 31Ni kum lôtì kpu, ba yi mô na ghàn tà taŋ yu jə gha ye Yènfù jìsà kum nì lôtì yi kpu ma? Yènfù tì jis na, 32‘Mu mò Yènfù Ablàhâm fù, mô Yènfù Isìk fu, mô Yènfù Jakòb fù. Wù tì jis ni ma ghɨna shyə kputi.’ Yènfù mô Yènfù fu ghɨt a ta bu Yènfù ghɨt a kputena. Yina chwùtè na ghɨt ghɨ̂n baha chyə lò beka Yènfù mò fu ghɨt a tafu.”

33Ghɨt a dona ghê à jɨ̀m tì yu yiki yîn hì mô nì jwo yumani.

Sak ye yi chyâ tu letu nâ tù jɨ̀m

(Mâk 12.28-34; Lûk 10.25-28)

34À ndùku mô te ghɨt a Falàsî ywo na Jisòs ti baŋ jwo ghɨt a Sadùsî, ghɨna yûŋtì bên. 35Wùt wù mòk a ghɨna fùtɨ̂n, a mô chichà yi sâk, mom wûn buf na, 36“Chichà, à mò ghɨ̀ni lâŋà atɨ̂n à làŋ wu Musìs a ghɨ ta chyâ nâ laŋù gha jɨ̀m agha?”

37Jisòs jis na, “À mò ghe ghɨ jîsà na, ‘Wò kəta hi tè kòŋà Bâba Yènfù nì təm gha à jɨ̀m nì yohnà gha à jɨ̀m nì kwâktì ya yì jɨ̀m.’ 38À mò sak yi shyə a fê mô yê yi ta chyâ sak tù jɨ̀m. 39Yi kumteni mô nâbi yâ na, ‘Kòŋ wâ nâ kə yi ghəl te wò kòŋà ngɨŋ yâ.’ 40Sak tu Musìs tù nâ tù jɨ̀m nì gha ghe fòktìsu chiksu tì nyàka mò kə tô tu sak afân tù bà.”

Klistù mô nde

(Mâk 12.35-37; Lûk 20.41-44)

41Te ghɨt a Falàsî tî baha mô kə ghɨna nòn, Jisòs ki buf ha ghɨna na, 42“Ghàn kwàktè na ghə kum Klistù we ghɨ chwoka lema? Ghɨ khə na à mô wâ nde?”

Ghɨna jis na à mò wâ Defìt.

43Jisòs buf ha ghɨna na, “Yi ni mò ni, à tì ni ghə na Defìt nì ngɨŋ à wûn tohna a Yohnà Yulena toŋti wûn na Bâba?” Mu bufa ni beka Defìt tì jìsa na: 44Bâba Yènfù ti jis ha Bâba mù na, ‘Ndòko a mu bàh à kpen wu wo ta hi tàn shyəma mu bê lem bànà sasu a wo dèt yi wù.’

45À hì mô na Defìt ti toŋti wûn na Bâba, wù nê hi fê mô wâ Defìt yàni? 46Wùt lè tà fî gan hi fîsì yi ghâ. Hi yìmì wu tuk wu tɨnu, wùt lè tà fî mom hi buf yi ghâ ha Jisòs.

Currently Selected:

Matiyò 22: bmv

Highlight

Copy