Lûk 23

Ghɨ yên nì Jisòs ha Gòbnà Balèt, wù tum wûn ha fə̀n Helòd

(Mat 27.1-2, 11-14; Mâk 15.1-5; Jon 18.28-38)

1Kə wu yu, yûŋtì tɨni yì jɨ̀m lôtì lyi yen nì Jisòs ha Gòbnà Balèt, 2yîmì hi tè ngane wûn jyana, “Ghàh kwo wùt wunâ wù gbê lehe à ghɨ̂t a ghàhnà yi lak jîsà na, kə ghɨ hi mâkà ŋwàklànà ha fə̀n wù chìk a Lûm, fê mô kə nâ à mò yi we ghɨ chwoka lema na yi mò fə̀n.”

3Ni, Balèt buf ha wun na, “Wò mò fə̀n ha ghɨt a Jûs?”

Jisòs fîsì jyan na, “Yi mô kə te wò jìsa.”

4Balèt ki jîs ha ngàŋsù ndâ Fùyènsu chiksu nì ha nôn à ghɨ̂t ghe ghɨ ndùku mô afû na, “Mu yena wijə gha be yile ye wùt wuna ne.”

5Ghɨna hì kântè a ghâ jîsà na, “Yiki wuni bènà nì nô atɨ̂n à yì lak yi ghɨt a Jûs nâ yì jɨ̀m, hi yìmì a Galìlî hi bè tàn yi tèk afân.”

6Balèt yuti gha mɨ ghɨ̂n buf na, wù mò ni a mô wùt à Galìlî? 7Wù yu na Jisòs fwo a bàh a lak afa Helòd ndùku saka, jis na ghɨ kwok nì wûn ha Helòd beka wù ndùku mô a Jèlusalèm a mu tuk afû. 8Helòd yen yen Jisòs hì saŋlê nâ jûŋ beka wù ndùku mô ma wù ti yu gha ale kum wûn hì chyə kôŋà hi yen a wûn na wù mom gha kanani yile ma yi yen. 9Wù lyi wu yu bufte a gha ha Jisòs wù tê fìsì jə̀ nâ yì mòk. 10Biyani, ngàŋsù ndâ Fùyènsu chiksu nì chichàsu saksu hì mô kə afû, kântè kə a ghâ ngane wûn. 11Helòd ghê sojàsu wunsu nyâblì nì Jisòs nyikhì wûn fî mak dàla yì jùŋ a wun wù wùn kaha tum wûn ha Balèt. 12À mò kə wu tuk afân a Balèt ghê Helòd kaha kwo sunu atɨ̂n beka à ndùku mò ni ghɨna bânnè.

Balèt tê yena jə̀ gha be yile a Jisòs ne

(Mat 27.15-26; Mâk 15.6-15; Jon 18.39–19.16)

13Balèt toŋa ngàŋsu ndâ Fùyènsu chiksu nì ghɨt a tihena ale nì ghɨt ale 14jis ha ghɨna na, “Ghàn ye ben nì wùt wunâ jis ha mu na, wù jɨ̀ŋhè à ghɨ̂t nê na ghɨna hi ta nì to. Biyani ba ghàn ti yen te mu bufte gha ha wûn kə nâ a ghàn ashyə̂ faŋ tè yena jə̀ gha be yile ye ghàn jìsa na wù ti nî. 15Nâbi Helòd tà boŋ yen jə̂ gha beka wù ti kaha tum ben nì wun ha ghàhnà. Yi mô kə hamok na wù tà ni jə gha shyəma ghɨ ywi wûn. 16Mu ti jîsà na, ghɨ sam à kə yi sâm ma ghɨ de wûn.” 17(À ndùku mô yâ, a bê nâbi mùni tuk mù Dàŋa Chyalamù, ghɨt a Jûs chwok wùt à ghɨna wù kòŋ, Balèt fihi a ndâ chyâk.)#23.17 Ŋwàklù su mwu su dosu kəta wi luk wûn.

18Te wù jìsà bê ni, ghɨna bwat kə jyə̂ yì mòk na, “Wù nè yenalò gha! Ghàh khɨŋa na ghɨ bɨlà fihi lô Bàlabàs.” 19Yi mô ni, ma ghɨ tì lihi Bàlabâs wunâ a ndâ chyâk beka wù ti yìme nô yi tèk fî ywi wût.

20Balèt fî jis ha ghɨna beka wù ndùku kôŋà na ghɨ fihi Jisòs. 21Biyani ghɨna hì bwate yè kə ashyə̂, jîsà na, “Ghɨ banti wûn a kàkfùtàfù, ghɨ banti wûn a kàkfùtàfù!”

22Wù fî kûmtì buf, na à hì mô a ghan à tât na, “À mò kum ghə? Ghàn fokti gha be ye wùt wunâ ne. Mu tà yen jə̂ gha be ye ghɨ mô hi ywe wun atɨ̂n. Mu nè jîsà ma ghɨ sam à kə yi sâm wûn ma ghɨ de wûn.”

23Ghɨt ghe fî bwati yen kə ashyə̂ jîsà kə na ghɨ banti wûn a kàkfùtàfù. Yi ghak Balèt, 24-25wù kat sak bimi na ghɨ banti Jisòs ma fihi wùt we ghɨ tì lèma a chyâk te wù fihe nô yi lak ywi wùt yâ, ma wù ya ni kə gha ye ghɨna yê hì khɨŋa.

Ghɨ banti Jisòs a kàkfùtàfù

(Mat 27.32-44; Mâk 15.21-32; Jon 19.17-27)

26Ghɨ lo nì wûn shihi yên kwônà nì Samùn wùlè wu lûm a mô wùt à Sìlên, ma wù lo a sù ngûn hì kaha kolê. Ghɨ khɨti wûn fo kâkfùtàfù Jisòs ha wûn, kan na wù beka ma wù jumti Jisòs.

27Ghɨta fwu nâ hidù hì yênà a wun yi bàm bakhe nì ywena, ghɨ jyê yênà, khɨmte wu wun kum wûn. 28Jisòs ne kaha bɨnhì wu wun jis ha ghɨna na, “Ywena Jèlusalèm, kə ghàn fi ji mu, ghàn hi jyê ha ngɨŋ sanisu nì ha wan ghana.” 29Ghàn hi khə na tuk mù bakhe bênà lò shyəma ghɨta hi jîsà na, ‘Yi bɨlà mô a jûŋ ha kânù ywenu wù mô teka wu timè bwɨ wana, teka ghɨna yê timè nyoŋhi wan!’ 30Ghɨta bè hì jyê a mu tuk afû, jîsà ha kunsu chiksu na, ‘Ghàn fen a ghàh a tû, jîsà ha kunsu tetasu na, ghàn baŋ ghàh.’ 31Ghɨ shìki jîf nì kâk fù yûfù te mu ni, ghɨ bê ni nâ ghə nì fu yima fu?

32À ndùku mô yani, ghɨ yênà hi yè ywe wûn nì ghɨt ale à bà, a mô à ghɨ̂t ghê ghɨ ndùku khɨma saktu. 33À hì mô te ghɨ ye tana wu lùk afa ghɨ ndùku toŋte na Wok yi tu, ghɨ banti wûn a kàkfùtàfù afû fî banti ghɨt ghe ghɨna ndùku khɨma saktu yâ, banti wùlè a kàkfùtàfù a bàh a kpen wu wo ta, banti wùlè a kpen wu wo kôwì. 34Jisòs jis ha Bè wûn na, “Lèhifo ghɨna a bâ, beka ghɨna khə wi gha ye ghɨna nè.”

Ghɨna lem njusu wunsu hi tuma kàŋ, a yə nâbi nde, lyê. 35Gha mɨ ghɨ̂n tì gânà ghɨta mô ke. Nâbi ghɨt ghe ghɨ ndùku tihe ghɨna hì chəktê kə wûn, jîsà na, “Wù chehì bònhè à ghɨ̂t, wù bònhi lê ngɨŋ à wûn chîn, a yu afa wù mò kə nâ Klistù we Yènfù chwoka lema!”

36Sojàsù hì boŋa nyikhè nâbi wûn, lyi mu lûk ma mù ti tâ yen fo ha wûn 37fî jis ha wun na, “Wò hì mô nâ fə̀n à Jûs hamok, wo bônhì ngɨŋ yâ!”

38Ghɨ nyak yi gha a bàŋ à fùkàk banti a wun a tô kàkfùtàfù na, “Wûn mò fə̀n à ghɨt a Jûs.”

39Wùt lè we ghɨ tì bante ghê ghɨna hì sùlè kə Jisòs, jîsà na, “Ba wò mò kə nâ Klistù wê, bonhi lê ngɨŋ yâ ma wò bonhi ghàh!”

40Wùlè we njaŋ ha wâ nì fî buf na, “Ba yi mô na wò fànà nâbi wi Yènfù, ghɨ nè boŋa ywe kəbi wò ni, 41wò kwàktè wijə na ghàhnà nè kpo hamok kum ni gha be ghe ghàhnà ne biyani wùt wuna kpo kə halô.”

42Wù jyan yâ jis ha Jisòs na, “Wò be shihi saka fə̂n wa, kə wò yìta mu.”

43Jisòs jis ha wun na, “Mu jìsà ha wo hamok na, ghàh à wò nè hì mô a Balàdîs lân hamok.”

Jisòs kpû

(Mat 27.45-56; Mâk 15.33-41; Jon 19.28-30)

44-45Chwì bân tâ, hi fê bana wi luku kaha fîn, kə tù jɨ̀m ne fî kaha ban kə a bɨn a bonana a mbɨŋlu sù tât. Bâh à sùnju ghe ghɨ tì chuŋa daŋhe na ghɨ jyati ndâ Fùyèn yì chìk bâhà kə fùtɨ̂n fùtɨ̂n wu yu mefû. 46Jisòs jî a jyə̂ yì tâ jis na, “Bâ, mu fo a yohnà ma a wo wô!” Wù jis ben ni, yohnà gokhì lò.

47To sù sojà ghe yen gha ghe ghɨ tì gàna ni hì kokhe Fùyèn jîsà na, “Hamok, wùt wuna chehì kəta wi njahi!”

48À hì mô te ghɨt ghe ghɨna ye bena hi yena gha ye ghɨ nê, yena gha ghe ghɨ gana, ghɨna kahi hì khɨmte kole yê wunu. 49Gha ghɨ̂n ndùku gânà ni, sunsu wunsu mô nâ ha ghaf, ke kə yi kî, ghɨ le mô a ywên ghe ghɨ tì lo a Galìlî ben a wun a yi bàm.

Ghɨ gûmà Jisòs

(Mat 27.57-61; Mâk 15.42-47; Jon 19.38-42)

50-51Wùt lè ndùku mô kəbi wu tuk afu metì ghɨ toŋte na Josèf, a wùt yi tèk yi Jùdiyà ye ghɨ ndùku toŋte na Àlìmàtiyà, a mò kə nâ wùt wù jùŋ, mò kə nâ chilichili, chyə yute kə yu we lak yi fə̀n à nyə Yènfù bè bênà atɨ̂n. Wù ndùku mô kə nâ wùt atɨ̂n à ghɨt afa ghɨ ndùku saka ghɨt a Jûs, biyani tê bime jə̀ gha ye ghɨ tì fate kum Jisòs fî ni ha wûn. 52Te bante mihe Jisòs wu kpû, Josèf yen jis ha Balèt na, yi khɨŋa hi lyè gun yi wuni hi gùmà. 53Balèt bimî. Wù yen chwohi wûn a kàkfùtàfù lim nì mbalaŋa, yen gûmà yi sì ma ghɨ chuf a yi wo, sì tɨni mô teka ghɨ yê timè guma wùt atɨ̂n. 54Wù tì gùmà Jisòs ni, hì fate wunu na tuku jə ma à hi mô tuk wu laku.

55A mô yani ma ywen ghe ghɨ tì lo a Galìlî ben a Jisòs yi bàm yâ, jûmtì Josèf yen yen yi sî ye wù gùma Jisòs atɨ̂n. 56Ni te ghɨ niŋhe gun yi wuni, ghɨna kaha kolo yen bakti yûhìsu lɨmtesu jûŋ sù na ghɨ yuhi wûn atɨ̂n.

Te tuku ghɨna wu laku bèna, ghɨna yutì kə te saki ndùku jîsà.

Currently Selected:

Lûk 23: bmv

Highlight

Copy