Lûk 22

Ghɨ fati te ghɨ mô hi ywe Jisòs

(Mat 26.1-5; Mâk 14.1-2; Jon 11.45-53)

1À hì mô te tuk mù chìk kpene bênà hi yə bana kwaŋa chɨmlana bu atɨ̂n, ghɨ toŋte na hi Dàŋà Chyà. 2Ngàŋsù ndâ Fùyènsu chiksu nì chichàsu saksu hì khɨŋa wu lum hi ywe Jisòs, nyamte yi nyamtî beka ghɨna ndùku fânà ghɨta.

(Mat 26.14-16; Mâk 14.10-11)

3Satàn lye a Judàs yi təm we ghɨ ndùku toŋte na Ìskaliyòt, a mô kəbi wùt wù mòk atɨ̂n à ghɨ̂t a tuma Jisòs njwòsù bà. 4Wù lo yen yen ngàŋsù ndâ Fùyènsu chiksu nì tu ghɨt ghe ghɨ ndùku chînà ndâ Fùyèn, sîhì lum we wù mò hi bəkle Jisòs ha ghɨna atɨ̂n. 5Ghɨna hì saŋlê lem na ghɨ nè folò ka ha wûn. 6Wù bimî, yîmì hi khɨŋa wu lum hi bəkle wûn ha ghɨna a wu yu afa ghɨta lo a wun à ngwùŋ.

Jisòs yə mwə̀ mù yə̂mù Dàŋa Chyalamù ghê ghɨt a wuna ghɨ tuma

(Mat 26.17-25; Mâk 14.12-21; Jon 13.21-30)

7Tuk we ghɨ ndùku mô hi se njyə̀su Dàŋa Chyala su atɨ̂n à mu tuk afa ghɨ ndùku mô hi yə bana kwaŋa chɨmlana bu atɨ̂n bên, 8Jisòs tum Bità ghê Jon jis na, “Ghàn yê fati mwə̀ mù yə̂mù Dàŋa Chyalamù ma ghàhnà yə.”

9Ghɨna buf ha wun na, “Wò khɨŋa na ghàh yê fati afa mwə̀ mù yə̂mù mù tɨ̂n agha?”

10Wù fîsì ha ghɨna na, “Ghàn yuti, te ghàn nè hì lye yênà atɨ̂n à yi tèk yi tɨni ma wùt nê kwona ghàn à ghɨna ma wù ti bêkà khɨŋi mòli. Ghàn yen wûn, ghàn yen kə wun yi bàm, wù yen lyi kəbi yìni ndâ, ghàn lyi kə atɨ̂n, 11ghàn jis ha bè ndâ àtɨ̂n na, ‘Chichà buf na, Lûm à ndâ ghɨt a benana yê lâ ma mu tahi yə mwə̀ mù yə̂mù Dàŋa Chyalamù atɨ̂n ghàh à jùmtìbàm samsu agha?’ 12Ma wù nê chwuti lûm à ndâ yi ghaka kə ni ha ghàn a nyə̂, nâbi ghə ghɨ mô atɨ̂n ma ghàn fati mwə̀ mù yə̂mù àtɨ̂n afû.”

13Ghɨna yen yen nâbi ghə ghɨ mô kə yi ghəl te Jisòs ye jisa, fati mwə̀ mù yə̂mù Dàŋa Chyalamù afû.

(Mat 26.30; Mâk 14.22-26; 1Kò 11.23-25)

14Yu kpên, Jisòs ben ndokò hi yə̂ ghê ghɨt a wuna ghɨ tuma 15ki jîs ha ghɨna na, “Mu chehì jyê kə nâ yi jî hi yə̂ mwə̀ mù yə̂mù Dàŋa Chyalamù muna nì ghàn shyəma mu yen ngə̂k ma mu kpu. 16Mu jîsà ha ghàn na, mu bè fè yə wi mwə̀ mù yə̂ muna nâ hakoh hi bè tàn a tuk afa gha yi yə yîn bè kwoka kpene a fə̂n wù Fùyènù.”

17Wù lyi bòm fo àyòŋnà ha Yènfù fî jis na, “Ghàn ko lùk muna, ghàn jyàtê nyu. 18Mu jìsà ha ghàn na, hi yìmì chîn hi yèn ashyə̂, mu bè fê nyo wi lùkû hi bê tàn a wu tuk afa fə̂n wù Fùyènù bè bênà.”

19Wù lyi a ban a kwaŋa fo àyòŋnà ha Yènfù fî bəktilò fo ha ghɨna jis na, “Wùna mò wun wu mu te mu fo ha ghàn. Ghàn hi nê yìna ni, hi tè kwàktè mu.” 20Wù fî nì kəbi yâ ni bòm à mù lùk te ghɨ yə mihe fî jis na, “Bòm yinâ mò bòm à mu kàn mu fê te Yènfù baŋa nì luŋ mâmù lunhi na mù sùha ha ghàn.”

21“Mu jìsà ni, wùt we wù nè bəkle mu wù mô kə nâ ghàh à wûn wu lùk wu yənu afân. 22Wâ Wùt nè lô kə te Yènfù tì lèma, biyani yi nè hì bəma nâ haŋaŋ ha wùt we wù bəkle wûn!”

23Ghɨna yìmì hì bufa nâ, yinâ nki gha ni mò hi mòm à nde a ghàhnà fùtɨ̂n agha?

À chyà nde ghɨt ale?

24Gufnânì tì lôtì a ghɨna fùtɨ̂n na, a mò nde we wù ngaŋte chyâ ghɨna à jɨ̀m agha? 25Jisòs ki jîs na, “Fə̂ntù mbyi tu kətalò jyaka, saka yikte kə yi yikî ghɨt a ghɨna, biyani khɨŋa na ghɨ hi toŋte ghɨna na gàmtìsù ghɨ̂tsù.” 26Yi kəta wi hi tè mò yani ha ghàn. Wùt ngaŋtena a ghàn a fùtɨ̂n kəta hi tè mò te wùt we wù tobte gokhe, wùt we wù mò a tû, mò hi tè mò te wùt wù fètana ha ghàn. 27Wùt ngaŋtena mô hi tè mò wun we wù ndòkò yə kə yi yə̂ ma, ma we wù chyàhè kə yi chyâhì agha? Ba à mò we wù ndòkò yə agha? Ha mu, mu mò a ghàn a fùtɨ̂n te wùt wù fètana.

28À mò ghàn ghe ghɨ faŋa kə yi fâŋ a mu atɨ̂n à tu mômhì, 29mu ti fô fə̀nù ha ghàn kəbi te Bôm fo ha mu 30shyəma ghàn bê hi yə̂ fê nyô a mu wu lùk wu yənu wu tuk te mu saka fə̂n wu mu. “Ghàn bè ndokò a mu kpòk mù tù fə̀n njwòsù bà, saka a te Isalì ghɨ̂n njwòsù bà.” 31Jisòs fî toŋti Samùn jis na, “Samùn, Samùn, wò hi khə na Satàn ti chyati mu hi sèkà ghàn te ghɨ sêkà kùŋû 32biyani mu ti jə̂m ha wò na kə bimî ya fen à mihi. Wò kaha bên ha mu, wo ni ma təm a wana na hi tâ.”

33Bità jis ha wun na, “Bâ, mu gbùtè hi yè chyâk ghàh à wò, hi fè kpû ghàh à wò.”

34Wù jis ha wun na, “Mu fòktè ha wò Bità na, Lɨm à ngwû nè shihi tôŋ lân ma wò ti mana mu a ghan à tât.”

35Jisòs fî buf ha ghɨna na, “À mò wùni tuku a mu ndùku tuma ghàn ka bu, bàlì bu, gwusu wùsu bu, ghàn tî gha shyə ale agha?”

Ghɨna fîsì na, “Ghàh tà shyə ale tì gha jə̂.”

36Wù ki jîs ha ghɨna na, “Chîn, à hì kəta nâbi nde ka makə bàlì wu lyi lò. À shìki gha nâbi nde fâ wu bəkli waf a wuna wu yunlò. 37Mu jìsà ha ghàn na, gha ghɨ̂n ghɨ mô ma ghɨ ti nyak a ŋwàklù Fùyèn ghɨ kəta hi gàn ha mu. Ghɨ tì nyak na, ‘Ghɨ ti taŋ wûn te wùt wù mòk atɨ̂n à ghɨ̂t ghe ghɨ khɨma saki.’ Yi mô ni beka nâbi ghə ghɨ tì nyàka kum mu yi kəta hi gàn.”

38Ghɨna jis ha wun na, “Yen ke bâ, afân mô tufâ tù bà.”

Wù jis ha ghɨna na, “Ghàn de yen.”

Jisòs shik hi jə̀m a tô kùn

(Mat 26.36-46; Mâk 14.32-42)

39Jisòs fwu yi tèk afû kwok à kùn à sù Olìfs, kəbi te wù ndùku kwoka, jùmtìbàmsù wunsu kwok a wun yi bàm. 40Ghɨna kwok tan afû, wù jis ha ghɨna na, “Ghàn jəm kə ghàn lye a yi mômhì.”

41Jisòs jis yani lô a ghɨna ngwùŋ khɨŋti yen timi kəbi te wùt mò hi tum a yi ti ma yi yê chem, tum sù ngwuk a chyə̂ hì jə̂mà, jyana, 42“Bâ mù, wò hì kôŋà wo fihi bòm à ngə̂k yinâ a mo wô. Nâ biyani, nì kə gha ye wò khə na yì kpenalò ha wò, kə wò ni yami.” 43(Kə yu tɨnu, anjèl à Fùyèn lo a nyə̂ ben fo a jyak ha wûn. 44Wù kwâktì ngə̂k yì chìk ye wù ndùku mô atɨ̂n, yi bəma chyâhè, wù fî tôk chyati yukhênà fwo a wun wu wùn, kə̂kà te mu luŋ chemle a chyə̂.)

45Wù jəm mihì lôtì shihi kaha yèn, yen jùmtìbàmsù wunsu bwunê te gha tɨni fo chyâhè ngə̂k ha ghɨna, ghɨna bôt. 46Wù jyan ha ghɨna na, “Ba ghàn mò na ghàn bwune kə yi bwunî agha? Ghàn lòti ma ghàn hi jə̂mà kə mômhìnì ben ha ghàn.”

Te ghɨ tì khɨte Jisòs

(Mat 26.47-56; Mâk 14.43-50; Jon 18.3-11)

47Te Jisòs ndùku baha jîsà kə yi jîs, nôn à ghɨ̂tà fwu ben, ashyə̂ mô Judàs, kəbi wùt wù mòk atɨ̂n à jùmtìbàmsù wunsu njwòsù bà. Wù khɨŋti ben hì khɨŋa hi baŋle Jisòs. 48Jisòs buf ha wun na, “Judàs, a wò jyana wò baŋle Wâ Wùt hi fo ha ghɨta agha?”

49À hì mô te ghɨt ghe a ndùku mô ghê ghɨna yena gha ye yi mô hi gàn, ghɨna buf ha wun na, “Bâba, ghàh kakli nì fâtù agha?” 50Kə ni, wùlè fihi yi fâ kak fihi tûŋla wo tâ wùt wù fètana à ngàŋ à ndâ Fùyènà yì ngaŋtena.

51Jisòs kân jis na, “Kə ghàn fî mom; kə wu yu tûŋla tɨna ta kə yi tâ.”

52A mô yâ ma ngàŋsù ndâ Fùyènsu chiksu nì tû ghɨt ghe ghɨ ndùku chînà ndâ Fùyèn yi ghakana nì chəhsu lak su ma ghɨ ye fwu ben hi khɨte wûn. Wù buf ha ghɨna na, “Ghàn fwu ben nì fâtù nì mbàŋsù te ghàn nyiŋa a wùt chwoŋana yi bàm njwô ghə? 53Ba mu chehì yusa kə ghàhnà tuk mù jɨ̀m a ndâ Fùyèn, ghàn khɨte wi mu? Nâ ha nkàn, à kpen kə nâ yu wanu a bè jyaka bɨn a finana saka atɨ̂n.”

Bità mana Jisòs

(Mat 26.57-58, 69-75; Mâk 14.53-54, 66-72; Jon 18.12-18, 25-27)

54Te wù jìsa ni, ghɨ khɨti wun yen nì wun a bɨn a ngàŋ à ndâ Fùyèn yì ngaŋtena, Bità jûmtè yênà mô nâ hadà. 55Ghɨ yen kpa wusu atɨ̂n à bɨn hì yohâ. Bità boŋ yên ndokò chîntì ghê ghɨna. 56Wusu shihi bamî, wan wù ywên wùlè we wù ndùku fêtà a bɨn afû, yen te wù ndòkne a ngwùŋ à yì tê, wù duŋ ki kə wun ni, jis na, “Wùt wunâ ndùku boŋa gbêlò ghê wûn.”

57Bità tunhî jis na, “Wùt ywên, mu khə wijə wûn.”

58Ghɨ motì kə afu yulâ, wùt lɨmà wùlè fî yen wûn jis na, “Wò mò bi a wùt wunâ à nòn.”

Bità bəm wûn jis na, “Yema, bə wunâ nyâ mu!”

59Mbɨŋlu yì mòk shihi chyà, wùt wùlè fî kûmtì jis kə na, “Yi mô kə nâ hamok na bə wunâ chehì gbêlò ghê wùt wunâ beka wù mô kə nâ wùt à Galìlî.”

60Biyani Bità fîsì jis na, wùt wuna jìsà na ghə ni? Te wù jìsà mihè yênà kə ni, lɨm à ngwû tôŋ. 61Kə wu yu Bâba bɨ̂nhì ki yen kə Bità yi kə̀k, wù kaha kwâktì gha ye Jisòs ye jisa ha wûn na, “Lɨm à ngwû nè shihi tôŋ lân ma wò ti mana mu ghàn à tât.” 62Kə wu yu, Bità fwo a bɨn ji nâ haŋaŋ.

(Mat 26.67-68; Mâk 14.65)

63Ghɨt ghe ghɨ tì khɨte Jisòs shìki nyikhè wûn fê sama wûn, 64ma ghɨ ti kwut se wuna hì bufa ha wun na, “Fôkti lê na wò sam nde agha?” 65Ghɨna tî jîs gha dona ha wûn ghɨ yafa kə ni.

Ghɨ yen nì Jisòs wu lùk wu saku

(Mat 26.59-66; Mâk 14.55-64; Jon 18.19-24)

66Tuku yû, chəhsu lak su nì ngàŋsù ndâ Fùyènsu chiksu nì chichàsu saksu khɨti yi yûŋtì, ghɨ ben nì Jisòs ashyə̂ yì yùŋtì, 67ghɨna jis ha wun na, “Wò hì mô kə nâ Klistù we Yènfù chwoka, wò fôktì ha ghàh.”

Wù fîsì na, “Mu fòkti nâbi yi fôktì, ma ghàn tê bimî, 68nâbi mu nè bufalò gha ha ghàn, ma ghàn tê fìsì. 69Biyani hi yìmì chîn hi yèn ashyə̂, Wâ Wùt nè ndòkò lò a Yènfù kpen wu wò ta, bè jyak à jɨ̀m.”

70Ghɨna chîntì buf kə à jɨ̀m na, “Ba yi ni mò na wò mò Wâ Fùyèn agha?”

Wù fîsì na, “Yi mô kə ni te ghàn jìsa.”

71Kum ni, ghɨna jis na, “Ghɨ fê khɨŋa nâ hi nè ghə nì bɨ̀n à sak, ba ghàhnà ti yû kə nâ a wun a yi jwô?”

Currently Selected:

Lûk 22: bmv

Highlight

Copy