Lûk 21

Nki yi fo ye yi chyâ yile

(Mâk 12.41-44)

1Jisòs ndùku baha mô kə a ndâ Fùyèn ki yen nì luk we ghɨ ndùku fo fotu atɨ̂n yen te ghɨta chika fo fotu ghɨna tu, 2yen kəbi te fufa ywê nkwû ale boŋa be fo katà fu wun fu. 3Wù ki jîs na, “Mu jìsà ha ghàn hamok na, fufa ywê nkwû ghɨ̂n ti fo fo yi chyâ na fotu ghɨt ghɨ̂n nâ à jɨ̀m, 4beka ghɨna ye fabti kə ka we wu dô ghakne ghɨna ben folò, biyani wùt ywên wunâ nâbi te wù fufa ni, ti fo mihì kə yi mihì katà fu wun fu kəta wi nâbi hi yə̂.”

Jisòs jis kum yi bobhî ndâ Fùyèn

(Mat 24.1-2; Mâk 13.1-2)

5Ghɨta hì jîsà kum ndâ Fùyèn, na ghɨ ti fati bâ nì te jûŋà fê jîsà kum mwə̀ mù jùŋ mùlè ghɨta fo na ghɨ lem a ndâ Fùyèn àtɨ̂n. Jisòs ki jîs na, 6“Ghàn yena bɨn ghɨ̂n ni, yu khɨŋte bè lò shyəma ghɨ shyakti ndasu tɨnsu ma nâ ti yì mòk bê hi bu a tô yile.” 7Ghɨna buf ha wun nâ, “Chichà, gha mɨ ghɨ̂n bè gânà a wùni tuku agha? Ghɨ bè shihi yìmì hi gàn, ma chwena bê hi mô ghə?”

8Wù jis na, “Ghàn hi tôknè, kə wùt bê jìŋhi ghàn. Ghɨta bè hì bê lò, dô kə ni, ghɨna bênà jîsà na ghɨna bènà a mu yet. A bê nâbi nde jîsà na, ‘À mò kə nâ mu we ni!’ Fê jîsà na, ‘yu ti kpên chîn! Ghàn yu yâ, kə wùt yen a ghɨna yi bàm.’ 9Ghàn bê ki yû na woŋtu ti yîmì, fî yu na ndùm sù ti yîmì, kə ghàn hi fânà na gokhini ti bakhâ beka gha ghɨ̂n kəta hi yìtà gàn ashyə̂.”

10Te wù jìsa ni, fî jis na, “Lak tu bè hì nô lak tu letu, fə̂ntù nô tu letu.” 11Chyə bê hi senalò, ma jìŋ fê kwo kə a tu lùk a tu lùk. Yaf tê tu dâŋà bê hi fwô, ma chwesu bəmasu fwu a nyə̂ fânhè à ghɨ̂t. 12Ma gha ghɨ̂n bê shihi gàn ma ghɨ ti khɨti ghàn fo ngə̂k ha ghàn, lyi yen nì ghàn ashyə̂ yì sâk a ndasu chintesu lem ghàn a chyâk. Ghɨ bè lyê yênà nì ghàn a fə̂ntù ashyə̂ nì ghɨt a sakana ale ashyə̂ kum mu.#21.12 Kum mu: À mò yi jìs yi Gɨlìs ma ghɨ nyak na kum yet yi mi. 13À mô kə wu tuk we ghàn bè fôktè tum à mì yì jùŋ ha ghɨna atɨ̂n. 14Ghàn lem a ghàn a təm na ghàn bè kwâktè wi gha kum lum we ghàn bè fîsè gha ghe ghɨ bufte ha ghàn 15beka nâ mu bè folò jîs yi tofani ha ghàn, wùt bê tê gàn hi tunhe gha ye ghàn jìsa. 16Nâbi bì ghana nì wana ne ghana nì sun sanisu nì sah yani nda bè folò ghàn, na ghɨ hi nê gha mɨ ghɨ̂n ha ghàn ma ywiti ghàn ghɨ le. 17Nâ ghɨt à jɨ̀m bè hì bànàlò ghàn kə kum mu. 18Biyani nyuŋ yì mòk wi hi bè ləhà a ghàn a tû. 19Wunhî yani bè nêlò ma ghàn kwoti yohnà ghana.

Jisòs jis te ghɨ bè bobhe Jèlusalèm

(Mat 24.15-21; Mâk 13.14-19)

20“Ghàn bê ki yên ma sojàsù ti jɨ̂ŋ kat Jèlusalèm ni, ghàn khɨli na tuku ti kpên na bobhi Jèlusalèm.” 21Yi gan ni, nâbi nde a Jùdiyà wu tet kwok a su kùn, ghɨta tet atɨ̂n à yi tèk afû. Wùt hì mô a fùk, kə wù kaha lyi a yi tèk afû. 22Munâ mò mu tuk me Yènfù bè chə̂bhè ghɨta atɨ̂n te ghɨ ti nyàka, hi nì na gha ghɨ̂n à jɨ̀m a ghɨ tì nyàka lema a ŋwàklù Fùyèn na ghɨ kpen. 23Tuk mù tɨn bè hì bəma hanɨ̂ŋ ha ywen ghe ghɨ mô mu lâ nì ghe ghɨna lè mwəlà, beka lùmchuŋ, nì ngə̂k yì kanana bè hì mô ha ghɨna. 24Ghɨ bè sòlè ywiti ghɨna nì nywimù, ma ghɨ kwoti ghɨna ma yê lem ha wu kwòs kə bàh wù mbyi wù jɨ̀m. A mô kə te tumu tì yikte kə Jèlusalèm ni fî nyâblì nì ghɨna hi yaka te yu we Yènfù lèma ha ghɨna kwok à kpen.

Jisòs jis kum bên yì Wâ Wùt

(Mat 24.29-31; Mâk 13.24-27)

25“À bè hì mô a wu yu mefû ma yuchwî chwuti chwesu, njoŋ nì njènû chwûtè. Jwò yì tâ bê hi nêkà fè dûmà bê nì lùmchuŋ a mbyî ma tu ghɨt à jɨ̀m bê fwu. 26Ghɨta fentê kum yi fân kum gha ye yi mô hi gàn a mbyî, beka mwə̀ me mù mò a nyə̂ bê hi nêkà. 27Ma à nê hi mô yi bàm yi tɨ̂n ma ghɨna yen Wâ Wùt, wu chwo bênà atɨ̂n à sù mbàk kəta jyaka nì ban yi chiki. 28Gha ghɨ̂n ki yîmì hi tè gàn nâbi wùni yu, ghàn lôhì tu wanu ki a nyə̂ beka yu wu bakhe bênà shyəma Yènfù yun tu wanu.”

(Mat 24.32-35; Mâk 13.28-31)

29Jisòs fî ma gàn yina ha ghɨna jis na, “Ba ghàn yenalò kâk fù fikfù nâ nì kàk mùlè.” 30Ba futu tɨntu yàtàlò, tu yîmì nâbi wùni yu hi tè kaha tô, ghàn yen yâ ghàn hi khə ha ghàn a sù ngɨŋ na bɨ̀ŋ hì chwô bênàlò. 31Yi mô kəbi yi ghəl te ghàn bè yena gha mɨ ghɨ̂n te ghɨ gânà. Ghàn yên, ghàn hi khə na fə̂n wù Fùyènù wu hi bakhe bênà.

32“Mu jìsà ha ghàn hamok na ghɨt a mbye ghɨ̂n chin wi hi bè kpute mìhì teka gha mɨ ghɨ̂n gan à jɨ̀m. 33Nyə bè chyàlàlò, ma chyə chya, biyani ma gha bê tè kwuna atɨn à gha afa mu jìsa.”

34“Ghàn hi tôknè nì ngɨŋ sanisu, bu yani ma jwo yəni nì se mu lùkà nì lâ lumanu kum gha mbye ma ghɨ bukhi se ghana wu tuk afân ma wu bê bûŋtê kwo kə ghàn te a tâm. 35Yen lê bûŋhì ben yì tɨni ha ghɨt à jɨ̀m a mbye afân. 36Ghàn hi mô yu mù jɨ̀m, gbûtè kə yi gbûtì, jə̂mà na Yènfù fo jyaka ma ghàn bê timi a Wâ Wùt ashyə̂.”

37Jisòs yike a ndâ Fùyèn a mu tuk afu metì ni, tuku jyə̂, wù kwok chyə a tô kùn à sù Olìfs, 38à hì mô mbisìmbisi ghɨt à jɨ̀m yen yûŋtì a ndâ Fùyèn hi yute yikî wuni.

Currently Selected:

Lûk 21: bmv

Highlight

Copy