Lûk 20

Ghɨt ghe ghɨ tì saka tì buf luk we Jisòs tì lye jyak a wuna

(Mat 21.23-27; Mâk 11.27-33)

1Tuku yû tuk wule, Jisòs hì yike ghɨta a ndâ Fùyèn, fôktè tum yì jùŋ ha ghɨna. Ngàŋsù ndâ Fùyènsu chiksu nì chichàsu saksu bakhi nì chəhsu, fwu bên 2ki buf ha wun nâ, “Fôkti ha ghàh na gha ghɨ̂n wò nè ma jyaka lo afa agha?” À fo nde jyak ghɨ̂n ha wò agha?

3Jisòs jis ha ghɨna na, “Mu ti boŋa bufalò gha ha ghàn. Ghàn fokti ha mu nâ, 4à tì fo Fùyèn jyaka ha Jon na wù hi fo mòlû ha ghɨta ma, à tì fo à ghɨ̂t agha?”

5Ghɨna kanti gha tɨni ha ghɨna sù ngɨŋ jis na, “Ghàhnà ki jîs na, ‘À tì fo Fùyèn jyaka ha wûn,’ ma wù buf na, ‘Ghàn tê bimî gha ye wù ndùku jîsà njwô ghə?’ 6Ma ghàhnà ki jîs na, ‘À tì fo à ghɨ̂t jyaka ha wûn,’ ma ghɨt à jɨ̀m nê tumle ywiti ghàhnà nì te beka ghɨna ndùku lyê na Jon mò fòktì wù chìk.” 7Te ghɨna kwàkte ni, jis kə na ghɨna khə wi luk we jyaka wuna tì lo atɨ̂n.

8Jisòs ki jîs ha ghɨna na, “Nâ mu te boŋa fôktè wi luk afa mu lye jyaka hi tè nè gha ghɨ̂n atɨ̂n.”

Jisòs ma ngàn yi kwo ghɨt a sakana

(Mat 21.33-46; Mâk 12.1-12)

9Te wù jìsa ni, ki ma ngàn ha ghɨna à jɨ̀m na, “Wùt lè ti jîmì fûk à mu tama fo na ghɨta hi fêtà, jyâtè fo wun nì mwə̀ me mù fwo atɨ̂n. Wu fo ni, yen yi gbî yi lak yile hi chyə a wu yu dâ. 10Yu kpenu kpên, wù tum wùt à wûn wù fèt wùlè na wù yê jis ha ghɨt ghe wù tì fo fûk ghe ha ghɨna na ghɨna fo tam wule ha wûn. Ghɨt a fetana atɨna yen khɨti wùt we wù tuma, sam jûm wûn, wù kahi kolô kə nì wo yumu. 11Wù fî tum kpenhi wùt wù fètana wùlè, ghɨna fî sam kə yi sâm wûn fî nyâblì nì wûn a lum wu wumenu fî jum wûn, wù lo kə nì wo yumu. 12Wu fî tum wùlè na à hi mô ghɨt à tât, ghɨna sam ləmhi wûn, chin fihi wun a fùk afû. 13Bè fùk kwâktì nâ gha ye wù mò hi nì, jis kə wun a ngɨŋ na, ‘Mu nè tuma kə nâ wâ mù wù kòŋ yu lefu ma ghɨna yê fan wûn.’ 14Wâ wûn we yên, ghɨna yen wûn jis na, ‘Wûn mò kə nâ yə̂ ndâ bè fùk wuna ni. Ghàhnà khɨtè ywi wûn shyəma ghàhnà kwoti mwə̀ me wù ndùku mô hi bè khɨtî.’ 15Ghɨna jis ni, khɨti fwu nì wun a fùk afû yen ywilò.”

Jisòs ki buf ha ghɨt ghe ghɨ ndùku yute ha wun na, “Yi ki gân ni ma bè fùk mu wuna hi mô hi nì nâ ghə ha ghɨt ghɨ̂n agha? 16Yi hì mô yâ, ma wu bê ywiti ghɨt a fetana ghê, ma wù kahà lyi fùk à tɨna ma wù fo ha ghɨt a lô.”

Jisòs mihì ngàn mi yinâ ghɨt ghe yuti ni, jis na kə Yènfù bè bime na nki gha yîn bê gan ha ghàh ni.

17Jisòs ki ke ghɨna ni buf na, “Luk wu ŋwàklù Fùyèn wûn chwùtè na ghə, wu jîsà na:

‘Ti ye ghɨt a bana tì tuma maka

yi ti kahi ha ti bûlà ndâ’ agha?

18A damta nâbi nde yi ti bûlà nda afân, ma wù fen ma wù kati kə wu kòm a wu kòm ma yi fen nâbi a nde tû ma yi gwohi kə yi gwôhì wûn.”

Ghɨt a sakana buf yi gha kum mâk yì ŋwàklù

(Mat 22.15-22; Mâk 12.13-17)

19Jisòs ma mihì ngàn mi yina, chichàsu saksu nì ngàŋsu ndâ Fùyènsu chiksu khɨlî na wù yê hì mâ ngàn yina kum ghɨna, hì mòmhè hi khɨte wûn kə yu mefû fî fan kə se ghɨ̂tà. 20Ghɨna lem yi se a wun wu wùn fî lem à ghɨ̂t a wun a yi bàm na ghɨna hi kama nê kə te ghɨna mò ghɨt a jûŋà, hì yute kə na wù jis gha ma ghɨ kwo wûn ma fo ha wùt à Lûm we wu ndùku saka bâh à lak mi ghê. 21Ghɨna ki jîs ha wun na, “Chichà, ghàh khə na wò jîsà kə nâ hamok, yike kə gha ghe ghɨ mô hamok, chwûtè wi na wùt lè chyàlò wùlè, fate yike kə te sak tu Fùyèn tu mò. 22Fòkti ha ghàh chîn nâ saki bimelò na ghàhnà mak ŋwàklànà ha Fə̀n wù chìk Sisà a Lûm, ma yi bimi wi agha?”

23Kə wu yu, Jisòs kwo tof yi ghɨna ki jîs na, 24“Ghàn chwùtê ben nì ka kahu ha mu ni.” Ghɨna chwûtì, wù buf na, “À mò lîŋhà nde atɨ̂n nì yeti agha?” Ghɨna jis na, “À mò yi kə̂k yi Sisà fə̀n wù chìk a Lûm nì yet yi wuni.”

25Jisòs ki jîs na, “Yi hì mô ni, ghàn hi fo mwə̀ mù fə̀n Sisà ha Sisà, fo mwə̀ mù Fùyèn ha Yènfù.”

26Yi ghak ghɨna, ghɨna tê yena jə̀ gha ye ghɨ mô hi khɨte wun a ghɨta fùtɨ̂n kum yini, jwo yim ghɨna, ghɨna china kə moŋ.

Ghɨt a Sadùsî ale buf yi gha kum lôtì yi kpu

(Mat 22.23-33; Mâk 12.18-27)

27Ghɨt a Sadùsî ben ha Jisòs, a mô ghɨt ghe ghɨ bime wi na wùt bè lôtèlò a yi kpû, buf ha wun nâ, 28“Chichà, ba Musìs tì nyak ha ghàhnà na, ‘Wâ nè wùt ki kpû, kəta ywi, biyani kəta wi mwəlà, ma wâ nè wùt kpona lyi wùt ywên àtɨ̂n, ma ghê wûn bwɨ mwəlà ha wâ nè wûn wù kpona we agha?’ 29Wana ne ale ndùku lâwû sàmba, wù shyə̂ lyi wùt ywên kpulò, kəta wi mwəlà. 30Jɨ̀m à wûn lyi wùt ywên àtɨ̂n fî kpu kəbi yâ.” 31Kùmti fî lyî wùt ywên àtɨ̂n fî boŋ kpu kəbi yâ kəta wi mwəlà. Ghɨna à jɨ̀m ghe sàmba a ghɨna tì lye wùt ywên àtɨ̂n kputî mihì mwəlà bu, 32shyəma wùt ywên àtɨ̂n bê boŋà kpu. 33“À bè hì mô wu tuk afu metì a ghɨ bè lôtè a yi kpû, ma wùt ywên àtɨ̂n bê hi mô ywê nde, beka wana ne wùt wù mòk ndùku kəta kə wûn kə ghɨna à jɨ̀m ha ywi agha?”

34Jisòs jis ha ghɨna na, “Ghɨt a mbyî chîn lyè a ywên, ywena bime à lɨmà, 35Biyani yi bè kwunalò ha ghɨt ghe a ghɨ kpene hi lòtì a yi kpû hi tè chyə te wù bênà. 36Yi bè hì mô yâ beka ghɨna bè fê kpo wi. Ghɨna bè hì mô kə yi ghəl te anjèlsù Fùyènsu, fê mô wana Fùyènà beka ghɨna ti lôtì a yi kpû. 37Nâbi Musìs ti chwûtì gha mi yîn na ghɨ lôhèlò ghɨta a yi kpû a lùk wu ŋwàklù Fùyèn we wu jîsà kum fukâk fe wusu bame atɨ̂n yani. À mò wu lùk wu ŋwàklù afân ma wù ti toŋti Bâba Yènfù na à mò fù Yèn fe Ablàhâm nì Isìk nì Jakòb ndùku ngumle. 38Yènfù wijə Yènfù ghɨt a kputena, fu mô Yènfù ghɨt ghe ghɨ chyə, ha wun ghɨt à jɨ̀m mò wu tâ.”

39Jisòs jis mihì chichàsu saksu lesu jis ha wun na, “Wò jìsà kə nâ a jûŋ ni a chichà.” 40Ghɨna jis yâ, nâ wùt wùlè wù mòk tà fî mômhì jə hi buf a yi gha ha wûn.

(Mat 22.41-46; Mâk 12.35-37)

41Wù ki buf ha ghɨna na, “Wùt ni mò yàni hi fè jìs na wùt we a ghɨ chwoka lema mò wâ Defìt agha? 42Defìt nì ngɨŋ à wûn tî jis a ŋwàklù Sù njàŋ na:

‘Bâba Yènfù jis ha Bâba mù na,

Ndòko a mu bàh à kpen wu wo ta

43ma wò hi yutê hi tàn te mu nè nê bànà sasu ma su lye a wo sah yì sak.’

44À shìki mô ma Defìt ti toŋti wun na Bâba, ma wù hi fê mô yàni wan ha Defìt agha?”

(Mat 23.1-36; Mâk 12.38-40)

45Wù yîmì hi tè jìs ha jùmtìbàmsù wunsu wu lum afa nâbi nde mò hi yû, jis ha ghɨna na, 46“Ghàn hi tôknè nì chichàsu sak sîn. Ghɨna kòŋà hi tè gbê chyâ nì dàlasu chiksu, fwo yê wu wən na ghɨta hi nyiŋa bênà toŋte ha ghɨna, yênà a ndasu chintesu, ghɨ kwok ndokò kə ashyə̂, ghɨ yena luk wu yənu ghɨ kwok ndokò kə lùk wu ngaŋtenu. 47Ghɨna kôŋà hi fye mwə̀ mù ywena nkwô kə mù jɨ̀m, biyani kama chwùtè na ghɨna mò ghɨt a jûŋà jə̂mà làtè. Yènfù bè folò ngə̂k ha ghɨna a tu lum hanɨ̂ŋ.”

Currently Selected:

Lûk 20: bmv

Highlight

Copy