Lûk 19

Jisòs ghê Sàkiyòs

1Jisòs yen lye a Jèlikù hì tohne chyâlà. 2Wùt lè mô yi tèk afû, a toŋte na Sàkiyòs, a mô to ghɨt ghe ghɨ ndùku kâtà ŋwàklànà, wu kəta wu kâ nâ jûŋ. 3Wù hì khɨŋa hi yen a Jisòs, hì yena wijə beka ghɨta ndùku dô chyâhè, wu fê tumhe chyâhè. 4Wù nyiŋ yen ashyə̂ kwok a tô fùkàk fu sikamò fù shyəma Jisòs shihi bèn hi chyà ma wù yen beka Jisòs ndùku yênà hi chyà lumu afû. 5Jisòs ben tan afû ki kokhe a tô fùkàk afa Sàkiyòs ndùku mô atɨ̂n, jis ha wun na, “Sàkiyòs, nyàŋhi chwo bî, mu kəta hi chyə a wo ndâ lân.”

6Wù nyâŋhì chwo ben hì mô nì saŋlînì hi lyè yèn nì Jisòs a wun a ndâ. 7Ghɨta yen ni hì sunnê, fê njaŋa, jîsà na, “Wù ti shik jiki a wùt wù be a ndâ.”

8Sàkiyòs lôtì timi jis ha Bâba na, “Kike, a Bâba, mu nè jyâtèlò mwə̀ me a mu kəta ghàh à ghɨt a fufana kə yi ghəl, à hì mô ma mu tì lehi wùt fyi a shyə wuna ma mu nê kaha fo mù kìk.”

9Jisòs jis ha wun na, “Ghɨt a ndâ afan ti bôn lân. Wùna mò kəbi wâ Ablàhâm. 10Gha ye yi tì ne na Wâ Wùt ben mò hi khɨŋa ghɨt ghe ghɨ lehne nì hi bònhè ghɨna.”

Ngàn kum lum we ghɨt a fetana tì khɨte ka we bì fèt tì fo ha ghɨna

(Mat 25.14-30)

11Te ghɨta tì baha yute jîs yì Jisòs yê, wù ma ngàn ha ghɨna beka wù ndùku bakhe yênà a Jèlusalèm, ghɨna hi kwâktè kə na Yènfù khɨŋa hi yìmì hi saka fə̀nù a yu mefû. 12Jisòs ma ngàn yina jis na, “Wan tôk wùlè tî lô hì yênà yi gbî wu lùk wule, nâ hadà na ghɨ yê tuk wûn ma wù kahà bê sak bâh a ghɨna ghɨ laka, 13wù toŋti ghɨt a wuna ghɨ fetana ìwûm hì jyàtè bàlì wu kâ ha ghɨna jis na, ghɨna hi bəkle atɨ̂n hi tàn wu tuk afa yi bè kaha bênà.” 14À ndùku mô ni, ghɨta bàh à lak afû bânà wûn. Wù lo ni, ghɨna tum na ghɨta yê jis wu lùk afa wù yènà na ghɨna kòŋà wi na wù hi saka ghɨna.

15“Wù tì kaha ben ma ghɨ ti tuk wûn na wù hi saka ghɨt a wuna, wù ki jîs na ghɨ toŋti ghɨt a wuna ghɨ fetana ghe wù tì fo ka ha ghɨna yâ, ghɨna ben ma yi yu na ghɨna che bəkli mbì ti fwu yàni agha.” 16Wù shyə̂ bên jis na, ‘Bâ, bàlì wu kâ yâ yê yì mòk ti ben nì mbì kam malàm.’ 17Wù jis ha wùt wù fètana atɨ̂n na, ‘Wò ti nî kə nâ afû! Wò mô kə nâ wùt wù fètana wù jùŋ! Wò nè hì saka tu tèk ìwûm chîn beka mu ti yen na wò khəlò hi tòknà nì mwə̀ mù tetamù.’ 18Kùmtê wùt wù fèt bên jis na, ‘Bâ, bàlì wu kâ yê yì mòk ti bên nì mbì kamsu tân.’ 19Wù jis ha wun na, ‘Wò nè hì saka tù tèk tù tân.’ 20Wùlè bên jis na, bâ, à mò bàlì wu kâ yâ ye ni à mu tì kwute lema a bàh à sù njwo, 21beka mu ndùku fànà wò. Wò mò ni bəmâ, khə hi lyè a shyə teka wò lem, ‘khə hi kpì teka wò yomi.’ 22Wan tok we jis ha wun na, ‘Mu nè saka wò kə wu lum afa wò jìsa atɨ̂n. Wò mò kə nâ wùt wù fètana wù be! Wò ndùku khə kə nâ na mu bəmalò, lyê tì lèm, kpê teka mu yomi, 23à tì ni ghə na kə wò lem ka mu a ndâ wu kâ, ma mu nê ben hi lyì, ma mu lyê bakhi nì mbì agha?’ 24Wù jis ha ghɨt ghe ghɨ ndùku mô afû na, ‘Ghàn fyi kam ye ha wûn ma ghàn fo ha wùt we wù kəta kam se ìwûm yâ.’ 25Ghɨna buf ha wun nâ, ‘Kəbi ha wun agha a bâ! Ma wù hì kəta kamsu ìwûm agha?’ 26‘Mu jìsà ha ghàn na, à hì kəta nâbi nde ma ghɨ nê fo kpenhi, à hi gha nâbi nde ma ghɨ nê fyi fu teta fê wù kəta. 27Ha bànà sam sê su chehì kânà na kə ghɨ tuk mu na mu hi saka ghɨna yâ, ghàn lyê ben nì ghɨna ma ghàn ywitè kə mu ashyə̂ afân.’

Jisòs lye a Jèlusalèm te fə̀n

(Mat 21.1-11; Mâk 11.1-11; Jon 12.12-19)

28Te Jisòs jìsa ni, chya yen a ghɨta ashyə̂ hì kwoka yênà a Jèlusalèm, 29ni te wù ndùku bakhe yê a tu tèk tê ghɨ ndùku toŋte na Betfàs nì Betanì, a kùn ye ghɨ toŋte na kùn à sù Olìf, tum jùmtìbàmsù wunsu sùbà, 30jis na “Ghàn lyê yen a fùtɨ̂n à yì tèk afân a ghàn ashyə̂. Te ghàn nè hì lye yênà ma ghàn yen wâ jàkâs te ghɨ chuŋa teka wùt timè kwok a tû. Ghàn yên, ghàn yêntì ben nì yinì afân. 31Ghàn yen hi yèntì, a buf nâbi nde ghàn jis na, ‘Bâba kətalò gha hi nì nì yinì.’”

32Ghɨt ghe wù tì tuma yâ, lo yên, yen gha à jɨ̀m gan kə te wù ye jisa. 33Te ghɨna tì yèna yîmì hì yèntì, ghɨt ghe ghɨ ndùku kəta nyàm àtɨ̂n buf ha ghɨna na, “Ghàn yèntè jàkâs yina njwô ghə?”

34Ghɨna jis na, “Bâba kətalò gha hi nì nì yinì.” 35Te ghɨna tì jìsa ni, lyi ben nì yinì ha Jisòs yîmhì njumù ghɨna, kokhi Jisòs a tô àtɨ̂n. 36Jisòs hì yênà a tô nyàm afû, ghɨta chwokti njumù ghɨna mak wu lûm, Jisòs hì gbê yênà a tô àtɨ̂n.

37Te wù bakhe a Jèlusalèm hì chwo yênà a kùn à sù Olìf, nâ nôn à jùmtìbàmsù wunsu sù jɨ̀m hì saŋle kə yi saŋlî, kokhe Yènfù nâ nì jyesu tasu kum a gha kanana ghe ghɨna ndùku mô ma ghɨna ti yên. 38Ghɨna hì jîsà na, “Yutìnì mô ha fə̀n we wù bènà a Bâba yi yet. Yutìnì mô a nyə̂. Yènfù kəta yi kokhî wu lùk afa wu ngaŋte kpene!”

39Ghɨt a Falàsî ale ghe ghɨ tì gbê kəbi a nòn afû jis ha Jisòs na, “Kanti jùmtìbàm sa sîn a chichà ma ghɨna china moŋ.”

40Wù jis ha ghɨna na, “Ghɨna china kəbi yi chinâ ma te nê hi kokhe Yènfù.”

41Te wù ndùku bakhe mihè yênà a Jèlusalèm ki yen nì tèk yi tɨni, seni kwo wûn, wù jî, 42jis na, “À nè nê nde na ghàn, ghɨt a Jèlusalèm khɨli yutì yê yi bênà ha ghàn lân, chîn mò ghàn bu hi yên! 43Tuk mù be mu bakhe bênà ha ghàn. Bànà sanisu nè balò mbàn, ma yì jɨŋ à kat ghàn ma yì baŋ à kə yi bâŋ ghàn. 44Ma ghɨna bê chikhi ghàn à jɨ̀m bakhi nì mwəlà me mù mò a ghàn a sù ndâ. Ti bè faŋa wi a tô yile afân beka ghàn tà yen khɨli jə̂ yu we Yènfù bè hi bònhè ghàn.”

Jisòs lye a ndâ Fùyèn

(Mat 21.12-17; Mâk 11.15-19; Jon 2.13-22)

45Wù yen lye bɨn a ndâ Fùyèn yì chìk hì jûmà fihe ghɨt ghe ghɨ ndùku bəkle mwə̀lû atɨ̂n, 46jîsà ha ghɨna na, “Ghɨ nyak a ŋwàklù Fùyèn na, ‘Ndâ mì bè hì mô a ndâ jə̀mana’ biyani ghàn ti kahi chîn ha ndâ ghɨt a chwoŋana.”

47Jisòs yîmì hì yusa yikê a nda Fùyèn kə mu tuk mù jɨ̀m. Ngàŋsù ndâ Fùyèn su chiksu nì chichàsu saksu nì chəhsu lak su hì khɨŋa wu lum hi ywe wûn, 48biyani tê yena jə̀ gha ye ghɨna mò hi dàŋ atɨ̂n hi kwo wûn beka ghɨta ndùku mô kə wun a ngwùŋ ywo kə gha ye wù ndùku yike.#19.48 À ndùku mô a Jisòs mu tuk, ghɨ ndùku mô hi tuka wut ha fə̀n ghɨt a wuna a laka yen fye a jyak ha fə̂n wù chìk a Lûm beka a ndùku mô wun we wu ndùku saka lak yi Jûs yì jɨ̀m.

Currently Selected:

Lûk 19: bmv

Highlight

Copy