Lûk 18

Ngàn à ywê nkwû we wù tà tì bôt jə̂ hi lon a yi gâmtì ha to sù saka ale

1Jisòs tî fî ma kəbi ngàn yìlè ha jùmtìbàmsù wunsu yike ghɨna na ghɨna kəta hi tè jə̀m yu mù jɨ̀m bota wi. 2Wù jis na, “Tô sù sak ale ndùku mô yi tèk yile fânà wi Yènfù, lyê wi na wùt mò a shyə ale. 3Ywê nkwû wùlè hì mô kəbi yi tèk afû, yênà a wun a ndâ tuk mù jɨ̀m, jîsà na, ‘Sak fyi to ma ha bànà mì.’ 4Wù bê jîsà to sak ghɨ̂n bukhe kə yi bukhî. Te wù faŋa hì yênà kə yi yên, à be kaha kwâktì kə wûn hi kâtà sak atɨ̂n, nâbi te yi fànà wijə Yènfù, lyê wijə na wùt mò a shyə ale, 5bu ni, ma bên yì wuni a mu ndâ yu mù jɨ̀m nê hi fo ngə̂k ma mu nê hi kəta wijə yutìnì.”

6Bâba jis ni, ki jîs ha jùmtìbàmsu wunsu na, “Ghàn yu lê na to sù sak ghɨ̂n tì jis ni yàni bu chilichili agha. 7À bɨlà mò lô hi faŋa Yènfù hi ywo jî ghɨt a wuna ghe wù mò ma wù ti chwokti ghɨ jyê ha wûn, ntuksu nì nchwì agha? Fu làhi tê wunhe kə yi wunhî ghɨna agha? 8Mu jìsà ha ghàn na, Yènfù wunhe wi hi sak a fo sak yâ. Nâbi yâ Wâ Wùt bè shihi kaha bèn a mbye afân ma wù yen ghɨta ghɨ baha samhe ha Yènfù agha?”

Ngàn à wùt à Falàsî nì wùt we wù ndùku kâtà ŋwàklànà

9Wù tì fî ma ngàn yìlè ha ghɨna ghe ghɨna ndùku ke ngɨŋsu ghɨna su na ghɨna mò chilichili, kehe ghɨt ale, jis na, 10“Ghɨt ale à bà tî kwok lyi yen a ndâ Fùyèn hi jə̀m, wù mòk mô wùt à Falàsî, wùlè kâtà ŋwàklànà. 11Wùt à Falàsî we yen timi hanɨ̂ŋ hì jə̂mà, jyana, ‘Mu fo àyòŋnà ha Yènfù beka mu wijə ni te ghɨt ale ghe ghɨna nyâŋhè fye mwə̀ mù ghɨt halô, bu te ghê ghɨna khɨma saki, jûmtè wijə ywen a ghɨ̂tà. Mu wijə ni te wùt wunâ wù kàtà ŋwàklànà ni. 12Mu bama yi jwô a ghan à bà a ngâm, jyâtè mwə̀ mâmù wu bàh ìwûm, mu fo à mòk ha wò.’ 13Wùt we wù ndùku kâtà ŋwàklànà yîmì hi jə̀m, timi kə hadà te kòŋ hi ke kwok a nyə̂ biyani lem wo wuna a ngàŋtù kwohe yi sên jîsà na, ‘Yènfù, kwohi seni ha mu, mu mò wùt wù be!’ 14Mu jìsà ha ghàn na wùt mu we tì shihi kolo lye a wun a ndâ mô chilichili biyani wùt à Falàsî we kolo bu chilichili. Nâbi nde we wù kokhe ngɨŋ à wûn a nyə̂ ma Yènfù nê chwohi wûn a chyə̂, nâbi nde wù lye ngɨŋ à wûn a chyə̂ ma Yènfù nê kokhi wûn a nyə̂.”

Jisòs bonhi mwəlà

(Mat 19.13-15; Mâk 10.13-16)

15Ghɨta ndùku lye bê nì mwəlà ha Jisòs na wù kum ghɨna ma wù bonhi ghɨna. Jùmtìbàmsù wunsu yen yâ hì njaŋa ha ghɨt atɨna. 16Biyani wù toŋa mwəlà mù tɨ̂n jis na ghɨna ben, ki jîs ha jùmtìbàmsù wunsu na, “Ghàn de mwəlà ma ghɨna ben ha mu. Kə ghàn fi tamti ghɨna beka fə̂n wù Fùyènù kəta ghɨt ghe ghɨ mô te ghɨna. 17Mu jìsà ha ghàn hamok na, à faŋ nâbi nde hi bimî fə̂n wù Fùyènù te wan wù bot ma wù bê tê lye jə̀ wu lùk wu fə̀nù tɨnu.”

Ghaki nì fə̂n wù Fùyènù

(Mat 19.16-30; Mâk 10.17-31)

18Wùt wù tâ ghɨt a Jûs wùlè ki buf ha wun na, “Chichà wù jùŋ, mu mò hi nè nâ ghə hi khɨte bôn ye yi bè mê wi agha?”

19Jisòs buf ha wun na, “Njwô ghə te wò toŋte mu na wùt wù jûŋ agha? Nâ wùt wù jùŋ wi a bu kə Fùyèn. 20Wò khəlò sak te tu jîsà na, ‘Kə wùt chyə nì ywê wùt makə nì lɨm à wùt, kə wò ywi, kə wùt chwoŋ, kə wùt timi bɨ̀n à sak yì fə̂m, ngumli bâ nì nâ.’”

21Wùt tâ we ki jîs na, “Mu ti lem sak tɨ̂n hi yìmì ha wan wù bot.”

22Jisòs yu ni ki jîs ha wun na, “Wò baha kətalò gha yì mòk hi nì, ndù bəkli mwə̀ mâ nâ mù jɨ̀m ma wò fo ka tɨnu ha ghɨt a fufana ma wò tahi khɨte ghaki a nyə̂. Wò ni yâ, wò ben jûmtì mu.” 23Wùt wù ta we yu gha ghɨ̂n ni, wun wu wunu bôt beka wù ndùku mô nâ wùt wù chìk.

24Jisòs ki wun ni ki jîs na, “Yi ta nâ haŋaŋ ha ghɨt a chika shyəma ghɨna bê lye lùk wu fə̀n wù Fùyènù! 25Yi bonelò ha nyàm à kwaŋ hi lye tohna a bùk à saka chyâ shyəma wùt wù chìk lye yi lak yi fə̀n wù Fùyènù.”

26Ghɨt ghe yu jis yîn ki buf ha wun nâ, “Yi hì mô ni, ma à bê bon nâ nde?”

27Wù jis ha ghɨna na, “Gha ye yi ghaka wùt yi bone kə ni ha Yènfù.”

28Bità buf ha wun na, ba wò ti yen te ghàh de mwə̀ mâhù hì jûmtè kə wò agha.

29Jisòs kahi fîsì ha ghɨna na, “Mu jìsà ha ghàn hamok na, wùt chin ma wù ti de bɨn a wuna, de ywê wûn nì wana ne wuna, kəbi bè wùn nì nè wûn, kəbi mwəlà mù wûn kum gha fə̂n wù Fùyènù, 30ma Yènfù nê kpenhi mwə̀ mù tɨ̂n ha wûn nâ hidù a chyə afân, ma wù bê hi kəta bôn ye yi bè mê wi a mbye afa yì bè bênà.”

Jisòs fî kûmtì jis na kpu wuni yi hì bakhe bênà

(Mat 20.17-19; Mâk 10.32-34)

31Jisòs lyi lô nì ghɨt a tuma wuna njwòsù bà jis ha ghɨna na, “Ghàn hi khə na ghàhnà kwok a yênà a Jèlusalèm chin ni, nâbi ghə fòktìsù chiksu tì nyàka kum Wâ Wùt mô hi kpên. 32Ghɨ nè lyê folò wûn ha tumu, ma ghɨna nyikhi wûn, ma ni gha wumena ha wûn, ma fê chwuli chwâmù à wun wu wùn. 33Ghɨ nê sam wûn nì wànsù ma khɨtè ywi wûn, ma à nê hi mô yi bàm mu tuk mù tât, ma wù kahà lòti a yi kpû.”

34Te wù jìsa ni, ghɨna tê khɨlî na wù jis nâ ghə agha, beka tof ye yi ndùku mô atɨ̂n à gha tɨna ndùku mô ma ghɨ ti lêt ha ghɨna.

Jisòs chwuk a fèf

(Mat 20.29-34; Mâk 10.46-52)

35Te Jisòs ndùku bakhe yê a Jèlikù, wùt wu fèfana wùlè mô yi bi lumi lonâ. 36Wù yu te nôn à ghɨ̂tà chyàlà buf nâ, à gànà ghə agha?

37Ghɨ jis ha wun na a chyàlà Jisòs wâ wùt a Nasalì.

38Wù bwat jis na, “Jisòs Wâ Fə̀n Defìt, kwohi seni ha mu!”

39Ghɨt ghe ghɨ ndùku yênà ashyə̂ kântì wûn jîsà na wù china moŋ. Wù fî bɨlì bwat yen kə ashyə̂ jîsà kə na, “Wâ Fə̀n Defìt, kwohi seni ha mu!”

40Jisòs timi jis na ghɨ lyê ben nì wûn ha yi. Ghɨ lyi bakhi bên nì wûn a wun ashyə̂, Jisòs buf ha wun nâ, 41“Wò khɨŋa na mu ni ghə ha wò?”

Wù jis na, “Bâba, nê ma mu kahà yen luktu!”

42Wù ki jîs ha wun na, “Bimi ya ti nî wò ti tâ. Kaha yen luktu.”

43Kə wu yu tɨnu, wù kahi yen tu luk lô hì jûmtè yê nì Jisòs, kokhe yênà nì Yènfù. Nâbi nde ndùku ywo gha ye yi gana, hì boŋa kokhe yê Yènfù.

Currently Selected:

Lûk 18: bmv

Highlight

Copy