Lûk 17

Jisòs fôktì lum we jùmtìbàmsù wunsu nè gbê atɨ̂n

(Mat 18.6-7, 21-22; Mâk 9.42)

1Jisòs tî jîs ha jùmtìbàmsù wunsu na, “Gha ghe ghɨ nê na ghɨta hi nê be wi hi faŋ hi gàn, biyani ngə̂k yì chìk mò ha wùt we wù nè na ghɨt ale njah lumu!” 2Yi jwôfàlò hi chuŋ a yi ti a wun wu mɨ̀, hi tum a màkà wun a jwô yì chìk chyâ shyəma wù ni na wan wù mòk atɨ̂n à mwəlà afân na wù ni be. 3Ghàn hi tôknè ha ngɨŋ sanisu!

“Wâ nâ ki nê be ha wò, wò njaŋti ha wûn, wù de gha tɨni, wo lehìfo wûn. 4Wù ni gha be ha wò kəbi ghan à sek wu tuk, nê kəbi wùni yu ben chyati wò, jis na, yi bè fê mômà wi, wò lehìfo wûn.”

5Ghɨt a tuma Jisòs kahi jis ha Bâba na, “Nì ma ghàh tôkà khɨti bimînì ha Yènfù!”

6Bâba jis ha ghɨna na, “Ghàn hì kəta yi bimî yi tobte nâbi te yi se ngwìk yi mostà, ghàn làhi jìs ha kâk fun na fu chyâ lyê timi ma fu hi ləmnê atɨ̂n à jwò yì chìk, ma fu nê kə yâ.”

7“Ghàn lem lê na wùt a ghàn a fùtɨ̂n shìki kəta wùt wu fêtà a wun a fùk ma wù chìnà nâbi sù bwû. Wù ki kaha kolo bèn a ngûn ma wù jis ha wûn na nyàŋhi bi yə ma? 8Ba wù kolo bê ni, wo jis na wù kwuna njusu, wù khɨŋ shyə wu fo wò yəlò wu fî fo a shyə wo nyu lò shyəma nâ wûn boŋà yə ma wù nyu? 9Wùt fètana àtɨ̂n wi hi tê ki na ghɨ fo yòŋnà beka wù nè kə fêt ye ghɨ ye jisa. 10À mò ni te yi kəta hi tè mò ha ghàn. Ghɨ ki fo yi fêt ghàn nì mihì, ghàn lem na ghàn fet te wu kwôs, ghàn ni kə yi fêt ghàn yê hì kəta hi nì.”

Jisòs chwuk ghɨta ìwûm

11Jisòs lô hì fê yênà a Jèlusalèm lyi lum we wu tohne wu kpì nì Sàmaliyà ghê Galìlî, 12ben hì lye yênà kə yi tèk yile ni, ghɨt a kuhana ale ìwûm yen wûn afû timi kə hadà 13toŋa jis ha wun na, “Bâ, Jisòs kwohi seni ha ghàh.”

14Jisòs yen ghɨna jis na, “Ghàn yen ma ngàŋsù ndâ Fùyènsu kina ghàn.”

Ghɨna fwu tan wu lum yen kə ma ghɨna ti tâ. 15Wùlè atɨ̂n, te wù yena na yi ti tâ, kahi hì bəmhe yê nì Yènfù nâ jyə̂ yì tâ 16te wù ye yena ye nì Jisòs ni, fen a wun ashyə̂ kuhi kə̂k yi wuni fo àyòŋnà ha wûn. Wùt wunâ mô wut à Sàmaliyà. 17Jisòs ki buf na, “Mu ye chwuk ghɨta ìwûm, ghɨta bulamòk ti yen afa agha? 18Ba yi mô na wùt ha ghɨna tà kwâktì jə hi kaha bè fo yòŋnà hi kokhe Fùyèn, a bu kə wùt à tum wuna agha?” 19Te wù jìsa ni, ki jîs ha wùt à Sàmaliyà we na, “Lô ma wò yen a wo lùk. Bimî ya ti nî wò ti tâ.”

Bên yì fə̂n wù Fùyènù

(Mat 24.23-28, 37-41)

20Ghɨt a Falàsî ale buf ha Jisòs na, “Yènfù bè yîmè yini hi sak a fə̂n wù wunu?”

Wù jis ha ghɨna na, “Chwena ale bè hì wijə hi chwùtì na fə̂n wù Fùyènù ti yîmì hi tè bèn ni. 21Wùt bè jîsà wi na yen ke, a yìmè bê wunu ni, ghàn hi khə na Yènfù hì sakalò fə̂n wu wunu kə nâ ghàn a fùtɨ̂n chîn.”

22Wù ki kaha jìs ha jùmtìbàmsù wunsu na, “Tuk mù bènàlò ghàn bè hì jyê hi yena Wâ Wùt kə nâ afu yulâ ni, biyani yena wi.” 23À bè hì mò a mu tuk mù tɨ̂n ma ghɨta hi jîsà na, ‘Wù mò a fokô, wù wunâ afân!’ Ghàn ki yû, kə wùt yen afû. 24Bên yì Wâ Wùt bè hì mô kə a ndan kəbi te wuli yè shihi mwàn, ghɨ yen kə te yi bana bûlà tu mbyi tù jɨ̀m. 25Shyəma gha mɨ ghɨ̂n gan, wù kəta hi yena ngə̂k a tu lûm tu dô kə ni, na ghɨt a mbyî mana wûn shyəma gha ghɨ̂n gan. 26Wâ Wùt bè shihi bèn ma gha hì gânà te ghɨ ndùku gânà Nuwà mu tuk. 27Ghɨta ndùku yə̂, nywô, lyê a ywên, lyê lɨmà, fê fo wana ha lɨm atɨna hi kwok a tàn a wu tuk afa Nuwà tì lye a bâŋ, kwuŋa bên ywiti ghɨt ghe ghɨ tì faŋa nâ jɨ̀m. 28Gha bè gânà kəbi wu tuk afa Wâ Wùt bè bênà kəbi te ghɨ tì gàna wu tuk nì Lôt. À ndùku mô a mu tuk afû ghɨta yə̂, nywô, yuna mwə̀lû, bəkle mwə̀lû, yome mwə̀lû, ba sù ndâ. 29À ndùku mô wu tuk afa Lôt fwo a Sodòm, Yènfù suh chwohi wusu a nyə̂ te fimi te mu kân, ywiti ghɨt ghe Lôt tì lo de nâ à jɨ̀m. 30À mò kəbi te gha bè hì mô a tuk afa Wâ Wùt bè bênà.

31“Gha ghɨ̂n bè shihi gàn, wùt mô nâbi a tô ndâ, kə wù chwo hi lyè shyə atɨ̂n à ndâ shyəma wù tet. Wùt hì mô kəbi a fùk, kə wù fi kahi kolo a ndâ hi lyè a shyə shyəma wù tet. 32Kə wùt nè yità gha ye yi tì gàna ha ywê Lôt. 33À mòmhi nâbi nde hi chìnà yohnà wuna, ma wù kpu, à màka nâbi nde yohnà wuna ma wù nê lem ghɨna. 34Mu jìsà ha ghàn na à bè hì mô mu tuk afû ma ghɨt à bà bê hi mô wu khɨ̀, ma ghɨ bê lyi wù mòk ma de wùlè. 35-36Ywena bè hì gwô bana yi ti à bà, ma ghɨ bê lyi wù mòk ma ghɨ de wùlè.”#17.35-36 À mò a ŋwàklù su mwu su lesu ma ghɨ ti kpenhi luk wule wu lùk afan na, “À bè hì mô mu tuk afû, ma ghɨt a lɨmànà bê hi fêtà a fùk à bà, ma ghɨ bê lyi wù mòk ma ghɨ de wù mòk.”

37Jùmtìbàmsù wunsu ki buf ha wun nâ, “Gha mɨ ghɨ̂n bè gânà afa a Bâba?”

Wù jis ha ghɨna na, “Shyə kpona mò nâbi afa, à mò wu lùk afa ngùluŋu nè yûŋtè.”

Currently Selected:

Lûk 17: bmv

Highlight

Copy