1 Мусэ 16

Хьэджэррэ Исмэхьилэрэ

1Ауэ Сарай, Ибрам и фызыр, лъхуэртэкъым. Абы иӀэт унэӀут бзылъхугъэ Хьэджэр и цӀэу, Мысырым щыщу. 2ЖриӀащ Сарай Ибрам:

– КъэдаӀуэ, Зиусхьэным зэхуищӀащ си кӀуэцӀыр, сымылъхуэн папщӀэ; атӀэ щӀыхьэ си унэӀут бзылъхугъэм деж: абы къыбгъэдэкӀыу сэ сабий сиӀэнкӀи хъунщ.

Ибрам едэӀуащ Сарай и псалъэм. 3Ханаан щӀыналъэм Ибрам илъэсипщӀкӀэ щыпсэуа нэужь, Ибрам и фыз Сарай и унэӀут бзылъхугъэр, Мысырым щыщ Хьэджэр, иритащ фызу езым илӀ Ибрам. 4ЩӀыхьащ ар Хьэджэр деж, модрейри лъэщыджэ хъуащ. Лъэщыджэ зэрыхъуам гу щылъитэжым, абы и зиусхьэн гуащэм нэмыплъ ириту щӀидзащ.

5– Си гукъеуэмкӀэ уэрщ къуаншэр, – жриӀащ Сарай Ибрам, – сэ уэстащ си унэӀут бзылъхугъэр, уекӀуэлӀэну; ауэ абы, уэндэгъу зэрыхъуар щилъагъум, нэмыплъ къызиту щӀидзащ; къытхурехъу Зиусхьэныр уэрэ сэрэ хеящӀэ.

6– Уи унэӀутыр уи ӀэмыщӀэ илъщ, – жриӀащ Ибрам, – уэ ещӀэ абы узыхуейр.

Сарай дикъузэу щӀидзати, Хьэджэр щӀэпхъуэжащ.

7Зиусхьэным и мелыӀычым ар къыщигъуэтащ губгъуэ нэщӀым къыщыщӀэж псынэм деж, Шур хуэкӀуэ гъуэгум и гъунэгъу псынэм деж. 8ЖриӀащ абы:

– Хьэджэр, Сарай и унэӀут! Дэнэ укъикӀа, дэни укӀуэрэ?

– Сэ си зиусхьэн гуащэ Сарай и пащхьэ сыкъикӀри сыщӀэпхъуэжащ, – жиӀащ абы.

9– Уи бысым зиусхьэн гуащэм деж гъэзэжи, абы хуэжыӀэщӀэ, – къыжриӀащ Зиусхьэным и мелыӀычым абы.

10– Згъэбэгъуэнущ уэ къыптехъукӀынухэм я бжыгъэр, ахэр зэрыкуэд дыдэм къыхэкӀыу пхуэмыбжыну.

11ИтӀани къыжриӀащ Зиусхьэным и мелыӀычым абы:

– Уэ ууэндэгъущ, къуэ къэплъхунущи, фӀэпщынущ абы цӀэуэ Исмэхьил#16:11 Исмэхьил – абы къикӀыр: Тхьэм зэхех.; сыт щхьэкӀэ жыпӀэмэ гу лъитащ Зиусхьэным уэ гугъуехьу пшэчым.

12Ар цӀыхухэм яхэтынущ шыд Ӏэлым хуэдэу;

ар псоми езауэурэ,

псори езым къезэуэнущ,

щыпсэунущ ар езым и къуэш псоми емызэгъыу.

13Хьэджэр фӀищащ Зиусхьэну езым къепсэлъам мы цӀэр: «Уэ у-Ел-Ройщ». Абы къикӀыр: «Сэ сыкъэзылъагъу Тхьэр Уэрщ». Сыт щхьэкӀэ жыпӀэмэ, Хьэджэр жиӀащ: «Пэж дыдэу, сэ сызылъагъум щыслъэгъуа нэужь сыпсэу пӀэрэ?» 14Абы къыхэкӀкӀэ а псынэм и цӀэщ Бэр-Лахай-рой#16:14 Бэр-Лахай-рои* – абы къикӀыр: Псэ зыӀутым, сэ сыкъэзылъагъум и псынэ.. (Псэ зыӀутым, сэ сыкъэзылъагъум и псынэ). Ар дэтщ Кадешрэ Бэрэдрэ я зэхуакум.

15Хьэджэр Ибрам къыхуилъхуащ къуэ, Ибрам и къуэм Хьэджэр къыхуилъхуам, Исмэхьил цӀэуэ фӀищащ. 16Ибрам и ныбжьыр илъэс ищӀрэ хырэ хъурт Хьэджэр къуэ къыщыхуилъхуам щыгъуэ.

Currently Selected:

1 Мусэ 16: KbdNTGP2017

Highlight

Copy