1 Мусэ 17

Ибрам Ибрэхьим зэрыхъуар

1Ибрам илъэс бгъущӀрэ бгъурэ щыхъум, Зиусхьэныр абы къыхуэлъагъуэри, къыжриӀащ:

– Псори зыхузэфӀэкӀ Тхьэр#17:1 Псори зыхузэфӀэкӀ Тхьэр – евреибзэкӀэ Ел-Шадай. Сэращ; щыпкъагъэ уиӀэу щыпсэу Си пащхьэ икӀи лажьэ зыри зыхуумыгъэху. 2Дэзгъэувэнщ Си зэгурыӀуэныгъэр Сэрэ уэрэ ди зэхуакуми, икъукӀэ узгъэбэгъуэнщ уэ.

3ЩӀыгум зытридзащ Ибрам нэкӀукӀэ. Тхьэм, абы адэкӀи къепсалъэурэ, жиӀащ:

4– Сэрэ уэрэ ди зэхуакум зэгурыӀуэныгъэу дэлъынур мыращ: уэ адэ уахуэхъунущ лъэпкъ куэдым. 5ДяпэкӀэ уэ зэи къоджэжынукъым ИбрамкӀэ; атӀэ цӀэуэ уиӀэнущ: Ибрэхьим#17:5 Ибрэхьим – абы къикӀыр: куэдым я адэщ.; сыт щхьэкӀэ жыпӀэмэ Сэ усщӀынущ лъэпкъ куэдым я адэ.

6– ИкъукӀэ узгъэбэгъуэнущ,

къыптезгъэхъукӀынущ уэ лъэпкъхэр,

пащтыхьхэри къыптехъукӀынущ уэ.

7– Сэри уэри, уэ и ужькӀэ къыптехъукӀынухэми, зы щӀэблэм къикӀрэ адрейм кӀуэуэ, ди зэхуакум мыкӀуэдыжын зэгурыӀуэныгъэ дэзгъэувэнущ: уэри уэ къыптехъукӀынухэми Сэ фи Тхьэу сыщытынущ. 8Фэстынущ уэри уэ лъэпкъ къыптехъукӀынухэми щӀыналъэу уэ хамэу узыщыпсэур, Ханаан щӀыналъэ псори зэрыщыту, игъащӀэкӀэ фэ фи унейуэ щытыну; икӀи сахуэхъунущ абыхэм Тхьэ.

9КъыжриӀащ адэкӀэ Тхьэм Ибрэхьим:

– АтӀэ уэри гъэзащӀэ ди зэгурыӀуэныгъэр, вгъэзащӀэ уэри къыптехъукӀынухэми, зы щӀэблэм къикӀрэ адрейм кӀуэуэ. 10Мыращ Сэри, фэри, иужькӀэ къыптехъукӀынухэми ди зэхуакум дэлъ зэгурыӀуэныгъэу гъэзэщӀэн хуейр: Фэ къыфхэт цӀыхухъу псори сунэт фщӀын хуейщ. 11ПывупщӀ фи лыфэ кӀапэр#17:11 ПывупщӀ фи лыфэ кӀапэр – сунэт щӀыныращ къригъэкӀыр.: ар Сэрэ фэрэ ди зэхуаку дэлъ зэгурыӀуэныгъэм и нэщэнэ хъунущ.

12– Зы щӀэблэм къикӀрэ адрейм кӀуэуэ цӀыхухъуу фи унэм къыщалъхуа дэтхэнэ сабийри, уэ къыптемыхъукӀауэ нэгъуэщӀ лъэпкъым щыщ цӀыхум деж къыщыпщэхуари сунэт фщӀын хуейщ къалъхуа нэужь еянэ махуэм.

13– Ӏэмал имыӀэу сунэт фщӀын хуейщ уи унэм къыщалъхуари, уи дыжьынкӀэ къэпщэхуари. Апхуэдэу зэгурыӀуэныгъэу Сэрэ фэрэ дяку дэслъхьа мыкӀуэдыжын зэгурыӀуэныгъэм и дамыгъэ фи пкъым телъынущ.

14Сунэт ямыщӀа цӀыхухъуу зи лыфэ кӀапэр пезымыгъэупщӀар хэкӀуэдыкӀынущ езым и лъэпкъым, ди зэгурыӀуэныгъэр зэрикъутам щхьэкӀэ.

Сарай Сарэ зэрыхъуар

15КъыжриӀащ Тхьэм Ибрэхьим:

– Уи фыз Сарай уемыджэ СарайкӀэ, атӀэ абы и цӀэу щрет: Сарэ#17:15 Сарэ – абы къикӀыр: пщы гуащэщ..

16– Сэ си нэфӀ щыхуэнущ абыи, абыкӀэ къыпхуэхъунущ къуэ; Сарэ си нэфӀ щыхуэнурэ абы къытехъукӀынущ цӀыху лъэпкъхэри, цӀыху лъэпкъхэм я пащтыхьхэри къытехъукӀынущ абы.

17Абдеж щӀым зытридзащ Ибрэхьим нэкӀукӀэ, къэдыхьэшхри и щхьэ хужиӀэжащ: «Къыхуэхъуну пӀэрэ илъэсищэ зи ныбжьым къуэ? Сарэ илъэс бгъущӀ хъури лъхуэну пӀэрэ?»

18ЖриӀащ Ибрэхьим Тхьэм:

– НэгъуэщӀ мыхъуми, Исмэхьил закъуэ щыпсэуащэрэт Уи пащхьэм.

19Ауэ Тхьэм жиӀащ:

– Сарэ, уи фызым, къыпхуилъхунущ къуэ, икӀи фӀэпщынущ абы цӀэуэ Исхьэкъ#17:19 Исхьэкъ – абы къикӀыр: ар мэдыхьэшх.; мыкӀуэдыжын зэгурыӀуэныгъэ абыи абы иужькӀэ къытехъукӀынухэми ди зэхуакум дэслъхьэнущ Сэ.

20– Исмэхьил теухуауэ уэ уи лъэӀури зэхэсхащ Сэ: си нэфӀ щыхуэнущ абы, быныбэ къытезгъэкӀынущ, икъукӀэ згъэбэгъуэнущ; пщы пщыкӀутӀ къытехъукӀынущ абы; Сэ къытезгъэхъукӀынущ абы лъэпкъ ин дыди.

21– Ауэ зэгурыӀуэныгъэр зыдэслъхьэнур Сэрэ Исхьэкърэ ди зэхуакурщ; илъэс къакӀуэ и мыпхуэдэ зэманым деж Сарэ ар къыпхуилъхунущ.

22Тхьэм Ибрэхьим къепсэлъэн иухри, итӀанэ ӀукӀыжащ.

23Ибрэхьим Исмэхьилу езым и къуэри, и унэм къыщалъхуа псори, и дыжьынхэмкӀэ къищэхуа цӀыхухъу псори, Ибрэхьим и унэм цӀыхухъуу щӀэс псори къызэщӀикъуэри, яхупиупщӀащ я лыфэ кӀапэр а махуэ дыдэм, Тхьэм къызэрыжриӀам хуэдэу. 24Ибрэхьим и лыфэ кӀапэр щыпаупщӀам илъэс бгъущӀрэ бгъурэ хъурт. 25Абы и къуэ Исмэхьил и лыфэ кӀапэр щыпаупщӀам илъэс пщыкӀущ хъурт. 26Зы махуэм сунэт ящӀащ Ибрэхьими абы и къуэ Исмэхьили. 27Абы и гъусэу сунэт ящӀащ абы и унэм щӀэс цӀыхухъу псори, унэм къыщалъхуахэри, нэгъуэщӀ лъэпкъхэм я деж дыжьынкӀэ къыщащэхуахэри.

Currently Selected:

1 Мусэ 17: KbdNTGP2017

Highlight

Copy